Isaías 48:1 - Dios Iwene

^1-2 Baikwö laebobe Dios yöawi̧, Judasaso jojodönö: Ökwödö Jacob ömöledö, israel jojodö ötjabawö̧ma, ökwödönö yötawi̧ kwa̧ja̧kwaduwo. Ökwödöma Juda itji̧mu tupadanö jojodöja, ja̧danö ökwödö yöbawö kwujunaduwenama, ötjö Isabenö Jo̧ Dios chiminö yöbawö junadöja, ja̧danö yöba̧ladöja, —Ökwödöma Israel jojodö tjösödökwe Diosnö ösödadösa. Ja̧danö iteda itebo comunidad baibanö Dios 'da̧batö ujuninemi comunidad jojodösa. Isabenö Jo̧ Okobe Jwiinö Juluwo̧ Dios jö̧ba̧lö mikwo̧nö do̧'wo wana̧ladösa, —jö̧ba̧lö yöba̧ladöja. Jo̧kwaijayonö, jobekwö wamenö yöka̧laduwijayonö, omöna, ökwödöma ötjö weti̧ a̧ja̧kwöködöja.

Isaías 48:1 ပူးပေါင်းရင်းမြစ်များ

Génesis 32:28

Ikenama öwawachajo̧ma jö̧ba̧lijetö: —Babema kwimi balewö lota. Jacob kwimikwökakobe, babema Israel, jö̧ba̧lö, mikwo̧ja, Diosnöbi, jojodönöbi ölakwabikwawö kwujuluwajabetjö̧. Ja̧danö, ökwöma Diosnöbi, jojodönöbi ölabikwawö kwujuluwajabetjö̧ Israel, jö̧ba̧lö mikwo̧ja babema— jö̧ba̧lijetö.

Génesis 35:10

Ja̧danö Diosma yöba̧lijetö Jacobnö: —Jacob, balekwa kwimi chimidakwö. Ökwöma Jacob, jö̧ba̧lö, kwimikwijayonö babe tupakwöma, Israel, jö̧ba̧lö, mikwo̧ja— jö̧ba̧lijetö Diosma.

2 Reyes 17:34

Ja̧danö, babe mölebi baibanö, ina jobekwö ajayinö tjösödinadanö ösödö tju̧ju̧kwobe. Israel nijinö tjö̧jijayonö, Isabenö Jo̧ wei̧ a̧ja̧kwöködö otiwanöma. Diosnö yebabinö omukwatö, Israel jojodönö weina tja̧ja̧kwo jö̧tja̧lijayonö, ja̧bö tjö̧jo weinabi, ju'wi weinabi a̧ja̧kwöködö otiwanöma. Isabenö Jo̧ma Jacob itji̧mu tupadanö jojodö, Israel jö̧ba̧lö imidinawö̧nö weinobe, ja̧danö Diosbi Israel jojodöbi ja̧bö tjö̧jakwa̧ wene yöba̧lakwawö tjujuninobe. Jobadökwö yöba̧lakwawö junö, Isabenö Jo̧ma jobadönö weinobe, —Ju'wedö diosbedönö yebabinö kwösödaduwoko, ja̧danö jobadönö bȩbachibö kwösödaduwoko, ja̧danö wetji̧ a̧ja̧kwö kwö̧jaduwoko, ja̧danö jobadönö kwabö juwö kwiyaduwoko.

2 Reyes 5:20

Eliseo ömöayo̧ Giezima yöa̧linobe itedada, —Chuluwo̧ Eliseoma Naaman iyi̧tjö emo jö̧a̧lajabe, midökönö jo̧ba siria jojo ȩwa̧jobö weoko jö̧a̧lajabe. Iyobö ichejebajayonö, emö̧kö̧ chuluwo̧ma. Jo̧kwaijayonö ötjöma isabenö iyi̧tjö chemakwo̧sa, Isabenö Jo̧ öba a'o, isabenö yöta̧la, ökömanö ö'öbakwawö, iyi̧tjö chemakwo̧sa, —jö̧ba̧lö.

Éxodo 23:13

Okobe jwiinö bi̧ya weawa wene yötawi̧ma ö'wöyawakwawalö̧jinö a̧ja̧kwö kwö̧jaduwo. Ja̧danö, ötjönöda akebaduwo. Ju'wedö tjo̧'wo jawa tjöwa̧na̧lawö̧nöma akebaduwoko jobadönö pjatjatobö, ja̧danö tjo̧'wo tjö̧wa̧na̧lawö̧ tjimibiyabi yöka̧laduwoko— webijetö Isabenö Jo̧ma Moisésnöma.

Proverbios 5:16

Jao chitji̧ bakwuju, kwilekwokwöda kwö̧jo. Ju'wi wanedö yötawa: Bakwa'do ojwese'dotjö ya̧dö ba̧jekwadö ojwiyo tjowobö wabö tji̧'ye'do. Ökwöma ja'dodanö kwö̧joko chitji̧, ba̧jȩkwadö ya̧dö watje'dodanöma kwö̧joko. Ja̧ wanekwachi̧ma jeluju, jelujunöma ökwökwö jö̧joböma jwiobe jö̧ba̧lö wanekwachobe.

Isaías 26:13

Isabenö Jo̧, ökwödö Juda niji jojodö dösödökwe Dios, ju'wedö duluwedöbi ajayinö ökwödönö webö tjö̧jinobe, jo̧kwaijayonö jobadönö omukwatöködösa, ökwönöda domukwatibakwedösa, —Isabenö Jo̧ma isabenö duluwo̧ ökwödönö pjabato̧, —jö̧ba̧lö.

Isaías 44:5

Ja̧danö otiwanö pjatatiawö̧, jobadötjö bakwo̧ yöa̧lena, —Isabenö Jo̧ ömöledöso̧sa, —jö̧ba̧lö, ja̧danö jelo̧, —Jacob itji̧ tupadanö jojosa, —jö̧ba̧lö yöa̧lakobe. Ja̧danö jelo̧ iteda ömamunö i̧wȩyudakwo̧, —Isabenö Jo̧ Ömöledöso̧, —jö̧ba̧lö, ja̧danö imi yöa̧lakwo̧, —Israel jojosa, —jö̧ba̧lö, jwiinö kwitjimuduwi israel jojodönö otiwanö pjatatobetjö̧.

Isaías 45:23

Isabenö wene yötawaduwakwö, ja̧danö ötjöda chiminö yöbawö chujunaduwakwö, isabenö baledakwa̧, la'akatjöda balewachökakwa̧ wenema: Isabenö yadakwö okobe deinö chöba a'o bȩbachibö tjö̧jakwedö, ja̧danö okobe deinö chöba a'o yöbawö tjujunakwedö: —Isabenö Jo̧ Diosda bakwainö otiwanö ja̧bö jo̧ma, jo̧bada inesö juluwo̧ma, —jö̧ba̧lö okobe deinö bö̧jȩnö ju̧kwadöma bȩbachibö yöbawö tjujunakwedö, jö̧ba̧lö yöawobe Diosma. Jau chömöledö, okobe deinö Diosnö öpöjödö, jo̧banö dameakwö ölakwabikwawö ji̧nadöma, tabakwö ja̧nö Dios öba a'o yebabinö tjö̧bawö tjö̧jakwedö.

Isaías 46:12

Otiwanö ökwödönö yötawi̧ kwa̧ja̧kwaduwo chömöledö israel jojodö. Ökwödö kwomajadeduwinö, kwuuduwi 'dibadöja chömöledö, ja̧danö weti̧ a̧ja̧kwö ja̧kwawatjö, ödö 'da̧bachibö 'ya̧döja, jo̧kwaijayonö tjebachajö yötawi̧ kwa̧ja̧kwaduwo.

Isaías 51:1

Okobe deinö ökwödö Isabenö Jo̧ Diosnö isakwadö, jo̧ba wei̧ a̧ja̧kwö kwö̧jaduwobö omukwatadöma, baikwö yöta̧li̧ kwa̧ja̧kwaduwo: Wanedö yötawa, ökwödötjö ajayinö jinawa, Dios 'dȩbö otidinawa kwomukwataduwo, ja̧danö ja̧wa ajayinö ji̧nemi, löwö eminelö kwomukwataduwo.

Isaías 51:2

Jau chömöledö, ökwödötjö ajayinö ji̧na Abrahamnö kwomukwataduwo, ja̧danö ilekwo Sara ökwödönö ajayinö eminujunö kwomukwataduwo. Baikwö yöa̧lobe Diosma, kwadömine Abrahamnö: Abrahamnö jwötijatö, ötjö chömöledöso̧ baibobö, ja̧danö jobekwö jo̧banö jwötenama, bakwo̧da, itji̧mu debo̧da ö̧jinobe kwa'döduwima. Jo̧kwaijayonö, jemi ikenama jo̧banö pjatatijatö, ja̧danö pjatatiökwe, ba̧jȩkwaso baibinobe, jö̧tö?

Isaías 58:2

Wamenö otiwanö ötjönö ösödadö, mölekwena chejube ichibö, weti̧ jawa tjöwaisobö ösödinö isakwadö. Jau, wamenö tji̧sȩbi̧ edö, —Bidöma otiwanö tjösödökwe Dios wei̧ a̧ja̧kwö ju̧kwadötö, tjösödökwe Dios lȩekwa yöawi̧ma ja'yubebi kabatiböködötö, —jö̧ba̧lö jojodö edö tjomukwatena. Ba̧kwelöjatebö chöba a'o ichibö abebadö, ötjöda yötawakwa̧ lȩekwa tja̧ja̧kwobö, ja̧danö ba̧kwelöjatebö chöba a'o tjichibobö ösödadö.

Isaías 62:8

Isabenö Jo̧ma, iteda inesö ujulunö baikwö yöbawö ujunajabe: Ötjö inesö chujulunö baikwö yöbawö chujunaduwakwö: Bemi tupakwö la'akatjöda ökwödö kwöbatjoduwi wa̧ji̧ma, iyö lotökakwo̧sa kwöpöjojodöduwi tju̧kwa baibanöma. Ja̧danö ökwödö ubasobu o̧'do̧bu kwotidaduwajobuma, ju'wedö tjitebo jojodöma la'akatjöda 'döbebö tjowökakwedö.

Isaías 64:6

Okobe deinö kwöba a'otjö yȩbekwadödanö babibadösa chuluwo̧. Ja̧danö otiwanö ja̧badösa jö̧ba̧lö yöda̧li̧jayonö, ja̧di̧ma yȩekwado̧, iwonö lu̧ju pjajawa̧do̧danö ichejekwobe. Ökwödöma towisöja kököachibi̧danö ichejekwadösa, ja̧danö jwa̧le'epjo e'ewibobedanö, sulabenö ja̧bö dö̧ji̧ma jelobekwö badibanö öibawö̧sa.

Isaías 65:16

Ja̧ möle israel jojodönö chödameakwi̧ katatibakwo̧sa, ja̧danö cho̧'wo jwitibakwo̧sa, ajayinö israel jojodö sulabenö ja̧bö tjö̧jinama. Ja̧danö, ja̧ möle ju'wedö diosböködönö atjebökakwedö, sule ötjö isabenö Diosbo̧nöda atjebakwedö. Ja̧danö ja̧tja̧kwa̧ yöbawö tjujunenama, sule ötjö isabenö Diosbo̧ chiminöda yöbawö tjujunakwedö, jö̧ba̧lö yöawobe Diosma.

Mateo 23:13

Tupakwö yöawinobe Jesúsma: —¡Ökwödö Moisés iwȩyudina ba̧ja̧dadö ja̧danö fariseo jojodöwe! Ökwödö dötölatajanö omukwatadöma isabenö usula kwemawaduwakwedöja, Dios la'aka luwo̧ ö̧jena teachakwawemi pje'data̧lö tjöbeba̧lö kwö̧jaduwobetjö̧. Ökwödöma Dios la'aka luwo̧ ö̧jena tebachöködöja, ja̧danö ju'wibi ju'wedö Dios la'aka luwo̧ ö̧jena tetjachapji jö̧ba̧lö tjöbeba̧ladöja.

Juan 1:47

Ja̧danö, Jesúsma jobadö yöneawinö tjichibajena ju'wedönö yöawinobe Natanaelnöma: —Edaduwi. Bite Natanaelma inesö Israel jojo, Israel jojodö tjö̧jo jö̧tja̧li̧danö omukwatö jo̧. Isabenö otiwanö omukwato̧ itema. Omöna yöba̧lö̧kö̧— yöawinobe Jesúsma Natanaelnöma.

Juan 4:24

Ja̧danö, Diosma itebiyama jwibo̧— jö̧a̧linobe—. Ja̧danö, jojodöbi, tjo̧'wo̧ luwo̧ okwanöda tjösödobö jo̧be, iteda O̧'wo̧ Luwo̧ öiba̧lonö. Jejenö, tjo̧'wo̧ luwo̧nö tjösödobö, Diosnö isabenö dösöda, jö̧ba̧lö, ösödobe Diosma— jö̧a̧linobe Jesúsma Samaria jojosujunö.

Romanos 2:17

Babema judío jojodönö yötawa. ¿Ökwödö judío jojodöja? ¿Diostjö wene jwiköbaduwobeji̧? Ökwödöma baikwö kwomukwataduwena, Aaa, ötjöma judioso̧sa, ju'wedönötjö o̧penönö otiwanö jo̧sa. Ja̧danö Dios weina, Moisésnö iwȩyudobö weinama cho̧'wo̧ wana̧lo̧sa. Ja̧danö, Dios ömöledöso̧sa, jö̧ba̧lö, kwomukwataduwena.

Romanos 9:6

Chömöledö, Diosma iteda isabenö ja̧akwa̧ wene yöbawö ujuninobe Israel jojodönö, ökwödönö pjatatocha jö̧ba̧lö, ¿jö̧tö? ¿Dakwö kwomukwataduwa? Jö̧a̧li̧danö pjatatocha jö̧a̧linawö̧nö ¿pjaatinökiji̧ Diosma? Ja̧maökö chömöledö, baikwö labebö lobö yötawa: Israel i̧tji̧mu tupadanö jojodötjöma, Israel jojodöböködö tjuju̧kwobe ju'wedöma, Dios ömöledö tjö̧jokobetjö̧.

Romanos 9:8

Ja̧danö, biya̧ wene waisachö, baikwö döwaisachibobe chömöledö: Ju'wedöma, Abrahamtjö 'yatjebinajayonö, Abraham a̧dekwanö i̧tji̧muböködö, sule Dios yöbawö ujuninawö̧da Abraham a̧dekwanö i̧tji̧mu tupadanö jojodöma.

Deuteronomio 10:20

—Kwuluwo̧duwi Isabenö Jo̧ Diosnöda yebabinö omukwatö kwösödaduwo chömöledö, jo̧banöda bȩbachibö kwösödaduwo, jo̧banöda do̧ba̧lö kwö̧jaduwo, –Duluwo̧ Dios, –jö̧ba̧lö, ja̧danö jo̧ba iminöda yöbawö kwujunaduwo, –Yöbawö chujunaja̧danö ja̧bökönö, wainö ja̧titjö̧ma, Isabenö Jo̧ lȩebobö ja̧kobe, –jö̧ba̧lö.

Deuteronomio 33:28

Jo̧kwajabetjö̧, israel jojodöma wene jwiinö tjö̧jobe, Jacob itji̧mu tupadanö jojodöma labokobe otiwanö tjö̧jobe. Israel nijima, si̧li̧'idö ti'oli otiwanö tjoduwemi, ja̧danö trigojaye waji̧bi, ubasobubi nöinö jȩmi niji̧.

Deuteronomio 5:28

—Jejenö akebinaduwiökwe, Isabenö Jo̧ma yöka̧laduwina a̧ja̧kwinobe, ja̧danö a̧ja̧kwajo̧, ötjönö yöa̧linobe Isabenö Jo̧ma: –Bidö jojodö ökwönö abebö yötja̧laja̧ma, cha̧ja̧kwajabe, ja̧danö yötawakwö, Yötja̧laja̧ma, jweinö omukwatö yötja̧lajabe.

Deuteronomio 6:13

—Chömöledö, kwuluwo̧duwi Isabenö Jo̧ Diosnö yebabinö kwomukwataduwo, –Isabenö Dios wei̧ cha̧ja̧kwobö jo̧be, –jö̧ba̧lö. Jo̧banöda ösödö kwö̧jaduwobö jo̧be, ja̧danö isabenö ja̧köbaduwakwa̧ wene yöbawö kwujunaduwenama, kwuluwo̧duwi Isabenö Jo̧ iminöda wanedö yöbawö kwujunaduwo, –Yöta̧löködanö sulabenö ja̧titjö̧ma, Isabenö Jo̧ ötjönö lȩebobö jȩna, –jö̧ba̧lö.

1 Timoteo 4:2

Ja̧danö, ja̧ wene ju'wedö jojodöbi yötjawakwedö, omöna yöba̧ladöma. Jobadöma lekwe möle tjomajade yöawi̧, biya̧ma sula biya̧ma otiwa jö̧ba̧lö tjomajadenö yöawi̧ma tja̧ja̧kwinokobetjö̧, tjomajadenö wajwibadö babibadö biya̧ma otiwa, biya̧ma sula jö̧ba̧lö.

Apocalipsis 2:9

Jo̧bama baikwö yöawobe ökwödö Esmirna jojodönö, jo̧banö ösödadönöma: Ökwödö, Esmirna jojodönö inia tjököbaduwinö baledi̧ma chöwaisa. Yelösöda, jwibadöja, usulasedö babibinadöja, chöwaisa. Jo̧kwaijayonö, ökwödöma kwo̧'wo̧ luwo̧duwinö okobe jwiinö juna̧ladödanö kwö̧jaduwobe, böjȩ jawa jwiköbaduwijayonö. Chöwaisa, judío jojodötjö ju'wedöma omöna yötja̧lobe ökwödönöma, Sulabenö ja̧badö, jö̧ba̧lö. Jobadöma, Ökwödödasa Dios ömöledö, jö̧ba̧lö, yötja̧lijayonö, tjo̧'wo̧ luwo̧nö Dios ömöledö babibinöködö. Jobadöma Awetjanöda ösödadö.

Apocalipsis 3:9

A̧ja̧kwaduwitjö. Kwo̧'wo̧ tjo̧kekwaduwa ökwödönö inia tjököbaduwinö ja̧badönö, judío jojodönöma. Jobadö tjo̧'wo̧ luwo̧ okwanö chöwaisawö̧. Jobadöma judío jojodö tjöbötjachinajayonö, judío jojodöböködödanö babibinadö tjo̧'wo̧ luwo̧nöma, Dios ömöledö batjibinokobetjö̧. Awetja ömöayedöda babibinadö, jo̧ba wei̧ a̧ja̧kwö. Chömöledö, ju'winö ökwödö kwöba a'oduwi ichö, tju̧yu̧ju̧ki̧junö bamatö, tjuu nijakwö bȩbachibö tjubudekwobö ja̧takwo̧sa jobadönöma. Ja̧ mölema jobadöma, ökwödönö edö waisachibö tjubudekwakobe,¡Ayö! Isabenö bidöma Dios ile niebawö̧, jö̧ba̧lö.