Isaías 35:8 - Dios Iwene

⁸ Ja̧danö niji ö'wejenö, jalama mana ja̧kobe, ja̧danö ja̧ma Sulabe jwibadö kwetjachama, jö̧ba̧lö ötjabakwama. Ja̧manö Dios öba a'otjö 'yȩekwi̧ juna̧ladöma kwetjachökakwedö, sule Dios wei̧ a̧ja̧kwö ju̧kwadöda jamanö tjö̧jakwedö. Ja̧manö la'akatjöda kwetjachökakwedö, sulabedö jweinö omukwatöködöma.

Isaías 35:8 ပူးပေါင်းရင်းမြစ်များ

Proverbios 16:17

Ja̧danö, ju'wibi yötawa: Otiwanö omukwatö jo̧ma jwaikwöda 'yo̧, sulabenö baledi̧tjö jelobekwö 'ya̧nö. Jo̧bama jwaikwöda 'ya̧nö, suli̧ jawatjö ö̧jibinö 'yo̧.

Proverbios 4:18

Jobekwömaökö Dios wei̧ a̧ja̧kwadö tjö̧ji̧ma. Dios wei̧ a̧ja̧kwadöma sulabenö omukwatadö tjö̧ji̧danö jö̧kö̧dö. Wanedö yötawakwö chitji̧: Dewachenama, i̧ya̧nö deapjo dewachobe tjo̧'o̧manö, ja̧wo̧ laebaja̧ tupakwö jwiinö dewobe jweinö öjenanö. Jobekwö Dios wei̧ a̧ja̧kwadö kwetjachamanö dewinö dejatobe, ajayinö dejatemitjö̧ tupakwö jwiinö dewinö dejatobe, otiwanö edö, salöamanöda tji̧'yobö.

Proverbios 8:20

Ötjöma Dios wei̧ a̧ja̧kwö, ja̧danö, jweinöda omukwatö ja̧bö jujusa.

Proverbios 9:4

— Ökwödö, wajwibadöma ichaduwi tekachaduwo jweinö omukwatö ja̧kwawa jojosuju jejube. Jobujuma ökwödö omukwatöködönö ja̧debobe, Ichaduwi tekachaduwo, jö̧ba̧lö.

Isaías 11:16

Jau, damötjö israel jojodö Egipto nijitjö latjebena, jwaibalawa ö'wejenö jalama po̧ebinadanö, Asiria nijitjö jalama baibanö ujunakobe Diosma, iteda ömöledö israel jojodötjö ina 'yaba̧ladöma jweinö tjitebobe tjetjachajakobetjö̧.

Isaías 19:23

Ja̧danö ja̧ mölema, mana otiwama ja̧kobe, Egipto nijitjö Asiria nijibe ichibanö, jojodö juluwanö otiwanö kwetjachobö. Ja̧danö Asiria jojodöma Egipto jojodönö dösölö̧jinö edö tji̧'yakwedö, ja̧danö Egipto jojodöma Asiria jojodönö dösölö̧jinö edö tji̧'yakwedö, ja̧danö Egipto jojodöbi, Asiria jojodöbi bakobe Diosnö tjösödakwedö.

Isaías 30:21

Isabenö otiwanö ökwödönö jweebakwo̧ chömöledö, baikwö yöta̧la: Kwölakwiyuduwinö ökömakwötjö kwa̧ja̧kwaduwakwedöja, —'Ya̧kwawa manama, bimada, bimanö kwekachaduwo, —jö̧ba̧lö. Jau, kwöwaisaduwakwöchobe jalachö kwi̧'yaduwobö jȩnabi, wajwiköbaduwakwöchobe jalachö kwi̧'yaduwobö jȩnabi, otiwanö jweebakwo̧.

Isaías 33:8

Jalama manama, jojodö deama jo̧be, yebabinö kwebachöködö dömöledö Juda jojodöma. Döpöjojodökwö wene jwiinö dö̧jakwa̧ wene yöbawö dujuninajayonö, yöbawö tjujunina wene kabatibadö. Jau, ju'wedö tjöba a'otjö öwawinö yöbawö tjujuninajayonö, —Yöbawö dujuninama mikwawökö ji̧, —jö̧ba̧lö kabatibadö, ja̧danö —Ja̧kwawama mikwawökö ji̧, —jö̧ba̧lö, jojodönö kwabö lobadö sulabenö.

Isaías 4:3

Jau, isabenö Jerusalen comunidad söbebö lotjakobe, jo̧kwaijayonö bakobe okobe deinö jobe ju̧kwadönö kwabawö lotjoböma weökakwo̧ Diosma, o̧bukwedönö tjö̧jibinö pjaatakobe. Ja̧danö, ja̧ möle jobadö tjö̧jibobö Dios pjaatinawö̧, ina Sion mösa'o comunidad Jerusalennö ju̧kwadönö ötjabikobe, —Diosda ömöledö, —jö̧ba̧lö.

Isaías 42:16

Ja̧danö, chömöledö tjöbajale tjewawadödanöbedönö pjatatocha. Jobadönö ötibakwo̧sa, mana edajitjökö mananö kwetjachobö. Ötjöda jobadönö jwetebakwo̧sa, ja̧danö tjöba a'otjö yȩa'woma, dewi̧ baibanö balewö lotakwo̧sa, otiwanö tjedakobetjö̧. Ja̧danö niji ya̧likwaobe inakoobema, ba̧ba̧ladö chotidocha, ba̧ba̧lawamanö otiwanö kwetjachakobetjö̧. Jobekwö isabenö chömöledönö pjatatakwo̧sa, ja̧danö jobadönö le'dedö lotökakwo̧sa.

Isaías 43:19

'Yayi jawa, babeda chotidakwa̧ jawa kwomukwataduwo. Ida̧ökö ja̧ 'yayi jawa jamatö chotidajabe chömöledö, edö kwomukwataduwökiji̧? Ötjöma jojodö deobe kököobe ö'wejenö mana chotidocha, ja̧danö ojwebiya jobe kököajemi lamatobö wetocha.

Isaías 51:10

Jau chuluwo̧, ökwöda damötjö jwaibalawa köködö lobinaja, inesö da̧kwawa köködö lobinaja, ökwöda kwömöledö israel jojodö, tjö̧jibinö pjakatajawö̧ma otiwanö tjöbaledakobetjö, jö̧tö? Yemidanö jobekwö pjakatobö adebakwö.

Isaías 52:1

Wilubi, wilubö a̧la̧ibi Sion mösa'o, yemidanö juluwachibi. Ökwö Dios itebo comunidad baibanö 'da̧batö ujuninemi Jerusalenma, otiwa̧do̧ 'dubawi, yȩbekwadöbi, Diosnö öpöjödadöbi kwitea apjude okwa tetjachökakwedö bemi tupakwöma.

Isaías 52:11

Jo̧kwajabetjö̧ labebö kwȩwa̧jaduwo chömöledö, ökwödönö öbibö tjeminelö labebö kwȩwa̧jaduwo. Jobe ja̧nö, yȩekwi̧ jawa maköbaduwoko chömöledö, jobe yȩekwelö labebö kwȩwa̧jaduwo. Ökwödö Dios eju jawa deja'di̧ju jawa tje'ewakwedöma, Dios öba a'otjö yȩekwi̧ jawatjö kwidichawaduwo, Dios eju jawa otiwanö Jerusalenbe e'ewö kwȩwa̧jaduwakobetjö̧.

Isaías 57:14

Diosma weobe, —Otidaduwi, mana ba̧ba̧ladö otidaduwi. Okobe jwiinö tjöekwemitenia 'yebö lobaduwi, chömöledö otiwanö wene jwiinö kwetjachakobetjö̧, —jö̧ba̧lö.

Isaías 60:21

ja̧danö okobe deinö kwömöledö israel jojodöma, bakobe weti̧ a̧ja̧kwö tjö̧jakwedö, ja̧danö 'döbibajökönö, ba̧kwelöjatebö otiwanö israel nijinö tjö̧jakwedö. Jau chömöledö, jojodö towi tjujuni̧danö, ötjöda israel jojodönö chujunocha, —Duluwo̧ Diosma otiwo̧, —jö̧ba̧lö ötjönö tjösödakobetjö̧. Ja̧danö chujunajawö̧, otiwanö 'diinö tjö̧jakwedö.

Isaías 62:10

Comunidad apjudebenö lakebaduwo chömöledö, Jerusalenbe ichibakwama mana otiwanö kwotidaduwo. Jalama otiwama baibanö kwotidaduwo, ja̧danö inawiya manatjö pjolatö loköbaduwo, Jerusalenbe tjichakwedö otiwanö kwetjachakobetjö̧. Ja̧danö mana i̧sȩba̧do̧, banderasa̧do̧ kabebö kwönaduwo, tjiteboteniatjö ichadöma mana otiwanö tjedakobetjö̧.

Isaías 62:12

Ja̧danö, jobadö tjö̧jibinö pjaatajawö̧ma, —Isabenö Jo̧ Ömöledö Suli̧ Jwibadö, tjö̧jibinö pjaatinawö̧—jö̧ba̧lö ötjabikwawö̧. Ja̧danö ja̧ möle Jerusalen comunidad ötjabikobe, —Dios ösödemi, kaatibökemi comunidad, —jö̧ba̧lö.

Mateo 1:23

Yötawaduwakwö, ina iso̧nö ja̧bökujuma, metu'wo jö̧jakobe, ja̧danö jitji̧nö jemakobe, ja̧danö jo̧banö Emanuel jö̧ba̧lö ötjabikobe, Diosma ökwödökwö jo̧, jö̧ba̧lö laebobe Dios iwene.

Juan 14:6

—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Juan 7:17

Ja̧danö, Dios ösödi̧ ösödadöma, ötjö yötawi̧ a̧ja̧kwö, ötjö chomukwati̧ yötawojobö, Dios omukwati̧da yötawojobö, tjöwaisachibakobe.

Efesios 2:10

Chömöledö, Diosma ökwödönö otiwanö pjabatijetö yemidanö do̧'wo̧ luwo̧nö 'yabibajadö badibanö. Ja̧danö, otiwanö pjabatijetö, Cristo Jesúskwö bakobe dötewadö badibanöma. Diosma jejenö pjabatijetö ökwödönöma, otiwanö ja̧bö dö̧jobö. Ajayitjöda omukwatijetö ökwödönöma, do̧'wo̧ luwo̧nö 'yabibajadö, Cristo Jesúskwö dötewadö otiwanö ja̧bö dö̧jakwa̧ma.

1 Tesalonicenses 4:7

Diosma ökwödönö jwöinokobe kwi̧lȩkwa̧muböködökwö ja̧köbaduwoböma chömöledö, sulabe jwiinö kwö̧jaduwo jö̧ba̧lö jwöinobe.

2 Timoteo 1:9

Jau Timoteo, Diosda ökwödönö dö̧jibinö pjabatinama, jo̧bada iteda ömöledö badibobö jwöbinama, jo̧kwajabetjö̧ usula emawö jwaikwöda otiwa jawa wene yöbawö kwö̧jo iteda ujulunö. Ja̧ Dios ökwödönö pjaatinama, otiwanö ja̧bö dö̧jiökwema pjaatinokobe, itedada la'akatjöda jejenö omukwatö ujuninobetjö̧ jejenö pjaatinobe. La'akatjöda Diosma omukwatö ujuninobe, Cristo Jesúsnötjö otiwa jawa mikwa jwiinö ökwödönö iyobö.

Hebreos 12:14

Chömöledö, ökwödöma kwö̧ja̧wo̧dökwö ösödabikwawö, wene jwiinö kwuju̧kwaduwobö kwisakwaduwo. Ja̧danö, Dios i̧tji̧mu bakibinaduwobetjö̧ sulabenö ja̧bökönö kwö̧jaduwobö kwisakwaduwo. Chömöledö, sulabenö ja̧bökönö ju̧kwadöma Duluwo̧kwö dötewinö ju̧kwadö. Isabenö chömöledö, sulabenö ja̧bö ju̧kwadöma Duluwo̧kwö dötewinö ju̧kwöködö.

1 Pedro 1:16

Jau chömöledö, jejenö ja̧bö kwö̧jaduwo, Kwabe'do Dios jejenö ja̧bö kwöjaduwobö weinobetjö̧. Baikwö laebobe Dios iwene, Dios wei̧ma: Ötjöma sulabe jwibo̧chobetjö̧, ökwödöbi sulabe jwibadö ja̧duwi, jö̧ba̧lö laebobe.

2 Pedro 3:13

Ja̧danö, ökwödö dite'ada̧li̧ma biya̧ chömöledö, mölejȩ 'yayöjȩ, ja̧danö böjȩ 'yayöjȩ Dios otidobö te'ada̧ladösa chömöledö, Dios yöbawö ujuninadanö. Ja̧danö, ja̧ 'yayöjȩ Dios otidakwöjȩma, suli̧ma jwiakobe, Dios inesö otiwi̧da ja̧kobe chömöledö. Jo̧kwajabetjö̧ ina böjȩnö dö̧jayi, Dios ösödi̧danö ja̧bö kwö̧jaduwo chömöledö, ökwödöma mölejȩ 'yayöjȩ jojodököbaduwobetjö̧.

1 Juan 2:20

Ja̧danö chö̧ja̧wo̧dö, ökwödöma Dios isabenö ji̧ iwene waisadöja. Jau chö̧ja̧wo̧dö, Jwiinö Otiwo̧ Cristoma Dios O̧'wo̧ Luwo̧nö ökwödö kwo̧'wo̧ luwo̧duwinö tebachibö ö̧jobö weinobe. Ja̧danö, Dios O̧'wo̧ Luwo̧ma ökwödö kwo̧'wo̧ luwo̧duwinö ö̧jobetjö̧ Dios isabenö ji̧ iwene waisadöja.

1 Juan 2:27

Jo̧kwaijayonö jelo̧ ökwödönö ba̧ja̧do̧ma ö̧jobe, Dios O̧'wo̧ Luwo̧, Cristo kwo̧'wo̧ luwo̧duwinö ö̧jobö iyinökwema. Ja̧danö, jo̧ba öba̧ja̧di̧ma jwiinö isabenö ji̧ yöawakwawa. Omönama jwiobe yelösöda jo̧ba Dios O̧'wo̧ Luwo̧ öba̧ja̧di̧ma. Jo̧kwaobetjö̧ jelobekwö omukwatö yöbawadö ökwödönö tjöba̧ja̧dobö jwiobe chö̧ja̧wo̧dö. Ja̧danö yötawaduwakwö, Dios O̧'wo̧ Luwo̧ öba̧ja̧di̧ma, biya̧: Cristokwö dötewinö kwi̧'yaduwo, chö̧ja̧wo̧dö.

Apocalipsis 21:27

Jo̧kwaijayonö suli̧ jawama teatakwawokobe, jwiinö otiwi̧ jawada. Jobema, 'yayi̧ Jerusalénöma, otiwakwö sulabekwö pjaacha̧lokobe. Ja̧danö, ba̧kwȩlö̧jatebö omöna yöba̧ladöbi tebachöködö. Tjimibiya wȩyukwadöda tetjachobe, Bidöma Dios ö̧jobe tebachö ja̧dö, jö̧ba̧lö, jö̧tja̧lawö̧da. Jobadöma, tjimibiya ba̧jadö, Obeja Itji̧danö Jo̧ u̧kwa kwialu'ye okwa.