Isaías 32:17 - Dios Iwene17 Ja̧danö otiwanö Dios wei̧ a̧ja̧kwö tjö̧jiökwe, wene jwiinö ölakwabikwawökönö tjö̧jobö pjaatakobe. Okobe jwiinö ditebo ba̧kwemwachibanö, lekwe möle wene jwiinö tjö̧jakwedö, ja möle ju̧kwadö Dios wei̧ a̧ja̧kwö tjö̧jobetjö̧. အခန်းကိုကြည့်ပါ။ |
Isaías 32:17
35 ပူးပေါင်းရင်းမြစ်များ
Ja̧danö, ja̧ möle bandera ötjabi̧ jawa öwawi̧danö, Isai itji̧ tupadanö jojo la'aka luwo̧ma öwawinö öjamatakwo̧, okobe deinö bö̧jȩnö ju̧kwadöma joba ö̧jobekwö ko̧ko̧kwö tji̧'yakobetjö̧. Ja̧danö, öba a'o ichibajadö, tjitebotenia jojodöma jo̧banö abebö tja̧ja̧kwakwedö, otiwanö ja̧bö tjö̧jakwa̧ tjöwaisakobetjö̧. Ja̧ mö̧le, isabenö okobe deinö jojodöma jo̧ba itebo comunidad ösödö otiwanö tjomukwatakwedö, —Duluwo̧ itebo comunidadma dejatinö salöi̧ comunidad, —jö̧ba̧lö.
Jobekwö ko̧ko̧dö ichejebiawö̧, israel jojodökwö, Juda jojodökwö wene jwiinö tjö̧jakwedö. Israel jojodöma, Juda jojodönö tjome suli̧nö tjedi̧ma katjatibakobe, ja̧danö tjome sulinö edökönö, otiwanö Juda jojodökwö dösölö̧jinö tjö̧jakwedö. Ja̧danö Juda jojodöma, Israel jojodönö tjölabi̧ma katjatibakobe, jadanö ölakwabikwawökönö, Israel jojodökwö dösölö̧jinö tjö̧jakwedö.
Jobekwö isabenö baledakwawö̧ja chömöledö, Dios yöawi̧ kwöpöjödinaduwobetjö̧. Jau chömöledö, Isabenö Jo, Israel jojodö tjösödökwe Sulabe Jwibo̧ Diosma ökwödönö yöawinobe, —Sulabenö kwomukwataduwi̧ kabatibö, tjebachajö ötjönö kwo̧'wo kwöwana̧laduwitjö̧ma, kwö̧jibaduwakwedöja. Kwujuluduwi̧ma, ökwödöda jawamaökö, wi̧inö ja̧nö, ötjönö ösödö kwo̧'wo kwöwana̧laduwitjö̧ma, ja̧ kwösödaduwi̧da kwujuluduwi̧danö ja̧kobe, —jö̧ba̧lö yöawinobe. Jo̧kwaijayonö yöawi̧ a̧ja̧kwajadö, kwösödaduwoböma öpöjödinadöja chömöledö.
Jo̧bada 'diinö kwö̧jaduwobö pjaatakwo̧ma chömöledö, jo̧bada kwö̧jibaduwinö pjaatakwo̧. Jobada waisakwawa jawa ba̧ja̧dö, waisanö kwomukwataduwobö pjaatakwo̧. Isabenö nöinö mikwawobe jo̧banö yebabinö kwösödaduwi̧ma, ju'wi mikwawi̧ jawatjö bajalekwönönö mikwawi̧, ökwödö Sion mösa'o ju̧kwadö Isabenö Jo̧nö yebabinö ösödö kwö̧jaduwi̧ma.
Chömöledö, isabenö ökwödönö weti̧ kwa̧ja̧kwaduwo jö̧ka̧linaduwobe. Weti̧ a̧ja̧kwö kwö̧jinaduwatjö̧ma, isabenö otiwanö kwö̧jaduwo jö̧ka̧linaduwobe. Baikwö wanedö yöta̧la, ojwe tjo'omanö kabatibökönö isuwi̧danö, ja̧danö jwaibalawa kabatibökönö ba̧kwelöjatebö loidanö, ba̧kwelöjatebö wene jwiinö ja̧nö, otiwanö kwö̧jaduwo jö̧ka̧laduwena.
Ja̧danö baikwö yöbawö chujunaduwakwö chömöledö: Ju'wedö tjujuluwajawö̧ kwö̧jaduwelö, kwo̧'woduwi ösöwachibanö lakebaduwakwedöja, ökwödönö ötibonö, wene jwiinö lakebaduwakwedöja. Ja̧danö jobekwö otiwanö lakebaduwobetjö̧, kwabönöduwitjö mösa'ijuma lo̧akobe ichejekwa, ja̧danö towibiyama ömamiju 'bȩakobedanö ichejekwakobe.
Baikwö yöawobe Diosma: Baikwö wanedö yötawaduwakwö: Isabenö otiwanö pjatatocha Jerusalennö, ojwe kabatökönö isuwi̧danö, otiwanö jö̧jobö pjatatocha, ja̧danö tjitebotenia jojodö tjitea nöinö mikwawi̧ma, ojwe okwatibi̧danö jobujunö welachobö wetocha. Ja̧danö ökwödö jitji̧muma, otiwanö kwö̧jaduwakwedöja. Kwojo'doduwi Jerusalenma otiwanö jo̧do'bi̧ ojwö jiteada̧lakwawö̧ja, ja̧danö jö̧dö̧lö'anö apjö̧alö je'ewakwawöja, ja̧danö ji̧sȩ'bonö wananö döjeabikwawö̧ kwö̧jaduwakedöja.
Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.
Jau chömöledö, Dios ömöayedö dö̧ji̧ma kwakwawa jawamaökö, owawa jawamaökö. Ju'wida chömöledö, Dios ömöayedö dö̧ji̧ma. Dios O̧'wo̧ Luwo̧ma ökwödönö ja̧inobe, sulabe jwibadö badibanö, ja̧danö tupakwöbi pjaatobe ökwödönöma. Jau chömöledö Cristonö ösödadö dömöledökwö wene jwiinö dö̧jobö, do̧'wo̧ ösöwanö wene jwiinö dömöledökwö dö̧jobö pjabato̧ Dios O̧'wo̧ Luwo̧ma. Ja̧da Dios ömöayedö ja̧kwawama chömöledö.
Chömöledö, otiwanö ökwödönö ja̧bö dö̧jina wene yötawaduwakwö, ökwödönö sulabenöma ja̧binöködösa jö̧ba̧lö. Jau chömöledö, okobe jwiinö böjȩnö ja̧nö ja̧di̧ma, ja̧danö ökwödönö ja̧bö dö̧ji̧ma sulabenö ja̧bökönö dö̧jijatö, Dios pjaatonö jweinö ja̧bö dö̧jijatö chömöledö. Ja̧danö, ja̧bö dö̧jinama ökwödöda waisanö omukwatöma ja̧dijökötö chömöledö, Diosda lȩlö̧jinö edö ökwödönö pjaatobetjö̧, otiwanö ja̧bö dö̧jijatö chömöledö. Jejenö yötawaja̧ma, jweinö yötawa chömöledö, ja̧danö chomajadenö chöwaisa, isabenö yötawa jö̧ba̧lö.
Ja̧danö döwaisa chömöledö, kwabö lȩebajökwema usula emawö jo̧, o̧'wo̧ ösöwanöma jö̧könö. Jo̧bama o̧'wo̧ tjo̧bekwöda jo̧, ¡Ötjöwe! jö̧ba̧lö. Jo̧kwaijayonö, jemi tupakwöma omukwatobe, Isabenö, ja̧ ötjönö yöbawö kwabö lȩebi̧ma pjaatobe jweinö omukwatö chöda̧peachobö, jö̧ba̧lö. Jejenö omukwatö o̧'wo̧ luwo̧ okwanö wene jwiinö ö̧jobe.
Chömöledö, kwö̧ja̧wo̧dönö dösölö̧jinö pjakataduwi̧danö Jesúsnö do̧batö kweminaduwa baikwö, babebi kwo̧'wo̧ luwo̧duwi okwanö dösölö̧jinö kwi̧'yaduwo, jwaikwöda Diosnö kwo̧'wo̧duwi wana̧lö. Chömöledö, jwaikwöda kwi̧'yaduwobö chösöda, Diosnö kwo̧'wo̧duwi̧ wana̧lö, Okobe jwiinö Dios yöbawö ujuninama isabenö baledakobe, jö̧ba̧lö. Jejenö te'ada̧lö jwaikwöda kwi̧'yaduwo chömöledö, okobe jwiinö Dios yöbawö ujuninama badekwachenanö kabatö.
Ja̧danö, chö̧ja̧wo̧dö ökwödöma Dioskwö bakobe dötewinö 'ya̧dösa. Ja̧danö, Diosma ökwödökwö dötewinö 'yo̧. Jejenö 'ya̧nö Diosma ökwödö do̧'wo̧ luwo̧ okwanö öibobe dö̧ja̧wo̧dönö ile nibebö dö̧jobö, jo̧ba ökwödönö ile niebi̧danö. Chö̧ja̧wo̧dö, jejenö dö̧jenama Dios ökwödö dö̧jobö ösödi̧danö dö̧jobe, jo̧ba ile niebi̧ma i̧sebö. Ja̧danö, jejenö dö̧jobetjö̧, Dioskwö dötewinö 'ya̧nö, ja̧danö dö̧ja̧wo̧dökwö ösödabikwawö ju'wi möle, jojodönö lȩekwa yöawakwa̧ möle omukwatö yebaböködösa. Chö̧ja̧wo̧dö, ökwödöma Jesús Dioskwö dötewinö ö̧ji̧danö böjȩnö ja̧nö Dioskwö dötewinö di̧'yobetjö̧ ja̧ lȩekwa yöawakwa̧ möle omukwatö yebaböködösa, Isabenö Dios öba a'o otiwanö dichibakwedösa, jö̧ba̧lö.
ကြော်ငြာတွေ