Isaías 24:6 - Dios Iwene

⁶ Ja̧danö, a̧ja̧kwökönö sulabenö ja̧tjobetjö̧, bö̧jȩ lȩebakobe Diosma, ja̧danö bö̧jȩnö ju̧kwadöma usula tjemawakwedö, Dios öba a'otjö isabenö wene tjujuna̧lobetjö̧. Jau, Dios öba a'otjö wene tjujuna̧lobetjö̧, bö̧jȩnö ju̧kwadönö juwö loakwo̧ Diosma, ja̧danö jojodötjö o̧bukwedöda tjö̧jibakwedö.

Isaías 24:6 ပူးပေါင်းရင်းမြစ်များ

2 Reyes 24:12

Jemi ikenama Juda la'aka luwo̧ Joaquinma ojo'donöbi, yöne ömöayedönöbi, Juda luwedönöbi, eju teada̧lakwawa luwedönöbi öbibö, la'aka luwo̧ Nabucodonosor ö̧jobekwö laebinobe, ja̧danö jo̧banö iyawinobe, —Chuluwo̧, ökwödöma ökwö kwömöayedösa, —jö̧ba̧lö. Ja̧ baledina mölema, Nabucodonosor ida̧ökö jelemutjö wapöbakwa o̧biya baledibanö ida̧ökö webö ö̧jenama baledinobe. Ja̧danö Joaquin iyawiökwe, jo̧banö ka̧lena ödinobe, ja̧danö jo̧banö öbibö ȩwa̧jinobe Babilonia nijibe.

2 Reyes 25:12

Jo̧kwaijayonö okobe deinö luwedönö öbibö ȩwa̧jinajayonö, jojodötjö jo̧kwadabedötjö ju'wedönö okobe tjö̧jibobö weinobe, batjo sobö, ja̧danö uba waji̧ teada̧lö tjö̧jakobetjö̧.

Isaías 1:31

Ökwödötjö inesö juluwo̧bi ja̧danö, ökwöla tjönötedobö öjiya ji̧danö juluwö̧kö̧ baibakwo̧, ja̧danö otidina jawama ökwöla 'dö̧tekwajö juluwanö tiibi̧danö baibakobe. Ja̧danö, wanedö yöta̧la, Dios lȩebenama, o̧'wo jawa ösödo̧ juluwo̧nöbi, otidina jawabi, bakobe juwö loakokobe, ja̧danö jobekwö juwö loenama, bakwo̧bi Dios önötedajola tiebobö jwiakobe.

Isaías 1:9

Jau chömöledö, ökwödö israel jojodöma, Sodoma comunidaddanö, ja̧danö Gomorra comunidaddanö badibo jö̧da̧linobe, Dios lȩebi̧tjö okobe deinö bakobe debö di̧'yo jö̧da̧linobe chömöledö. Jo̧kwaijayonö, okobe deinö debö di̧'yapji jö̧ba̧lö, Isabenö Jo̧ okobe jwiinö juluwo̧ Diosma ökwödö israel jojodötjö o̧bukwedönö tjöbeba̧lö pjaatajabe, Sodomadanö, ja̧danö Gomorradanö badibapji jö̧ba̧lö.

Isaías 34:5

Jau, baikwö wanedö yöa̧lobe Diosma: —Chitea kwölöte'oma, mölejenö lö̧jadönö söbebö lobö, nöinö tjökwösobu ida̧ökö owa̧lajabe ichejekwa, 'dukwacha'o baibanö. Ja̧danö babema chitea kwölöte'oma, mölejȩbetjö nijakwö jwiachakobe, Edom jojodönöbi lȩtebakobetjö̧. Jobadönö lȩbebö yötawajabe, bakobe jobadönö söbebö lotobö jo̧be, jö̧ba̧lö, ja̧danö babe jobadönö lȩtebakwo̧sa, —jö̧ba̧lö yöa̧lobe.

Isaías 43:28

Ja̧danö, jobekwö sulabenö ja̧bö kwö̧jaduwi̧tjö̧, ökwödönö lȩtebocha chömöledö. Chejunö otidadö ö'wejenö pjabatadönö, jo̧kwadabedö batjibanö meatö lotocha, ja̧danö ökwödö Jacob itji̧mu tupadanö jojodönö 'da̧batö lotocha, kwöpöjojodöduwi ökwödönö söbebö lotjobö, ja̧danö ökwödö israel jojodönö obö yötja̧lobö, jö̧ba̧lö yöa̧lobe Diosma, israel jojodönö.

Isaías 5:24

Okobe deinö jobadö yöta̧lajawö̧ma, Okobe Jwiinö Juluwo̧ Isabenö Jo̧ Dios weina a̧ja̧kwökönö öpöjödadö, —Israel jojodö tjösödökwe Sulabe Jwibo̧ Dios wei̧ma mikwawökö ji̧, —jö̧ba̧lö sulabenö öpöjödadö, jo̧kwajabetjö̧ isabenö usula tjemawakwedö. 'Witjaja̧ isa'ye juluwanö ubi̧danö, ja̧danö ökwöla öba a'otjö meje'ye kököa'ye juluwanö bȩbachibö ubi̧danö baledakwawö̧. Jau, wanedö yötawa, tjö̧ji̧ bö'diyadanö ji̧ma 'dolowakobe, ja̧danö tjö̧ji̧ o̧bubiyadanö ji̧ma kököbachibö jwiakobe, tjöpöjödiökwe Dios isabenö lȩebobetjö̧.

Isaías 9:19

Ja̧danö jojodö sulabenö ja̧bö tjö̧jiökwe, Isabenö Jo̧ Okobe Jwiinö Juluwo̧ Diosma jwiinö ödameakwobe, ja̧danö ödameakwobetjö̧, israel niji ubajabe, ja̧danö israel jojodöma imidanö ichejekwadö, ökwölanö ubadö batjibakwedö. Isabenö sulabenö ja̧bö ju̧kwadö israel jojodöma, ja'yubebi tjömöledönö lȩlöjinö edöködö.

Mateo 27:25

Yöa̧lawö̧, okobe deinö tjatadinobe: —Jau, ökwödödasa jo̧banö kwabö lobadöma. Jo̧banö kwabö lodobetjö̧ lȩekwa ji̧tjö̧ma, ökwödönöbi, di̧tji̧mu tupadanö jojodönöbi lȩekwa baibobö jo̧be— jö̧ba̧lö tjatadinobe.

Mateo 7:14

Jau chömöledö, ja̧kwawa jawasade apjudema, ja'yuwade, ja̧danö ja̧kwawa manama, wayama, ja̧danö ja'yubeda jojodö jade apjude badekwajadö. Jade ja'yuwadenöda tekachaduwo chömöledö— jö̧ba̧lö wanedö yöawinobe Jesúsma.

Romanos 9:27

Ja̧danö, Dios iwene wȩyudina Isaíasma Israel jojodönö iwȩyudinobe. Baikwö iwȩyudinobe Isaíasma, Israel jojodönö: Duluwo̧ Diosma juluwanö böjȩ jojodönö labinö lȩebakobe. Ja̧danö, lȩebenama, Israel jojodö tjöba̧jekwijayonö, ojwe ö'öbö ba̧pu̧ so̧bi̧ya̧pu̧danö tjöba̧jekwijayonö, ja'yubenöda tjö̧jibakwedö, Israel jojodöma, jö̧ba̧lö iwȩyudinobe Isaíasma.

Deuteronomio 28:62

Jejenö baleditjö̧ma, ökwödö israel jojodötjö sule o̧bukwedöda kwö̧jibaduwena chömöledö, baikwö yötawa: Isabenö Jo̧ma ökwödönö pjaatobö ösödinobe, nöinö kwujuna̧laduwobö iyinobe, ja̧danö kwö̧ba̧jekwachaduwinö pjaatinobe, si̧li̧'idö tjö̧ba̧jekwi̧danö kwö̧ba̧jekwachaduwobö, jö̧tö? Jo̧kwaijayonö, kwuluwo̧duwi Isabenö Jo̧ Dios wei̧ a̧ja̧kwökönö kwö̧jaduwitjö̧ma, ökwödönö lȩebobö ösödakobe, baikwö yötawa: Jo̧ba wei̧ kwa̧ja̧kwaduwobö kwöpöjödaduwitjö̧ma, ökwödönö pjaatobö ösödinadanö, bakweminö ökwödönö suli̧ öwaedobö ösödakwo̧, ja̧danö ökwödönö suli̧ öwaedakobe, ökwödönö söbebö loenanö kabatö. Jau chömöledö, babe Dios iyakwemi niji juluwanö tekachaduwakwedöja, jobe kwö̧jaduwobö, jo̧kwaijayonö wei̧ a̧ja̧kwökönö kwö̧jaduwitjö̧ma, ja̧ nijinö deköbaduwakobe, jobetjö lakebaduwinö Isabenö Jo̧ma ökwödönö 'döebakobetjö̧.

Deuteronomio 4:27

Jau chömöledö, ökwödönö söbebö lobö, ju'wedö tjitebokwena jojodö tjö̧'da̧de bakibaduwanö kwipjelekwachaduwinö a'dewö loakobe Isabenö Jo̧ma, ja̧danö jejenö a'dewö loawö̧ sule o̧bukwedöda debö 'yö̧könö, ju'wedö tjitebo jojodö tjö̧'da̧denö kwö̧jaduwena.

2 Pedro 3:10

Jo̧kwaijayonö Duluwo̧ma lekwe ite'ada̧lijayonö, isabenö yemidanö ichakwo̧ chömöledö. Ja̧danö wanedö yötawa, naukwabo̧ ju'wedö tjomukwatokonö tebachö önaukwi̧danö, jojodö jo̧ba ichakwa̧ tjomukwatokonö ja̧ inesö lȩebakwa̧ möle baibakobe chömöledö. Ja̧danö, ja̧ baibenama, labinö ökwöobetjö mölejȩma jwiinö baibakobe, ja̧danö mölejȩnö la̧jadöma ökwölanö ubö jwiinö baibakobe, ja̧danö böjȩbi, okobe jwiinö böjȩnö ji̧bi ubö jwiinö baibakobe. Jau chömöledö, obadö ichökena jö̧ba̧lö otjijayonö, isabenö ichakwo̧ Duluwo̧ma.