Isaías 37:16 - Dios Iwene

¹⁶ —Chuluwo̧ Isabenö Jo̧ Okobe Jwiinö Juluwo̧, Israel jojodö dösödökwe Dios, ökwö angeledö querubines tjöwame kwiteaka inesö la'aka luwo̧ ö̧bakanö bo̧nö baikwö atebakwö: Chuluwo̧ Dios, ökwödaja isabenö Diosbo̧ma, bö̧jȩ ba̧kwemeachibanö tjiteboteniatjö, jelo̧ Diosbo̧ma deobe. Ökwödaja mölȩjȩbi bö̧jȩbi otidinaja chuluwo̧ Dios.

Isaías 37:16 ပူးပေါင်းရင်းမြစ်များ

Génesis 1:1

Ajayinöma Dios wa̧pedijetö okobe jwiinö, mölejȩbi böjȩbi.

2 Samuel 7:26

Inesö otiwo̧ kwö̧ji̧ wene öwawakobetjö̧. Jau chuluwo̧, jejenö ja̧köbiawö̧, bö̧jȩ jojodöma ba̧kwelöjatebö ösödö yötja̧lakwedö, Isabenö Jo̧ Okobe Jwiinö Juluwo̧ Diosma, israel jojodö tjuluwo̧ Dios jö̧ba̧lö. Ja̧danö pjakatawö̧, chi̧tji̧mu tupadanö jojodöma ba̧kwelöjatebö israel jojodö tjuluwedö ja̧nö kwöba a'o tjö̧jakwedö.

1 Reyes 18:32

Ja̧danö, ja̧ inawiyanö Isabenö Jo̧ Diosnö ösödö iyawemi otidinobe. Jemi ikenama, otidajo̧, iyawemi söpödö i̧sa̧la soinobe. Ja̧ soaja̧ma, ja'yubenö nöinö soinobe, soajemi ödebiyatjö quince litro jenanö a̧jibo jö̧a̧lenanö baibanö, soinobe.

1 Reyes 8:6

Ja̧danö, Dios iteapjo, wei̧ wȩyukwa öbiya döbölataja a̧ja̧pjo e'ewajadö, jo̧ jö̧a̧lemi tjujuninobe, Dios ejutjö okwasȩko̧nö, inesö 'da̧batö junawȩko̧nö, querubines ötjabawö̧ angeledö tjöwa̧ja̧pa teebe.

2 Reyes 5:15

Jobekwö balediökwe, okobe deinö ömöayedö jo̧bakwö kwebachadönö öbibö tjeachajinobe Dios yöawi̧ yöbawo̧ Eliseo ö̧jobekwö, ja̧danö öba a'o öjamatinobe. Ichibajo̧, Eliseonö yöa̧linobe, —Isabenö yötawakwö, babe chöwaisachibajabe, bö̧jȩ ba̧kwemeachibanö jelo̧ Diosbo̧ma deobe, sule bemi niji israeltjöda isabenö Diosbo̧ma ö̧jobe. Ja̧danö, babe atebakwö, ötjö kwömöayo̧ma, bi̧ya iyawa ökwönö chiyobö chichejebajabe, ja̧danö kwemobö atebakwö, —jö̧ba̧lö.

Éxodo 25:22

Moisés, jobeda, ökwönö yöba̧lö chichocha, ö̧tjö weti̧ wȩyukwa öbiya a̧ja̧pjo muchekwapi wamenö. Ja̧pi wamenö ja̧dö, queribines mikwadö tjö'da̧denö chichocha. Jobetjöda ökwönö yötawocha kwö̧jaduwobö weti̧ma, Israel jojodönö yökawobö— webijetö Isabenö Jo̧ma Moisésnö.

Isaías 37:15

Ja̧danö Isabenö Jo̧ öba a'o ja̧nö, baikwö aebinobe Ezequiasma:

Isaías 37:20

Jobadödanöbö̧kö̧ja chuluwo̧ Isabenö Jo̧ Dios, jo̧kwajabetjö̧ atebakwö, jo̧ba Senaquerib ujulutjö dö̧jibinö pjakatobö, okobe deinö tjitebotenia jojodöma edö ökwönö tjöwaisakobetjö̧, ökwödaja Isabenö Jo̧ma, jelo̧ma deobe jö̧ba̧lö, —Diosnö aebinobe Ezequiasma.

Isaías 40:22

Bö̧jȩ wame ja̧ka iteaka inesö la'aka luwo̧ ö̧bakanö bo̧ Diosma, jwiinö möakwo bo̧, ja̧danö jo̧ba öba a'otjö bö̧jȩ jojodöma pjebadö ma̧la̧ka̧yudanö ichejekwadösa. Jau chömöledö, inesö juluwo̧obetjö̧, sabana'wo sedatö tjö̧ni̧danö, mölejȩ sedatö nöno̧, iteda eju sabana'wotjö otikwejudanö baibakobetjö̧.

Isaías 40:28

Diosnö la'akatjöda kwa̧ja̧kwinaduwökiji̧? Yötjawi̧ okwa jawa la'akatjöda do̧katinaduwökiji̧? Isabenö Jo̧ma, ba̧kwelöjatebö jo̧ Dios chömöledö, jo̧bada okobe jwiinö bö̧jȩ otidinama. Jo̧bama la'akatjöda 'dö̧bachibö̧kö̧, ja̧danö la'akatjöda me'dawachibö̧kö̧. Ja̧danö okobe jwiinö waiso̧, bakwo̧bi okobe jwiinö Dios öwaisi̧ jawa öwaisachiboböma jwiobe.

Isaías 42:5

Chömöledö, Isabenö Jo̧ Diosda mölȩjȩ otidajo̧, sedatö nöninama, ja̧danö jo̧bada bö̧jȩbi, okobe jwiinö bö̧jȩtjö pokwi̧bi otidinama. Jo̧bada okobe deinö bö̧jȩnö ju̧kwadönö tjo̧'wo emapjo iyo̧ma, bö̧jenö kwebachö ju̧kwadönö ja̧kwawa iyo̧ma Isabenö Jo̧ Diosda. Ja̧danö, jo̧bada baikwö yöawobe omudawö ujuninökwenö:

Isaías 44:24

Baikwö yöa̧lobe ökwödönö tjöbeba̧lö pjabato̧, ina kwojo'do jukwa'wo okwa ina kwö̧jaduwayi dadö otidina Isabenö Jo̧ Diosma: Ötjöma okobe jwiinö otidina Isabenö Jo̧ Diossa. Ötjöda mölejȩ sedatö nöninasa, ötjöda jo̧dawa'ye bö̧jȩbi dadö otidinasa.

Isaías 44:6

Israel jojodötjö inesö la'aka luwo̧, Isabenö Jo̧, israel jojodönö tjöbeba̧lö pjabato̧, Okobe Jwiinö Juluwo̧ Isabenö Jo̧ Diosma baikwö yöa̧lobe: Ötjöma ju'wedötjö ajayinö ji̧nasa̧, ja̧danö ju'wedötjö ikena chö̧jakwo̧sa. Jelo̧ Diosbo̧ma deobe, ötjödasa isabenö Diosbo̧ma.

Isaías 45:12

Ötjödasa bö̧jȩ otidinama, ja̧danö otidajo̧, ötjödasa jojodönö chotidijatö, bö̧jenö tjö̧jakobetjö̧. Ötjödasa mölejȩ sedatö nöninama, ja̧danö ötjödasa si̧li̧'idö tjö̧lakwena tjö̧lobö webinama.

Isaías 45:22

Jau, ötjöda Diosbo̧ma, jo̧kwajabetjö̧ sulabenö kwomukwataduwi̧ kabatibö, balewachö ötjönö kwösödaduwo, ökwödönöbi kwö̧jibaduwinö pjatatakobetjö̧. Jau, okobe deinö bö̧jȩnö ju̧kwadö, bö̧jȩ bakwachö̧je ju̧kwadöbi ötjönö kwödösaduwo, ötjöda Diosbo̧chobetjö̧, ja̧danö jelo̧ diosbo̧ma deobetjö̧.

Isaías 54:5

Jau, ökwö kwilekwedanöbo̧ma, ökwönö otidina Isabenö Jo̧ Okobe Jwiinö Juluwo̧ Dios jö̧ba̧lö mikwo̧da. Ökwönö kwö̧ji̧binö pjabato̧ma, Israel jojodö tjösödökwe Suli̧ Jwibo̧ Dios, okobe deinö bö̧jȩnö ju̧kwadö tjuluwo̧ Dios jö̧ba̧lö ötjabökweda kwilekwedanöbo̧ma, jo̧kwajabetjö̧ tabakwö kwö̧jobö jwibujuja.

Isaías 6:3

Ja̧danö bakwo̧nökwena jwötjakwawobe cha̧ja̧kwijatö, —Bakwainö sulabe jwibö jo̧, bakwainö sulabe jwibö jo̧, bakwainö sulabe jwibö jo̧, duluwo̧ Okobe Jwiinö Juluwo̧ Isabenö Jo̧ Diosma. Jo̧bama inesö dejatinö juluwo̧obetjö̧, okobe jwiinö bö̧jema iteda dejatinö ujulutjö su̧'bȩ baibajabe, —jö̧ba̧lö bakwonökwena jwötjakwawobe cha̧ja̧kwijatö.

Isaías 8:13

Jau Isaias, ju'wedö yetjabi̧ jawama yekaboko, ötjö Okobe Jwiinö Juluwo̧ Isabenö Jo̧ Diosnö yebabinö omukwatö kwösödo, –Isabenö Jo̧ma inesö suli̧ jwibo̧, –jö̧ba̧lö. Ötjönöda omukwatö yebabinö tjö̧bawö kwö̧jo Isaias.

Juan 1:3

Ja̧danö jo̧ba, Dios Iwene Jo̧, jö̧ba̧lö, ötjabökwema okobe jwiinö otidijetö. Jo̧ba otidinökötjö̧ma ja'yubebi batibokoinobe.

Deuteronomio 10:17

—Jau chömöledö, isabenö Dios wei̧ kwa̧ja̧kwaduwobö jo̧be, baikwö yötawa: Kwuluwo̧duwi Isabenö Jo̧ Diosma, okobe deinö tjösödawö̧tjö inesö Diosbo̧ chömöledö, ja̧danö okobe deinö luwedötjö inesö la'aka luwo̧, ja̧danö jo̧bada inesö juluwo̧ Diosma, okobe deinö yetjaibo jö̧tja̧lökwema. Ju'wibi, wainökwena omukwatökönö, bakwainö edo̧ jo̧bama jojodönö. Ju'wedö lȩekwa jojodöma jweinö yöbawökönö, jojodö tjimidobö abebadö, sulabenö lȩekwa yötjawobö, jo̧kwaijayonö jejenöbö̧kö̧ Diosma chömöledö, bakweminö jweinö lȩbebo̧, juna̧ladönöbi jwibadönöbi.

Colosenses 1:16

Diosma jo̧banötjö okobe jwiinöbi okobe deinöbi otidinobetjö̧. Jau chömöledö, Cristonötjö Diosma okobe jwiinöbi okobe deinöbi otidinobe, mölejȩnö ji̧bi, böjȩnö ji̧bi, jojodö tjedi̧ jawabi, tjedökö jawabi. Cristonötjö Diosma okobe deinö luwedönö ujuninobe, böjȩ luwedönöbi, mölejȩ luwedönöbi. Jau chömöledö, Cristonötjö okobe jwiinöbi okobe deinöbi otidinobe Diosma, Cristo ösödi̧danö tjö̧jo jö̧ba̧lö.

Hebreos 4:16

Jo̧kwaobetjö̧ Jesúsma, Diostjö jojodötjö ö'weje la'aka pjabato̧ baibanö jo̧obetjö̧ Diosnö yöbawö, abebö yebabökönö dichibaduwo chömöledö. Isabenö, Diosma ökwödönö lȩlö̧jino edobetjö̧, ökwödönö pjabato̧ do̧'wo̧ tjo̧bekwö dö̧jenama. Chömöledö, Dios, lȩlö̧jino edö pjabato̧nö do̧'wo̧ luwo̧ okwanö dichibenama, jo̧bakwö ö'wachö döbamatobe.

1 Samuel 4:4

Jejenö yöba̧lakwawajadö, Silo comunidadbe wetjinobe, tjichejebobö, ja̧danö wetjaja̧danö Dios weina a̧ja̧pjo, Isabenö Jo̧ okobe jwiinö juluwo̧ Dios, angeledö querubines mikwadö tjöwame inesö iteakanö bo̧ Dios iteapjo tje'ewinobe ölakwabikwawadö tjö̧jobekwö. Ja̧danö, Eli i̧tji̧mu du̧ju̧taja Ofni mikwo̧bi, Finees mikwo̧bi japjo isapjokwö tji̧'yinobe.