Isaías 28:7 - Dios Iwene

⁷ Babe möle, ökwödönö ötjibo jö̧ba̧ladöma, 'dukwachawö̧ kwebachadö. Ubasobu o̧'dobubi, ju'wi nio ojwiyobi o̧wa̧lajadö, jobekwö 'dukwachawö̧ kwetjachobe. Dios yöawi̧ yöbawadöbi, Diostjö jojodötjö ö'weje pjabatadöbi, nöinö o̧wa̧lajadö jobekwö 'dukwachawö̧ kwebachadö. Jobadöma tji̧'wididanö tjedijayonö, okwa jawa tjöwaisachibanö tjedobö jwibadö, ja̧danö lȩekwa yötjawobö jö̧tja̧lenama, jweinö lȩekwa yötjawobö jwibadö, 'dukwachawö̧ tjö̧jobetjö̧.

Isaías 28:7 ပူးပေါင်းရင်းမြစ်များ

Proverbios 20:1

Baikwö laebobe ju'wi Salomón jwebebö yöawakwawa jawanö wanekwachi̧ jawa: Isabenö yötawa: 'Dukwachawö̧ma jweinö omukwatöködö. Jobadöma ubasobu o̧'do̧bu, ja̧danö ju'wi nio ojwiyo owajadö 'dukwachawö̧ma jojodönö tjo̧'wo sulachibanö edö obadö. Ja̧danö, jojodönö ölakwabikwawö jwöbeba̧ladö 'dukwachawö̧ma. Isabenö jweinö omukwatöködö.

Proverbios 23:30

Yotawakwö chitji̧: Owa̧ladönöda wanekwachobe chitji̧. Jobadödanöbedö, ubasobu o̧'do̧bubi, nio ojwiyobi tjowobö isakwadöma.

Isaías 19:14

Jau, okwa jawa omukwatöködö batjibanö weajabe Isabenö Jo̧ma, ja̧danö okobe jwiinö ja̧bö tjö̧ji̧ma, sulabenö öbibadö Egipto jojodönö, Egipto jojodöma jwiinö 'dukwachökwe etekwawo̧danö tjichejekwenanö baibanö, etekwawaja̧nö sayuwena mebabinö kwebacho̧danö tjichejekwenanö baibanö.

Isaías 22:13

Jo̧kwaijayonö, jobekwö omukwatökönö, kwo'woduwi ösöwanö ba'ali junadöja. Jau, Dios wei̧ a̧ja̧kwökönö, baikwö yöba̧ladöja: –Pakayadönöbi, obejadönöbi kwabajadö, itebia kwanö, ubasobu o̧'dobu owö, ba'ali dujunaduwo. Jau, itekwai möle debö di̧'yakwedösa, jo̧kwajabetjö̧ babe möle kwanöbi, owöbi ba'ali dujunaduwo, –jö̧ba̧lö, Dios wei̧ a̧ja̧kwökönö sulabenö yöba̧ladöja, —jö̧ba̧lö laebobe Dios Jerusalen jojodönö yöawi̧ma.

Isaías 24:2

Jobekwö lȩebenama, okobe deinö bö̧jȩnö ju̧kwadöma bakweminö usula tjemawakwedö, baikwö yöta̧la: Diostjö jojodötjö ö'weje pjabatadöbi, ju'wedö jojodö jo̧kwadabedöbi bakweminö usula tjemawakwedö. Ja̧danö bakwo̧ ömöayo̧bi, uluwo̧bi bakweminö usula tjemawakwedö. Ja̧danö bakwuju jömöayujubi, juluwujubi bakweminö usula tjemawakwedö. Ja̧danö tea emadöbi, tea iyadöbi bakweminö usula tjemawakwedö. Ja̧danö balada balewadöbi, tjöbalewawö̧bi bakweminö usula tjemawakwedö. Ja̧danö musido̧bi, umusidökwebi bakweminö usula tjemawakwedö.

Isaías 24:20

Bö̧jȩ tjö̧awi̧ma, 'dukwachökwe suliidanö tjö̧awakobe, jwa̧le'ewena löwöte 'ya̧'yȩa̧kwawi̧danö, labinö tjö̧awakobe bö̧jȩma. Jau, bö̧je jojodö Dios öba a'otjö sulabenö ja̧tji̧ma ömökobe, bö̧jȩ meenanö baibanö, ja̧danö inesö ömöki̧tjö meakobe bö̧jȩma, yemidanö a̧la̧ibobö jwiinö.

Isaías 28:1

Efrainsaso jojodötjö 'dukwachawö̧ tjubutjawakadanö ji̧ma, Samaria comunidad, —Inesö otiwemi, —jö̧ba̧lö. Jau, jobadö nöinö ubasobu o̧wa̧lö, 'dukwachawö̧ babibajadö tjö̧jemi wabeko ö'öbö mösa'o otiwa'o wame öwawinö jo̧be Samaria comunidadma, ja̧danö mösa'o wa̧pekwa'o ja̧nö, butjawakadanö ichejekwobe. Jau, butjawaka otiwakadanö, o̧bubia jwiinö otiwo̧'o̧bu ji̧danö ichejekwobe Samaria comunidadma. Jo̧kwaijayonö, o̧bubiya damö jawa babibö, suli̧ waekwi̧danö baledakobe Samaria comunidadma, Samaria comunidadwe.

Isaías 29:11

Isabenö yötawaja̧danö baledakwa̧ chi̧'wi̧didanö chedobö weajabe Diosma, ja̧danö ökwödönö yötawajabe chömöledö. Jo̧kwaijayonö, otiwanö yötawijayonö, yötawaja̧ma kwiyalu tumatö sȩyu dotjajobedanö ichejekwobe ökwödönö, baikwö yöta̧la. Ja̧ tumatö sȩyu dotjaja̧ kwiyaluma yöa̧lakwawa waiso̧nö iyö, —Yöba̧li̧, —jö̧ba̧lö wetjitjö̧ma, —Dakwö yöta̧lobö, sȩyu dotjajabe, —jö̧ba̧lö atadakwo̧, jö̧tö?

Isaías 3:12

Ötjö chömöledö Juda jojodöwe. Tjemu la'aka luwedö babibinadöma, sulabenö ja̧badö chömöledö Juda jojodönö, ja̧danö ya̧döda chömöledö israel jojodönö webö jadö. Chömöledöwe! Ökwödönö öbibö jwebebadöma, ö'öbönö ötjibawö̧ja, jweinö kwi̧'yaduwakwa̧ma wajwiköbaduwenanö baibanö.

Isaías 43:27

Kwöwaisaduwa chömöledö, jobekwö kwi̧sȩbaduwoböma jwiobe. Ökwödö Israel jojodöma la'akatjöda ba̧kwelöjatebö weti̧ kwa̧ja̧kwaduwobö öpöjödadöja, ajayi möletjö, babe baibanö. Jau, ökwödö israel jojodötjö ajayi ji̧nabi chöba a'otjö sulabenö ja̧bina chömöledö, ja̧danö jo̧ba ikena, okobe deinö ju'wedö kwuluwedöduwibi weti̧ a̧ja̧kwökönö tjö̧jajabe chömöledö.

Isaías 5:11

Ja̧danö isabenö Dios lȩebakwawö̧ja, nio ojwiyo kwowaduwotö jö̧ba̧lö isakwadönöma. Ja̧köbaduwi̧ma baikwö yöta̧la: Yȩayi a̧la̧ibadöja, nio ojwiyo kwowa̧laduwotö jö̧ba̧lö, jadanö yö̧te baledibanö ubasobu o̧'do̧bu owa̧ladöja, 'dukwachawö̧ bakibaduwenanö.

Isaías 5:22

Isabenö usula tjemawakwedö, nöinö nio ojwiyo owa̧ladöma. Jobadöma sulabenö omukwatadö, —Ju'wedötjö bajalekwönö nöinö ubasobu o̧'do̧bu dowa̧lobö dujuluwobetjö̧, otiwadösa, ja̧danö ju'wi nio ojwiyokwö, ju'wi nio ojwiyokwö pjabatö wiwodakwawa döwaisobetjö̧, otiwadösa, —jö̧ba̧lö omukwatadö.

Isaías 5:23

Ja̧danö, ju'wibi ju'wedö tjimidawö̧, sulabenö ja̧badönö pjabatadö, sulabenö ja̧tjijayonö, —Bidöma wene jwibadö, sulabenö ja̧böködö, —jö̧ba̧lö omöna yöba̧ladö, ja̧danö sulabenö ja̧böködönö pjatjato jö̧tja̧lijayonö, pjabatökönö suli̧ waedadö.

Mateo 24:29

Ja̧danö juluwanö ja̧ möle usula tjemawaja̧ ikenama, Jawo̧ yȩatibakobe, ja̧danö yö̧te jawo̧ma idejatökakobe, ja̧danö si̧li̧'i̧döma mölejȩbetjö metjakobe, ja̧danö okobe deinö mölejȩnö la̧jadöma wainö batjibakobe.

Lucas 21:34

Tupakwö yöawinobe Jesúsma: —Wanedö yötawa: Te'ada̧lönö eda̧lö kwö̧jaduwo chömöledö, böjȩ jojodö tjösödi̧ jawama ökwödönö ömökapji jö̧ba̧lö. Jau chömöledö, nöinö pjiesta junö, ja̧danö nio ojwiyo owa̧lö, ja̧danö böjȩnö kwö̧ja̧duwi̧ omukwatö kwö̧jaduwitjö̧ma, yemidanö chichakwa̧ kwomukwataduwökena, ja̧danö chichakwa̧ te'ada̧lökönö kwö̧jaduwonö, juluwanö ja̧ möle baibena.

Efesios 5:28

Jejenö, Cristo ökwödönö jwiinö ile niebinadanö ökwödöbi, ömadönö bakwo̧nökwena yötawa, Kwi̧lȩkwa̧muduwinö ökwödöda ile nibekwö kwö̧jaduwi̧danö otiwanö te'ada̧lö kwö̧jaduwo. Ökwödöma kwi̧lȩkwa̧muduwikwö bakwo̧da bakibinaduwobetjö̧, kwi̧lȩkwa̧muduwinö ile nikebaduwenama, ökwödöda ile nikekwaduwi̧danö jo̧be, ökwödö bakwo̧da bakibinaduwobetjö̧.