Isaías 11:10 - Dios Iwene

¹⁰ Ja̧danö, ja̧ möle bandera ötjabi̧ jawa öwawi̧danö, Isai itji̧ tupadanö jojo la'aka luwo̧ma öwawinö öjamatakwo̧, okobe deinö bö̧jȩnö ju̧kwadöma joba ö̧jobekwö ko̧ko̧kwö tji̧'yakobetjö̧. Ja̧danö, öba a'o ichibajadö, tjitebotenia jojodöma jo̧banö abebö tja̧ja̧kwakwedö, otiwanö ja̧bö tjö̧jakwa̧ tjöwaisakobetjö̧. Ja̧ mö̧le, isabenö okobe deinö jojodöma jo̧ba itebo comunidad ösödö otiwanö tjomukwatakwedö, —Duluwo̧ itebo comunidadma dejatinö salöi̧ comunidad, —jö̧ba̧lö.

Isaías 11:10 ပူးပေါင်းရင်းမြစ်များ

Génesis 49:10

Ina yöbawijetö: —Isabenö yötawa, Judá: Ökwötjö tupadanö jojodöma ba̧kwȩlöjatebö la'aka luwedö webö tjuju̧kwakwedö. Jejenö webö tjö̧bakobe bakwo̧, inesö la'aka luwo̧ ichenanö kabatö. Jo̧ba inesö la'aka luwo̧ma okobe deinö jojodö tjuluwo̧ ö̧jakwo̧— yöbawijetö Jacobma itji̧ Judánöma.

1 Crónicas 2:12

Ja̧danö Boozma Obed mikwo̧ abe'doinobe. Ja̧danö Obedma Isai mikwo̧ abe'doinobe.

Isaías 11:1

Isabenö Dios lȩebakwawö̧ israel jojodönö, ja̧danö wanedö yötawa, David abe'do Isai itji̧mu tupadanö jojodö tjö̧ji̧danö wanekwachowi towi jubö loakobe, sule towi la'akada ji̧binö. Jo̧kwaijayonö, jemi ikenama, ja̧ Isainö wanekwachowi towi la'akatjö, yayinö pokwö laebakobe, ja̧danö pokwaja̧ ikenama, yemidanö otiwanö wa̧ja̧kobe.

Isaías 11:12

Iteda itea bandera kaebakobe, tjitebotenia jojodö öwawinö tjedobö, ja̧danö israel jojodö, ajayinö tjitebotjö a'dewö loinawö̧nö o̧ko̧kodakobe, ja̧danö Juda jojodö tjipjelekwachinö ju̧kwadönöbi o̧ko̧ko̧dakobe, bö̧jȩ bajale ju̧kwadönöbi o̧ko̧kodakobe, a̧dekwanö tjitebobe tjetjachajakobetjö̧.

Isaías 14:3

Jau chömöledö, isabenö ju'wi möle inia tjöbö, usula emawö, 'diinö kwotidaduwelö kwö̧jibaduwinö pjaatakwo̧ Isabenö Jo̧ma,

Isaías 2:11

Ja̧ möle Isabenö Jo̧ Diosnöda otiwanö tjomukwatakwedö, —Isabenö Jo̧ Diosda inesö la'aka luwo̧ juluwo̧ma, —jö̧ba̧lö. Babe möle bö̧je jojodöma ju'wedönö edö omukwatadö, —Idöma mikwawöködö, —jö̧ba̧lö, ja̧danö, —Ju'wedötjö bajalekwönö mikwawo̧sa, —jö̧ba̧lö omukwatadö babema. Jo̧kwaijayonö, löji möle okobe deinö jobekwö omukwatadöma tabakwö tjö̧jakwedö, sule Isabenö Jo̧ Diosnöda otiwanö tjomukwatakwedö, —Diosda mikwawo̧ma, —jö̧ba̧lö.

Isaías 2:2

—Yadakwö löji möle baibenama, Isabenö Jo̧ eju ja̧'o mösa'oma, isabenö nöinö mikwawa'o ja̧kobe, okobe jwiinö mösa'ijutjö, Dios eju ja̧'o mösa'oda inesö la'aka mösa'o ja̧kobe. Jau, ja̧ mösa'oda kabebö ujunakobe Diosma, okobe jwiinö jele'otjö bajalekwönönö inesö mikwawa'o mösa'o baibanö, ja̧danö bö̧jȩ bakwemeachibanö ju̧kwadö tjitebokwena jojodöma ja̧'o jo̧bekwö tji̧'yakwedö.

Isaías 2:3

Jau, ba̧jȩkwadö tjitebokwena jojodöma yöba̧lakwawö yötja̧lakwedö, –Isabenö Jo̧ itea mösa'obe di̧'yaduwo, ajayinö ji̧na Jacob ösödinökwe Dios ejube di̧'yaduwo. Jobe di̧'yaduwo, Diosma ökwödönöbi iteda wei̧ ö̧ba̧ja̧dakobetjö̧, ja̧danö ökwödöbi Dios wei̧ a̧ja̧kwö dö̧jakobetjö̧, –jö̧ba̧lö yötja̧lakwedö. —Jau, Sion mösa'otjö laebakobe Dios wei̧ma, Jerusalen comunidadtjö Isabenö Jo̧ yöawi̧ laebakobe, bö̧je ba̧kwemeachibanö tja̧ja̧kwobö.

Isaías 28:12

Jau, ajayinö ökwödö iteda ömöledönö yöawinobe, —Bemi niji chiyaduwakwö, nöinö kwotidaduwaja̧tjö kwö'wachaduwobö. Lekwe möle nöinö kwebachö kwö̧jinaduwijayonö, babe bemi nijinö ja̧nö otiwanö kwö'wachaduwobö ja̧kobe, —jö̧ba̧lö yöawinobe, jokwaijayonö yöawi̧ tja̧ja̧kwobö tjöpöjödinobe.

Isaías 42:4

Jwaikwöda me'dawachibökönö, waekwökönö lȩekwa yöbawö ö̧jakwo̧, bö̧jȩ ba̧kwemeachibanö ju̧kwadöma, lȩekwa yöawi̧ a̧ja̧kwö tjö̧jenanö baibanö. Ja̧danö ja̧ möle jwaibalawa ö'öbö ju̧kwadöbi jo̧ba wei̧ tja̧ja̧kwobö tjiteada̧lakwedö, —Dios ömöayo̧ webö ö̧ba̧ja̧dakwa̧ da̧ja̧kwaduwo, —jö̧ba̧lö, laebobe Dios iteda ömöayo̧nö yöa̧li̧ma.

Isaías 49:22

Baikwö yöa̧lobe Isabenö Jo̧ Diosma, ökwödö israel jojodönö pjaatakwa̧ma: Baikwö yötawaduwakwö chömöledö, ötjöma chömamu kabebö, tjitebotenia jojodönö weti̧ chi̧sȩbocha, ja̧danö chi̧sȩbiawö̧, kwitji̧muduwinö tjebatö, baikwö tjichejebakwedö. Jau, kwitji̧mu ömadönö apjö̧a̧lö tjichakwedö, ja̧danö tjöböbe'onö kwitji̧mu ya̧dönö e'ewö tjichejebakwedö.

Isaías 59:19

Jobekwö lȩebiawö̧, Isabenö Jo̧ imi omukwatö yetjaibakwedö, jawo̧ meajobekwö ju̧kwadöma. Ja̧danö jawo̧ laebobekwö ju̧kwadöbi dejatinö ujulu yetjaibakwedö. Jau, Dios lȩbebö ichakwa̧ma, juluwanö ujulunö ichakwo̧. Isabenö Jo̧ labinö pjubö, ojwe buluwanö labinö isuwobö wei̧danö, juluwanö lȩbebö ichakwo̧.

Isaías 60:3

Jobekwö kwidewaduwiawö̧, tjitebokwena jojodöma kwö̧jaduwobekwö tjichakwedö, yȩayi dewachi̧danö salöinö kwidewaduwiawö̧, inesö la'aka luwedöbi kwö̧jaduwobekwö tjichibakwedö.

Isaías 60:5

Jobekwö baledi̧ edö, jwiinö kwo̧'woduwi ösöwachibanö kwö̧jaduwakwedöja, ösödachibö kwomajadeduwima tjö̧awakobe ichejekwa, jwiinö kwo̧'woduwi ösöwachibanö kwitji̧muduwinö kwedaduwobetjö̧. Jau chömöledö, inesö mikwawi̧ jawa, jwaibalawabenö tjichejebakwedö ökwödönö, tjitebotenia nöinö mikwawi̧ jawama, ökwödönö iyö tjichibakwedö, kwo̧'woduwi ösöwachibanö.

Isaías 62:10

Comunidad apjudebenö lakebaduwo chömöledö, Jerusalenbe ichibakwama mana otiwanö kwotidaduwo. Jalama otiwama baibanö kwotidaduwo, ja̧danö inawiya manatjö pjolatö loköbaduwo, Jerusalenbe tjichakwedö otiwanö kwetjachakobetjö̧. Ja̧danö mana i̧sȩba̧do̧, banderasa̧do̧ kabebö kwönaduwo, tjiteboteniatjö ichadöma mana otiwanö tjedakobetjö̧.

Isaías 66:19

I̧sȩkwa jawa baibanö, labinö lȩtebakwo̧sa jobadönö. Ja̧danö lȩtebaja̧tjö ji̧badönö wetocha, tjitebotenia jojodönö yötjawobö, Tarsis nijibebi, Fut nijibebi, 'böawa waisadö tjitebo Lud nijibebi, Tubal nijibebi, Javan nijibebi yöbawö tji̧'yobö. Ja̧danö ötjönö a̧ja̧kwajiböködö, ja̧danö dejatinö chujulu edajiböködö tjitebo jwaibalawa ö'öbö nijibebi tji̧'yobö wetocha, ja̧danö tjitebotenia jojodönö chujulu yötjawakwedö, —Isabenö Jo̧ Diosma isabenö dejatinö juluwo̧, —jö̧ba̧lö.

Mateo 12:21

ja̧danö jo̧banö böjȩ bakwameachibanö jojodö tjo̧'wo̧ tjöwana̧lakobe, jö̧ba̧lö laebobe Isaías iwȩyudinama.

Mateo 8:11

Isabenö yötawaduwakwö, Mölejȩbe jo̧ Dios la'aka luwo̧ ba̧nö weenama, ba̧jekwadö Israel jojodöböködö jelobetjö ichajadöma ichö mesasötenö tjöbamatakobe Abrahamkwö, Isaackwö, Jacobkwö.

Lucas 2:32

Jo̧bama dewinö idejatakwo̧, tjitebotenia jojodö Diosnö tjöwaisachibakobetjö̧. Ja̧danö ju'wibi, jo̧bama Israel jojoobetjö̧, böjȩnö ju̧kwadöma Israel jojodönö ösödö yötja̧lakobe: Bidö Israel jojodöma isabenö otiwadö, jobadönötjöda Dios weinökwe ichinobetjö̧— jö̧ba̧lö yöawinobe Simeonma.

Juan 12:32

Ötjönö kabebö towisa'onö bȩbö tjujunena, okobe deinö jojodönö pjatatocha, ötjönö tjomukwatobö— yöawinobe Jesúsma jojodönö.

Hechos 11:18

Ikenama Pedrokwö wene juna̧lakwawö yöba̧ladöma Pedro yöawobe a̧ja̧kwö wene tjujuna̧li̧ma kabatakwawijadötö. Wene tjujuna̧li̧ma kabatibö Diosnö ösödö jö̧ba̧lijadötö: —Diosma judío jojodöböködönöbi otiwanö pjaatinobe. Tjomukwati̧ balewachö itekwöda tjichibobö, itekwöda ba̧kwȩlö̧jatebö tjuju̧kwobö pjaatinobe— jö̧ba̧lö, ösödijadötö Diosnö.

Hechos 28:28

Ina yöbawijetö: —A̧ja̧kwaduwitjö kwöwaisachibaduwinö. Ökwödöma, judío jojodöma Dios pjaatina kwöpöjödaduwijatö, jojodö tjö̧jibinö pjaatinama. Jo̧kwaobetjö̧ Diosma webijetö judío jojodöböködönö tja̧ja̧kwobö. Isabenö jobadöma tja̧ja̧kwobö jö̧ba̧ladö, Dios iwenema— yöbawijetö Pabloma.

Hebreos 4:1

Isabenö chömöledö, yötawaduwakwö. Ina babebi Diosma ösödobe jo̧bakwö ö'wachö döbamatobö, do̧'wo̧ luwo̧nö. Jo̧ba iwene, da'dödöminenö yöbawö ujunina wenema, Ötjökwö ö'wachö bamataduwi, jö̧ba̧lö, ina 'dö̧ibajinokobe. Ökwödönö babe ju̧kwadönöbi Diosma yöbawö ujuninobe ja̧ wene, jo̧bakwö do̧'wo̧ luwo̧nö ö'wachö döbamati̧ wenema. Jo̧kwaobetjö̧ tjöbeba̧lö̧jönö omukwatö di̧'yaduwo, Diosnö ösödö. Jau chömöledö, Diosma ökwödötjö bakwo̧nö edö, Chedemi ötjökwö ö'wachö bamatö jö̧kö̧ja, jö̧a̧lapji jö̧ba̧lö, jo̧banö ösödö tjöbeba̧lö̧jönö omukwatö di̧'yaduwo.

1 Pedro 5:10

Isabenö babe usula kwemawaduwobö jo̧be chömöledö, ikenama ja'yubenö lekwajabetjö jejenö usula emawajadönö, Diosma ökwödö usula kwemawaduwaja̧tjö kwö̧bibajaduwinö otidö loakobe chömöledö. Jau chömöledö, Diosda, mikwa jwiinö otiwanö iyo̧da ökwödönö jwöinöbe, Cristokwö dötewanö ja̧nö, jo̧ba ba̧kwȩlö̧jatebö salöinö idejatobe ökwödö kwö̧jaduwobö, ja̧danö isabenö jo̧bakwö kwö̧jaduwakwedöja chömöledö. Ja̧danö chömöledö, ina böjȩnö kwö̧jaduwayi, Diosda 'diinö kwö̧jaduwobö pjaatakwo̧, ja̧danö pjolachibökönö kwö̧jaduwobö ujunakwo̧, ja̧danö kwujuluwaduwachibanö pjaatakwo̧ chömöledö.

Apocalipsis 22:16

Ikenama Jesús yöawijatö okobe deinö itenöda ösödadönöma. Baikwö yöawijatö: —Ötjöma Jesússa. Chömöayo̧ ángelnö, Juannö yöawobö wetinobetjö̧, tjo̧wi̧ta, kwa̧ja̧kwaduwobe. Ja̧danö, ötjöma Davidminetjö tupadanö jojosa. Ja̧danö, ötjöma sili'i jwiinö dejatinö dewo̧danö, yȩayi dejatö dewo̧danö jwiinö dejatinö dewo̧sa— jejenö Jesúsma yöawijatö okobe deinö jo̧banö ösödadönöma.

Apocalipsis 5:5

Ja̧danö, chubudekwiökwe, damö la'aka luwedötjö bakwo̧ma ötjönö pjabatö yöawijatö: —Budekwökönuwi. Isabenö yötawa. Jwiinö mikwawo̧ma ö̧jobe, bakwo̧da. Jo̧bama kwa'dömine Judá ömöledötjö tupadanö jojo, Didiba, jö̧ba̧lö, ötjabökwe. Ja̧danö, kwa'dömine David ömöledotjöbi tupadanö jojo, jo̧bama. Jo̧bada sulabebi, wobajalebi jwiinö juluwo̧obetjö̧, jo̧bada, jwiinö mikwawo̧ma, böja tö'awa'be pöekwöja kabebö edobö jo̧ma— yöawijatö damö la'aka luwo̧ma ötjönöma.