Isaías 42:1 - Dios Iwene

¹ Baikwö laebobe Dios yöa̧li̧ma: Bitema ötjöda omudawö chujuninökwe chömöayo̧, ujuluwachibanö pjatjatökwema. Jo̧bama ötjö ile 'di̧tebökwe. Jo̧banö chiyajabe ötjöda Cho̧'wo Luwo̧nö, ja̧danö jo̧bama jweinö lȩebo jö̧a̧li̧danö lȩebakwo̧ tjitebotenia jojojodönö.

Isaías 42:1 ပူးပေါင်းရင်းမြစ်များ

Génesis 49:10

Ina yöbawijetö: —Isabenö yötawa, Judá: Ökwötjö tupadanö jojodöma ba̧kwȩlöjatebö la'aka luwedö webö tjuju̧kwakwedö. Jejenö webö tjö̧bakobe bakwo̧, inesö la'aka luwo̧ ichenanö kabatö. Jo̧ba inesö la'aka luwo̧ma okobe deinö jojodö tjuluwo̧ ö̧jakwo̧— yöbawijetö Jacobma itji̧ Judánöma.

Isaías 2:4

Ja̧ möle tjitebokwena jojodö ju'wedö tjitebo jojodökwö wene tjujuna̧lenama, Isabenö Jo̧ Diosda lȩekwa yöawakwo̧. Ja̧danö tjitebokwena jojodö ölakwabikwawö tjö̧jenama, jo̧bada jwebebö lȩekwa yöawakwo̧. Ja̧danö jobekwö lȩekwa yöawiawö̧, ölakwabikwawökönö tjö̧jakwedö bö̧jȩ jojodöma, jo̧kwajabetjö̧ ölakwabikwawa jawa tjiteama, balewö lobö tjotidakobe, batjo otikwa jawa baibanö. Kwölöte'ijuma, niji soawa ökiya baibanö balewö lotjakobe, ja̧danö tokwötebiyama, towibiya bajale ötjebiya 'wiawaka baibanö balewö lobö tjotidakobe. Ja̧ mölema ju'wedö tjitebo jojodöma, ju'wedö tjitebo jojodökwö tjölakwabikwawökakwedö, ja̧danö ölakwabikwawa jawa tjöwaisachökakwedö, okobe deinö bakobe wene jwiinö tjö̧jakwedö, —jö̧ba̧lö yadakwö baledakwa̧ jawa i̧sȩbinobe Diosma.

Isaías 32:16

Ja̧ möle jojodö deobetjö, ja̧bö tjö̧jo jö̧tja̧li̧danö otiwanö jabö tjö̧jakwedö jojodöma, ja̧danö batjo otiwanö pokwemi niji ju̧kwadöma, otiwanö Dios wei̧ a̧ja̧kwö tjö̧jakwedö.

Isaías 41:8

Tupakwö laebobe Dios yöa̧li̧: Ökwödö Israel jojodöma, isabenö ötjöda chömöayedöja. Ökwödöma omudawö chujuninökwe Jacob itji̧mu tupadanö jojodöja, ja̧danö chömöledöso̧ Abraham itji̧mu tupadanö jojodöja.

Isaías 41:9

Ökwödöma bö̧jȩ bajaletjö baikwö chichejebinawö̧ja, bö̧jȩ bakwachö̧jetjö jwötinawö̧ja, —Ökwödöma ötjöda chömöayedöja, ökwödönö omudawö chujunajabe, ja̧danö ökwödönö kabatibö̧kö̧sa, —jö̧ba̧lö.

Isaías 42:2

Jo̧bama labinö yöawökakwo̧, ja̧danö jwöeba̧lökakwo̧, ja̧danö comunidad manatjö, iwene ökwöi̧ tja̧ja̧kwökakwedö.

Isaías 43:10

Jo̧kwaijayonö ökwödö israel jojodöma, Isabenö Jo̧ i̧sȩbina edö waisadösa. Baikwö yöa̧lobe Isabenö Jo̧ma: Ökwödö israel jojodöma isabenö chi̧sȩbina edö waisadöja, isabenö Diosbo̧ chö̧ji̧ma. Jau, chömöayedö bakibaduwanö omudawö chujuninawö̧ja, ötjönö kwöwaisaduwobö, ja̧danö ötjönö kwösödaduwobö, ja̧danö okwa jawa otiwanö kwöwaisachibaduwobö, —Okobe deinö tjösödawö̧tjöma, Isabenö Jo̧ Diosda isabenö Diosbo̧, —jö̧ba̧lö. Jau, ötjö chö̧jakwa̧ abönö tjotidinökwema deobe la'akatjöda, ja̧danö chö̧jaja̧ ikena ö̧jakwo̧ diosbo̧bi deakobe la'akatjöda, ötjödasa Diosbo̧ma.

Isaías 50:10

Baikwö yöta̧laduwakwö chömöledö: Ökwödötjö didöda Isabenö Jo̧ Diosnö yebabinö ösödö kwö̧jaduwobeda? Ökwödö Diosnö ösödadösa jö̧ba̧ladöma, Dios ömöayo̧ yöawi̧ a̧ja̧kwö kwö̧jaduwo chömöledö. Ja̧danö ökwödötjö yȩa'wo okwa, dewi̧ ja'yubebi dewokobe kwebachadöma, Isabenö Jo̧nö kwo̧'woduwi wana̧lö kwö̧jaduwo, kwuluwo̧duwi Diosnö ösödö kwö̧jaduwo, —Diosda pjaatakwo̧, —jö̧ba̧lö.

Isaías 52:13

Baikwö yöa̧lobe Diosma: Baikwö yöta̧laduwakwö chömöledö: Ötjö chömöayo̧ma, otiwanö waisanö ö̧jakwo̧. Jo̧banö möakwö katebakwo̧, ja̧danö jwiinö otiwanö tjomukwatakwo̧ ötjö chömöayo̧ma.

Isaías 53:11

Ja̧danö, usula emawajo̧, otidaja̧ omukwatakobe Dios ömöayo̧ma, ja̧danö otidaja̧ okwa jawa omukwatö, o̧'wo ösöwanö omukwatakwo̧, —Chotidaja̧ma, otiwanö chotidajabe, —jö̧ba̧lö. Baikwö yöa̧lobe Diosma, iteda ömöayo̧nö: Chömöayo̧ma ba̧jȩkwadö tjusula emawajabe, jo̧kwajabetjö̧ iteda ida̧'ökö emawajobetjö̧, jobadönö lȩekwa yöawakwo̧, —Bidöma wene jwibadö, —jö̧ba̧lö.

Isaías 59:21

Ju'wibi yöawobe Isabenö Jo̧ma: Ja̧danö, ötjöma jobadö tjö̧jibinö pjatatajawö̧nö isabenö pjatatakwa̧ wene yöbawö chujunakwo̧sa, baikwö: Ökwödökwö jo̧ cho̧'wo luwo̧ma, la'akatjöda kwö̧jaduwelö laebökakwo̧. Ja̧danö ötjö yötawi̧, yöka̧laduwobö chiyaja̧ chiwenema, ba̧kwelöjatebö yöba̧lö kwö̧jaduwakwedöja, ja̧danö kwitji̧muduwibi ba̧kwelöjatebö yöba̧lö tjö̧jakwedö, ja̧danö tji̧tji̧mu tupadanö jojodöbi ba̧kwelöjatebö chiwene yöba̧lö tjö̧jakwedö. Bemi tupakwö, ba̧kwelöjatebö 'dö̧ibajökönö, jobekwö yöba̧lö kwö̧jaduwakwedöja, jö̧ba̧lö yöawobe Isabenö Jo̧ma.

Isaías 61:1

Isabenö Jo̧ O̧'wo̧ Luwo̧ma ötjökwö jo̧, Isabenö Jo̧ Diosda ötjönö omudawö ujuninobetjö̧, otiwa jawa wene usula jojodönö yötawobö. Ötjönö weinobe, tjo̧'wo tjo̧bekwö ju̧kwadönö tjo̧'wo ösöwachibanö pjatatobö, ja̧danö ölakwabikwawö juluwajö do̧tja̧tajawönö tjetjatakwa̧ yötawobö, ja̧danö ka̧lena ba̧jadönö ka̧lenatjö tjö̧jibakwa̧ wene yötawobö.

Isaías 63:1

—Ayö, ite Edom nijitjö icho̧, Edom niji comunidad Bosratjö, ökamijido̧ duwa̧do̧ 'dubawo̧ma, tida? Jo̧ba baikwö icho̧ma, inesö la'aka luwo̧ 'duawajiadanö 'dubawö, inesö ujulunö kwebacho̧ma, tida? —jö̧ba̧lö abebö cha̧jakwökwe, icho̧ma baikwö atado̧: —Ötjöma kwö̧jibaduwinö pjatatobö juluwo̧ Diossa, chujulunö kwö̧jibaduwinö pjatataja̧ wene yöbawö icho̧sa, —jö̧ba̧lö.

Mateo 17:5

Pedro ina jejenö yöa̧lonö, ojwiyo'wo dewinö dejata'wo jobadö tjöwamenö öwawachinobe, ja̧danö ja'wotjö̧ iwene ökwöinobe baikwö ökwöi̧ma: —Bitema ötjöda chösödökwe chitji̧, cho̧'wo̧ ösöwanö chedobe jo̧banö. Jo̧banö kwa̧ja̧kwaduwo— jö̧ba̧lö iwene ökwöinobe.

Lucas 3:22

Ja̧danö Dios O̧'wo̧ Luwo̧ma atji̧onö yunukodanö ichejekwo̧ jwibachibö Jesúsnö öwamatinobe, ja̧danö ju'wibi mölejȩbetjö iwene ökwöinobe, Ökwöma chösödökwe chitji̧ja, cho̧'wo̧ ösöwanö chösödobe ökwönö, jö̧ba̧lö.

Lucas 4:18

Duluwo̧ O̧'wo̧ Luwo̧ma ötjökwö jo̧, jo̧bada ötjönö omudawö ujuninobetjö̧, otiwa jawa wene usula jojodönö yötawobö. Ötjönö weinobe, ka̧lena ba̧jadönö ka̧lenatjö tjö̧jibakwa̧ wene yötawobö, ja̧danö tjöbajale tjewawadönö edadö batjibakwa̧ wene yötawobö, ja̧danö tjujuluwajawönö tjuluwedötjö tjö̧jibakwa̧ wene yötawobö.

Lucas 4:19

Jau, Duluwo̧ jojodönö ösödö pjaatakwa̧ o̧ba badekwachaja̧ yötawobö weinobe ötjönö, jö̧ba̧lö Isaias iwȩyudinöjatjö yöa̧linobe Jesúsma.

Lucas 9:35

Ja̧danö ojwio'wotjö Dios iwene ökwöinobe: —Bitema ötjöda Chitji̧, ötjöda omudawö chujunökwema. Jo̧ba yöawi̧ a̧ja̧kwaduwi— jö̧ba̧lö.

Juan 16:32

Jejenö ösödö yöka̧laduwijayonö yötawaduwakwö. Tjo̧wi̧, ötjö chö̧jelö dökibaduwakobe, kwejuduwikwena ȩwa̧jö. Jau, ötjönö le'dedibö kwȩwa̧jaduwakwa̧ möle yöneawacha babema. Ja̧danö, döbibajö kwȩwa̧jaduwajabe okobema jo̧dawa'ye chö̧jakwo̧sa. Jo̧kwaijayonö, jo̧dawa'yemaökö, Chabe'do ötjökwö jo̧.

Juan 3:34

Ja̧danö, Dios weinökwema Dios iweneda yöbawo̧. Ja̧danö, Diosma iyijetö weinökwenö iteda O̧'wo̧ Luwo̧nöma, jo̧ba ujulu okobe jwiinö iyö.

Juan 6:27

A̧ja̧kwaduwitjö, wanedö yötawi̧ma: Ökwödöma 'dö̧ibaji̧ kwakwawada kwukwaduwobö omukwatö kwö̧jaduwobe. Jo̧kwaijayonö yötawaduwakwö. 'Dö̧ibajökö jawa kwakwawa kwujuna̧laduwobö omukwatö kwö̧jaduwo. Ja̧ 'dö̧ibajökö kwakwawama ba̧kwȩlö̧jatebö ja̧kwawa iyi̧ kwakwawa. Ja̧ kwakwawa iyo̧ma ötjöda, jojo baibanö jeminökweda. Jau, ötjödasa ba̧kwȩlö̧jatebö ja̧kwawa iyo̧ma, Chabe'do Dios jejenö chiyobö ösödö ötjönö weinobetjö̧— yöawinobe Jesúsma jobadönöma.

Hechos 10:38

Ja̧danö, kwöwaisaduwa Diosma webijetö iteda O̧'wo̧ Luwo̧nö Jesús, Nazaretnö da̧peachinakwö ö̧jobö. Ujulubi iyijetö Diosma Jesúsnöma. Ja̧danö, Diosma Jesúskwö ö̧jobetjö̧, Jesúsma okobe jwiinö i̧'yobema otiwanö pjabatö 'yi̧jetö. Otiwanö otidiabijetö okobe deinö Awetja sulabenö ja̧inawö̧nöma, Diosma jo̧bakwö ö̧jobetjö̧.

Hechos 11:18

Ikenama Pedrokwö wene juna̧lakwawö yöba̧ladöma Pedro yöawobe a̧ja̧kwö wene tjujuna̧li̧ma kabatakwawijadötö. Wene tjujuna̧li̧ma kabatibö Diosnö ösödö jö̧ba̧lijadötö: —Diosma judío jojodöböködönöbi otiwanö pjaatinobe. Tjomukwati̧ balewachö itekwöda tjichibobö, itekwöda ba̧kwȩlö̧jatebö tjuju̧kwobö pjaatinobe— jö̧ba̧lö, ösödijadötö Diosnö.

Hechos 28:28

Ina yöbawijetö: —A̧ja̧kwaduwitjö kwöwaisachibaduwinö. Ökwödöma, judío jojodöma Dios pjaatina kwöpöjödaduwijatö, jojodö tjö̧jibinö pjaatinama. Jo̧kwaobetjö̧ Diosma webijetö judío jojodöböködönö tja̧ja̧kwobö. Isabenö jobadöma tja̧ja̧kwobö jö̧ba̧ladö, Dios iwenema— yöbawijetö Pabloma.

Hechos 9:15

Jejenö jö̧a̧liökwe Duluwo̧ma jö̧ba̧lijetö: —Yayonö jo̧ba ö̧jobekwö 'ya̧wi Ananías. Jo̧banö ötjö jawa wene yöbawo̧ baibanö 'da̧batö chujunökweobetjö̧ 'ya̧wi. Jo̧bama Israel jojodöböködönöbi, Israel jojodöböködö tjuluwedönöbi yöawakwo̧ ötjö jawa wenema. Ja̧danö, Israel jojodönöbi yöawakwo̧ jo̧bama ötjö jawa wenema.

Efesios 1:4

Ja̧danö ajayinö, böjȩ ina otidapjii Diosma omudawö junijetö ökwödönöma iteda ömöledö babibö, Jesúskwö bakobe dötewinö badibakwa̧ma. Ja̧danö, omudawö junijetö iteda öba a'otjö suli̧ jwiinö, wene jwibadö badibakwa̧ma.

Efesios 1:6

Jo̧kwaobetjö̧ iteda i̧tji̧mu badibinobetjö̧ dösödonö, Lȩlö̧jino edo̧, jwiinö otiwo̧, jö̧ba̧lö. Chömöledö ökwödöma Jesúskwö, Dios Itji̧ ile niebökwekwö, dötewinö badibinobetjö̧ Diosma ökwödönö jwiinö lȩlö̧jino edobe.

Efesios 3:8

Chömöledö, ötjöma ju'wedö Dios ömöledö babibinadötjö baikwönönöda jo̧sa. Jejenöijayonö Diosma ötjönö lȩlö̧jino edö 'da̧batö ujuninobe, judío jojodöböködönö yötawobö, Cristoma jwiinö pjabato̧, jwiinö otiwo̧, jwiinö juluwo̧, jö̧ba̧lö. Ja̧ jawa, Cristo pjaati̧, otiwi̧, ujuluwi̧ jawa kaatiboböma jwibo̧, jö̧ba̧lö, yötawobö 'da̧batö ujuninökwesa.

Filipenses 2:7

Jejenö do̧ba̧lökönö, iteda okobe jwiinö ujuna̧li̧ma junibö, usulaso̧ tjömöayo̧danö baibanö ja̧inobe, ja̧danö jojo baibanö öbötjachinobe.

Colosenses 1:13

Jo̧ba Diosma yȩa'wotjö, Awetja ujulutjö dö̧jibanö ja̧inobe, ja̧danö iteda ösödökwe Itji̧ la'aka luwo̧ ö̧jobe dichibanö ja̧inobe.

1 Pedro 2:4

Jau chömöledö, isabenö duluwo̧nö waisachinadösa, lȩlö̧jinö pjabato̧ jö̧ba̧lö. Ökwödö Jesúsnö ösödadönö baikwö wanedö yötawa: Ökwödöma Dios eju inawiyadanö ichejekwadösa, ja̧danö Duluwo̧ Jesúsma Dios ejutjö inesö la'aka lödawawa inawadanöbo̧. Ja̧danö, ökwödö Jesúsnö ösödadöma, jo̧banö ösödö ichadösa, Diosma ökwödötjö iteda eju otidakobetjö̧. Jau chömöledö, Jesúsma isabenö ökwödö Dios ejubedötjö la'akadanöbo̧, Dios iwene laebi̧danö. Baikwö laebobe Dios iwene Jesúsnöma: Inawa nöinö mikwawawa omudawajo̧, Jerusalénnö chödobe, o̧dotjö inesö la'aka lödawawa baibanö, ja̧danö bakwo̧ jo̧ba inawadanöbo̧nö ösöditjö̧ma, waekwökena, jö̧ba̧lö laebobe Jesúsnöma. Jau chömöledö, kwöwaisaduwa, böjȩ jojodöma Jesúsnö öpöjödadö, mikwawö̧kö̧ jö̧ba̧lö, jo̧kwaijayonö jobadö tjöpöjödijayonö, Diosma Jesúsnöda omudawö ujuninobe, ökwödö iteda ejubedötjö la'aka ajayinö lödawawa inawadanö ö̧jobö. Jau chömöledö, Dios edemi isabenö mikwawo̧ Jesúsma, ja̧danö ökwödö Jesúsnö ösödadöbi jo̧banö jweinö domukwatobe, isabenö mikwawo̧ jö̧ba̧lö. Jau chömöledö, ökwödö Jesúsnö ösödadöma Dios ejubedösa, jo̧kwaijayonö ja̧damaökö, ju'wibi Diosma ökwödönö 'da̧batö ujuninobe, iteda wei̧ otidadö badibanö chömöledö. Jau chömöledö, Jesucristo ökwödönö pjaatinobetjö̧, babema Dios ösödi̧ iyawa jo̧banö iyadösa, do̧'wo̧ luwo̧ jawa iyawama.