Isaías 45:20 - Dios Iwene

²⁰ Okobe deinö ko̧ko̧kwö kwichaduwo, bakobe kwichaduwo, tjitebotenia jojodötjö ina 'yaba̧ladöma. Baikwö yötawaduwakwö ökwödönö: Tjösödawö̧ towisa'otjö otikwawö̧ o̧'wo jawa e'ewadö, ja̧danö tje'ewawö̧nö abebö ju̧kwadöma, wajwibadö yelösöda, tjujulu jwibadö tjö̧jibinö pjatjatobö juluwöködönöda ösödö tjö̧jobetjö̧.

Isaías 45:20 ပူးပေါင်းရင်းမြစ်များ

Isaías 4:2

Yadakwö Isabenö Jo̧ma yemidanö israel jojodönö pjaatakwo̧. Ja̧ möle Israel niji pokwi̧ma, jwiinö otiwanö pokwakobe. Ja̧danö, jejenö otiwanö pokwiawö̧, israel jojodötjö ji̧binadöma tjo̧'wo ösöwanö tjö̧jakwedö, —Ditebo israel niji pokwi̧ma, jwiinö otiwanö pokwobe, otiwanö kwakwawa dujuna̧lobö, —jö̧ba̧lö.

Isaías 41:21

Baikwö yöa̧lobe Isabenö Jo̧, Jacob itji̧mu tupadanö jojodötjö inesö la'aka luwo̧ Diosma: Kwösödaduwawö̧ o̧'wo jawama isabenö waisadö tjö̧jitjö̧ma, tjöwaisi̧ jawa i̧sȩbö yökawaduwo.

Isaías 43:9

Okobe deinö bö̧jȩnö ju̧kwadö, tjitebotenia jojodönö ko̧ko̧dö kwichejebaduwo, bakobe ko̧ko̧kwö yöda̧lakwawobö. Ko̧ko̧kwajadö, okobe deinö tjösödawö̧nö abebö kwa̧ja̧kwaduwo, jobadö tjösödawö̧tjö bakwo̧bi babe baledi̧ jawa baledakwa̧ abönö yötjawinojobö jö̧ba̧lö. Isabenö jweinö baledakwa̧ yötjawinatjö̧ma, yötjawina waisadö ichibö yötja̧lobö jo̧be, —Isabenö waisanö yöbawinadötö, —jö̧ba̧lö waisachibö yöda̧lakobetjö̧. Jo̧kwaijayonö okobe deinö tjösödawö̧tjö jobekwö waisanö yöbawinama deobe, jö̧tö?

Isaías 44:10

Jau chömöledö, isabenö waisadöma la'akatöda jobekwö o̧'wo jawa tjotidökena. Sule omukwatöködö wajwibadöda tjösödawö̧ o̧'wo jawa tjotidena, sule wajwibadöda 'dii jawatjö o̧'wo jawa mikwawö̧kö̧nö tjotidena.

Isaías 44:9

Okobe deinö o̧'wo jawa otidadöma, mikwawöködö, ja̧danö tjotidaja̧wö̧tjö, —Bidöma inesö mikwawadö, —jö̧ba̧lö tjomukwatawö̧bi, mikwawöködö. Ja̧danö tjösödawö̧ tjujulu yöbawadöma, tjösödawö̧ tjotidina jawa ja'yubebi edöködö, ja̧danö ja'yubebi wajwibadö, jo̧kwajabetjö̧ isabenö tabakwö tjö̧jakwedö.

Isaías 46:1

Babilonia jojodö tjösödökwe Bel ötjabökwema, bȩbachibö ö̧jobedanö ichejekwa, ja̧danö tjösödökwe Nebo ötjabökwebi, nijakwö bȩbachibö ö̧jobedanö ichejekwa, jobadönö meatö, tjajwimu tjoma'anö tje'ewobetjö̧. Jau, jobadö tjösödawö̧ o̧'wo jawama, ömöki̧ jawa batjibajabe tjajwi̧munö, tjajwimu tjime'dawachibobö ömökadö.

Isaías 48:14

Jobekwö ötjöda chujulunö otidinasa̧ chömöledö, jo̧kwajabetjö ökwödönö yötawonö, bakobe ko̧ko̧kwö kwa̧ja̧kwaduwo. Bi̧ya ökwödönö yötawi̧ma, ju'wedö tjösödawö̧tjö, bakwo̧bi yöawinaji̧? Yöawinokobe chömöledö, ötjöda bi̧ya̧ wene yötawaduwakwö: Ötjöma bakwo̧nö omudawö chujunajabe, ötjökwö bakobe pjabatakwawö ö̧jakwo̧nö. Ja̧danö wetökwe, Babilonia jojodönö ujuluwakobe, ömöayedö ölakwabikwawadönö öbibö, Caldeo jojodö ötjabawö̧ Babilonia jojodönö ujuluwakwo̧.

Isaías 57:13

Ökwödöma ba̧jȩkwadö o̧'wo jawanö ösödadöja, jobadönö jwöbeba̧lö, —Pjabataduwitjö, —jö̧ba̧lö jwököbaduwenama, ökwödönö pjatjatakwa̧ji̧? Pjatjatökakwedö chömöledö. Jobadö kwösödaduwawö̧ma, jwa̧lȩ'epjo jelobekwö e'ewakwawö̧, ja'yubenö pjutenama, jelobekwö debi batjibakwedö. Jo̧kwaijayonö ötjönö ösödadö, —Diosda tjöeba̧lakwo̧, —jö̧ba̧lö tjo̧'wo wana̧ladöma, otiwanö tjö̧jakwedö. Jobadöda otiwanö israel nijinö tjö̧jakwedö, ja̧danö jobadöda chitea mösa'o Sion mösa'o tjujuna̧lakwedö, jobe chejutjö otiwanö ötjönö tjösödakobetjö̧, jö̧ba̧lö yöa̧lobe Diosma, israel jojodönö.

Efesios 2:16

Ja̧danö, Jesús midawö woinobetjö̧ ökwödö, Jesúsnö ösödadöma, ajayinö Diostjö 'da̧bachibö ju̧kwinadöma, babema Dios ömöledö babibinadöja. Ja̧danö, ökwödö judío jojodöbi ökwödö judío jojodöböködöbi bakwaibedödanö babiböma, do̧'wo̧ ösöwanö ölakwabikwawökönö duju̧kwobe.