Isaías 11:1 - Dios Iwene1 Isabenö Dios lȩebakwawö̧ israel jojodönö, ja̧danö wanedö yötawa, David abe'do Isai itji̧mu tupadanö jojodö tjö̧ji̧danö wanekwachowi towi jubö loakobe, sule towi la'akada ji̧binö. Jo̧kwaijayonö, jemi ikenama, ja̧ Isainö wanekwachowi towi la'akatjö, yayinö pokwö laebakobe, ja̧danö pokwaja̧ ikenama, yemidanö otiwanö wa̧ja̧kobe. အခန်းကိုကြည့်ပါ။ |
Isaías 11:1
26 ပူးပေါင်းရင်းမြစ်များ
Ja̧danö, ja̧ möle bandera ötjabi̧ jawa öwawi̧danö, Isai itji̧ tupadanö jojo la'aka luwo̧ma öwawinö öjamatakwo̧, okobe deinö bö̧jȩnö ju̧kwadöma joba ö̧jobekwö ko̧ko̧kwö tji̧'yakobetjö̧. Ja̧danö, öba a'o ichibajadö, tjitebotenia jojodöma jo̧banö abebö tja̧ja̧kwakwedö, otiwanö ja̧bö tjö̧jakwa̧ tjöwaisakobetjö̧. Ja̧ mö̧le, isabenö okobe deinö jojodöma jo̧ba itebo comunidad ösödö otiwanö tjomukwatakwedö, —Duluwo̧ itebo comunidadma dejatinö salöi̧ comunidad, —jö̧ba̧lö.
Yadakwö Isabenö Jo̧ma yemidanö israel jojodönö pjaatakwo̧. Ja̧ möle Israel niji pokwi̧ma, jwiinö otiwanö pokwakobe. Ja̧danö, jejenö otiwanö pokwiawö̧, israel jojodötjö ji̧binadöma tjo̧'wo ösöwanö tjö̧jakwedö, —Ditebo israel niji pokwi̧ma, jwiinö otiwanö pokwobe, otiwanö kwakwawa dujuna̧lobö, —jö̧ba̧lö.
Baikwö yöta̧la Dios ömöayo̧nö: Dios öba a'o ö̧da̧peachinama, a̧dekwanö pokwi̧danö, kököelö bö'diatjö pokwi̧danö ichejekwinobe. Jo̧banö edö, jo̧kwadabo̧danö ichejekwijatö, wamenö edö, otiwo̧nöma dedijökötö, ja̧danö la'aka luwo̧ ichejekwi̧danöma ichejekwinokobe. Wamenö edö, —Bitenö dösödo jö̧da̧lökwe, —jö̧ba̧lö edö domukwatijökötö, jo̧kwadabo̧danö ichejekwobetjö̧.
Isabenö jwiinö usula tjemawakwedö israel jojodöma, baikwö yöta̧la: Yöta̧laja̧danö baledaja̧ ikenama, domulataja jawa osotjö, jelemutjö ö'wejemu jawa oso ida̧ökö deijayonö, ina bakwaso ina israel nijinö tjö̧jitjö̧ma, tjöpöjojodöma yemidanö israel niji juwö tjichakwedö. Jo̧kwaijayonö, jobekwö baledijayonö, bakobenö debö tji̧'yökakwedö israel jojodöma, baikwö wanedö yöta̧la: Encina towibi, roble towibi jutjaja̧ ikena, towi la'aka 'yebö lotjökötjö̧ma, yadakwö towi la'akatjö yemidanö pokwobö jȩna, jö̧tö? Ja̧danö, ba̧jȩkwadö debö tji̧'yijayonö, ina ji̧badö tjö̧jena, tjitjimu tupadanö jojodö inesö otiwadö chömöledöma yadakwö tjö̧jakobetjö̧, —jö̧ba̧lö yöawinobe Isabenö Jo̧ma, ötjö Isaiasnö.
Jau chuluwo̧, isabenö tjo'wo ösöwachibanö ju̧kwadö kwömöledöma, bakwuju jitji̧nö jemajobetjö̧, duluwo̧ baibakwo̧ jitji̧nö jemajobetjö̧. Ja̧danö jo̧ba jemajökwema, isabenö duluwo̧ baibanö webö ö̧jakwo̧, ja̧danö jo̧ba imi baikwö ötjabikwo̧: —Inesö waisanö tjomukwatobö pjabato̧, —jö̧ba̧lö ötjabikwo̧. Ja̧danö ju'wibi, —Juluwo̧ Dios, —jö̧ba̧lö ötjabikwo̧. Ja̧danö ju'wibi, —Dabe'do Ba̧kwelöjatebö Jo̧, —jö̧balö ötjabikwo̧. Ja̧danö ju'wibi, —Wene Jwiinö Dö̧jobö Webö Jo̧, —jö̧ba̧lö ötjabikwo̧, duluwo̧ baibanö jemajökwema.
Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.
Ja̧danö Dios iwene wȩyudina Isaíasma baikwö iwȩyudinobe Jesús judío jojodöböködönö pjaatakwa̧ma: Jesé itji̧ tupadanö jojoma ichakobe, ja̧danö jo̧bama webö yöawakobe judío jojodöböködönöma, tjuluwo̧ baibanö. Ja̧danö, jo̧banö tjösödakwedö judío jojodöböködöma, Bitema ökwödönö pjaatakwo̧, jö̧ba̧lö laebobe Dios iwenema. Jau chömöledö, Jesúsma judío jojodönöbi, judío jojodöböködönöbi ösödö pjaatinobe, jo̧kwajabetjö̧ ökwödöbi kwömöledöduwi Jesúsnö ösödadönö kwösödaduwo, öpöjödökönö.
Ikenama Jesús yöawijatö okobe deinö itenöda ösödadönöma. Baikwö yöawijatö: —Ötjöma Jesússa. Chömöayo̧ ángelnö, Juannö yöawobö wetinobetjö̧, tjo̧wi̧ta, kwa̧ja̧kwaduwobe. Ja̧danö, ötjöma Davidminetjö tupadanö jojosa. Ja̧danö, ötjöma sili'i jwiinö dejatinö dewo̧danö, yȩayi dejatö dewo̧danö jwiinö dejatinö dewo̧sa— jejenö Jesúsma yöawijatö okobe deinö jo̧banö ösödadönöma.
Ja̧danö, chubudekwiökwe, damö la'aka luwedötjö bakwo̧ma ötjönö pjabatö yöawijatö: —Budekwökönuwi. Isabenö yötawa. Jwiinö mikwawo̧ma ö̧jobe, bakwo̧da. Jo̧bama kwa'dömine Judá ömöledötjö tupadanö jojo, Didiba, jö̧ba̧lö, ötjabökwe. Ja̧danö, kwa'dömine David ömöledotjöbi tupadanö jojo, jo̧bama. Jo̧bada sulabebi, wobajalebi jwiinö juluwo̧obetjö̧, jo̧bada, jwiinö mikwawo̧ma, böja tö'awa'be pöekwöja kabebö edobö jo̧ma— yöawijatö damö la'aka luwo̧ma ötjönöma.
ကြော်ငြာတွေ