Isaías 35:4 - Dios Iwene

⁴ Tjomajadenö yebabinö ju̧kwadönö yökawaduwo, —Kwujuluwaduwachibanö, yebabökönö kwö̧jaduwo, chömöledö. Jau chömöledö, kwösödaduwökwe Diosma isabenö pjabatö ichakwo̧, öpöjojodö sulabenö ja̧tjiökwe, balekwa mikwa dameakwö ichakwo̧, lȩebobö. Jau chömöledö, kwöpöjojodöduwitjö kwö̧jibaduwanö, otiwanö ichakwo̧ Diosma, kwujuluwachibaduwo, —jö̧ba̧lö ökwödötjö tjomajadenö yebabinö ju̧kwadönö tjujuluwachibanö yökawaduwo.

Isaías 35:4 ပူးပေါင်းရင်းမြစ်များ

1 Crónicas 28:20

Ja̧danö wȩyukwa'ye Salomonnö iyajo̧, tupakwö yöawinobe Davidma: —Chitji̧, kwujuluwachibanö yebabökönö ja̧nö kwotido. Yebabökönö ja̧nö, dakwö ja̧takwajö jö̧ba̧lö omukwatökönö kwö̧jo, ötjö chösödökwe Dios, Isabenö Jo̧ Dios ökwökwö ö̧jobetjö̧. Kwö̧jelö 'da̧bachibökönö, ökwönö le'dedö loökakwo̧ chitji̧, isabenö ökwökwö pjabatö ö̧jakwo̧, okobe jwiinö iteda eju, Isabenö Jo̧ eju, kwotido jö̧ka̧lidanö otidö kakatakwawenanö baibanö.

Isaías 1:24

Ja̧danö, ökwödö Jerusalennö ju̧kwadöbi, kwuluwedöduwibi jobekwö sulabenö ja̧köbaduwiökwe, isabenö lȩebakwo̧ Diosma. Baikwö yöawobe inesö la'aka luwo̧, Okobe Jwiinö Juluwo̧ Isabenö Jo̧, Israel jojodö tjösödökwe juluwo̧ Diosma: —Ökwödö Jerusalennö ju̧kwadötjö chöpöjojodö ötjökwö ölakwabikwawadönö lȩtebobö chisakwocha, ja̧danö sulabenö ja̧badö chöpöjojodönö balekwa mikwa suli̧ chöwaedocha.

Isaías 25:9

—Ja̧ möle baikwö yötja̧lakwedö Isabenö Jo̧nö: –Bite Isabenö Jo̧ Diosda, dösödökwe Diosma. Jo̧banö o̧'wo wana̧lö, pjaatakwa̧ diteada̧lajabe, -Isabenö ökwödönö pjaatakwo̧, -jö̧ba̧lö, ja̧danö otiwanö pjaatajabe. Dösödökwe Isabenö Jo̧ Diosma jo̧bada, jo̧ba pjaatakwa̧ diteada̧lajabe, jadanö babe ökwödönö pjaatajobetjö̧, do̧'wo ösöwachibanö dösödaduwo, -Diosma otiwanö dö̧ji̧binö pjaatajabe, –jö̧ba̧lö yötja̧lakwedö ja̧ möle.

Isaías 28:16

Ötjö Isabenö Jo̧ma baikwö yötawaduwakwö: Jerusalen mösa'o Sion mikwa'onö inawa chödocha, –Isabenö otiwawa, –jö̧ba̧lö badedö chedinawama. Jawa, o̧do la'aka baibanö, ajayinö lödawawa nöinö mikwawawa baibanö chödocha, o̧do la'aka 'diinö jakobetjö̧. Ja̧danö jawa ösödadöma, –Dakwö jatakwajö, –jö̧ba̧löma omukwatö tjö̧jökakwedö.

Isaías 31:5

ja̧danö isabenö Jerusalen comunidad tjöbeba̧lö chiteada̧lakwo̧sa. Pji̧yu tji̧tji̧mu tja̧'do̧nö ju̧kwadönö tjöbeba̧lö, wame kwöbö tjiteada̧li̧danö, isabenö tjöbeba̧lö chiteada̧lakwo̧sa, ja̧danö tjö̧jibinö pjatatakwo̧sa. Jau, Jerusalen comunidad wame baledö, isabenö tjöpöjojodö tjujulutjö tjö̧jibobö pjatatakwosa, —jö̧ba̧lö laebobe Isabenö Jo yöawi̧ma.

Isaías 32:4

Ja̧danö ja̧tja̧kwa̧ abönö otiwanö omukwatinöködöma, okwa jawa otiwanö omukwatö, isabenö wene tjösödakwedö, jadanö tjiwene tjöpöawö̧ma, otiwanö ökwöinö yötja̧lakwedö.

Isaías 33:22

Jau chömöledö, Isabenö Jo̧ Diosda duluwo̧ ö̧jakwo̧, Isabenö Jo̧ Diosda ökwödönö webö ö̧jakwo̧, Isabenö Jo̧ Diosda inesö la'aka duluwo̧ ö̧jakwo̧, ja̧danö jo̧bada dö̧jibinö pjaatakwo̧, döpöjojodö tjichibapji jö̧ba̧lö.

Isaías 34:8

Jau chömöledö, Edom niji jojodöma isabenö sulabenö ja̧tjinobe Sion mösa'o ju̧kwadönö, ja̧danö jobekwö sulabenö ja̧tji̧ökwe, balekwa mikwa jobadönö lȩebakwo̧ Isabenö Jo̧ma, ja̧danö yöta̧laja̧ jawa baledakwa̧ mölȩ ida̧ökö badedö ujunajabe.

Isaías 37:20

Jobadödanöbö̧kö̧ja chuluwo̧ Isabenö Jo̧ Dios, jo̧kwajabetjö̧ atebakwö, jo̧ba Senaquerib ujulutjö dö̧jibinö pjakatobö, okobe deinö tjitebotenia jojodöma edö ökwönö tjöwaisakobetjö̧, ökwödaja Isabenö Jo̧ma, jelo̧ma deobe jö̧ba̧lö, —Diosnö aebinobe Ezequiasma.

Isaías 37:6

jobadönö yöa̧linobe Isaiasma: —Baikwö yökawaduwo kwuluwo̧duwi Ezequiasnö: –Isabenö Jo̧ yöawi̧ma baikwö laebobe: Yebabökönuwi Ezequias. Asiria la'aka luwo̧ ömöayedö ötjönö sulabenö yötja̧laja̧ a̧ja̧kwajo̧, jobadönö yebabökönui.

Isaías 40:2

Dösölö̧jinö yöka̧lo chömöledö Jerusalennö ju̧kwadönö, jobadönö jwöbö yökawo: —Ölakwabikwawö kwö̧jaduwi̧ma ida̧ökö 'dö̧ibajabe. Ja̧danö sulabenö ja̧bö kwö̧jinaduwijayonö, Isabenö Jo̧ma ida̧ökö dötölatajanö ökwödönö lȩebajabe, ja̧danö kwusuladuwima söbebö loajabe, jö̧ba̧lö yöawobe.

Isaías 44:2

Ötjö Isabenö Jo̧ma, ökwödönö otidinasa, ina kwojo'do jukwa'wo okwa kwö̧jaduwayi, ökwödönö dadö otidinasa. Ju'wibi ökwödönö otidajo̧, ökwödönö pjabatö jo̧sa chömöledö, ja̧danö babema baikwö yöta̧laduwakwö: Chömöayedö Jesurun ötabiwö̧ Jacob itji̧mu tupadanö jojodö, ötjöda omudawö chujuninawö̧, yekabiduwoko, isabenö ökwödönö pjatatakobetjö̧.

Isaías 47:3

Kwa̧dobi 'yobekwö ja̧nö, kwa̧do jwibö kwö̧ji̧ öwawinö tjedobö kwö̧jakwujuja, jwiinö taba lö̧joko bakibanö. Jobekwö wanedö yöta̧la, ökwödö Babilonia jojodönö lȩtebakwa̧ma. Jau, chömöledönö sulabenö ja̧köbaduwi̧tjö̧, balekwa mikwa ökwödönö lȩtebakwo̧sa, ökwödötjö bakwo̧nöbi lȩlöinö edökönö, labinö lȩtebakwo̧sa,

Isaías 49:25

Jo̧kwaijayonö baikwö yöawobe Isabenö Jo̧ma chömöledö: Ötjöda kwöpöjojodöduwi, ökwödönö ölakwabikwawö juluwadönö chölakwabikwawakwo̧sa, ja̧danö ötjöda kwitji̧muduwinö tjujulutjö tjö̧jibanö pjatatakwo̧sa. Ötjöda chölakwabikwawobetjö̧, ölakwabikwawadö juluwö do̧tjatajawö̧ma, ejatö latjebawö̧ tjö̧jakwedö, ja̧danö inesö la'aka luwedö juluwö tjitea do̧tja̧taja jawama, jobadötjö 'döbebö tjemakwedö.

Isaías 49:4

Yöa̧li̧tjö̧, —Chuluwo̧, nöinö chotidinajayonö, mikwawinokobe. Chime'dawachibenanö baibanö labinö chotidinajayonö, chotidaja̧ma jwiobe, mikwawökö chotidaja̧ma, —jö̧ba̧lö. Jo̧kwaijayonö Isabenö Jo̧ Diosda chotidina mikwa̧wi̧ waiso̧ma, ja̧danö chotidaja̧ mikwama, jo̧bada iyakwo̧, wei̧ a̧ja̧kwö chö̧jiökwe, balekwa mikwa chemo jö̧tja̧li̧danö otiwanö iyakwo̧.

Isaías 59:18

Isabenö jweinö lȩebakwo̧ Diosma, jo̧ba öpöjojodö sulabenö ja̧badönö. Sulabenö ja̧tja̧ja̧ badekwachinö, balekwa mikwa jweinö lȩebakwo̧. Dameakwö lȩebakwo̧ öpöjojodönö, sulabenö ja̧tjiökwe balekwa mikwa lȩebakwo̧, bö̧jȩ bakwachö̧jȩ ju̧kwadö öpöjojodönöbi jweinö lȩebakwo̧.

Isaías 61:2

Jau, Isabenö Jo̧ jojodönö ösödö pjaatakwa̧ o̧ba badekwachaja̧ yötawobö weinobe, ja̧danö duluwo̧ Dios dameakwö lȩebakwa̧ möle badekwachaja̧ yötawobö, ja̧danö okobe deinö budekwadönö tjo̧'wo ösöwachibanö pjatatobö weinobe.

Isaías 63:4

Jau, tjitebotenia jojodö chömöledö israel jojodönö sulabenö ja̧tji̧ omukwatö, balekwa mikwa lȩtebobö jö̧ta̧lijatö, ja̧danö chömöledö tjö̧jibinö pjatatakwa̧ o̧ba ida̧ökö badekwachajabe.

Isaías 66:15

Isabenö labinö lȩebakwo̧ iteda öpöjojodönö chömöledö. Isabenö Jo̧ma ökwölanö ichakwo̧, ja̧danö itea kolukiyama juluwanö labinö ökwöinö ichakobe, labinö Dios inesö ödameakwi̧ lȩebakobetjö̧, ja̧danö iteda öpöjojodönö juwö loakobe ökwölanö.

Isaías 7:4

Acaznö badekwajo̧, yökawonö: –Teada̧lönö ja̧nö, yebabökönui. Kwomajadenö tjö̧bawökönö, idö juluwöködö la'aka luwedönö yebabökönö kwö̧jo. Jau Acaz, jobadö siria niji la'aka luwo̧ Rezinbi, israel la'aka luwo̧ Pekabi jwiinö tjö̧dameakwijayonö, juluwöködö, sule ökwöla ubö̧'a, juluwanö tiibö̧'adanö ichejekwadö. Isabenö jobadöma ökwönö suli̧ tjöwaedotö jö̧ba̧lö omukwatö tjujunajabe,

Daniel 10:18

Jejenö yöta̧liökwe, jojodanö ichejekwo̧ma yemidanö ötjönö mainobe, ja̧danö chujuluwachibanö pjaatinobe.

Daniel 10:19

Ja̧danö ötjönö yöa̧linobe: —Jojoso̧, Dios jwiinö ile niebökweja, yebabökönui, kwo̧'wo̧ ösöwachibanö ja̧wi. Kwujuluwachibanö ja̧nö yebabökönö ja̧wi— jö̧ba̧lö yöa̧linobe. Jejenö yöa̧litjö, chujuluwachibijatö, ja̧danö jo̧banö chatadijatö: —Tjo̧wi̧ ötjönö chujuluwachibanö pjakatajabe, jo̧kwajabetjö̧ yöba̧li̧ chuluwo̧— jö̧ba̧lö.

Lucas 21:28

Jejenö baledakobe chömöledö, ja̧danö jejenö baledakwa̧ jamatö baledenama, ju'wedö yetjabijayonö yekabiduwa chömöledö. Jejenö baledenama, ökwödöma kwo̧'wo̧ ösöwachibanö a̧laibö möakwö kwedaduwo, ida̧ökö ökwödönö kwö̧jibaduwinö chemakwa̧ yöneawachibobetjö̧— jö̧ba̧lö yöawinobe Jesúsma.

Efesios 6:10

Babema bajaleapo yöbawö chiwȩyuda, chömöledö. Duluwo̧ma jwiinö juluwo̧ ¿jö̧tö? Ja̧danö, iteda ujulunö pjaatobetjö̧ kwo̧'wo̧ luwo̧duwinö jemi tupakwö juluwachibanö kwi̧'yaduwo.

1 Tesalonicenses 5:14

Ja̧danö, tupakwö wedaduwakwö chömöledö, 'dö̧wekwachibadönöma kwöba̧ja̧daduwo, 'dö̧wekwachibökönö tjö̧jo jö̧ba̧lö. Ja̧danö yebabinö ju̧kwadönöma tjujuluwachibanö pjakataduwo. Ja̧danö me'dawadönöbi pjakataduwo. Jobadö okobe deinö pjabatö kwö̧jaduwenama, kwo̧'wo̧duwi 'dibachibö kwö̧jaduwo chömöledö, jobadönö öpöjödökönö.

2 Timoteo 2:1

Chitji̧danö chösödökwe Timoteo, Cristo Jesúsnö dötewanö kwö̧jiökwe, Diosma isabenö otiwanö lȩlö̧jinö iyökweja, jo̧kwajabetjö̧ baikwö wetakwö: Ja̧ Dios iyi̧tjö kwujuluwachibanö ja̧wi.

Hebreos 9:28

Ja̧danö, Cristobi bakwötanöda woinobe jojodö tjusula tjumusidi̧ midawö. Ja̧danö, ju'wi möle yemidanö ichenama jojodö dusula dumusidi̧ imidawobö ichökakwo̧. Yemidanö ichenama jo̧ba yemidanö ichakwa̧ te'ada̧ladönö mölejȩbekwö öibobö ichakwo̧. Jejenö okobe jwiinö dö̧jibinö pjaati̧ma tjo̧wi̧ kaatakobe.

Apocalipsis 1:7

A̧ja̧kwaduwitjö, Jesucristo yemidanö ichakwa̧ wenema: Jesucristoma yemidanö ichakobe ojwiyo'wonö, okobe deinö tjedinö. Okobe deinö jo̧banö inia tjöinö tibatinadöma, jo̧ba ichobema tjedakwedö. Ja̧danö, böjȩ bakwameachibanö, okobe deinö bakwasokwena ju̧kwadö, Jesúsnö öpöjödadöma, jo̧ba ichobe edö yebabinö tjubudekwakwedö, jo̧ba lȩebakwa̧ omukwatö, jö̧ba̧lö laebobe Dios iwenetjö. Jau, chömöledö, biya̧ Dios iwenetjö yötawi̧ma isabenö baledakobe, Jesús yemidanö ichenama.

Apocalipsis 2:10

Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.

Apocalipsis 22:20

Jesucristo, böja kwialusöjatjö laebi̧ma, Jweinö wene, jö̧ba̧lö, yöba̧lo̧. Jo̧bama, baikwö yöawobe ökwödönöma: —Isabenö yötawa, lekwökö chichakwa̧ma— yöawobe ökwödönöma. Chömöledö, jo̧bama isabenö yöbawo̧. Ötjöma jo̧ba yöawi̧ma, Lekwökö chichakwa̧ma, jö̧ba̧lö, yöawi̧ma, jwiinö chösöda. Jo̧kwaobetjö̧, jo̧banö yöta̧la, Jau, Duluwo̧ Jesús, ichi, jö̧ba̧lö.

1 Samuel 23:17

Jonatanma Davidnö yöa̧linobe, —Chabe'do ökwönö isakwijayonö, yebabökönui, chabe'do Saulma ökwönö öbadekwajökakobe. Isabenö ökwöma israel jojodö la'aka tjuluwo̧ bakibakwo̧ja, ja̧danö ötjöma kwömöayo̧ ja̧nö kwipjea jojo chö̧jakwo̧sa. Chabe'dobi ja̧ wene öwaisobe, isabenö ökwöma israel jojodö la'aka tjuluwo̧ bakibakwo̧ja, jö̧ba̧lö ja̧danö ötjöma kwömöayo̧ chö̧jakwo̧ja, jö̧ba̧lö öwaisobe chabe'do Saulma, —jö̧ba̧lö yöawinobe Jonatanma.