Isaías 28:29 - Dios Iwene

²⁹ Ja̧ otikwa tjöwaisi̧bi, Diostjö ichi̧ chömöledö, batjo ajayi otikwa jawa tjöwaisi̧bi, waji̧ emö otikwa jawa tjöwaisi̧bi Isabenö Jo̧ Okobe Jwiinö Juluwo̧ Diostjö ichi̧ chömöledö. Isabenö jwiinö waiso̧ Diosma, ja̧danö ju'wibi waisakwawa jawa otiwanö ba̧ja̧do̧, ökwödöbi waisanö domukwatakobetjö̧.

Isaías 28:29 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 37:23

Okobe Jwiinö Juluwo̧ Diosma, isabenö jwiinö juluwo̧, domukwati̧tjö bajalekwönönö isabenö jwiinö juluwo̧. Ju'wibi bakwainö sulabe jwibo̧ Diosma, jadanö lȩekwa yöawo jö̧a̧li̧danö bakwainö otiwanö yöbawo̧, la'akatjöda sulabenö ja̧bö̧kö̧ ökwödönöma.

Diosnö ösödo̧ Job mikwo̧ usula emawina jawa 5:9

Jau Job, Diosnöda akebobö jo̧be, baikwö yötawa: Diosma inesö otiwi̧ jawa otido̧, bö̧je jojodö wajwidi jawama. Isabenö nöinö inesö otiwi̧ jawa otido̧ Diosma, dö̧ba̧jadökenanö iteda ujulu i̧sȩbö, otiwi̧ jawa otido̧ Diosma.

Proverbios 8:14

Ju'wibi yöbawuju, isudada: —Ötjö, jweinö omukwatö ja̧kwawa wanekwachujuma jojodönö pjabatö jwebebö yöbawujusa. Ja̧danö, ötjöma jojodönö jweinö omukwatö otiwanö tjö̧jobö öbibujusa. Ja̧danö, ötjöma di̧ya sulojobö jö̧ba̧lö, di̧ya otiwojobö jö̧ba̧lö waisujusa. Ja̧danö, jwiinö juluwujusa ötjöma— yöbawuju jweinö omukwatö ja̧kwawa wanekwachujuma isudada.

Isaías 28:28

Ja̧danö pan otikwa jawa trigo wa̧ji̧ma, i̧sopja baibanö 'dobö otidadö, jo̧kwaijayonö kabatibökönö 'dobö otidöködö, jö̧tö? Ja̧danö, trigo jawa ochobiya wamenö, ajwimu kabayudö koluka tötjobö weijayonö, kabatibökönö wamenö tjöbaledobö webö̧kö̧, trigo jawa 'dainö suli̧ waekwapji jö̧ba̧lö, jö̧tö?

Isaías 31:2

Isabenö Diosnö kwomukwataduwo jö̧ka̧laduwobe chömöledö. Diosma isabenö waisanö omukwato̧, ja̧danö waisanö omukwatö, söbebö lobö lȩebakwo̧. Jo̧bama isabenö jö̧a̧li̧danö ja̧bo̧, ida̧ökö yöawajabe, sulabenö ja̧badönö lȩebakwa̧ wenema, ja̧danö sulabenö ja̧badönö pjabatadönö lȩebakwa̧ wenema, ja̧danö isabenö yöawaja̧danö ja̧akwo̧, la'akatjöda yöawajöködanö ja̧ökakwo̧.

Isaías 41:20

Jobekwö chotidakwo̧sa, chotidaja̧ edö, jojodö tjöwaisakobetjö̧, ja̧danö tjedaja̧ omukwatö, tjöwaisachibakobetjö̧, ötjö Isabenö Jo̧ Diosda jobekwö chotidajobetjö̧, baledobe jö̧ba̧lö. Jau, chotidaja̧ edö, tjöwaisachibobö chösöda, —Bi̧ya dedi̧ma, ökwödö israel jojodö dösödökwe Suli̧ Jwibo̧ Diosda otidajabe, —jö̧ba̧lö, laebobe Dios Israel jojodönö yöa̧li̧ma.

Isaías 9:6

Jau chuluwo̧, isabenö tjo'wo ösöwachibanö ju̧kwadö kwömöledöma, bakwuju jitji̧nö jemajobetjö̧, duluwo̧ baibakwo̧ jitji̧nö jemajobetjö̧. Ja̧danö jo̧ba jemajökwema, isabenö duluwo̧ baibanö webö ö̧jakwo̧, ja̧danö jo̧ba imi baikwö ötjabikwo̧: —Inesö waisanö tjomukwatobö pjabato̧, —jö̧ba̧lö ötjabikwo̧. Ja̧danö ju'wibi, —Juluwo̧ Dios, —jö̧ba̧lö ötjabikwo̧. Ja̧danö ju'wibi, —Dabe'do Ba̧kwelöjatebö Jo̧, —jö̧balö ötjabikwo̧. Ja̧danö ju'wibi, —Wene Jwiinö Dö̧jobö Webö Jo̧, —jö̧ba̧lö ötjabikwo̧, duluwo̧ baibanö jemajökwema.

Romanos 11:33

Diosma isabenö otiwanö lȩlö̧jinö edo̧ chömöledö, otiwa jawa mikwa jwiinö iyö. Isabenö okobe jwiinö waiso̧ Diosma, ja̧danö okobe jwiinö ja̧i̧ma, waisanö ja̧bo̧. Bakwo̧bi deobe okobe jwiinö Dios omukwati̧ waiso̧ma, jweinö labebö lobö yöawo jö̧ba̧lö. Ja̧danö, bakwo̧bi deobe Dios ja̧i̧ waiso̧ma chömöledö.