Hechos 5:31 - Dios Iwene31 Jemi tupakwöma, Diosma junijetö Jesúsnöma, la'aka luwo̧ baibanö. Ja̧danö, Diosma Jesús kaekwajinö ja̧bijetö. Ikenama Diosma kabekwajo̧nö iteda öwaisobekwöchobe öbamatobö webijetö, ökwödö Duluwo̧ baibanö, ökwödö dö̧jibinö pjabato̧nö. Jo̧bama ökwödö israel jojodö domukwati̧ma balewachö domukwatobö pjabato̧, ja̧danö ökwödö dusuli̧ma söbebö lobo̧, jo̧bama. အခန်းကိုကြည့်ပါ။ |
Hechos 5:31
57 ပူးပေါင်းရင်းမြစ်များ
Jau chömöledö, ötjöma kwuluwo̧duwi Isabenö Jo̧ Diossa, ötjöma ökwödö Israel jojodö kwösödaduwökwe Suli̧ Jwibo̧ kwö̧jibaduwinö pjabato̧ Diossa, jo̧kwajabetjö̧ isabenö jobekwö pjatatakwo̧sa ökwödönö. Isabenö chösödaduwakwö ökwödö israel jojodönö, baikwö yöta̧la: Ökwödö kwö̧jibaduwoböma, Egipto jojodönö iyö lotajabe, ja̧danö Cus jojodönöbi, Seba jojodönöbi iyö lotajabe, ökwödöda kwö̧jibaduwakobetjö̧.
Jobekwö a̧ja̧kwö, jobadönö dösödi̧ma otiwa jö̧ba̧lö kwomukwataduwitjö̧ma, baikwö abebö cha̧jakwaduwakwö: Bakobe yöba̧lakwawö kwedaduwo, ökwödö kwösödaduwawö̧tjö dite babe baledakwa̧ yöawinojobö, jö̧ba̧lö. Ina baledapji, dite jweinö yöawinada, —Bejenö baledakobe, —jö̧ba̧lö? Kwösödaduwawö̧tjö bakwo̧bi yöawinokobe, jö̧tö? Ötjö Isabenö Jo̧ Diosda babe baledakwa̧ yöbawinama. Ötjödasa Diosbo̧ma, jelo̧ diosbo̧, ötjödajayo̧ma deobe yelösöda. Ötjöda bakwainö otiwanö ja̧bö jo̧sa, ötjöda tjö̧jibinö pjabato̧ma, jelo̧ma deobe.
Jau chömöledö, baikwö wanedö yötawa kwöpöjojodöduwinö chölakwabikwawakwa̧ma: Kwöpöjojodönö idöda tjiteba'o tjukwobö chiyakwo̧sa, ja̧danö ubasobu tjowi̧danö, idöda tjökwösobu owö 'dukwachawö̧ batjibobö chiyakwo̧sa, jö̧ba̧lö. Jau chömöledö, otiwanö ökwödönö pjabatö chölakwabikwawakwo̧sa, ja̧danö okobe deinö bö̧jȩnö ju̧kwadöma edö tjöwaisachibakwedö ötjönö, —Isabenö Jo̧ Diosda, Jacob ömöledö tjösödökwe juluwo̧ma, Diosda israel jojodönö tjö̧ji̧binö pjabato̧ma, jo̧bada tjöbeba̧lö pjabato̧ma, —jö̧ba̧lö edö tjöwaisachibakwedö, jö̧ba̧lö yöawobe Diosma.
Jau chuluwo̧, isabenö tjo'wo ösöwachibanö ju̧kwadö kwömöledöma, bakwuju jitji̧nö jemajobetjö̧, duluwo̧ baibakwo̧ jitji̧nö jemajobetjö̧. Ja̧danö jo̧ba jemajökwema, isabenö duluwo̧ baibanö webö ö̧jakwo̧, ja̧danö jo̧ba imi baikwö ötjabikwo̧: —Inesö waisanö tjomukwatobö pjabato̧, —jö̧ba̧lö ötjabikwo̧. Ja̧danö ju'wibi, —Juluwo̧ Dios, —jö̧ba̧lö ötjabikwo̧. Ja̧danö ju'wibi, —Dabe'do Ba̧kwelöjatebö Jo̧, —jö̧balö ötjabikwo̧. Ja̧danö ju'wibi, —Wene Jwiinö Dö̧jobö Webö Jo̧, —jö̧ba̧lö ötjabikwo̧, duluwo̧ baibanö jemajökwema.
Baikwö kwöwaisobö jo̧be Daniel, la'aka luwo̧ma yemidanö Jerusalén comunidad tjotidobö weakobe, ja̧danö ja̧ weaja̧ ikena, cuarenta y nueve o̧biya baledakobe, otidö katjatenanö baibanö. Jerusalén comunidadnö yemidanö mana tjotidakobe, ja̧danö comunidad söpödö sobö ojwe tjönakobe, tjöpöjojodö ichibö tjujuluwapji jö̧ba̧lö. Jejenö otidajadö, cuatrociento treinta cuatro o̧biya baledibanö comunidad söbebö lotjökakobe, jo̧kwaijayonö söbebö lötjököjayonö, ina nöinö wene baledakobe. Ja̧danö ja̧ cuarenta y nueve o̧biakwö, cuatrociento treinta y cuatro o̧biakwö baledibajenama, la'aka luwo̧ Dios weakwo̧ jö̧a̧linökwema ichibakobe.
Ina jö̧ba̧lijetö: —Babema kwöwaisachibaduwobö, biya̧ jö̧ta̧la. Ötjöma, jojo baibanö jeminökwema, bite 'wabo̧nö otiwanö baibobö otidö lotocha. Ökwödöma jejenö otidö loti̧ edö kwomukwataduwena, Edaduwi, bitema, Jesúsma wamenö tjö'wöchi̧ma otidö lobo̧, jö̧ba̧lö. Jo̧kwaobetjö̧ tjo̧'wo̧ luwo̧nö tjö'wöchi̧bi, tjusuli̧ma söbebö loawabi waiso̧ena, jö̧ba̧lö, kwomukwataduwena. Dios ujulunö tjo̧'wo̧ luwo̧nö tjusuli̧ söbebö lobö ja̧bo̧ena, jö̧ba̧lö, kwomukwataduwena ökwödöma, jejenö otidö loti̧ edö—jö̧ba̧lijetö Jesúsma jobadönöma. Ikenama 'wabo̧nö edö webijetö Jesúsma:
Jobadöma wajwibö tja̧ja̧kwobe. Jejenö Dios iwene ajayinö yöawinadanö badekwachibanö wajwibö tja̧ja̧kwobe. Ajayinö Dios iwenetjö baikwö laebijetö: Jobadöma ötjö chotidobe wajuwanö tjeda̧lijayonö ötjönöma wajwibadö. Ötjö yötawi̧ kabatökönö tja̧ja̧kwijayonö do̧tjatibokobe a̧ja̧kwadö. Otiwanö edö, a̧ja̧kwö tjöwaisachibitjö̧ma, sulabenö tjomukwati̧ kabatibö tjöbalewachena. Ja̧danö, tjomukwati̧ tjöbalewachitjö̧ma sulabe tjujuna̧li̧ söbebö lotena. Jejenö laebijetö ajayinö, Dios iwenetjö— jö̧ba̧lijetö Jesúsma.
Ja̧danö ju'wibi tjiwȩyudinobe: Okobe deinö sulabenö tjomukwati̧ kabatibö balewachö Dios weakwo̧ jö̧a̧linökwenö ösödadönöma, tjusula söbebö loakwo̧ Diosma jö̧ba̧lö yötjawobö ja̧kobe. Ja̧ yötjawakwa̧ma, Jerusaléntjö jamatö böjȩ bakwameachibanö baibanö yötjawobö ja̧kobe, jö̧ba̧lö laebobe damötjö tjiwȩyudinama.
Ikenama Pedrokwö wene juna̧lakwawö yöba̧ladöma Pedro yöawobe a̧ja̧kwö wene tjujuna̧li̧ma kabatakwawijadötö. Wene tjujuna̧li̧ma kabatibö Diosnö ösödö jö̧ba̧lijadötö: —Diosma judío jojodöböködönöbi otiwanö pjaatinobe. Tjomukwati̧ balewachö itekwöda tjichibobö, itekwöda ba̧kwȩlö̧jatebö tjuju̧kwobö pjaatinobe— jö̧ba̧lö, ösödijadötö Diosnö.
Ina yöbawijetö Pabloma: —Damötjö Diosma ajayinö yöbawö junijetö biya̧ wenema, Israel jojodö tjö̧jibinö pjaatakwo̧ma Davidtjö tupadanö jojodötjö bakwo̧, jö̧ba̧lö. Chömöledö, ja̧ Dios ajayinö yöbawö ujunina wene ida̧ökö badekwachijetö Jesúsnö jemenama. Jesúsnö, Davidminetjö tupadanö jojonö, israel jojodö tjö̧jibinö pjabato̧nö jeminena Dios ajayinö yöbawö ujunina wene badekwachijetö.
Jo̧banöma mölejȩbe kaekwajinö ja̧bijetö Diosma, iteda öwaisobekwöchobe öbamatobö, la'aka inesö ö̧bena. Ikenama Diosma iyijetö iteda O̧'wo̧ Luwo̧nö Jesúsnöma, isabenö yöawinadanö. Jemi tupakwöma Jesúsma iyijetö Dios O̧'wo̧ Luwo̧nö ökwödönöma. Bena ju'wedö tjiwene wajwidijayonö yödawobe kwedaja̧duwabi, kwa̧ja̧kwaja̧duwabi Dios O̧'wo̧ Luwo̧, Jesús ökwödönö weajökwe ja̧aja̧— yöbawijetö Pedroma—.
Ina yöbawijetö Pedroma: —Jo̧kwaobetjö̧ babema jweinö yöta̧la ökwödönö, israel jojodönö. Ökwödöda öpöjödö towisa'onö bȩtjobö weköbaduwinökwema Jesúsda. Jo̧kwaijayonö kwöpöjödaduwökwenöma Diosma yöbawö junijetö ökwödö Duluwo̧ baibanö. Ja̧danö, Diosma yöbawö junijetö Jesúsnöma ökwödö dö̧jibinö pjaatobö— jö̧ba̧lijetö Pedroma.
Jejenö abebö tja̧ja̧kwiökwe Pedroma atadijetö: —Chömöledö, ökwödötjö, bakwo̧nökwena sulabenö kwomukwataduwi̧ma kabatibö balewachaduwi. Ja̧danö, ojwenö ubu̧datobö abebaduwi, Jesucristonö kwo̧'wo̧ kwöwana̧laduwi̧ i̧sebö. Jejenö ja̧baduwi, Dios ökwödö sulabe kwujuna̧laduwi̧ söbebö loakobetjö̧. Jejenö ja̧köbaduwenama Dios O̧'wo̧ Luwo̧ma tebachibö öjamatakobe ökwödönö— yöbawijetö Pedroma—.
Ja̧danö, babema ida̧ökö lȩkebinaduwökwenö yemidanö kwösödaduwobö jo̧be, ja̧danö jo̧banö jejenö kwösödaduwenama, ötjöbi jo̧banö chösödobe chömöledö, ja̧ina omukwatökönö. Jau chömöledö, baikwö yötawa: Bakwo̧ sulabenö ja̧ina omukwatökönö chösödobö ji̧tjö̧ma, Cristo öba a'otjö ja̧nö, ja̧ina omukwatökönö jo̧banö ösödo̧sa chömöledö, ökwödönö pjatatotö jö̧ba̧lö omukwatö.
Ja̧danö jwaikwö 'ya̧nö, me'dawachibökönö, Jesús, dö̧jibinö pjabato̧nö eda̧löda di̧'yobö jo̧be. Chömöledö, Jesúsma ökwödönö pjaatinobetjö̧ Diosnö do̧'wo̧ wana̧ladö babibinadösa, Jesúsnö do̧batö emö. Ja̧danö, Jesús ökwödönö pjaatinobetjö̧ ba̧kwȩlö̧jatebö Diosnö do̧'wo̧ wana̧ladösa, jo̧banö kabatibökönö, jwaikwöda 'ya̧nö. Jo̧kwaobetjö̧ chömöledö, Jesúsnöda omukwata̧lö, jo̧ba i̧'yinadanö di̧'yobö jo̧be. Jo̧ba ö̧jina omukwataduwi. Yelösöda usula emawö woinobe towisa'onö bȩtjajökwema. Isabenö, ja̧ jo̧banö lȩtjebi̧ma yelösöda jwiinö taba̧lö̧ji̧ jawanö lȩtjebinobe. Jo̧kwaijayonö Jesúsma omukwatinokobe itenöda taba̧lö̧ji̧ jawanö lȩtjebi̧ma. Usula emawijayonö ju'wi möle baibakwa̧ omukwatinobe, jwiinö o̧'wo̧ ösöwanö ö̧jakwa̧ma. Ja̧danö, Jesús towi sötenö bȩtjajökwema ö'wö baibinobe. Jemi ikenama ö'wö babibajo̧ma wobajaletjö tjeachajinobe. Ja̧danö, yemidanö tjebachajo̧ma mölejȩbe kabekwachajö ȩwa̧jinobe. Ȩwa̧jo̧ma Abe'do Dios ö̧bemi öwaisobekwöchobe öbamatinobe. Chömöledö, Jesúsma jwiinö usula emawijayonö kaatibinokobe ju'wi möle baibakwa̧ omukwatobetjö̧, jwiinö o̧'wo̧ ösöwanö ö̧jakwa̧da. Jo̧kwaobetjö̧ chömöledö, jwaikwö 'ya̧nö, kabatibökönö, Jesús, dö̧jibinö pjabato̧nö eda̧löda di̧'yaduwo.
Ja̧danö chömöledö, döwaisa. Diosma okobe jwiinö otidina. Ja̧danö, okobe jwiinö otidinama iteda otiwi̧, ja̧danö iteda ujulu i̧sebobö otidinobe. Ja̧danö, Diosma iteda otidinawö̧nö itekwöda ba̧kwȩlö̧jatebö tjö̧jobö ösödo̧, jwiinö otiwobe ö̧jobema. Jo̧kwaijayonö Diosma ökwödönö, suli̧ juna̧ladönöma ¿dakwö teatoböda jobekwö? Teatokobe chömöledö. Jo̧kwaijayonö jweinö omukwatö Diosma badedö ujuninobe iteda Itji̧ Jesúsnöma, ökwödönö pjaatobö. Jejenö omukwatö weinobe Itji̧ Jesúsnö böjȩkwö usula emawö woobö, ökwödö dumusidi̧ midawö. Jejenö Jesús, Dios weinökwema ökwödö dö̧jibinö okobe jwiinö pjabato̧ baibinobe. Chömöledö, okobe jwiinö dö̧jibinö pjaatinobe Jesúsma, ja'yubebi ji̧bökönö. Ja̧danö, Jesús ökwödö dö̧jibinö pjabatinama ökwödö, Dios ju'wedö i̧tji̧munö bakwo̧ öibi̧danö öibakwo̧ Dios jwiinö otiwemi ö̧jobekwö, iteda otiwi̧ dewinö idejati̧ i̧sebemima. Isabenö chömöledö, Diosma jweinö omukwatö badedö ujuninobe okobe deinö i̧tji̧mu jo̧bakwö tjö̧jobö jwiinö otiwobema. Itji̧ Jesúsbi, ju'wedö i̧tji̧mubi okobe deinö jo̧bakwö tjö̧jobö jweinö omukwatö badedö ujuninobe Diosma.
Ja̧danö, woawatjö tjebachajo̧, Cristoma mölejȩbe kaekwajinobe chömöledö, ja̧danö jobe Dios öwaisobekwöchobe inesö la'aka luwo̧ ö̧bena öbamatinobe. Ja̧danö chömöledö, okobe deinö ángelesdötjöbi, böjȩ luwedötjöbi, mölejȩbe luwedötjöbi la'aka tjuluwo̧ma jo̧bada, Cristoda. Ja̧danö chömöledö, babe usula kwemawaduwijayonö, kwo̧'wo̧ ösöwanö kwö̧jaduwena, baledajadö ökwödöbi Dioskwö dö̧jakwedösa jö̧ba̧lö.
Dokwa chömöledö, Ötjöma Simón Pedrosa, ja̧danö Jesucristo webawo̧sa, ja̧danö ju'wibi jo̧ba ömöayo̧sa. Ötjöma böja kwialusöja wȩyudö wetaduwakwö, ökwödö Cristonö chösödi̧danö bakwainö ösödadönö. Jau chömöledö, dö̧jibinö pjabato̧ Dios Jesucristoma bakweminö jojodönö edo̧obetjö̧, ötjönö pjaatinadanö ökwödönöbi pjaatinobe, Cristonö chösödi̧danö ökwödöbi bakwainö kwösödaduwobö. Ja̧danö, ökwödö bakwainö ösödadönö böja kwialusöja wȩyudö wetaduwakwö.
Jau chömöledö, kwöwaisaduwa, dö̧jibinö pjabato̧ Duluwo̧ Jesucristoma, la'aka luwo̧ ja̧nö yöbawö ö̧jakobe, ja̧danö ökwödö jo̧banö ösödadöma jo̧bakwö dö̧jakwedösa, ¿jö̧tö? Ja̧danö chömöledö, ju'wibi yötawaduwakwö, yötawaja̧danö jwaikwöda ja̧bö kwö̧jaduwobö kwisakwaduwitjö̧ma, jobe tekachaduwenama Diosma isabenö jwiinö otiwanö ökwödönö iyakobe, ina böjȩnö kwö̧jaduwayi chösödi̧danö otiwanö ja̧bö ji̧nadöja jö̧ba̧lö.
Ja̧danö chömöledö, ju'wibi yötawaduwakwö, Isabenö Dios jobadönö lȩebobö jo̧be, jö̧ba̧lö. Jau chömöledö, jobadöma Duluwo̧ dö̧jibinö pjabato̧ Jesucristonö waisachibö, böjȩ jawa suli̧ waedakwawa ji̧tjö tjö̧jibinobe ichejekwa, jo̧kwaijayonö öpöjödö tjebachajö ajayinö sulabenö ja̧tjina ja̧tjobe, ja̧danö sulabenö tjösödi̧ma jobadönö juluwobe. Ja̧danö chömöledö, ajayinö sulabenö ja̧bö tjö̧jitjö o̧penönö sulabenö ja̧badö batjibobe.
Jau chömöledö, jobadö sulabenö yötjawi̧ ösödökönö, ökwödö Jesúsnö ösödadöma jo̧ba mikwa jwiinö iyi̧tjö kwöda̧peachaduwobö jo̧be, ja̧danö tupakwönönö Duluwo̧ dö̧jibinö pjabato̧ Jesucristonö döwaisachibobö jo̧be. Jo̧banöda otiwo̧ja jö̧ba̧lö dösödobö jo̧be chömöledö, babebi, ja̧danö ba̧kwȩlö̧jateböbi dösödobö jo̧be, jejenö otiwa. Biya̧da ötjö Simón Pedroma ökwödönö pjabatö wȩyudö wetaduwakwö chömöledö. Biya̧data.
Jau chömöledö, Diosma bakwo̧da, jelo̧ma deobe, ja̧danö Duluwo̧ Jesucristonötjö Diosda dö̧jibinö pjaatajabe. Jo̧banöda okobe deinö tjösödo jö̧tja̧lökwema, jo̧bada inesö salöinö dejato̧ma, jo̧bada okobe jwiinö juluwo̧ma, jo̧bada inesö la'aka luwo̧ma, la'akatjö böjȩ otidakwa̧ abönöbi, babebi, ba̧kwȩlö̧jatebö 'dö̧ibajökenanöbi, jejenö otiwa. Biya̧data.
Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.
ကြော်ငြာတွေ