Isaías 43:1 - Dios Iwene

¹ Sulabenö ja̧diökwe, ökwödö Jacob itji̧mu tupadanö jojodönö otidina, israelsaso badibanö otidina Isabenö Jo̧ Diosma ökwödönö lȩebinobe. Jo̧kwaijayonö, ökwödönö lȩbebajo̧, baikwö yöawobe: Ökwödö Israel jojodöma, yekabiduwoko, ötjöma kwö̧ji̧baduwinö pjatatinobetjö̧. Isabenö ötjöda chömöledöja, ja̧danö ötjöda chömöledököbaduwobetjö̧, otiwanö jweinö kwimiduwi yöba̧lö ökwödönö jwötajabe, jo̧kwajabetjö̧ yekabiduwoko.

Isaías 43:1 ပူးပေါင်းရင်းမြစ်များ

Génesis 32:28

Ikenama öwawachajo̧ma jö̧ba̧lijetö: —Babema kwimi balewö lota. Jacob kwimikwökakobe, babema Israel, jö̧ba̧lö, mikwo̧ja, Diosnöbi, jojodönöbi ölakwabikwawö kwujuluwajabetjö̧. Ja̧danö, ökwöma Diosnöbi, jojodönöbi ölabikwawö kwujuluwajabetjö̧ Israel, jö̧ba̧lö mikwo̧ja babema— jö̧ba̧lijetö.

Éxodo 15:13

Ja̧danö, Isabenö Jo̧, ökwödönö kwösödi̧ma balewachökönö ökibajabe ökwödönö, döpöjojodötjö dö̧jibinö pjakatajawö̧nöma. Ja̧danö, ökwödönö kwujulunö öbibö kwi̧'yobe ökwö wainö kwujuninemi niji jobekwö.

Éxodo 15:16

¡Ayö! jö̧ba̧lö, okobe deinö Canaán nijinö ju̧kwadöma yebabidöda tjuju̧kwobe, kwujulu kwisȩbaja̧ yötjawi̧ tja̧ja̧kwajabetjö̧, jwiinö juluwo̧, jö̧ba̧lö. Jejenö, yebabinö tjuju̧kwobetjö̧ jobadö tjuju̧kwemi döbaledena wi̧inö tjö̧jobe, inawa wi̧achawa ji̧danö. Isabenö Jo̧, ökwödö, ökwö kwömöledö, Egiptotjö dö̧jibinö pjabatö lakebinawö̧ma jobadö tjuju̧kwemi döbaledenanö kabatö jejenö, wi̧inö tjö̧jobe.

Éxodo 33:17

Ja̧danö, Isabenö Jo̧ma Moisésnö atadijetö: —Moisés, ökwö akebi̧danö ökwödönö öbibö chi̧'yakwo̧sa, ökwönö dösölö̧jinö chedobetjö̧, ja̧danö, ökwönö chöwaisobetjö̧, omudawö chujuinökwe, jö̧ba̧lö— atadijetö Isabenö Jo̧ma Moisésnöma.

Isaías 27:11

Towi ötjebiya kököbachibö 'debawö meakobe, ja̧danö ya̧döma ko̧ko̧dö tjichakobe, imi baibanö tjujuwobö. Jobekwö baledakobe ditebo israeltjö, dömöledö israel jojodöma okwa jawa omukwatökönö tjö̧jobetjö̧. Jau, jweinö omukwatökönö, Dios wei̧ a̧ja̧kwöködö israel jojodöma, jo̧kwajabetjö̧ ökwödönö otidina Diosma lȩlöjinö edökakwo̧, ökwödönö dadö otidinama, dösölö̧jinö pjaatökakwo̧ ökwödönö.

Isaías 41:14

Ökwödö Israel jojodöma, yekabiduwoko. Ökwödö Jacob itji̧mu tupadanö jojodöma, sa̧dö juluwöködö kwichejekwaduwijayonö, yekabiduwoko. Jau chömöledö, —Ötjödasa ökwödönö pjabato̧ma, —jö̧ba̧lö ötjö Isabenö Jo̧ma yötawaduwakwö, ökwödönö kwö̧jibaduwinö pjabato̧ma, ötjö Israel jojodö tjösödökwe Suli̧ Jwibo̧ Diosda, jo̧kwajabetjö̧ yekabiduwoko.

Isaías 42:6

Ötjöma Isabenö Jo̧ Diossa, ötjödasa ökwönö jwöbinama, weti̧ a̧ja̧kwö kwö̧jakobetjö̧. Ötjöda kwömamu do̧ba̧lö, ökwönö chiteada̧lakwo̧sa. Ja̧danö ökwönö i̧sȩbö chiyakwo̧sa jojodönö, ökwönötjö̧ jojodökwöbi, ötjökwöbi bakobe ja̧nö dö̧jakwa̧ wene yöbawö dujunakobetjö̧, ja̧danö tjitebotenia jojodönö öbibö dejato̧ kwö̧jakobetjö̧.

Isaías 43:21

Ökwödö ötjöda chömöledö bakibaduwanö chotidinawö̧nö pjabatö, jobekwö chotidakwo̧sa chömöledö, ja̧ baledi̧ edö, —Diosma isabenö iteda ömöledönö otiwanö pjabato̧, —jö̧ba̧lö ötjönö ösödö yöka̧laduwakobetjö̧, jö̧ba̧lö yöa̧lobe Diosma, ökwödö Israel jojodönö.

Isaías 43:5

Yekabiduwoko, isabenö ökwödökwö chö̧jobetjö̧. Ja̧danö, ökwödötjö kwitji̧mu tupadanö jojodöma, bö̧jȩ ba̧kwemeachibanö tjipjelekwachibanö tjö̧jijayonö, jawo̧ laebobekwötjöbi, meajobekwötjöbi jobadönö ko̧ko̧dibö tjetatakwo̧sa kwiteboduwi Israel nijibe.

Isaías 43:7

Jau, okobe deinö ötjö chiminö ötjabawö̧, —Bidöma Isabenö Jo̧ ömöledö israel jojodö, —jö̧ba̧lö ötjabawö̧nö chichejebakwo̧sa. Ötjöda jobadönö dadö chotidijatö, ötjöda tjitebosaso batjibanö chotidijatö, ötjö Diosnö tjösödakobetjö̧. Jo̧kwajabetjö̧ jobekwö tjebatajö chichejebakwo̧sa, chömöledö pjelekwachibö ja̧dönö, jö̧ba̧lö yöawobe Diosma, israel jojodönö.

Isaías 44:2

Ötjö Isabenö Jo̧ma, ökwödönö otidinasa, ina kwojo'do jukwa'wo okwa kwö̧jaduwayi, ökwödönö dadö otidinasa. Ju'wibi ökwödönö otidajo̧, ökwödönö pjabatö jo̧sa chömöledö, ja̧danö babema baikwö yöta̧laduwakwö: Chömöayedö Jesurun ötabiwö̧ Jacob itji̧mu tupadanö jojodö, ötjöda omudawö chujuninawö̧, yekabiduwoko, isabenö ökwödönö pjatatakobetjö̧.

Isaías 45:11

Jau chömöledö, Israel jojodö tjösödökwe, Suli̧ Jwibo̧ Isabenö Jo̧ Diosma baikwö yöa̧lobe iteda otidinökwe, jo̧bakwö ölakwabikwawö jo̧nö baikwö yöa̧lobe: Tajawedö ötjönö abebö kwa̧ja̧kwobeda, ötjöda chi̧tji̧mu jawama? Tajawedö ötjöda chömamunö chotidi̧ jawa, —Sulabenö kwotida, wainö kwotido, —jö̧ba̧lö yöka̧lobeda? Isabenö jobekwö yöka̧lobö jwibo̧ja.

Isaías 48:17

Isabenö Jo̧, ökwödönö tjöbeba̧lö pjabato̧, Israel jojodö dösödökwe Suli̧ Jwibo̧ Diosma baikwö yöawobe ökwödönö: Ötjöma kwösödaduwökwe Isabenö Jo̧ Diossa. Ötjöda ökwödönö ba̧ja̧dö pjabato̧ma, otiwanö ja̧kwawa kwöwaisachibaduwakobetjö̧. Ja̧danö ökwödönö jwebebö öbibo̧ma ötjödasa, kwi̧'yaduwo jö̧ka̧laduwi̧danö otiwanö kwi̧'yaduwakobetjö̧.

Isaías 48:20

Ja̧danö babema yemidanö ökwödönö pjatatakwo̧sa, babe baikwö wetaduwakwö: Babilonia nijitjö labebaduwi, caldeo jojodö tjö̧jelö döbibajaduwi. Kwo̧'woduwi ösöwachibanö, bö̧jȩ ba̧kwemeachibanö jwöbeba̧lö yökawaduwo, —Isabenö Jo̧ma iteda ömöayedö Jacob ömöledönö tjö̧jibinö pjaatajabe.

Isaías 49:1

Baikwö laebobe Dios ömöayo̧ yöa̧li̧ma: Ökwödö ödö ju̧kwadö jwaibalawa ö'öbö ju̧kwadöbi ju'wedö bö̧jȩ bakwachö̧jȩ ju̧wkadöbi, yötawi̧ kwa̧ja̧kwaduwo. Chojo'do jukwa'wo ina cha̧ja̧yi, Isabenö Jo̧ma ötjönö jwöinobe, iteda ömöayo̧ batibakobetjö̧, ina ötjönö jemakwa̧ abönö, chimi imidinobe Isabenö Jo̧ma.

Isaías 49:26

Jau chömöledö, baikwö wanedö yötawa kwöpöjojodöduwinö chölakwabikwawakwa̧ma: Kwöpöjojodönö idöda tjiteba'o tjukwobö chiyakwo̧sa, ja̧danö ubasobu tjowi̧danö, idöda tjökwösobu owö 'dukwachawö̧ batjibobö chiyakwo̧sa, jö̧ba̧lö. Jau chömöledö, otiwanö ökwödönö pjabatö chölakwabikwawakwo̧sa, ja̧danö okobe deinö bö̧jȩnö ju̧kwadöma edö tjöwaisachibakwedö ötjönö, —Isabenö Jo̧ Diosda, Jacob ömöledö tjösödökwe juluwo̧ma, Diosda israel jojodönö tjö̧ji̧binö pjabato̧ma, jo̧bada tjöbeba̧lö pjabato̧ma, —jö̧ba̧lö edö tjöwaisachibakwedö, jö̧ba̧lö yöawobe Diosma.

Isaías 51:13

Tajawedö ötjö, ökwödönö otidina, Isabenö Jo̧ Diosnö kwo̧'wo jwikibinaduwada chömöledö? Ötjöma isabenö juluwo̧sa, ötjödasa mölȩjȩ sedatö nöninama, ja̧danö ötjödasa bö̧jȩ la'aka lödinama, ötjönö kwomukwataduwo jö̧ka̧laduwajabe. Jo̧kwaijayonö, kwöpöjojodöduwi usula kwemawaduwinö ja̧badö tjölabena, ja̧danö ökwödönö söbebö lotjobö jö̧tja̧lenama, ötjönö omukwatökönö, bakobe yebabinö ja̧döja. Jobadönö yekabiduwobö jwiobe chömöledö, ökwödönö labinadöma ida̧ökö debi batjibajabe.

Isaías 52:9

Jerusalen comunidad pjolö loinemibi o̧'wo ösöwachibanö lo̧obö jo̧be, Isabenö Jo̧ma iteda ömöledönö tjo̧'wo ösöwachibanö pjaatajobetjö̧, ja̧danö itebo comunidad Jerusalen tjöpöjojodötjö ji̧binö pjaatajabe.

Isaías 62:12

Ja̧danö, jobadö tjö̧jibinö pjaatajawö̧ma, —Isabenö Jo̧ Ömöledö Suli̧ Jwibadö, tjö̧jibinö pjaatinawö̧—jö̧ba̧lö ötjabikwawö̧. Ja̧danö ja̧ möle Jerusalen comunidad ötjabikobe, —Dios ösödemi, kaatibökemi comunidad, —jö̧ba̧lö.

Isaías 63:16

Ökwöma dabe'doja chuluwo̧. Da'dömine Abrahamma ökwödönö wajwibo̧, ja̧danö da'dömine israel mikwo̧bi ökwödönö omukwatö̧kö̧, jo̧kwaijayonö ökwö Isabenö Jo̧ma, ökwödaja dabe'dobo̧ma. Jau chuluwo̧, damötjö baikwö bajalenö, Israel jojodönö tjö̧jibinö pjabato̧, jö̧ba̧lö mikwo̧ja, isabenö ökwöda dabe'do jo̧ja.

Isaías 63:9

Isabenö okobe jwiinö usula emawö tjö̧jitjö̧, Diosda jobadökwö ja̧nö pjaatinobe. Jau, sule ömöayo̧nöda webö, —Chömöayo̧ angel, tjö̧jibinö pjabati, —jö̧ba̧lödamaökö, iteda da'dödökwö ja̧nö, tjö̧jibinö pjaatinobe. Jo̧bada ile nibebö, lȩlöinö edö pjabatinama, ja̧danö okobe jwiinö damötjö kwetjachinama, jo̧bada a̧la̧pedö kweatinobe.

Daniel 10:19

Ja̧danö ötjönö yöa̧linobe: —Jojoso̧, Dios jwiinö ile niebökweja, yebabökönui, kwo̧'wo̧ ösöwachibanö ja̧wi. Kwujuluwachibanö ja̧nö yebabökönö ja̧wi— jö̧ba̧lö yöa̧linobe. Jejenö yöa̧litjö, chujuluwachibijatö, ja̧danö jo̧banö chatadijatö: —Tjo̧wi̧ ötjönö chujuluwachibanö pjakatajabe, jo̧kwajabetjö̧ yöba̧li̧ chuluwo̧— jö̧ba̧lö.

Hechos 27:20

Ikenama ju'wi mölebi, ju'wi mölebi ina nöinö ojwiyo o̧bijatö jwa̧lȩ'epjokwöda. Yelösöda ojwiyo yȩobetjö̧ möle ja̧wo̧nöbi, si̧li̧'i̧dönöbi dedijökötö lekwe. Ökwödöma, ¡Ayö, tjo̧wi̧ debö di̧'yakwedösa! jö̧ba̧lö domukwatijatö.

Hechos 27:25

Jo̧kwaobetjö̧ ökwödönö yöta̧la: Yekabiduwa. Diosnö ösödö yöta̧la, isabenö jo̧bama jweinö yöbawo̧. Yöawi̧danö isabenö baledakobe.

Efesios 2:10

Chömöledö, Diosma ökwödönö otiwanö pjabatijetö yemidanö do̧'wo̧ luwo̧nö 'yabibajadö badibanö. Ja̧danö, otiwanö pjabatijetö, Cristo Jesúskwö bakobe dötewadö badibanöma. Diosma jejenö pjabatijetö ökwödönöma, otiwanö ja̧bö dö̧jobö. Ajayitjöda omukwatijetö ökwödönöma, do̧'wo̧ luwo̧nö 'yabibajadö, Cristo Jesúskwö dötewadö otiwanö ja̧bö dö̧jakwa̧ma.

Deuteronomio 32:15

Jejenö iyiawö̧, tjomeawinö tjukwinobe israel jojodöma, o̧tewadö batjibanö. O̧tewadö babibö, nötja̧chibinobe, inesö o̧tewadö batjibanö, ja̧danö jobadönö otidina Diosnö katjatibinobe, tjö̧jibinö pjabato̧ inawadanöbo̧ Diosnö obö katjatibinobe.

Deuteronomio 32:6

Ökwödöma wajwibadö omukwatöködödanöbedöja chömöledö, baikwö yötawa: Isabenö Jo̧ma kwabe'doduwibo̧, jo̧bada ökwödönö otidinobetjö̧, ja̧danö ju'wibi ökwödönö otidajo̧, kwiteboduwisaso juluwaso bakibaduwanö ujuninobe, jö̧tö? Isabenö otiwanö pjaatinobe chömöledö, ja̧danö jejenö pjaatiawö̧ balekwa mikwa jo̧banö kwöpöjödaduwobö otiwenaji̧? Sula chömöledö, jo̧banö kwösödaduwo jö̧ba̧ladöja.

Deuteronomio 32:9

Ja̧danö, jejenö 'da̧batö junajo̧, Isabenö Jo̧ma iteda ömöledö batjibakwedönöbi 'da̧batö ujuninobe, ökwödö israel jojodönö 'da̧batö ujuninobe, iteda ömöledö dö̧jobö.

2 Timoteo 2:19

Jo̧kwaijayonö, ju'wedö tjösödi̧ waekwijayonö, Dios yöbawö ujunina wenema waekwokobe, la'akatjöda söawachokobe. Jau Timoteo, Diosma isabenö wene ujuninobe, inawa pjolachibököwadanö. Wanedö yötawa: Diosma isabenö wenesawa inawa ujuninobe, ja̧danö jawanö seyudanö wȩyukwawa jo̧be, ja̧danö baikwö laebobe wȩyukwi̧ma: Diosma iteda ömöledönö waiso̧, jö̧ba̧lö laebobe, ja̧danö ju'wibi laebobe: Okobe deinö Duluwo̧ ömöledösa jö̧ba̧ladöma, sulabetjö 'da̧bachibö tji̧'yobö jo̧be, jö̧ba̧lö laebobe.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Apocalipsis 5:9

Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja.