Isaías 40:18 - Dios Iwene

¹⁸ Diteda jobekwö Diosdanöbo̧ma chömöledö? Tinö wanedö, Diosma bitedanöbo̧, jö̧ba̧lö yöka̧laduwena?

Isaías 40:18 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 40:9

—Ökwöma ötjö Dios chujuluwi̧danö, juluwo̧köbobeji̧? Böba ökwödö, chiwene ökwöi̧danö ökwöda kwiwene ökwödobö juluwo̧köbobeji̧?

Éxodo 15:11

Isabenö Jo̧, ju'wedö tjo̧'wo jawa tjösödawö̧tjö ökwödajayo̧ma deobe. Ökwödajayo̧ma ¿tida? Deobe, bakwo̧da wainö juluwo̧ja, ökwö Isabenö Jo̧da. Deobe ökwödajayo̧, yebabinö tjösödökwema, Deobe ökwödajayo̧, jwiinö ujulu i̧sebo̧ma.

Éxodo 20:4

Ja̧danö, kwotidaduwoko kwo̧'wo̧duwi jawa kwösödaduwawö̧nöma, mölejebi ju̧kwadö tjo̧'wo̧ jawabi, böjenö jukwadö tjo̧'wo̧ jawabi, böje teebe ojwe okwa ju̧kwadö tjo̧'wo̧ jawabi.

Éxodo 8:10

Itekwayida— atadijetö faraónma Moisésnöma. Jo̧kwaobetjö̧ Moisés jö̧ba̧lijetö: —Weköbi̧danö baibakobe kwöwaisachibobö, Israel jojodö Tjuluwo̧ Dios, Isabenö Jo̧ma, bakwo̧da. Jelo̧ tjösödökwe jo̧badajayo̧ma deobe, jö̧ba̧lö.

Éxodo 9:14

Jobadönö ina latjebokobö kakatakwawökötjö̧ma babema jwiinö lȩtebocha ökwönöma. Ja̧danö, kwömöayedönödamakö̧, kwömöledönödamakö̧ ökwönödabi jwiinö lȩtebocha kwöwaisachibobö, böjenöma Isabenö Jo̧dajayo̧ma deobe, jö̧ba̧lö— Jejenö yökawonö, Moisés. Ina yökawo:

Isaías 40:25

Jobekwö jo̧be chömöledö, jo̧kwajabetjö̧ baikwö abebö a̧ja̧kwobe Inesö Suli̧ Jwibo̧ma: —Tinö wanedö, –Diosma bitedanöbo̧, –jö̧ba̧lö labebö lobö yöka̧laduwakwa̧da? Bakwo̧bi ötjödanöbo̧ ö̧jenaji̧?

Isaías 44:6

Israel jojodötjö inesö la'aka luwo̧, Isabenö Jo̧, israel jojodönö tjöbeba̧lö pjabato̧, Okobe Jwiinö Juluwo̧ Isabenö Jo̧ Diosma baikwö yöa̧lobe: Ötjöma ju'wedötjö ajayinö ji̧nasa̧, ja̧danö ju'wedötjö ikena chö̧jakwo̧sa. Jelo̧ Diosbo̧ma deobe, ötjödasa isabenö Diosbo̧ma.

Isaías 46:5

Isabenö juluwo̧sa chömöledö, ju'wedö tjösödawö̧tjö, diteda ötjödajayo̧ma? Tinö wanedö, —Isabenö Jo̧ Diosma bitedanö bakwaibo̧, —jö̧ba̧lö yöka̧laduwakwa̧da? Bakwo̧nö, —Diosdanöbo̧, —jö̧ba̧lö kwomukwataduwitjö̧ma, badedö dedo, isabenö bakwaibedö dö̧jojobö jö̧ba̧lö.

Isaías 46:9

Damötjö̧ ötjö chujulu chi̧sȩbina jawa kwomukwatibaduwo chömöledö. Jelo̧ ötjödanöbo̧ ö̧jobeji̧? Deobe jö̧tö? Isabenö ötjödasa Diosbo̧ma, jelo̧ma deobe. Jau bakwo̧bi ötjödajayo̧ma deobe,

Hechos 17:29

Jo̧kwaobetjö̧, isabenö ökwödöma Dios otidinawö̧obetjö̧ ¿dakwö kwomukwataduwobö Diosma orotjö, platatjö, inawatjö, jojodö omukwatö tjotidi̧danö ichejekwo̧, jö̧ba̧löma? Ja̧maökö. Dios, ökwödönö otidinama ja̧ jojodö tjotidi̧danöma ichejekwö̧kö̧.

Deuteronomio 33:26

—Baikwö yötawaduwakwö ökwödö israel jojodönö: Ju'wedö tjösödawö̧tjö bakwo̧bi deobe, ökwödö kwösödaduwökwe Diosdanöbo̧ma. Jo̧bama mölejebenö kwebacho̧, ökwödönö pjabatö, iteda dejatinö ujulunö, mölejebenö kwebacho̧.

Deuteronomio 4:15

Tupakwö yöawinobe Moisesma, israel jojodönö: —Chömöledö, ja̧ möle Isabenö Jo̧ Sinai mösa'otjö yöawina möle kwomukwatibaduwo. Ja̧ möle ökwöla okwatjö Isabenö Jo̧ ökwödönö yöawenama, iteba'o kwedinaduwokobe, sule iwene ökwöi̧da kwa̧ja̧kwinaduwobe, jö̧tö? Jo̧kwajabetjö̧ ja̧ jawa omukwatö, teada̧lönö ja̧nö kwö̧jaduwo,

Colosenses 1:15

Jo̧ba Cristonö dedenama, öwawö̧kö̧ Diosnöbi dedobedanö ichejekwa, Cristoma okobe jwiinö Dios jawa i̧sekwobetjö̧. Ja̧danö, jo̧bama okobe deinö Dios otidinawö̧tjöbi, okobe jwiinö Dios otidina jawatjöbi la'aka luwo̧danö jo̧ma jo̧ba Cristoda,

1 Samuel 2:2

Isabenö bakwo̧bi deobe ökwödanö suli̧ jwibo̧ma Isabenö Jo̧ chuluwo̧, isabenö ökwödajayo̧ tjösödökwema deobe. Isabenö ökwödajayo̧ inawa 'diawa tjöbeba̧lö kwöji̧danöbo̧ma deobe Chuluwo̧ Dios.