Isaías 14:2 - Dios Iwene

² Dios israel jojodönö pjaatobetjö̧, tjitebokwena jojodöma israel jojödönö öbibö tjetjatajakobe, yemidanö israel nijinö tjö̧jobö, ja̧danö jobadö tjitebokwena jojodöma, israel jojodö tjömöayedö batjibakwedö, ömadöbi, ya̧döbi. Jau, ajayinö israel jojodönö juluwinadönö balekwa mikwa tjujuluwakwedö israel jojodöma, ja̧danö ajayinö jobadönö usula tjemawobö webinadönö webö tjö̧jakwedö, israel jojodöda.

Isaías 14:2 ပူးပေါင်းရင်းမြစ်များ

Isaías 18:7

Ja̧danö, ja̧ möle yötawaja̧ niji jojodöma Diosnö iyö tjichakwedö. Jau, jobadö ödöbaedö tji̧sȩdo̧ sayuwawö̧, bö̧jȩ ba̧kwemeachibanö jojodö yetjabawö̧, juluwadö ba̧jȩkwadö tjitebokwena jojodönö juluwadöma, Isabenö Jo̧nö tjiyakwa̧ tjichejebakwedö. Tjitebo, ojwebiya 'da̧'yachemi nijiitjö iyawa tjichejebakobe, Jerusalennö ja̧'o Sion mösa'obe, Isabenö Jo̧ Okobe Jwiinö Juluwo Dios itebo comunidad ötjabobe, Diosnö tjiyakobetjö̧.

Isaías 31:8

Ja̧danö kwöpöjojodöduwi Asiria jojodönö, baikwö laebobe Dios yöawi̧ma: —Isabenö dȩdȩbö lotjajawö̧ debö tji̧'yakwedö Asiria jojodöma, jo̧kwaijayonö jobadönö dȩdȩbö lotjakwedöma, bö̧jȩ jojodömaökö. Ja̧danö kwölöte'o, jobadönö dȩdebö loakwa'oma, bö̧jȩ jojodö tjitea kwölöte'omaökö, Dios itea kwölöte'oda jobadönö dȩdȩbö loakwa'oma. Ja̧danö, Dios itea kwölöte'o öba a'otjö dötjibakwedö Asiria jojodöma, ja̧danö jobadötjö möayedöma, tjömöayedö 'diinö otidadö batjibakwedö.

Isaías 45:14

Baikwö yöa̧lobe Isabenö Jo̧ma, Israel jojodönö: Egipto jojodö tjitea mikwawi̧ jawabi, Etiopia jojodö mikwanö tjiyi̧ jawabi, ökwödö israel jojodö kwiteaduwi baibakobe. Ja̧danö ödöbaedö sabeos ötjabawö̧ma, kwö̧jaduwobekwö ichibö, kwömöayedöduwi batjibakwedö. Jobadöma kwökömanöduwi kwebachö, ka̧lena osijunö yö̧bekwedö kwetjachakwedö, ja̧danö kwöba a'oduwi bȩbachibö bamatö yötja̧lakwedö, —Isabenö Dios otiwanö pjaatawö̧ja. Jo̧bajayo̧ juluwo̧ma deobe, jelo̧ diosbo̧ma deobe, kwösödaduwökwe Diosda isabenö Diosbo̧ma, —jö̧ba̧lö, yöawobe Diosma, Israel jojodönö.

Isaías 49:22

Baikwö yöa̧lobe Isabenö Jo̧ Diosma, ökwödö israel jojodönö pjaatakwa̧ma: Baikwö yötawaduwakwö chömöledö, ötjöma chömamu kabebö, tjitebotenia jojodönö weti̧ chi̧sȩbocha, ja̧danö chi̧sȩbiawö̧, kwitji̧muduwinö tjebatö, baikwö tjichejebakwedö. Jau, kwitji̧mu ömadönö apjö̧a̧lö tjichakwedö, ja̧danö tjöböbe'onö kwitji̧mu ya̧dönö e'ewö tjichejebakwedö.

Isaías 49:23

Jau, inesö la'aka luwedötjö ömadöma, kwitji̧muduwinö ba̧ja̧dö tjiteada̧lakwedö, ja̧danö inesö la'aka luwedötjö̧ ya̧döma kwitji̧muduwi pjebadönö o̧do'bi̧ ojwö tjiteada̧lakwedö. Jau, wetajawö̧, jobadö tjitebokwena inesö la'aka luwedöma, kwöba a'oduwi bȩbachibö tjöbamatakwedö, kwömöayedöduwi batjibanö, ja̧danö, —Isabenö kwömöayedö mikwawöködösa, —jö̧ba̧lö, kwömasapiyaduwitjö nijiso̧pja 'dȩtjakwedö. Ja̧danö, jobekwö baledenama, otiwanö kwöwaisachibaduwakwedöja ötjönö, Isabenö Jo̧ Diossa, jö̧ba̧lö. Ja̧danö ju'wibi kwöwaisachibaduwakwedöja, ötjönö tjo̧'wo wa̧nalö ja̧döma, la'akatjöda tabakwö tjö̧jökakwedö, jö̧ba̧lö yöa̧lobe Diosma.

Isaías 49:25

Jo̧kwaijayonö baikwö yöawobe Isabenö Jo̧ma chömöledö: Ötjöda kwöpöjojodöduwi, ökwödönö ölakwabikwawö juluwadönö chölakwabikwawakwo̧sa, ja̧danö ötjöda kwitji̧muduwinö tjujulutjö tjö̧jibanö pjatatakwo̧sa. Ötjöda chölakwabikwawobetjö̧, ölakwabikwawadö juluwö do̧tjatajawö̧ma, ejatö latjebawö̧ tjö̧jakwedö, ja̧danö inesö la'aka luwedö juluwö tjitea do̧tja̧taja jawama, jobadötjö 'döbebö tjemakwedö.

Isaías 54:3

Jau, kwöwaisobekwöchobebi, wajwiköbobekwöchobebi kweju jaleju baibanö kwotidobö jo̧be. Ja̧danö kwitji̧muma, ba̧jȩkwadö batjibanö ju'wedö tjitebo nijibi 'döbebö tjemakwedö, ja̧danö jojodö deobe comunidadma, kwitji̧muda jobe tju̧ju̧kwakwedö, jö̧ba̧lö wanedö yöawinobe Diosma, Jerusalen comunidad jawama.

Isaías 60:14

Ökwödönö ajayinö usula kwemawaduwinö ja̧binadö tjitji̧mu tupadanö jojodöma, ichibö kwöba a'oduwitjö nijakwö bȩbachibö tjö̧jakwedö. Ajayinö ökwödönö öpöjödö, —Israel jojodöma mikwawöködö, —jö̧ba̧lö öpöjödinadöma, kwöba a'oduwitjö̧ tjöbamatakwedö, —Duluwedöja, —jö̧ba̧lö. Ja̧danö kwiteboduwi comunidad Jerusalenma, —Isabenö Jo̧ itebo comunidad, Israel jojodö tjösödökwe Suli̧ Jwibo̧ Dios öjemi comunidad Sion, —jö̧ba̧lö ötjabikobe.

Isaías 60:4

Jobekwö baledakwa̧, baikwö yöawobe Diosma: Pöbamö edö bakwachobetenia ko̧ko̧kwö tjichobe kwedadaduwakwedöja. Kwi̧tji̧muduwi ömadö ödötjö tjichobekwö kwedaduwakwedöja, ja̧danö kwitji̧muduwi ya̧dönö apjö̧alö tjichejebobekwö kwedaduwakwedöja.

Isaías 61:5

Ja̧ möle jelobetjö ichajadöma, kwömöayedöduwi ja̧nö, kwa̧jwi̧mu obejadönö teada̧lö tjö̧jakwedö, ju'wedö tjitebo jojodöda kwöbatjoduwi sobö tjotidakwedö, ja̧danö ubasa'ba teada̧lö tjotidakwedö.

Isaías 66:12

Baikwö yöawobe Diosma: Baikwö wanedö yötawaduwakwö: Isabenö otiwanö pjatatocha Jerusalennö, ojwe kabatökönö isuwi̧danö, otiwanö jö̧jobö pjatatocha, ja̧danö tjitebotenia jojodö tjitea nöinö mikwawi̧ma, ojwe okwatibi̧danö jobujunö welachobö wetocha. Ja̧danö ökwödö jitji̧muma, otiwanö kwö̧jaduwakwedöja. Kwojo'doduwi Jerusalenma otiwanö jo̧do'bi̧ ojwö jiteada̧lakwawö̧ja, ja̧danö jö̧dö̧lö'anö apjö̧alö je'ewakwawöja, ja̧danö ji̧sȩ'bonö wananö döjeabikwawö̧ kwö̧jaduwakedöja.

Daniel 7:18

jo̧kwaijayonö jemi ikenama bajalianö Mölejȩbe Jo̧ Diosma iteda ömöledönö iyakobe, böjȩtjö yöbawö wetjobö. Ja̧danö, Dios ömöledö yöbawö wetjakwa̧ma, ba̧kwȩlö̧jatebö 'dö̧ibajökenanö yöbawö wetjakobe— jö̧ba̧lö yöawinobe.

Lucas 12:45

Jo̧kwaijayonö, jo̧ba ömöayo̧ sulabo̧ ö̧jitjö̧ma, iteda uluwo̧ weaja̧danö ja̧bökönö, Aaa, chuluwo̧ma lekwe deakobe jö̧ba̧lö, ju'wedönö uluwo̧ ömöayedö ömadönöbi ya̧dönöbö kwakwaena, ja̧danö kwanöbi nöinö ukwena, ja̧danö owa̧löbi owa̧lena, 'dukwachökwe baibanö.

Romanos 15:27

Jejenö pjatjatobö tjösödinobe, ja̧danö jweinö tjomukwatinobe chömöledö. Jerusalénnö ju̧kwadöma jobadönö pjatjatinobe, tjo̧'wo̧ luwo̧ jawama, ¿jö̧tö? Ja̧danö, tjo̧'wo̧ luwo̧ jawa pjatjatinobetjö̧ judío jojodöböködö Jesúsnö ösödadöma jobadö Jerusalénnö ju̧kwadö Jesúsnö ösödadönö tjumusidobedanö ichejekwa. Jau chömöledö, Jerusalénnö ju̧kwadö tjo̧'wo̧ luwo̧ jawa pjatjatinobetjö̧, babema, balekwa mikwa balada jawa pjatjatoböma otiwa chömöledö.

2 Corintios 10:5

Jau chömöledö, waisanö omukwatadösa jö̧ba̧lö tjomukwati̧ma, ja̧danö otiwadösa jö̧ba̧lö tjomukwati̧ma, ja̧danö okobe jwiinö jejenö tjomukwati̧ma, tjöekwemidanö ichejekwa, Diosnö tjöwaisapji jö̧ba̧lö. Jo̧kwaijayonö Dios ujulu ji̧nö ja̧ tjöekwemidanö tjomukwati̧ söbebö lodobedanö ichejekwa, ja̧danö tjomukwati̧tjö dujuluwobedanö ichejekwa, otiwanö omukwatö Cristo wei̧danö ja̧tjakobetjö̧.

Gálatas 5:13

Chömöledö, Diosma ökwödönö jwöinobe, Moisés iwȩyudinatjö kwö̧jibaduwinö, ¿jö̧tö? Jo̧kwaijayonö, Aaa, Moisés iwȩyudina ömöayedödanöböködö dö̧jobetjö̧, jwaikwöda dösödi̧ jawada ja̧bö dö̧jo jö̧ba̧löma kwomukwataduwa chömöledö, kwömöledöduwi Jesúsnö ösödadönö ösödabikwawö ja̧nö, tjömöayedödanö ja̧nö pjabatakwawö kwö̧jaduwo chömöledö.

Efesios 4:8

Jejenö laebobe Dios iwenetjö, baikwö: Mölejȩbe kaekwajena ujuluwajawö̧nö öbibö kabekwajijetö. Jobetjöma ömöledönöda otiwa jawa iyabijetö. Jejenö laebobe Dios iwenetjöma.

Apocalipsis 3:9

A̧ja̧kwaduwitjö. Kwo̧'wo̧ tjo̧kekwaduwa ökwödönö inia tjököbaduwinö ja̧badönö, judío jojodönöma. Jobadö tjo̧'wo̧ luwo̧ okwanö chöwaisawö̧. Jobadöma judío jojodö tjöbötjachinajayonö, judío jojodöböködödanö babibinadö tjo̧'wo̧ luwo̧nöma, Dios ömöledö batjibinokobetjö̧. Awetja ömöayedöda babibinadö, jo̧ba wei̧ a̧ja̧kwö. Chömöledö, ju'winö ökwödö kwöba a'oduwi ichö, tju̧yu̧ju̧ki̧junö bamatö, tjuu nijakwö bȩbachibö tjubudekwobö ja̧takwo̧sa jobadönöma. Ja̧ mölema jobadöma, ökwödönö edö waisachibö tjubudekwakobe,¡Ayö! Isabenö bidöma Dios ile niebawö̧, jö̧ba̧lö.