Isaías 40:26 - Dios Iwene

²⁶ Mölȩjȩbe edö, si̧li̧'idönö kwomukwataduwo. Tida jobadönö otidinama? Tida bakwo̧nökwena imi jwöbö, yö̧tekwena okobe deinö jobadö inesö ba̧jȩkwadö latjebobö öibobeda? Ötjödasa chömöledö, ja̧danö jwiinö chujuluwobetjö̧, latjebobö jwötenama, bakwo̧bi deökönö, okobe deinö weti̧ a̧ja̧kwö labebadö, jö̧tö? —jö̧ba̧lö abebö a̧ja̧kwobe Diosma ökwödönö.

Isaías 40:26 ပူးပေါင်းရင်းမြစ်များ

Génesis 1:14

Ikenama: —Möle ja̧wo̧bi yö̧te ja̧wo̧bi si̧li̧'i̧döbi babibaduwi, mölebi yö̧tebi wainö ja̧kobetjö̧. Ja̧danö, ökwödö mölejȩ lö̧jadöma, mölebiya baledi̧, ja̧danö o̧ba, imiyame baledi̧ kwi̧sebaduwakobetjö̧ babibaduwi.

Génesis 1:16

Du̧ju̧tajanö ödöbaedö dewinö dejatadönö wa̧pedijetö Diosma. Möle ja̧wo̧nöma tubinö dejato̧nö wa̧pedijetö möle dewobö. Ja̧danö, yö̧te ja̧wo̧nöma tiyuwanö dejato̧nö wa̧pedijetö yö̧te dewobö. Si̧li̧'i̧dönöbi wa̧pedijetö.

Isaías 34:16

Jau chömöledö, otiwanö Isabenö Jo̧ yöawi̧ wȩyukwa'ye laebi̧ yöka̧laduwo, ja̧ yöta̧laja̧danö baledakwa̧ kwöwaisachibaduwakobetjö̧. Okobe deinö jobadö tebonö ju̧kwadöma jobe Edom niji comunidadbiyanö tjö̧jakwedö, ja̧danö jobe ju̧kwadö tebonö ju̧kwadötjö, bakwo̧bi ilekwo deinö ö̧jökakwo̧, jobe Edom jojodö tjö̧jinemi otiwanö tjö̧jobö Dios iyobetjö̧. Jau, jobekwö baledobö weajabe Isabenö Jo̧ma, ja̧danö iteda O̧'wo Luwo̧ öibawö̧, okobe deinö jobadöma jobe ko̧ko̧kwö tjö̧jakwedö.

Isaías 42:5

Chömöledö, Isabenö Jo̧ Diosda mölȩjȩ otidajo̧, sedatö nöninama, ja̧danö jo̧bada bö̧jȩbi, okobe jwiinö bö̧jȩtjö pokwi̧bi otidinama. Jo̧bada okobe deinö bö̧jȩnö ju̧kwadönö tjo̧'wo emapjo iyo̧ma, bö̧jenö kwebachö ju̧kwadönö ja̧kwawa iyo̧ma Isabenö Jo̧ Diosda. Ja̧danö, jo̧bada baikwö yöawobe omudawö ujuninökwenö:

Isaías 44:24

Baikwö yöa̧lobe ökwödönö tjöbeba̧lö pjabato̧, ina kwojo'do jukwa'wo okwa ina kwö̧jaduwayi dadö otidina Isabenö Jo̧ Diosma: Ötjöma okobe jwiinö otidina Isabenö Jo̧ Diossa. Ötjöda mölejȩ sedatö nöninasa, ötjöda jo̧dawa'ye bö̧jȩbi dadö otidinasa.

Isaías 45:12

Ötjödasa bö̧jȩ otidinama, ja̧danö otidajo̧, ötjödasa jojodönö chotidijatö, bö̧jenö tjö̧jakobetjö̧. Ötjödasa mölejȩ sedatö nöninama, ja̧danö ötjödasa si̧li̧'idö tjö̧lakwena tjö̧lobö webinama.

Isaías 45:7

Jau, ötjödasa dewi̧ otido̧ma, ja̧danö yȩa'wobi otido̧ma ötjödasa. Ötjödasa wene jwiinö tjö̧jobö pjabato̧ma, ja̧danö ju'wibi suli̧ waekwö wene tjujuna̧lobö webo̧bi ötjödasa. Okobe jwiinö ja̧ jawa otido̧ma, ötjö Isabenö Jo̧ Diosda, jö̧ba̧lö yöa̧lobe Diosma, omudawö ujuninökwe Cironö.

Isaías 48:12

Chömöledö Jacob itji̧mu tupadanö jojodö, ötjöda chömöledö bakibaduwanö jwötinawö̧ israel jojodö, yötawi̧ kwa̧ja̧kwaduwo, baikwö: Ötjödasa ba̧kwelöjatebo jo̧ Diosma. Ajayitjöda ji̧nasa̧ chömöledö, ja̧danö bajaleapo löji mölebi chö̧jakwo̧sa.

Isaías 48:13

Jau chömöledö, ötjöda chömamunö bö̧jȩ la'aka chödijatö, ja̧danö ötjöda chömamu chöwaisobekwöchobesamunö mölȩjȩ sedatö chönijatö. Ja̧danö si̧li̧'idönö jwötenama, weti̧ a̧ja̧kwö bakobe labebö la̧matinadö si̧li̧'idöma.

Isaías 51:6

Möakwö mölejebe kwedaduwo chömöledö, ja̧danö nijakwö bö̧je kwedaduwo. Babe ji̧danöma, lekwema jö̧köjȩ chömöledö, baikwö yötawa: Imiyu'wo juluwanö debi baibidanö, juluwanö debi baibakobe mölejȩma, ja̧danö kamijido̧ damö waekwö, suli̧ waekwi̧danö, bö̧jȩ suli̧ waekwakobe. Bö̧jȩnö ju̧kwadöbi ja̧danö, okobe deinö damö waekwö debö batjibakwedö. Jo̧kwaijayonö jejenömaökö ötjö chö̧ji̧ma, ötjö tjö̧ji̧binö pjatati̧ma, ba̧kwelöjatebö ji̧ jawa chömöledö, ja̧danö otiwanö webö chö̧ji̧ma, la'akatjöda 'dö̧ibökakobe.

Isaías 66:2

Okobe jwiinö mölejȩnö ji̧bi, bö̧jȩnö ji̧bi, ötjöda chotidijatö chömöledö, ja̧danö okobe jwiinö kwedaduwi̧ma, ötjö chiteada edadöja. Jo̧kwajabetjö̧ cheju baibanö kwiyaduwobö jwibadöja chömöledö. Jobekwö ötjö Isabenö Jo̧ma yötawaduwakwö. Ju'wibi baikwö yötawaduwakwö: Ötjö otiwanö edö pjatatakwawö̧ma, bidö: Tjomajadenö, —Mikwawöködösa, —jö̧ba̧lö omukwatadö, yötawi̧ a̧ja̧kwö, yebabinö tjö̧bawö, sulabenö tjomukwati̧ kabatibö balewachadöma.

Deuteronomio 4:19

Ja̧danö mölejȩbe edö, mölejȩnö la̧jadönö jawo̧nöbi, yö̧te jawo̧nöbi, si̧li̧'idönöbi kwösödaduwoböma omukwatökönaduwi. Ju'wedöma ö'öbönö kwomukwataduwobö öbibö yötja̧lena, –Mölejȩnö la̧jadönö dösödobö otiwa, –jö̧ba̧lö, jo̧kwaijayonö sulabenö öbibö yötja̧li̧ma ösödökönaduwi, ja̧danö jobadönö bȩbachibö ösödökönaduwi. Jau chömöledö, duluwo̧ Isabenö Jo̧ Diosma bö̧jȩ ba̧kwemeachibanö ju̧kwadönö pjabatö, jobadö mölejȩnö la̧jadönö jobe tjö̧lobö öninobe, jo̧kwaijayonö ja'yubebi jobadönö kwösödaduwobö jwiobe, Diosnöda kwösödaduwobö jo̧be.