Isaías 42:25 - Dios Iwene

²⁵ Ja̧danö, jobekwö sulabenö döpöjödiökwe, jwiinö ödameakwinobe ökwödönö, ja̧danö dameakwö ja̧nö, labinö lȩbebö döpöjojodö mebibö tjölakwabikwawobö weinobe. Jobekwö baledi̧ma, baikwö wanedö yötawa, Dios inesö ödameakwi̧ma dö̧'da̧de ökwöla ubi̧danö ubinobe, jo̧kwaijayonö tajawedöjö jö̧ba̧löma domukwatijökötö. Jau, Dios ödameakwi̧ i̧sȩkwolatjö ubawö̧ döwaekwijayonö, yayonö otiwanö domukwatijökötö, ja̧danö, —Aaa, Dios wei̧ a̧ja̧kwökönö dö̧jobetjö̧ baledajabe, —jö̧ba̧lö okwa jawa döwaisachibijökötö. Isabenö tjöbajale tjewawadödanö, ja̧danö tjölakiyu a̧ja̧kwöködödanö ichejekwadösa, ökwödö israel jojodöma.

Isaías 42:25 ပူးပေါင်းရင်းမြစ်များ

2 Reyes 25:9

Ja̧danö Jerusalenbe ichibajo̧, Isabenö Jo̧ eju juwo loinobe, ja̧danö Juda inesö la'aka luwo̧ ejubi juwö loinobe, ja̧danö okobe jwiinö ju'wi Jerusalen comunidad ejubiyatjö, ejuawi̧ma juwö loinobe.

Diosnö ösödo̧ Job mikwo̧ usula emawina jawa 40:11

—Sulabedönö kwödameakwi̧ i̧sȩbö, jelobekwena ju̧kwadönö lȩkebo, ja̧danö okobe deinö otiwadösa jö̧ba̧lö sulabenö omukwatadönö, nijakwö batjibanö jwibatö loköbo.

Isaías 29:13

Ja̧danö, Isabenö Jo̧ Diosma baikwö yöawajabe ökwödönö chömöledö: —Bidö jojodöma tjaanö yötja̧lobe, –Dioskwö yö̧ne ja̧dösa, –jö̧ba̧lö, ja̧danö tja̧jȩnö ötjönö ösödö yöba̧ladö, –Diosma otiwo̧, jo̧banö yebabinö ösödadösa, –jö̧balö. Jo̧kwaijayonö jobekwö yötja̧lijayonö, omöna, tjomajadenö yö̧ne jö̧kö̧nö chö̧jelö ödö ju̧kwadö. Ja̧danö, –Diosnö yebabinö ösödadösa, –jö̧ba̧lö yötja̧li̧ma, ötjöda weti̧ a̧ja̧kwö, jobekwö yöba̧löködö, jojodöda wetji̧ a̧ja̧kwö, jobekwö yöba̧ladö.

Isaías 48:8

Ja̧u, babe ökwödönö yötawi̧ma, ina kwa̧ja̧kwinaduwökö jawa, ina wajwiköbaduwii̧ jawa, ina ökwödönö yötjawinökö jawada yötawocha, a̧ja̧kwajadö, —Ida̧ökö chöwaisi̧ jawada yöawajabe Diosma, —jö̧ba̧lö yöka̧laduwapji jö̧ba̧lö. Ökwödönö chöwaisawö̧ja chömöledö, omöna yöba̧ladö kwö̧jaduwi̧ma. Ja̧danö israelsaso bakibinaduwelö, baikwö bajalenö ba̧kwelöjatebö, Dios wei̧ a̧ja̧kwöködö jö̧ba̧lö ötjabi̧wö̧ja, jö̧ba̧lö chöwaisawö̧ja.

Isaías 5:25

Jau chömöledö, yöta̧laja̧danö sulabenö ja̧tjiökwe, isabenö ödameakwachibajabe Isabenö Jo̧ma, iteda ömöledö israel jojodönö, ja̧danö ömamu kabebö, jobadönö kwaajabe. Jobekwö kwaobetjö̧, mösa'ijuma tjö̧awobe, ja̧danö kwaajawö̧ tjiteba'ijuma, comunidad mananö bo̧be, sula'wo bi̧danö. Ja̧danö ida̧ökö bakwötanö kwaajayonö, ina seachibokobe Isabenö Jo̧ inesö ödameakwi̧ma, ja̧danö ina öja i̧sȩba̧lö jo̧, yemidanö kwaakobetjö̧.

Isaías 57:1

Dios wei̧ a̧ja̧kwö jo̧ma, ö'wö babibo̧, ja̧danö ö'wö baibiawö̧, jo̧kwadanö tjedökwe. Ja̧danö jwaikwöda Diosnö ösödö ju̧kwadöma debö 'ya̧dö. Jobekwö baledi̧ edö, wajwibadö jojojodöma, tajawedö ö'wö babibadöjö, jö̧ba̧lö. Ja̧ baled̈i̧ baikwö labebö lobö yöta̧la chömöledö: Inesö ju'wedö usula tjemawakwa̧ tjöbaledapji jö̧ba̧lö, ju'wedö tju̧ju̧kwelö Dios emawö̧ chömöledö.

Isaías 57:11

Chömöledö israel jojodö, tinö yekabinaduwada? O̧'wo jawa jwiinö yekabiduwobetjö ötjönö omöna yöka̧laduwaji̧? Tajawedö ötjönö kwo̧'woduwi jwikibaduwaja̧da, ja̧danö, —Dios ösödi̧ma di̧yajö, —jö̧ba̧lö tajawedö omukwatökönö kwö̧jaduwobeda? Lekwe möle ötjöma wi̧inö ja̧nö, ökwödönö lȩbebökönö chiteada̧lobetjö̧, ötjönö yebaböködö bakibaduwaji̧?

Isaías 9:13

Jau, ajayinö lȩebiawö̧, sulabenö tjomukwati̧ kabatibö, tjöbalewacho jö̧tja̧linobe, ja̧danö tjebachajö jobadönö kwabina Diosnö tjösödo jö̧tja̧linobe, ja̧danö Isabenö Jo̧ Okobe Jwiinö Juluwo̧ Diosnö abebö ta̧ja̧kwo jö̧tja̧linobe, jo̧kwaijayonö balewachökönö jwaikwöda sulabenö omukwatö ja̧dö israel jojodöma.

Isaías 9:19

Ja̧danö jojodö sulabenö ja̧bö tjö̧jiökwe, Isabenö Jo̧ Okobe Jwiinö Juluwo̧ Diosma jwiinö ödameakwobe, ja̧danö ödameakwobetjö̧, israel niji ubajabe, ja̧danö israel jojodöma imidanö ichejekwadö, ökwölanö ubadö batjibakwedö. Isabenö sulabenö ja̧bö ju̧kwadö israel jojodöma, ja'yubebi tjömöledönö lȩlöjinö edöködö.

Deuteronomio 32:22

Ökwöla labinö ubi̧danö chödameakwakwo̧sa israel jojodönö, wanedö yötawa, chödameakwi̧ ökwölama okobe jwiinö juwö loola, bö̧je okwa ö'wö babibinadö tju̧ju̧kwemibi, okobe jwiinö bö̧jebi, bö̧jenö pokwi̧bi, mösa'iju la'akabi juwö loola ökwöladanö chödameakwakwo̧sa israel jojodönö.