—Jau, edaduwi, Diosda ökwödönö dö̧jibinö pjabato̧ma, jo̧kwajabetjö̧ jo̧banö do̧'wo wa̧nalö ja̧nö, yebabökönö dö̧jakwedösa. Jau, Isabenö Jo̧ Diosda dujuluwachibanö pjabato̧ma, jo̧bada dö̧jibinö pjabato̧ma, ja̧danö döpöjojodötjö dö̧jibobö pjaatinobetjö̧, jo̧banö ösödö lo̧badösa, —jö̧balö yöka̧laduakwedöja.
Isaías 46:13 - Dios Iwene13 Isabenö kwö̧jibaduwinö pjatatakwo̧sa chömöledö, ja̧danö lekwökö ökwödönö pjatatakwa̧ mölema. Jau chömöledö, lekwema chiteada̧lökakwo̧sa, juluwanö pjatatakwo̧sa. Juluwanö Sion mösa'otjö kwö̧jibaduwinö pjatati̧ma chi̧sȩbakwo̧sa, juluwanö ökwödö israel jojodönö dejatinö chujulu chi̧sȩbakwo̧sa, jö̧ba̧lö yöa̧lobe Diosma. အခန်းကိုကြည့်ပါ။ |
Isaías 46:13
34 ပူးပေါင်းရင်းမြစ်များ
Ötjö Isabenö Jo̧ma baikwö yötawaduwakwö: Jerusalen mösa'o Sion mikwa'onö inawa chödocha, –Isabenö otiwawa, –jö̧ba̧lö badedö chedinawama. Jawa, o̧do la'aka baibanö, ajayinö lödawawa nöinö mikwawawa baibanö chödocha, o̧do la'aka 'diinö jakobetjö̧. Ja̧danö jawa ösödadöma, –Dakwö jatakwajö, –jö̧ba̧löma omukwatö tjö̧jökakwedö.
Jau, okobe deinö ötjö chiminö ötjabawö̧, —Bidöma Isabenö Jo̧ ömöledö israel jojodö, —jö̧ba̧lö ötjabawö̧nö chichejebakwo̧sa. Ötjöda jobadönö dadö chotidijatö, ötjöda tjitebosaso batjibanö chotidijatö, ötjö Diosnö tjösödakobetjö̧. Jo̧kwajabetjö̧ jobekwö tjebatajö chichejebakwo̧sa, chömöledö pjelekwachibö ja̧dönö, jö̧ba̧lö yöawobe Diosma, israel jojodönö.
Ju'wibi yöa̧lobe Diosma: Mölȩjȩbe ji̧ ojwiyo'wotjö ojwiyo o̧benama, niji okwa söbibö, batjo otiwanö pokwobö pjaati̧, ja̧danö otiwanö wa̧jobö pjaati̧, jö̧tö? Jobekwö chömöledönö baledobö weta, baikwö wanedö yöta̧la: Mölejȩbetjö ji̧bakwawa tjoduwobö weta, mölejebetjö jojodö tjö̧jibinö pjaatakwawa tjoduwobö weta, bö̧jȩnö söibena otiwanö tjö̧jibakobetjö̧, ja̧danö otiwanö weti̧ a̧ja̧kwö tjö̧jakobetjö̧. Ötjö Isabenö Jo̧ma, jobekwö baledobö otido̧sa, jö̧ba̧lö yöa̧lobe Diosma.
Chujulu chi̧sȩbakwa̧ möle juluwanö badekwachakobe chömöledö, ökwödönö kwö̧jibaduwinö pjatatakwa̧ma juluwanö badekwachakobe. Ötjöda chujulunö, juluwanö tjitebotenia jojodönö webö chö̧jakwo̧sa chömöledö, ja̧danö otiwanö webö chö̧jiawö̧, ödö ju̧kwadö jwaibalawa ö'öbö ju̧kwadöbi ötjönö tjo̧'wo tjö̧wa̧nalakwedö, ja̧danö chotidakwa̧ tjiteada̧lakwedö, inesö chujulunö otiwanö chotidakobetjö̧.
Ja̧danö, ötjö jobadönö otidinada ökwönö tjöbeba̧lo pjatatobetjö̧, okobe jwiinö ölakwabikwawa jawa tjotidi̧teniama, kwöba a'otjö suli̧ waekwakobe, ju'wi jawabi ökwönö suli̧ waedobö jwiakobe. Ja̧danö lȩekwa luwedö tjöba a'otjö, ju'wedö ökwönö wanedö yötja̧litjö̧ma, okobe deinö jobekwö wanedö yöba̧ladö yötja̧li̧ otiwanö i̧sȩbö kwatadakwujuja, —Omöna, lȩekwa yötjawobö jwia, —jö̧ba̧lö. Jobekwö pjabato̧sa ötjöda chömöayedönö Jerusalen, ja̧danö wene jwibadö tjö̧ji̧ i̧sȩkwama, ötjö tjuluwo̧ Isabenö Jo̧ Diostjö ichi̧, jö̧ba̧lö wanedö yöa̧lobe Diosma, Jerusalen comunidad jojodönö.
ja̧danö okobe deinö kwömöledö israel jojodöma, bakobe weti̧ a̧ja̧kwö tjö̧jakwedö, ja̧danö 'döbibajökönö, ba̧kwelöjatebö otiwanö israel nijinö tjö̧jakwedö. Jau chömöledö, jojodö towi tjujuni̧danö, ötjöda israel jojodönö chujunocha, —Duluwo̧ Diosma otiwo̧, —jö̧ba̧lö ötjönö tjösödakobetjö̧. Ja̧danö chujunajawö̧, otiwanö 'diinö tjö̧jakwedö.
Ja̧ kwedaduwakwa̧ma baikwö yöta̧la, jwaibalawa bakwachawa ju̧kwadö ötjönö ösödö tjichakwedö, —Diosma isabenö pjaatakwo̧, —jö̧ba̧lö. Ja̧danö ju'wedö tjabönö, Tarsis niji isowibiyanö, kwitji̧muduwi ödö ju̧kwadönö ichejebö tjichakwedö, ja̧danö ju'wibi tjitea orobi, platabi iyö tjichakwedö. Jau, ötjö kwuluwo̧duwi Isabenö Jo̧, Israel jojodö tjösödökwe Suli̧ Jwibo̧ Diosnö otiwanö omukwatö tjösödobetjö̧, jobekwö tjichakwedö. Jau chömöledö, ja̧ möle okobe deinö otiwanö ökwödö israel jojodönö otiwanö tjomukwatobö pjatatocha, ja̧danö jobekwö pjatatiawö̧, jobekwö kwö̧jaduwobekwö tjichakwedö.
Isabenö otiwanö pjabato̧ Diosma, baikwö yöta̧la: Pokwi̧ jawa nijitjö pokwö öwawi̧danö, ja̧danö batjonö tjödaja̧ jawa öwawi̧danö, Isabenö Jo̧ Dios iteda ujulunö dö̧jibanö pjaatakwa̧ öwawinö i̧sȩbakobe, tjitebotenia jojodö tjöba a'otjö, ja̧danö jobekwö pjaatiawö̧, okobe deinö Diosnö tjösödakwedö, —Ökwöma otiwanö pjabato̧ja, —jö̧ba̧lö.
Jau, okobe deinö Jerusalen comunidadtjö budekwadönö, ökwölaso̧pja tjuunö tjöwanajelö, balekwaka o̧bubiyatjö otikwaka butjawaka tjubutjawobö chiyobö weökwesa, ja̧danö tjubudesobu ji̧nemi, balekwobu o̧'wo ösöwachibakwawa o̧te chiyobö weinökwesa, ja̧danö budekwadö 'dutjawa̧do̧ 'dutjawajemi, balekwa̧do̧ tjo̧'wo ösöwachibanö Diosnö ösödadö 'dutjawa̧do̧ chiyobö weinökwesa. Ja̧ möle 'diinö ja̧nö Dios wei̧ a̧ja̧kwö tjö̧jobetjö̧, —Isabenö Jo̧ wei̧ a̧ja̧kwi̧owi encina towibiya, —jö̧ba̧lö ötjabikwawö̧. Jobekwö 'diinö tjö̧jobö ujunakwo̧ Diosma, jobadönö edö, jo̧banö otiwanö omukwatö tjösödakobetjö̧.
Isabenö cho̧'wo tjo̧ekwobe Sion mösa'o ju̧kwadönö, chitebo comunidad Jerusalen omukwatö, cho̧'wo tjo̧ekwobe, jo̧kwajabetjö̧ wi̧inö chö̧jökakwo̧sa. Jau, jwaikwöda yöbawö chö̧jakwo̧sa, Jerusalen comunidad jojodö Dios wei̧ tja̧ja̧kwenanö baibanö. Jau, baikwö wanedö yöta̧la, ja̧ möle tjö̧jibinö Dios pjaatakwa̧ma, dȩju̧wa'yudanö öwawakobe, ja̧danö Dios wei̧ a̧ja̧kwö tjö̧ji̧ma, möle dewachi̧danö salöinö dewakobe.
Jau chömöledö, ja̧ wenema isabenö Dios ujulu ji̧ wene. Baikwö yötawa: Ja̧ wenema wajuwanö labebö lobö yöawobe, Dios jojodö suli̧ jwibadö batjibanö ja̧i̧ma, Dios iwene laebi̧danö. Baikwö laebobe Dios iwenema: Dios bidöma suli̧ jwibadö jö̧a̧lawö̧ma, Dios yöawi̧ tjösödobetjö̧da ja̧kwawa juna̧ladö, jö̧ba̧lö laebobe. Ja̧danö, la'akatjöda Dios yöawi̧ ösödadönöda suli̧ jwibadö batjibanö pjaatinobe Diosma, damötjö ju̧kwinadönöbi, babe ju̧kwadönöbi.
Jejenö baibakobe Duluwo̧ ichakwa̧ mölema. Ja̧ möle ichakobe Jesúsma, okobe deinö iteda ömöledö jo̧banö otiwo̧ja jö̧ba̧lö tjösödobö, ja̧danö okobe deinö jo̧banö ösödadö jo̧banö otiwanö ösödö tjomukwato jö̧ba̧lö ichakwo̧. Jau chömöledö, ökwödöbi ja̧ möle jo̧banö kwösödaduwakwedöja, yödawina wene kwösödinaduwobetjö̧.
Jejenö Dios ökwödönö pjaatobö adeba chömöledö. Ja̧danö, jejenö ökwödönö pjaatobetjö̧, ökwödöma otiwanö omukwatö Duluwo̧ Jesúsnö kwösödaduwakwedöja, Duluwo̧ Jesúsma otiwo̧, jö̧ba̧lö. Ja̧danö, Diosbi Duluwo̧ Jesucristobi ökwödönö otiwa jawa mikwa jwiinö tjiyobetjö̧, Jesúsma ökwödönö ösödakobe, chömöledö otiwadö jö̧ba̧lö.
ကြော်ငြာတွေ