Isaías 44:13 - Dios Iwene

¹³ Ja̧danö, towösa'otjö otido̧ otidi̧ma baikwö yöta̧la: Otiwanö ba̧ja̧dö, jwȩakwa̧ wȩyudo̧. Ikenama wȩyudajo̧, jwȩbö otido̧. Ja̧danö compas ötjabi̧ jawanö, tupakwö jwȩakwa̧ teada̧lönö wȩyudo̧. Jojo o̧'wo jawa baibanö, jojo otiwo̧ o̧'wo jawa baibanö jobekwö jwȩbö otido̧, ja̧danö otidajo̧, ejunö juno̧.

Isaías 44:13 ပူးပေါင်းရင်းမြစ်များ

Génesis 31:19

Jo̧kwaijayonö ajayinö ina jelö labeibö tjȩwa̧ja̧pjii, Padan-aramnö ina tjö̧jena baikwö baledijetö: Raquelma jabe'do Labán, iteda a̧jwi̧mu o̧bȩja̧dö tjöwö'ye 'wibö i̧'yajabe okobe, jo̧ba ejube tebachibö naukwijotö jabe'do o̧'wo̧ öwa̧na̧lawö̧nö, tjotidinawö̧nöma. Ja̧danö, ju'wedö wajwitjonö naukwijotö, e'ewö jȩwa̧ja̧kwawö̧nö.

Génesis 31:30

Ina jö̧ba̧lijetö: —Jacob, isabenö chöwaisa, kwabe'do ö̧jobekwö kwȩwa̧jobö jwiinö kwösöda. Jo̧kwijayonö ¿tajawedö kwönaukwinada o̧'wo̧ jawa, cho̧'wo̧ chöwa̧na̧lawö̧nöma?— abebö a̧ja̧kwökwe:

Génesis 31:32

Jo̧kwijayonö kwo̧'wo̧ kwöwa̧na̧lawö̧nöma chönaukwijökötö. Yöta̧lo a̧ja̧kwi: Ötjökwö ȩwa̧jadötjö bakwo̧ o̧'wo̧ jawa naukwinanö kwöbadekwajitjö̧ma jo̧banö kwabö lotjobö wetena. Jo̧kwaobetjö̧ chömöayedöbi, kwömöayedöbi tjeda̧lonö isakwi dutu̧da'wiju okwa, kwitea dönaukwinojobö. Kwöbadekwajitjö̧ma kwo̧'wo̧ kwöwana̧lawö̧nö kwemo— jö̧ba̧lijetö Jacobma. Jo̧bama wajwibijetö Raquel jabe'do o̧'wo̧ öwa̧na̧lawö̧nö jö̧naukwinama. Wajwiobetjö̧ jejenö jö̧ba̧lijetö, Ötjökwö ȩwa̧jadötjö bakwo̧ o̧'wo̧ jawa naukwinanö kwöbadekwajitjö̧ma jo̧banö kwabö lotjobö wetena, jö̧ba̧lö.

Génesis 35:2

Jejenö weökwe Jacobma ömöledönö, ja̧danö okobe deinö jo̧bakwö ȩwa̧jadönö yöbawijetö: —Ökwödöma Betelbe dȩwa̧ja̧kobe, Diosnö ösödö. Jo̧kwaobetjö̧ dȩwa̧ja̧kwa̧ abönö okobe jwiinö jelobetjö o̧'wo̧ jawa kwichejebinawö̧duwi̧nöma loköbaduwobö jo̧be. ¡Loköbaduwodönö! Loköbaja̧duwa ikena ojwe kwibaduwo Dios öba a'otjö otiwanö dewadöda kwö̧jaduwobö. Kwibaja̧duwa ikena kamijido̧ balekwa̧do, dewado̧ 'dukawaduwo. Jemi ikenama Betelbe dȩwa̧jaduwo. Jobe ichibö juwö iyawemi chotidocha, Diosnö ösödö juwö iyawemima. Jo̧bama ajayinöma ötjönö pjaatinobe jwiinö cho̧'wo tjo̧bekwö, yebabinö chö̧jena. Ja̧ möletjö̧ babe möle ichibenanö jo̧bama ötjökwö jo̧, okobe jwiinö kwetachobema— yöbawijetö Jacobma.

Isaías 41:7

O̧'wo jawa otidadöma, bakobe pjabatakwawö tjujuluwachibanö ja̧badö. Ajayi dadö otido̧ma, orotjö otido̧nö ujuluwachibanö yöba̧lo̧, ja̧danö martiyunö 'dobö pöchö otido̧ma, 'dii jawa 'da̧jökachibanö 'doawakanö bȩbö otido̧nö ujuluwachibanö yöba̧lo̧. Ja̧danö o̧'wo jawa tubedö tjotidaja̧ edö, —Otiwa, —jö̧ba̧lö yöba̧lakwawadö, jemi ikenama tjösödakwo̧ o̧'wo jawa otidö kabatibajadö, puasö'inö bȩbadö, 'diinö kwaibökönö ö̧jakobetjö̧, jö̧ba̧lö yöa̧lobe Diosma, o̧'wo jawa ösödadönö.

Isaías 44:14

Jau, otidakwo̧ma, cedro towi juena, o̧'wo jawa otidakobetjö̧. Ju'wibi, cipre towiö̧kö̧, encina towiö̧kö̧ emena, ja̧ owitjö otidobö. Tebo okwa ji̧ towibiyatjö emajo̧, otidena. Ju'wibi pino towi ujunena, ja̧danö ojwiyo o̧bena otiwanö pokwena, ja̧danö otiwanö pokwaja̧ ikena, ja̧ ujuninowi emö otidena.

Hechos 17:29

Jo̧kwaobetjö̧, isabenö ökwödöma Dios otidinawö̧obetjö̧ ¿dakwö kwomukwataduwobö Diosma orotjö, platatjö, inawatjö, jojodö omukwatö tjotidi̧danö ichejekwo̧, jö̧ba̧löma? Ja̧maökö. Dios, ökwödönö otidinama ja̧ jojodö tjotidi̧danöma ichejekwö̧kö̧.

Romanos 1:23

Ja̧danö, ba̧kwȩlö̧jatebö jo̧ Diosnö tjo̧'wo̧ wana̧lökönö, tjotidajawö̧nöda tjo̧'wo̧ wana̧ladö. Woba jojo o̧'wo̧ jawabi, tebo luwa o̧'wo̧ jawabi, pjiyuwa o̧'wo̧ jawabi, nijinö töbawo̧ o̧'wo̧ jawabi, jobadö tjo̧'wo̧ jawa tjotidajawö̧nöda tjo̧'wo̧ wana̧ladö.

Deuteronomio 27:15

–Isabenö Jo̧ma jwiinö öpöjödo̧, o̧'wo jawa tjösödobö, jo̧kwajabetjö bakwo̧ 'dii jawatjöbi, ju'wi jawatjöbi o̧'wo jawa otidö, ju'wedö wajwitjonö ja̧ o̧'wo jawa ösödobö ujunitjö̧ma, isabenö Dios lȩebakwo̧ jo̧banöma, –jö̧ba̧lö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

Deuteronomio 4:28

Ja̧danö, ju'wedö tjitebonö ja̧nö, ju'wedö tjösödawö̧ diosbedö ötjabawö̧nö kwösödaduwena, jojodö tjotidinawö̧ diosbedönöda, towitjöbi, inawiyatjöbi tjotidinawö̧nö. Ja̧danö jobadö ju'wedö tjitebonö ja̧nö kwösödaduwakwa̧wö̧nö baikwö yötawa, jobadöma isabenö juluwöködö, edöbi edöködö, ja̧danö a̧ja̧kwöbi a̧ja̧kwöködö, ja̧danö kwanöbi kwöködö, ja̧danö 'dö̧batöbi 'dö̧batöködö.

Jueces 18:24

Atjebökwe, Micaiasma atadinobe, —Kwöwaisaduwa waekwaja̧ma. Ökwödöma chotidinawö̧ chösödawö̧ diosbedönöbi kwemaduwajabe, ja̧danö chömöledöso̧ tjö̧'da̧de pjabato̧nöbi kwemaduwajabe. Jejenö kwemaduwi̧tjö̧ jwibo̧ chö̧jibajabe, dakwö –Taji waekwa, –jö̧ba̧lö yöka̧laduwobö? Kwöwaisaduwa sulabenö kwemaduwaja̧ma, —jö̧ba̧lö.