Isaías 11:4 - Dios Iwene4 Jo̧ba lȩebakwa̧ma, jojodönö wainökwena edöma lȩebökakwo̧, jweinö Dios wei̧danö lȩebakwo̧. Jweinö bakweminö lȩekwa yöawakwo̧, jwibadöbi, ju'wedö sulabenö ja̧tja̧jawö̧bi öba a'o tjichibenama, mikwawöködö jö̧ba̧löma öpöjödökakwo̧, jojodönö bakweminö edö, isabenö lȩekwa yöawo jö̧a̧li̧danö lȩebakwo̧. Isabenö otiwanö lȩebakwo sulabedönöma, jweinö lȩekwa yöbawö, sulabenö ja̧badönö kwabö lotjobö weakwo̧, debö tji̧'yakobetjö̧. အခန်းကိုကြည့်ပါ။ |
Isaías 11:4
50 ပူးပေါင်းရင်းမြစ်များ
Otiwa jawa ja̧bö ja̧kwawa kwöwaisachibaduwo, ja̧danö jweinö lȩekwa weköbaduwo. Ju'wedö sulabenö ja̧tja̧wö̧nö pjabatö, tjo̧'wo ösöwachibanö pjakataduwo. Löyödöbi, tjilekwamunö wobekwinadöbi lȩekwa luwedö tjöba a'o tjö̧jenama, tjöbeba̧löjönö pjakataduwo, jobadönö suli̧ tjöwaedapji jö̧ba̧lö, yöawobe Diosma.
—Ja̧ möle baledakwa̧ baikwö yöawobe Diosma: –Ja̧ möle bö̧jȩ jojodö sulabenö ja̧tjobetjö̧, bö̧jȩ lȩtebakwosa, ja̧danö sulabenö ja̧badönö lȩtebakwo̧sa, sulabenö ja̧tji̧na mikwa baibanö. Ja̧ möle otiwadösa, ju'wedötjö bajalekwönönöbedösa jö̧ba̧lö omukwatadönö lȩtebakwo̧sa, otiwadösa jö̧ba̧lö tjomukwati̧ 'dö̧ibakobetjö̧. Ja̧danö la'aka luwedö sulabenö tjö̧möayedönö inia tjöbö, usula tjemawinö tjö̧jobö webö tjö̧ji̧ 'dö̧ibakobetjö̧.
—Jau, ötjöda chömöledötjö usula jojodönö otiwanö chiteada̧locha, ja̧danö jobadöma, otiwanö ju̧na̧lö, tjajwi̧mu obejadönö teada̧lö tjö̧jakwedö, ja̧danö chömöledötjö jwibadöma wene jwiinö tjabobö tjö̧bamatakwedö. Jo̧kwaijayonö jobekwö baledökakobe ökwödö chömöledö tjöpöjojodö filisteo jojodönö. Ökwödötjö ina ji̧badönö, a̧wi̧chi̧ löji̧ wetocha, ja̧danö ökwödötjö ina 'ya̧ba̧ladöma a̧wi̧chi̧tjö debö tji̧'yakwedö.
Ja̧danö, jemi ikenama, Diosma Davidmine itji̧mu tupadanö jojodötjö bakwo̧nö ujunakobe, inesö la'aka luwo̧ baibanö, Dios jwaikwöda kabatibökönö ile niebökwenö. Ja̧danö, joba Dios ujunajökwema, otiwanö jweinö webö ö̧jo jö̧a̧lidanö webö ö̧jakwo, jweinö lȩekwa yöawakwo̧, ja̧danö jweinö lȩebo jö̧a̧li̧danö lȩebobö isakwakwo̧, ja̧danö Dios wei̧danö a̧ja̧kwö juluwanö wei̧danö jabö ö̧jakwo̧, jo̧ba David itji̧mu tupadanö jojodötjö Dios ujunakwoma.
Ja̧ möle tjitebokwena jojodö ju'wedö tjitebo jojodökwö wene tjujuna̧lenama, Isabenö Jo̧ Diosda lȩekwa yöawakwo̧. Ja̧danö tjitebokwena jojodö ölakwabikwawö tjö̧jenama, jo̧bada jwebebö lȩekwa yöawakwo̧. Ja̧danö jobekwö lȩekwa yöawiawö̧, ölakwabikwawökönö tjö̧jakwedö bö̧jȩ jojodöma, jo̧kwajabetjö̧ ölakwabikwawa jawa tjiteama, balewö lobö tjotidakobe, batjo otikwa jawa baibanö. Kwölöte'ijuma, niji soawa ökiya baibanö balewö lotjakobe, ja̧danö tokwötebiyama, towibiya bajale ötjebiya 'wiawaka baibanö balewö lobö tjotidakobe. Ja̧ mölema ju'wedö tjitebo jojodöma, ju'wedö tjitebo jojodökwö tjölakwabikwawökakwedö, ja̧danö ölakwabikwawa jawa tjöwaisachökakwedö, okobe deinö bakobe wene jwiinö tjö̧jakwedö, —jö̧ba̧lö yadakwö baledakwa̧ jawa i̧sȩbinobe Diosma.
Lȩekwa yöbawö öjamatenama, iteda ömöledö Juda jojodötjö la'aka tjuluwedönöbi, ju'wedö luwedönöbi lȩbebö yöawakwo̧, baikwö: —Ökwödöma tjöbatjiju uba batjo suli̧ waedö kwönaukwaduwajabe, ja̧danö usula jojodötjö kwönaukwaduwaja̧ma, kwejuduwinö kwödaduwajabe, kwönaukwaduwaja̧ jawatjö kwejuduwi su̧'bȩ baibenanö kabatö.
O̧'wo emapjoma, ojwe okwatibö söbebö loödödanö ichejekwapjo, tjulume'a ichibanö da̧kwinö okwatibödöma, ja̧danö tjitebotenia jojodö döpöjojodönö ujuluwakwo̧. Jobadönö juluwö, chabö loakobobe tjitebotenia jojodönö, jwiinö söbebö loawaka chabö loawakanö. Ja̧danö kabayudö jweba̧laka tjaanö anö, jobadönö öbibö, söbebö loawemibe öibakwo̧.
Wanedö yöta̧la: Damötjö Asiria la'aka luwo̧nö juwö loakwemi omudawö ujuninobe Diosma, jalemi ja̧danö da̧kwemi juwö loakwemima, ja̧danö ida̧ökö imi jobe ujunajabe, nöinö imi ko̧ko̧dajo̧ ujunajabe. Ja̧danö, jobe junajo̧, inesö ubinö ubola nötedö pjuakwo̧ Isabenö Jo̧ma, Asiria la'aka luwo̧nö lȩbebö juwö loakobetjö̧.
Suli̧ waedadöbi ja̧danö, jobadönöbi otiwanö tjomukwatobö jwiobe. Jobadöma sulabenö omöna yöba̧lö jojodönö suli̧ waedadö, ja̧danö sulabenö ja̧tjo̧bö omukwatö junadö. Usula emawadönö suli̧ tjöwaedotö jö̧ba̧lö, sulabenö omöna yöba̧ladö. Jwibo̧ma lȩekwa luwo̧ öba a'o ja̧nö, jweinö yöawenabi, yayonö jo̧banö suli̧ tjöwaedotö jö̧ba̧lö omöna yöba̧ladö, suli̧ waedadöma.
Isabenö Jo̧ O̧'wo̧ Luwo̧ma ötjökwö jo̧, Isabenö Jo̧ Diosda ötjönö omudawö ujuninobetjö̧, otiwa jawa wene usula jojodönö yötawobö. Ötjönö weinobe, tjo̧'wo tjo̧bekwö ju̧kwadönö tjo̧'wo ösöwachibanö pjatatobö, ja̧danö ölakwabikwawö juluwajö do̧tja̧tajawönö tjetjatakwa̧ yötawobö, ja̧danö ka̧lena ba̧jadönö ka̧lenatjö tjö̧jibakwa̧ wene yötawobö.
Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.
tjöbajale tjewawinadöma babema edadö, ja̧danö kwebachinöködöma babema kwebachadö, ja̧danö tji̧sȩdo̧ sulinadöma, babema tji̧sȩdo̧ otiwadö, ja̧danö a̧ja̧kwinöködöma babema a̧ja̧kwadö, ja̧danö ö'wö babibajadöma yemidanö 'yabibajadö, ja̧danö usula jojodöma otiwa jawa wene yöawakwawa a̧ja̧kwadö jö̧ba̧lö Juannö yökawaduwo, ja̧ baledi̧ a̧ja̧kwö ötjönö öwaisakobetjö̧.
Chömöledö, Cristoma lȩlö̧jinö ja̧danö dösölö̧jinö ja̧bö jo̧, ¿jö̧tö? Ja̧danö, ötjö Pabloma jo̧ba Cristo iminö dösölö̧jinö abebö wetaduwakwö, ökwödönö wȩyudö yötawi̧ kwa̧ja̧kwaduwobö, kwiteboduwibe chichibena ökwödönö lȩtebapji jö̧ba̧lö. Jau chömöledö, ju'wedö ötjönö yötja̧lena, Aaa, Pablo ökwödökwö ö̧jenama, labinöma yöba̧lö̧kö̧, sule jelobetjö iwȩyudenada labinö yöbawö wȩyudo̧ Pabloma, jo̧kwajabetjö̧ ichakwa̧ yedabökö jö̧ba̧lö yötja̧lena.
jojodönö labinöma webökönö ja̧awabi, tjösödi̧da ja̧bökönö biya̧ma otiwanö ja̧awa jö̧ba̧lö tjöwaisi̧danö ja̧awabi. Ja̧ jawa i̧sekwö dö̧jo jö̧ba̧lo̧ do̧'wo̧ luwo̧nö otidobe Dios O̧'wo̧ Luwo̧ma. Jau chömöledö, jejenö ja̧bö ja̧kwawama otiwa, ja̧danö jojodönö weawama jwia jejenö ja̧köbaduwa jö̧ba̧löma chömöledö.
Chö̧ja̧wo̧dö ökwödötjö bakwo̧, waisanö omukwato̧ma, ja̧danö, Dios iwene jweinö waiso̧ma jo̧ba öwaisi̧ma i̧sekwobö jo̧be. Ja̧danö ¿dakwö i̧sekwobö jo̧beda? Biya̧ chö̧ja̧wo̧dö: Bakwo̧, jweinö waiso̧ma jojodönö dösölö̧jinö pjabato̧. Jejenö dösölö̧jinö pjabatö i̧sekwobe, Ötjöma Dios öibökwesa waisanö chomukwatobö, jö̧ba̧lö.
Ja̧danö, Dios Iwene ötjabökwe aatjö isa̧pi̧ ödöapi̧, bakwachakwadanö sȩapi̧ aatjö laebi̧pi̧ chedijatö. Ja̧pi̧nö okobe deinö böjȩnö ju̧kwadö, jelobebi jelobe Diosnö öpöjödadönö ujuluwakwo̧, Dios Iwene ötjabökwema. Ja̧danö, ujuluwajawö̧nöma webö ö̧jakwo̧, iteda inesö ujulunö, iteda wei̧ ja̧tjoböma. Yelösöda, bakwo̧bi jo̧banö ujuluwakwo̧ma deobe. Ja̧danö, jo̧bama Juluwo̧ Dios jwiinö ölabi̧ i̧sebö, uba ochiju tjöja̧takwi̧danö öja̧takwo̧ Diosnö öpöjödadönöma.
ကြော်ငြာတွေ