Isaías 30:1 - Dios Iwene

¹ Baikwö yöawobe Isabenö Jo̧ma: —Chitji̧mu kwuuduwi 'dibadö, isabenö usula kwemawaduwakwedöja. Ökwödöma omukwatö kwujunaduwaja̧danö badekwachinö ja̧badöja, jo̧kwaijayonö ötjö omukwatö chujuninadanömaökö. Ja̧danö ju'wedökwö bakobe pjabatakwawö kwöjaduwakwa̧ wene yöbawö kwujunaduwajabe, jo̧kwaijayonö ötjö cho̧'wo luwo̧ weawö̧, jobekwö yöbawö junöködöja. Jau, ida̧ökö sulabenö ja̧bajadö, ajayitjö̧ bajalekwönönö tupakwö sulabenö jabadöja.

Isaías 30:1 ပူးပေါင်းရင်းမြစ်များ

2 Reyes 18:21

Chedemi Egipto la'aka luwo̧nö kwo̧'wo wa̧na̧lö kwö̧jena, -Chöjibobö pjaatakwo̧, -jö̧ba̧lö. Jo̧kwaijayonö baikwö yöta̧lakwö: Jobadönö tjo̧'wo wana̧ladönö pjabatökönö, suli̧ waedadö Egipto jojodöma, tokwöte juluwanö 'deawötedanö. Jau, bakwo̧ ja̧jaye tokwöte öwanawitjö̧ma, 'deawena, ja̧danö 'debawö, ömamunö söibena, jö̧tö? Jobekwö ichejekwo̧ Egipto la'aka luwo̧ Faraonma, jo̧banö tjo̧'wo wana̧ladönöma.

2 Reyes 18:24

Jo̧kwaijayonö chedemi kwömöayedötjö dos milbedö kabayudönö wanö ölakwabikwawadö deobe Ezequias, jo̧kwajabetjö̧ ökwödökwö kwölakwabikwawobö juluwö̧kö̧ja. Jau, chuluwo̧ ömöayedö ölakwabikwawa luwedötjö, ju'wedötjö baikwönönö juluwö̧kö̧nöbi kwujuluwobö jwibo̧ja. Ja̧danö, –Egipto jojodöma kolukiyanö ölakwabikwawadönöbi, kabayudönö wanö ölakwabikwawa jojodönöbi wetjakwedö, –jö̧ba̧lö kwo̧'wo kwöwana̧lobö jwiobe, isabenö ökwödötjö kwö̧jibobö jwibo̧ja.

Isaías 1:2

Bö̧jenö ju̧kwadöbi, mölejenö ju̧kwadöbi kwa̧ja̧kwaduwo, Isabenö Jo̧ yöawaja̧ jawama, baikwö: Tjemu chö̧da̧pedinawö̧ma, ötjönö öpöjödö katjatibajabe.

Isaías 1:23

Ja̧danö kwuluwedöduwima, tjuluwedö wetji̧ sulabenö kabatibö ölakwabikwawadö ja̧nö, naukwabidökwö pjabacha̧lö ju̧kwadö. Jau, okobe deinö kwuluwedöduwima, sulabenö ja̧tja̧kwa̧ midawa ösödadö, jadanö kabatökönö ju'wedö sulabenö jobadönö tjimidobö isakwadö. Ju'wibi, tjilekwamunö wobekwinadönöbi, löyödönöbi tjöbeba̧lö pjatjato jö̧tja̧lijayonö, tjöbeba̧löködö ju'wedö jobadönö suli̧ tjöwaedenama.

Isaías 1:4

Ayö, chömöledö israel jojodöwe! Isabenö nöinö sulabenö ja̧badö israel jojodöma. Jobadöma bakobe sulabenö ja̧badö, chi̧tji̧mu otiwadö tjö̧jo jö̧tja̧lijayonö, suli̧ waedö ja̧bö ju̧kwadö, sulabenö. Jau, ötjö Isabenö Jo̧nö tjösödo jö̧tja̧lijayonö, öpöjödö, ötjö Sulabe Jwibo̧ Israel jojodö tjuluwo̧ Diosnö kabatibö, 'da̧bachibö ju̧kwadö israel jojodöma, sulabenö.

Isaías 1:5

Chömöledö israel jojodö, tajawedö yemidanö ökwödönö lȩtebobö ja̧badöja? Tajawedö jwaikwöda weti̧ a̧ja̧kwökönö kwö̧jaduwobedaja? Ida̧ökö nöinö inia tjöbadöja chömöledö, baikwö wanedö yötawa: Kwuuduwi inia tjököbaduwinö labinö kwatjawö̧danö ichejekwadöja, ja̧danö kwomajadeduwi ida̧ökö me'dawadödanö ichejekwadöja.

Isaías 28:15

—Ökwödöma Egipto jojodökwö bakobe pjabatakwawö kwö̧jaduwakwa̧ wene yöbawö kwujuninaduwobetjö̧, omukwatadöja: –Ökwödöma Egipto luwedökwö bakobe pjabatakwawö dö̧jakwa̧ wene yöbawö dujuninobetjö̧, ö'wö badibökakwedösa, ja̧danö ö'wö babibajadö tjö̧jemi dichibökakwedösa, otiwanö wene jwiinö dö̧jakwedösa. Jau, inesö labinö kwakwaakwawopja ji̧danö̧ ichejekwadö Asiria ölakwabikwawadöma, yö̧ne israel niji ö'wejenö tjöbaledijayonö, ökwödönö mebibö tjujuluwökakwedö, –jö̧ba̧lö omukwatadöja. Jo̧kwaijayonö ja̧ yöbawö kwujuninaduwama, omöna yöba̧lakwawö yöbawö kwujuninaduwobe, ja̧danö kwo̧'wo kwöwana̧laduwi̧ma, ömöna yöa̧lakwawa jawada ösödö, tjökeba̧la̧duwobö kwisakwaduwobe. Jo̧kwajabetjö̧, baikwö yötawaduwakwö ökwödö Juda jojodönö:

Isaías 28:20

—Waisanö yöa̧lakwawa yötja̧li̧danö baledakwawö̧ ökwödönö, baikwö laebobe yöa̧lakwawama: –Camapjoma yelösöda peapjoobetjö̧, dekatobö jwiiobe, ja̧danö sabana'woma, pea'woobetjö̧, jwakekwobö jwiobe, –jö̧ba̧lö laebobe. Ja̧danö yöa̧lakwawa laebi̧danö baledakobe ökwödönö, Egipto jojodönö kwo̧'wo kwöwana̧laduwi̧ waekwakobetjö̧.

Isaías 29:15

Ökwödö sulabenö ja̧köbaduwakwa̧ omukwatö kwujunaduwijayonö, kwomukwataduwi̧ Isabenö Jo̧ öwaisapji jö̧ba̧lö, tojö kwujunaduwobö isakwadöja. Ja̧danö ju'wedö tjedokonö, yȩa'wo okwatjö sulabenö ja̧badöja. Jobekwö sulabenö omukwatö, sulabenö ja̧köbaduwijayonö, yöba̧ladöja, —Bakwo̧bi sulabenö domukwati̧ wajwibo̧, ja̧danö bakwo̧bi sulabenö ja̧di̧ edö̧kö̧, —jö̧ba̧lö.

Isaías 30:9

—Jau Isaias, Juda jojodöma isabenö weti̧ tja̧ja̧kwobö öpöjödadö, chitji̧mu omöna yöba̧ladö, ja̧danö ötjö Isabenö Jo̧ chö̧ba̧jadi̧ tja̧ja̧kwobö öpöjödadö.

Isaías 31:1

Ayö, isabenö usula tjemawakwedö, Egipto niji jojodö pjatjatakwa̧ tjo̧'wo wana̧ladöma. Jobadöma Egipto nijibe 'ya̧dö, —Isabenö otiwanö pjatjatakwedö Egipto jojodöma, —jö̧ba̧lö. Ja̧danö ju'wibi kabayudönö tjo̧'wo wana̧lö tjö̧jobe, —Egipto jojodöma nöinö ölakwabikwawa jawa kolukiya tjujuna̧lobetjö̧, ja̧danö jobadötjö kabayudönö wa̧nö ölakwabikwawadöma juluwadötjobetjö̧, dö̧jibinö pjatjatakwedö, —jö̧ba̧lö tjomukwatobe. Isabenö tjo̧'wo tjöwana̧lo jö̧tja̧lökwema, Israel jojodö tjösödökwe Sulabe Jwibo̧ Diosda. Abebö tja̧ja̧kwo jö̧tja̧lökwema, Isabenö Jo̧ Diosda, jo̧kwaijayonö jo̧banö omukwatökönö, wajwibö Egipto jojodönöda tjo̧'wo wana̧ladö, sulabenö.

Isaías 32:2

Jobekwö lȩekwa jweinö yöbawö, tjömöayedönö otiwanö tjöbeba̧lö pjatjatakwedö, baikwö wanedö yötawa pjatjatakwa̧ma: Jwa̧le'epjo labinö doibenama, tjöekwemidanö tjö̧jakwedö, ja̧danö ju'wibi kököelö tjö̧jenama, ojwedanö tjö̧jakwedö, jadanö tubemi kököemi tjö̧jenama, nöawa isadanemi tjö'wachobö otiwawadanö tjö̧jakwedö, otiwanö jojodönö tjöbeba̧lö lȩekwa yötjawobetjö̧.

Isaías 4:5

Jemi ikenama Isabenö Jo̧ma iteda ujulu i̧sȩbakobe Jerusalen comunidadtjö. Ja̧ möle, mölekwena okobe jwiinö Jerusalen comunidad ja̧'o Sion mösa'obi, jobe ju̧kwadönöbi umuchebakobe Isabenö Jo̧ma ojwiyo'wonö, ja̧danö yö̧tekwena ökwöla dejatinö ubola dejatakobe, ja̧danö imiyu'wo umuchebakobe. Jau, Isabenö Jo̧ dejatinö ujulu jobe i̧sȩbakobe Jerusalen comunidadtjö, ja̧danö ojwiyo'wobi, imuyu'wobi comunidad wame tjöeba̧lakobe.

Isaías 5:18

Isabenö usula tjemawakwedö, sulabenö ja̧tjotö jö̧ba̧lö omöna yöba̧ladöma. Ja̧bö tjö̧ji̧ma baikwö wanedö yöta̧la, omöna yöa̧lakwawa yöba̧lö, sulabenö ja̧awa tötjobedanö ichejekwa, koluka a̧la̧chi'bonö bö'ödö tötjebi̧danö, sulabenö ja̧awa tötjebobedanö ichejekwa.

Isaías 63:10

Jo̧kwaijayonö, jobekwö otiwanö pjaatinajayonö, jo̧banö katjatibinobe, ja̧danö Dios O̧'wo Luwo̧ o̧'wo tjo̧ekwobö sulabenö ja̧tjinobe. Jobekwö sulabenö ja̧tjiökwe, tjöpöjojo baibinobe Diosma, ja̧danö jo̧bada da'dödönö ölakwabikwawö ö̧jinobe.

Isaías 65:2

Jau, möle baledibanö, chömöledönö pjatatotö jö̧ba̧lö, chömamu kabebö debatö chö̧jijatö, jo̧kwaijayonö ötjönö öpöjödö kabatibadö israel jojodöma. Ötjönö öpöjödö, idöda sulabenö tjo̧mukwati̧danö, sulabenö ja̧bö ju̧kwadö.

Isaías 8:11

Chömöledö, Isabenö Jo̧ma iteda ujulunö labinö weinobe ötjönö, bidö Juda jojodö sulabenö jabö tjö̧ji̧danö ötjö Isaiasbi sulabenö ja̧bö chö̧japji jö̧ba̧lö, baikwö:

Isaías 8:12

—Ju'wedö jojodöma ba̧kwelöjatebö ju'wedönö yöba̧ladö, –Idöma bakobe suli̧ tjöwaedakwa̧ omukwatö junadötö, –jö̧ba̧lö. Jo̧kwaijayonö ökwöma jobadö jobekwö kabatökönö yötja̧li̧danö yöka̧loko Isaias. Ja̧danö jobadö yebabinö tjomukwati̧ jawama, yebabinö kwomukwatoko, jadanö yekabökönö kwö̧jo.

Isaías 8:19

Ja̧danö chömöledö, wene baledi̧ edö, ju'wedöma ökwödönö wetjena: —Ö'wö babibinadö tjo̧'wo luwokwö yöa̧lakwawa jojodönöbi, ju'wedö debö 'yi̧nadökwö seboba̧lö yöa̧lakwawa jojodönöbi abebö kwa̧ja̧kwaduwo, tupakwö baledakwa̧ yötjawakobetjö̧, —jö̧ba̧lö. Jo̧kwaijayonö baikwö abebö cha̧ja̧kwaduwakwö, —Jojodöma idöda tjösödökwe Diosnö abebö tja̧ja̧kwobö jwienaji̧? Ja̧danö ina 'yaba̧ladö tjö̧ji̧ jawa tjöwaisakobetjö̧, isabenö 'debö 'yi̧nadönö abebö tja̧ja̧kwobö jȩnaji̧? Ja̧maökö chömöledö, tjösödökwe Diosnöda abebö tja̧ja̧kwobö jo̧be.

Romanos 2:5

Jo̧kwaijayonö, jejenö ite'ada̧lijayonö, jwaikwöda sulabenö omukwatadöja, kwomukwataduwi̧ balewachökönö. Ja̧danö, jwiinö labi̧ jawa lȩebakobe Diosma, ökwödönöma, jojodönö lȩebi̧ möle baibenama. Ja̧ möle baibenama, jweinöda lȩebakwo̧ Diosma, jojodö ja̧tji̧ mikwa baibanö.

Deuteronomio 29:19

—Jau chömöledö, ökwödötjö ju'wedöma Dios pjaatakwa̧ jawabi, lȩebakwa̧ jawabi yöbawö ujunaja̧ a̧ja̧kwö, tjomajadenö tjomukwatena, –Chuu 'dibo̧ ja̧nö, Dios wei̧ a̧ja̧kwökönö, ötjöda chösödi̧danö ja̧bö chö̧jijayonö, wene jwiinö chö̧jakwo̧sa̧, –jö̧ba̧lö. Jejenö omukwatö, Dios wei̧ a̧ja̧kwökönö idöda tjösödi̧danö ja̧bö tjö̧jitjö̧ma, wene jwötjebena chömöledö, jobadönöbi, ju'wedö sulabenö omukwatöködönöbi suli̧ tjöwaedi̧nö, jo̧kwajabetjö̧ teada̧lönö kwö̧jaduwo chömöledö.

Deuteronomio 9:24

Jau chömöledö, la'akatjöda Isabenö Jo̧ wei̧ öpöjödadöja, ökwödönö ajayinö chöwaisinelö babe möle baibanö, jo̧kwajabetjö̧ la'akatjöda kwomukwataduwoko, –Otiwadö dö̧jiökwe ditebo iyo̧ Diosma, –jö̧ba̧lö.

Deuteronomio 9:7

Tupakwö yöawinobe Moisesma, israel jojodönö: —Jau chömöledö, isabenö kwuluwo̧duwi Isabenö Jo̧ Dios ödameakwobö sulabenö ja̧badöja. Kabatökönö Isabenö Jo̧ wei̧ öpöjödö ji̧nadöja, Egipto nijitjö lakebinaduwelö baikwö bemi nijibe dichibenanö kabatö. Ja̧ wene isabenö kwomukwataduwobö jo̧be chömöledö, kwo̧'wo jwibibö, –Aaa, otiwadösa, –jö̧ba̧lö kwomukwataduwapji jö̧ba̧lö.

2 Timoteo 3:13

Jau Timoteo, sulabedöbi, Jesúsnö ösödadösa jö̧ba̧lö omöna yöba̧ladöbi ida̧ökö sulabenö ja̧tjobe babema, jo̧kwaijayonö 'dö̧ibaji̧ mölema jemi bajalekwönönö jwiinö sulabenö ja̧tjakobe, jojodönö omöna yöba̧löbi, omöna yöa̧lakwawa ösödöbi.

Josué 9:14

Tjatadawö̧, israel luwedötjö ju'wedöma tju̧kwatjö emö, Isabenö damö jawaobe, isabenö ödötjö tjichajabe, jö̧ba̧lö tjomukwatinobe. Jo̧kwaijayonö, Isabenö Jo̧nö abebö tja̧ja̧kwinokobe, isabenö atjebaja̧danö dösölö̧jinö tjö̧jakwa̧ wene yöbawö tjujunojobö, tjujunokojobö, jö̧ba̧lö.