—Chömöledö, kwuluwo̧duwi Isabenö Jo̧ Diosma isabenö ökwödökwö ja̧nö pjabato̧, jö̧tö? Ja̧danö isabenö döpöjojodö, ditebo ö'öbötenia ju̧kwadötjö dö̧jibanö otiwanö pjaatinobe, jobadökwö wene jwiinö dö̧jakobetjö̧, jö̧tö? Jau chömöledö, bemi niji ju̧kwadö döpöjojodönö chujuluwobö iyinobe, ja̧danö jobekwö chujuluwobö iyinobetjö̧, okobe deinö ajayinö bemi nijinö ji̧nadö döpöjojodöbinadöma, ida̧ökö Isabenö Jo̧ ömöayedö, ja̧danö Isabenö Jo̧ ömöledö israel jojodö tjö̧möayedö tju̧ju̧kwobe. Jau, isabenö otiwanö ökwödökwö ja̧nö pjabato̧ Isabenö Jo̧ma chömöledö,
Hechos 9:31 - Dios Iwene31 Ja̧ mölema okobe deinö Jesúsnö ösödadöma Judeanö ju̧kwadöbi Galileanö ju̧kwadöbi Samarianö ju̧kwadöbi otiwanö ju̧kwijadötö, usula emawökönö. Ja̧danö, Dios O̧'wo̧ Luwo̧ pjaatobetjö̧ Diosnö omukwatö tjo̧'wo̧ luwo̧nö ösödö juluwijadötö, tjo̧'wo̧ luwo̧ jawama. Ja̧danö, Diosnö otiwanö yebabinö omukwata̧lö ju̧kwijadötö. Ja̧danö, Dios O̧'wo̧ Luwo̧ pjaatobetjö̧ ba̧jekwachijadötö Jesúsnö ösödadöma. အခန်းကိုကြည့်ပါ။ |
Hechos 9:31
56 ပူးပေါင်းရင်းမြစ်များ
Jo̧kwaijayonö, ökwöma kwitji̧nö kwujunala̧kwo̧ja, ö'wö bakibaja̧ ikena la'aka luwo̧ baibakwo̧ma. Ja̧danö, ökwö ölakwabikwawö kwö̧jinadanöma ö̧jökakwo̧ kwitji̧ma. Jo̧banö pjabatö wetocha, israel niji ö'öbötenia ju̧kwadö tjöpöjojodöma, jo̧bakwö ölakwabikwawökönö dösölö̧jinö tjö̧jobö. Jau, kwitji̧ma Salomon imikwakwo̧, wene jwiobe jö̧ba̧lö, ja̧danö jo̧ba webö ö̧jena baledibanö, israel jojodö wene jwiinö ölakwabikwawökönö tjö̧jobö wetocha.
Chömöledö, isabenö yötawaduwakwö: Jweinö omukwatö kwö̧jaduwobö jö̧ka̧laduwitjö̧ma abönö baikwö kwomukwataduwobö jo̧be: Isabenö Jo̧nö yebabinö kwomukwataduwobö jo̧be, ökwöda, jö̧ba̧lö. Chömöledö, jweinö omukwatö kwö̧jaduwoböma kwisakwaduwo, ja̧danö jwebebö yötjawi̧ a̧ja̧kwö kwö̧jaduwo, otiwa jö̧ba̧lö. Sule sulabenö omukwatö ju̧kwadöda tjöpöjödobe jweinö omukwatö tjö̧joböma. Ja̧danö, sule sulabenö omukwatö ju̧kwadöda tjöpöjödobe jwebebö yötjawi̧ jawa tja̧jakwoböma.
Jemi ikena jweinö omukwatadö yötjawina, bakwo̧ iteda itji̧nö yöawinadanö baikwö laebobe: Chitji̧, sulabenö ja̧badöma nöinö tju̧juna̧lena, sulabenö ja̧tji̧tjö tjȩminama ¿jö̧tö̧? Chitji̧, jobadönö edö ö'wöyabinö kwedoko, otiwanö tjö̧jobe, ötjöbi jobekwö chö̧jobö jö̧ta̧la, jö̧ba̧lö. Jobekwö omukwatö kwedoko jobadö sulabenö ja̧badönöma. Isabenö Jo̧nöda yebabinö kwomukwato chitji̧, ba̧kwȩlö̧jatebö.
Ju'wibi yöbawuju: —Chömöledö, Isabenö Jo̧nö yebabinö omukwatö kwö̧jaduwobö jö̧ka̧laduwitjö̧ma suli̧ jawa kwöpöjödaduwobö jo̧be. Ötjöma suli̧ jawa öpöjödujusa, jojodö sulabenö tjo̧mukwati̧ma. Baikwö jojodö sulabenö tjo̧mukwati̧ jwiinö chöpöjödobe: Bakwo̧, ötjödasa waiso̧ma, jö̧ba̧lö omukwato̧nöma jwiinö chöpöjödobe. Ja̧danö, ju'wibi jojodö tjo̧mukwati̧ma jwiinö chöpöjödobe: Bakwo̧ ju'wedönötjö o̧penönö inesö luwo̧ jo̧sa, jö̧ba̧lö, omukwato̧nöma jwiinö chöpöjödobe. Ja̧danö ju'wi jawabi ju'wi jawa chöpöjödobe: Sulabenöda omukwatö jo̧nö jwiinö chöpöjödobe. Ja̧danö, jelo̧nöbi jwiinö chöpöjödobe, jojodönö jelobekwö tjo̧mukwatobö ö'öbönö yöba̧lo̧nöma. Ja̧ jawa jwiinö chöpöjödobe— yöbawuju, jweinö omukwatö ja̧kwawa wanekwachujuma, isudada.
Ja̧danö, ja̧ möle bandera ötjabi̧ jawa öwawi̧danö, Isai itji̧ tupadanö jojo la'aka luwo̧ma öwawinö öjamatakwo̧, okobe deinö bö̧jȩnö ju̧kwadöma joba ö̧jobekwö ko̧ko̧kwö tji̧'yakobetjö̧. Ja̧danö, öba a'o ichibajadö, tjitebotenia jojodöma jo̧banö abebö tja̧ja̧kwakwedö, otiwanö ja̧bö tjö̧jakwa̧ tjöwaisakobetjö̧. Ja̧ mö̧le, isabenö okobe deinö jojodöma jo̧ba itebo comunidad ösödö otiwanö tjomukwatakwedö, —Duluwo̧ itebo comunidadma dejatinö salöi̧ comunidad, —jö̧ba̧lö.
Jo̧bada 'diinö kwö̧jaduwobö pjaatakwo̧ma chömöledö, jo̧bada kwö̧jibaduwinö pjaatakwo̧. Jobada waisakwawa jawa ba̧ja̧dö, waisanö kwomukwataduwobö pjaatakwo̧. Isabenö nöinö mikwawobe jo̧banö yebabinö kwösödaduwi̧ma, ju'wi mikwawi̧ jawatjö bajalekwönönö mikwawi̧, ökwödö Sion mösa'o ju̧kwadö Isabenö Jo̧nö yebabinö ösödö kwö̧jaduwi̧ma.
Ina yöbawijetö: —Tjo̧wi̧ yöta̧la chömöledö. Babema Diosnö ateba ökwödönö ite'ada̧lobö. Jo̧bama ökwödönö lȩlö̧jino edö pjabato̧. Ja̧danö, lȩlö̧jino edö ökwödö kwo̧'wo̧ luwo̧duwi ujuluwachibanö ja̧bo̧, itekwöda juluwachibanö tupakwö kwi̧'yaduwobö. Ja̧danö, lȩlö̧jino edö otiwa jawa iyo̧ Diosma, okobe deinö i̧tji̧munöma, jo̧ba suli̧ jwiinö batjibanö ja̧inawö̧nöma.
Ja̧danö, Jesúsnö ösödadöma kabatökönö yöbawiabijadötö Dios iwenema. Jerusalénnö ju̧kwadöma kabatökönö ju'wedö ju'wedöbi Jesúsnö ösödijadötö, Jesúsma dö̧jibinö pjabato̧, jö̧ba̧lö. Ja̧danö, Jesúsnö ösödadö baibanö, ba̧jekwadö babibijadötö. Ba̧jekwadö Diostjö jojodötjö ö'weje pjabatadöbi Jesúsnö ösödadö Dios iwene yötjawobe a̧ja̧kwö do̧batö emijadötö Jesúsnöma.
Ja̧danö, Sauloma Estebannö ikwawö tjö'wötajobe edö, Otiwa, jö̧ba̧lö, ösödijetö. Ja̧danö, Diosnö jwiinö ösödadöma Esteban ö'wö babibajo̧nöma e'ewö lödijadötö. Jobadöma labinö budekwakwawijadötö, Esteban ö'wöchajiawö̧. Ja̧ möletjö, Esteban ö'wöchina möletjö jemi tupakwöma Jerusalénnö ju̧kwadö Jesúsnö ösödadönöma usula tjemawinö ja̧bijadötö ju'wedöma. Usula tjemawinö ja̧tjiawö̧ Jesúsnö ösödadöma jobetjö döbibajijadötö. Jerusaléntjö döbibajadö Judea nijinö ju'wedö, Samaria nijinö ju'wedö, wainökwena babibö ju̧kwijadötö. Okobema Jesús webawedöda, a̧li̧nösamutjö du̧ju̧tajanöda Jerusalénnöma ju̧kwibijadötö.
Jau chömöledö, Dios ömöayedö dö̧ji̧ma kwakwawa jawamaökö, owawa jawamaökö. Ju'wida chömöledö, Dios ömöayedö dö̧ji̧ma. Dios O̧'wo̧ Luwo̧ma ökwödönö ja̧inobe, sulabe jwibadö badibanö, ja̧danö tupakwöbi pjaatobe ökwödönöma. Jau chömöledö Cristonö ösödadö dömöledökwö wene jwiinö dö̧jobö, do̧'wo̧ ösöwanö wene jwiinö dömöledökwö dö̧jobö pjabato̧ Dios O̧'wo̧ Luwo̧ma. Ja̧da Dios ömöayedö ja̧kwawama chömöledö.
Chömöledö, Diosma ökwödönö pjabato̧, Aaa, isabenö Dios jö̧a̧linadanö otiwanö ja̧akwo̧, jö̧ba̧lö domukwatobö. Jo̧banö ateba, kwo̧'wo̧ luwo̧duwi ösöwachibanö kwö̧jaduwobö, wene jwiinö kwö̧jaduwobö. Ja̧danö, jo̧banö kwösödaduwobetjö̧, jejenö kwö̧jaduwobö pjaatakwo̧ ökwödönöma chömöledö. Ja̧danö Dios O̧'wo̧ Luwo̧ ökwödönö pjaatobetjö̧, tupakwö kwo̧'wo̧ kwöwana̧laduwakwedöja, isabenö Dios jö̧a̧linadanö ja̧akwo̧ jö̧ba̧lö.
Jau chömöledö, Diosma isabenö ökwödönö pjabato̧. Diosma öwaetjöda i̧sebinobe ökwödönö ile niebi̧ma chömöledö. Otiwa jawa mikwa jwiinö iyö, iteda o̧'wo̧ luwo̧nö iyinobe, ökwödö do̧'wo̧ luwo̧nö ö̧jobö. Ja̧danö, do̧'wo̧ luwo̧nö ja̧nö Dios ökwödönö ile niebi̧ma öba̧ja̧dobe ökwödönöma, Dios O̧'wo̧ Luwo̧ma chömöledö.
Jau chömöledö, yötawaja̧danö jo̧be, jo̧kwajabetjö̧ baikwö wetaduwakwö ja̧bö kwö̧jaduwo jö̧ba̧lö: Ko̧ko̧kwö Diosnö kwösödaduwenama, bakwo̧ lo̧awa lo̧o jö̧ba̧lö ujuna̧lena. Ja̧danö, jelo̧ ba̧ja̧dakwawa öba̧ja̧do jö̧ba̧lö ujuna̧lena. Ja̧danö, jelo̧ Dios jo̧banö i̧sebina jawa yöawo jö̧ba̧lö ujuna̧lena. Ja̧danö, jelo̧ ju'wedö tjiwenenö yöawakwawa jawa yöawo jö̧ba̧lö ujuna̧lena. Ja̧danö, jelo̧ ju'wedö tjiwenenö yötja̧li̧ labebö lobö yöawo jö̧ba̧lö ujuna̧lena. Jau chömöledö, okobe jwiinö ko̧ko̧kwö ja̧köbaduwi̧ma, Jesúsnö ösödadö tjöda̧peacho jö̧a̧li̧ jawada ja̧köbaduwo.
Yötawi̧ a̧ja̧kwö, Cristo ömöayo̧sa, kwa̧ja̧kwaduwotjö jö̧ba̧lö yötawi̧ a̧ja̧kwö, Aaa, otiwo̧sa jö̧ba̧lö yötawobedanö ichejekwena chömöledö. Jejenö ichejekwijayonö, omönama yöta̧lökö chömöledö jweinö yötawa, isabenö Duluwo̧ 'da̧batö ujuninökwesa. Ja̧danö, ötjönö 'da̧batö ujunenama, ökwödönö suli̧ chöwaedo jö̧ba̧löma 'da̧batö ujuninokobe, ökwödönö kwujuluwaduwachibanö pjatato jö̧ba̧lö 'da̧batö ujuninobe chömöledö. Jo̧kwajabetjö̧, Aaa, otiwo̧sa jö̧ba̧lö yötawobedanö ichejekwijayonö, taba lö̧jökwe chö̧joböma jwia chömöledö. Dios 'da̧batö ujuninökökwe ja̧nö jejenö yöta̧litjö̧ma taba lö̧jökwe chö̧jo jö̧ta̧lena, jo̧kwaijayonö, isabenö yöta̧li̧danö Dios ötjönö 'da̧batö ujuninobetjö̧ la'akatjöda taba lö̧jökakobe.
Chömöledö, ökwödötjö ju'wedö tjomukwatena, Aaa, okobe jwiinö böja Pablo iwȩyudi̧ma, sule jo̧banö otiwanö domukwatobö iwȩyudajena. Jo̧kwadabo̧ ö̧jijayonö, jo̧banö otiwanö domukwatobö iwȩyudajena, jo̧kwadabo̧ ö̧ji̧ döwaisachibapji jö̧ba̧lö tjomukwatena. Jejenö tjomukwatijayonö, ja̧maökö chömöledö. Cristoma isabenö ötjönö 'da̧batö ujuninobe ökwödönö pjatatobö chömöledö, ja̧danö Cristo yötawobö wei̧danö Dios öba a'otjö ja̧nö ökwödönö yötawajabe chömöledö. Ja̧danö ju'wibi yötawa chömöledö, okobe jwiinö yötawi̧ma, ötjönö otiwanö kwomukwataduwoböma yötawokobe, sule kwujuluwachibaduwobö yötawobe chösödawö̧ chömöledö.
Jejenö omukwatö, chi̧'yakwa̧ abönö chiwȩyudobe chömöledö, jobe ichibö ökwödönö lȩtebapji jö̧ba̧lö. Jau chömöledö, Duluwo̧ma isabenö ötjönö ujuninobe, kwuluwo̧duwidanöbo̧ batibobö, ja̧danö jejenö ujuninama, ökwödönö suli̧ chöwaedo jö̧ba̧löma jejenö ujuninokobe chömöledö, kwujuluwachibaduwobö pjatato jö̧ba̧lö ujuninobe.
Jejenö Cristoma Dios ömöledö babibinadönö, bakwo̧nökwena, iyabinobe tjotidawakwena, okobe deinö Dios ömöledö babibinadönö öbibö tjöba̧ja̧dobö. Jejenö öbibö tjöba̧ja̧do jö̧ba̧lö, iyabinobe Cristoma, okobe deinö Dios ömöledö babibinadöma otiwanö tjotidobö Dios weinama. Ja̧danö, okobe deinö Cristo iteba'obedöma tjo̧'wo̧ luwo̧nö jemi tupakwö juluwachibanö tji̧'yobö iyabinobe tjotidawakwenama.
Ja̧danö, ökwödö okobe deinö jo̧ba iteba'obedöma, ba̧jekwadö dö̧jobe, jojo iteba'onö nöinö ji̧danö. Iteba'onöma nöinö jo̧be, iwe'ijubi. Ja̧danö, iwe'iju otiwanö bakweminö 'yo̧bö u̧yu̧ki̧ju junekwemibi jo̧be. Ja̧danö jo̧be ökwödö Jesús iteba'obedöma. Ju'wedö Jesúsnö ösödadökwö bakweminö pjabatakwawö di̧'yobö jojo u̧yu̧ki̧ju junekwi̧danö junekwadösa. Ja̧ma ¿dakwö jö̧ba̧lö jö̧a̧lobeda? Biya̧, chömöledö: Bakwo̧nökwena otiwanö pjabatö ja̧nö, bakwo̧ jelo̧nö pjabatö, bakwo̧ jelo̧nö pjabatö, ja̧danö dö̧jitjö̧ma otiwanö bakweminö dichibakwedösa, do̧'wo̧ luwo̧ma. Ja̧danö tupakwö juluwachibanö 'ya̧nö döda̧peachena, do̧'wo̧ luwo̧ma. Ja̧danö, bakwo̧nökwena ösödanö pjabatakwawanö dotiditjö̧ma, do̧'wo̧ luwo̧ma jemi tupakwö bakweminö dichibakwedösa, jojodönö jwiinö ösödakwawanö.
Jau chömöledö, baikwö labebö lobö yötawa: Ökwödöma Jordan ojwe pebibö, kwiteboduwi baibanö kwuluwo̧duwi Isabenö Jo̧ Dios iyakwemi nijinö kwö̧jaduwakwedöja. Ja̧danö, kwiteboduwi ö'öbötenia, kwöpöjojodöduwi tjösawö̧ tjö̧jijayonö, kwuluwo̧duwi Isabenö Jo̧ Diosma ökwödönö tjöbeba̧lö̧ pjaatakwo̧, ja̧danö jejenö pjaatobetjö̧, wene jwiinö kwiteboduwinö kwö̧jaduwakwedöja.
Ja̧danö, jobadönö weköbo Timoteo, nöinö tja'dödö yötjawina jawa yötjawoko jö̧ba̧lö. Ja̧danö, jobadönö weköbo jojodö tja'dödönö nöinö tjomukwatokobö, Aaa, ötjötjö ajayinö ji̧nadöma bidö, bidö, jö̧ba̧lö. Ja̧ jawama, sule jojodö jwöjwötjakwawoböda ji̧, mikwawö̧kö̧. Jau Timoteo, Diosnö ösödöda tjöda̧peachobe tjo̧'wo̧ luwo̧nö, ja̧ jawa omukwatömaökö. Jo̧kwajabetjö̧ webidönö ja̧ jawa katjatibobö.
Jo̧kwaobetjö̧, Dios iwenetjö jweinö yöawobe, babebi ökwödö Dios ömöledöma, Dioskwö do̧'wo̧ luwo̧ okwanö ö'wachö bamatö duju̧kwi̧ma jo̧be, jö̧ba̧lö. Chömöledö, Dios ajayinöma, jelemutjö bakwöta möle böjȩ otidö kaatakwawaja̧ ikena jelemutjö dötölajata möle ö'wachö öbamatinadanö ökwödöbi ba̧kwȩlö̧jatebö jo̧bakwö do̧'wo̧ luwo̧ okwanö ö'wachö bamatö duju̧kwi̧ma jo̧be. Jo̧kwaobetjö̧ jwaikwöda di̧'yaduwo chömöledö, Diosnö do̧'wo̧ wana̧lö, jo̧bakwö ö'wachö bamatö duju̧kwökapji jö̧ba̧lö.
Ja̧danö, damötjö tja'dödönö yöbawö ujuninadanö, Isabenö Jo̧ma jobadönö otiwanö pjaatinobe, tjöpöjojodökwö ölakwabikwawökönö, wene jwiinö tjö̧jobö. Jau, Isabenö Jo̧ Diosda jobadönö otiwanö pjaatinobetjö̧, tjöpöjojodötjö bakwo̧bi tjöba a'o ö̧jobö jwiinobe, isabenö okobe deinö tjöpöjojodönö tjujuluwobö Dios pjaatinobetjö̧.
Jobadönö a̧ja̧kwökönaduwi chösödawö̧ chömöledö, wainö ja̧bö kwö̧jaduwobö jo̧be chömöledö, baikwö yötawa: Jobadö yötjawi̧ ösödadöma omöna wene ösödadö, jo̧kwaijayonö jejenöböködöja ökwödöma. Ökwödöma omöna wene ösödöködöja, isabenö weneda ösödadöja, isabenö Diosda yöawi̧ kwösödaduwobetjö̧, ¿jö̧tö? Jo̧kwajabetjö̧ jwaikwöda Dios yöawi̧ ösödö kwujuluwaduwachibanö kwö̧jaduwo, ja̧danö Dios O̧'wo̧ Luwo̧kwö dötewanö ja̧nö, Diosnö abebö kwö̧jaduwo.
ကြော်ငြာတွေ