Hechos 26:18 - Dios Iwene18 Jobadöma tjöbajale tjewawadödanö tjuju̧kwobe, tjo̧'wo̧ luwo̧ jawama. Jobadönö, yȩa'wo okwa ju̧kwadönö yökawobö wetokwöcha, jobadöma yȩa'wo okwatjö labebö dewinö ju̧kwadö batjibobö. Jobadöma, Awetja ösödi̧ ja̧bö tjuju̧kwi̧tjö kabatibö Dios ösödi̧da ja̧bö tjuju̧kwobö wetokwöcha. Ja̧danö ötjönö tjösöditjö̧ma tjusuli̧ söbebö loakobe Diosma. Ja̧danö jobadöma suli̧ jwibadö batjibinö Dios ja̧inawö̧danö jobadöbi batjibakobe, suli̧ jwibadö batjibakwedöma. Jejenö jö̧ba̧lö iwene jwöi̧ma cha̧ja̧kwijatö, chuluwo̧—jö̧ba̧lijetö Pabloma la'aka luwo̧ Agripanöma. အခန်းကိုကြည့်ပါ။ |
Hechos 26:18
90 ပူးပေါင်းရင်းမြစ်များ
Babema israel jojodötjö tjöbajale tjewawö̧kö̧wö̧ma, tjöbajale tjewawadödanö ichejekwadö, ja̧danö tjölakiyu a̧ja̧kwadöma, a̧ja̧kwöködödanö ichejekwadö, Dios yöawi̧ otiwanö tjomukwatokobetjö̧. Jo̧kwaijayonö ja̧ mölema isabenö wainö ja̧kobe. Ja̧ möle edadöma isabenö otiwanö edö, Dios yöawi̧ tjösödakwedö, jadanö a̧ja̧kwadöma, otiwanö a̧ja̧kwö Dios yöawi̧ tjösödakwedö.
Ja̧danö, chömöledö tjöbajale tjewawadödanöbedönö pjatatocha. Jobadönö ötibakwo̧sa, mana edajitjökö mananö kwetjachobö. Ötjöda jobadönö jwetebakwo̧sa, ja̧danö tjöba a'otjö yȩa'woma, dewi̧ baibanö balewö lotakwo̧sa, otiwanö tjedakobetjö̧. Ja̧danö niji ya̧likwaobe inakoobema, ba̧ba̧ladö chotidocha, ba̧ba̧lawamanö otiwanö kwetjachakobetjö̧. Jobekwö isabenö chömöledönö pjatatakwo̧sa, ja̧danö jobadönö le'dedö lotökakwo̧sa.
—Ötjö chömöayo̧ ja̧nö, Jacob itji̧mu tupadanö jojodö sasokwena jojodönö, yemidanö ajayi tjitebonö Israel nijinö tjö̧jobö tjekatobö otiwa. Jo̧kwaijayonö ja̧ otikwa otiwijayonö, ja̧ otikwadama ba̧jȩkwachökena, jemi tupakwöbi kwotidobö chösöda. Jo̧kwajabetjö̧ ju'wibi tjitebotenia jojodönö dejato̧ bakibanö chujunakwo̧sa, tjö̧jibinö pjatatakwa̧ma, bö̧jȩ bakwachö̧jȩ ju̧kwadönöbi tjö̧jibinö pjatatakobetjö̧, —jö̧ba̧lö babe yöawobe ötjönö, jö̧ba̧lö laebobe Dios ömöayo̧ yöa̧li̧ma.
Ja̧danö ju'wibi tjiwȩyudinobe: Okobe deinö sulabenö tjomukwati̧ kabatibö balewachö Dios weakwo̧ jö̧a̧linökwenö ösödadönöma, tjusula söbebö loakwo̧ Diosma jö̧ba̧lö yötjawobö ja̧kobe. Ja̧ yötjawakwa̧ma, Jerusaléntjö jamatö böjȩ bakwameachibanö baibanö yötjawobö ja̧kobe, jö̧ba̧lö laebobe damötjö tjiwȩyudinama.
Duluwo̧ O̧'wo̧ Luwo̧ma ötjökwö jo̧, jo̧bada ötjönö omudawö ujuninobetjö̧, otiwa jawa wene usula jojodönö yötawobö. Ötjönö weinobe, ka̧lena ba̧jadönö ka̧lenatjö tjö̧jibakwa̧ wene yötawobö, ja̧danö tjöbajale tjewawadönö edadö batjibakwa̧ wene yötawobö, ja̧danö tjujuluwajawönö tjuluwedötjö tjö̧jibakwa̧ wene yötawobö.
Diosma jojodönö lȩbebo̧, weinökwenö öpöjödadönö, jo̧ba yöawi̧ a̧ja̧kwö öpöjödadönöma. Ja̧danö, iteda itji̧, dewinö jo̧nö webijetö böjȩkwö, dewinö dejatö öibobö jojodönö, tjo̧'wo̧ luwo̧ okwanö, itenöda tjöwaisachibobö. Jejenö weinökwema otiwanö dewinö dejatö öibijayonö jojodötjö ju'wedöma jo̧banö tjöpöjödinobe. Jobadöma sulabenö ja̧bö tjuju̧kwobetjö̧ yȩa'wo okwa tjö̧ji̧da ösödinadö, sulabenö ja̧tji̧ öwawökönö tjö̧jobö. Ja̧danö, yȩa'wo okwa ja̧nö, Dios weinökwenö tjöpöjödobetjö̧ Diosma jobadönö lȩbebo̧.
Jejenö abebö ja̧ja̧kwökwe: —Ökwöma ötjönö akebobö jo̧be, ojwiyo chiyoböma— jö̧a̧linobe Jesúsma—. Diosma jwiinö otiwi̧ jawa iyobö jö̧ba̧lo̧. Ja̧ Dios iyi̧ma kwöwaisitjö̧ma, ja̧danö, ötjönöbi kwöwaisitjö̧ma, ötjönöda akebo jö̧ka̧lajena, Ojwiyo chowo iyitjö, jö̧ba̧lö— Jesús yöawinobe jobujunö—. Jejenö ötjönö akebajatjö̧ma ba̧kwȩlö̧jatebö ja̧kwawa ojwiyoma chiyochajena— yöawinobe Jesúsma Samaria jojosujunöma.
Ikenama, Jesúsma yemidanö yöawinobe jojodönö: —Wanedö yötawa: Ötjödasa dewinö jo̧ma. Ja̧danö, ötjödasa jojodönö öbibo̧ma, dewa'wo okwanö kwetjachobö. Ja̧danö, böjȩ jojodö tjo̧'wo̧ luwo̧ okwanö dewinö chidejatobe, tjo̧'wo̧ luwo̧ jawa tjöwaisachibanö. Ja̧danö, ötjökwö ichadöma yȩa'wo okwanö kwebachöködö, kwetjachobema dewinö chidejatobetjö̧. Ja̧danö, ötjökwö ichadönöma, tjo̧'wo̧ luwo̧ okwanö dewinö dejatö chi̧sebakwo̧sa, ba̧kwȩlö̧jatebö ja̧kwawa tjujuna̧lobö tjöwaisachibanö— yöawinobe Jesúsma.
Ikenama Jesúsma yöawinobe: —Ötjöma jojodö sulabenö ja̧bö tjö̧ji̧ chi̧sebobö chichijatö. Ja̧danö, wanedö yötawa: Diosnö wajwibadöma tjöbajale tjewawawö̧danöbedö. Jobadönö pjatatobö chichijatö, otiwanö tjedobö. Jejenö yötawena, Diosnö otiwanö tjöwaisachibobö, jö̧ba̧lö, yötawobe. Ja̧danö, ju'wedöma, Ökwödöma Diosnö waisadösa, jö̧ba̧lö, omukwatadö tjöbajale otiwadödanö tjichejekwijayonö tjewawawö̧danöbedö. Wajwibadö. Ja̧danö, jobadö wajwitji̧ chi̧sebobö chichijatö, Bidöma wajwibadö, isabenö tjöbajale tjewawawö̧danöbedö, jö̧ba̧lö— yöawinobe Jesúsma öbajale otiwanö baibinökwenö.
Jejenö yödawitjö̧ma jwiinö otiwena, Duluwo̧ma judío jojodöböködöbi tja̧ja̧kwobö weinobetjö̧. Baikwö laebobe Duluwo̧ iwenetjöma: Ökwönö 'da̧batö chujuna ötjö chiwene, ji̧bakwawa wene judío jojodöböködö tjöwaisinö yökawobö. Wanedö yötawa. La̧pa̧la̧yu̧ yȩobe tjidejatemi dewi̧danö, ökwödönö wetocha jojodönö yökawaduwobö ji̧bakwawa wenema. Jojodöma ökwö yökawi̧ a̧ja̧kwö, la̧pa̧la̧yu̧ tjidejatemi dewi̧danö edö tjöwaisachibakwedö, ji̧bakwawa wenema. Böjȩ bakwameachibanö ja̧ ji̧bakwawa wene yöbawö kwi̧'yo, jö̧ba̧lö laebobe Duluwo̧ iwenetjöma— jö̧ba̧lijadötö Pablo, Bernabé.
Jejenö abebö tja̧ja̧kwiökwe Pedroma atadijetö: —Chömöledö, ökwödötjö, bakwo̧nökwena sulabenö kwomukwataduwi̧ma kabatibö balewachaduwi. Ja̧danö, ojwenö ubu̧datobö abebaduwi, Jesucristonö kwo̧'wo̧ kwöwana̧laduwi̧ i̧sebö. Jejenö ja̧baduwi, Dios ökwödö sulabe kwujuna̧laduwi̧ söbebö loakobetjö̧. Jejenö ja̧köbaduwenama Dios O̧'wo̧ Luwo̧ma tebachibö öjamatakobe ökwödönö— yöbawijetö Pedroma—.
Ina yöbawijetö: —Tjo̧wi̧ yöta̧la chömöledö. Babema Diosnö ateba ökwödönö ite'ada̧lobö. Jo̧bama ökwödönö lȩlö̧jino edö pjabato̧. Ja̧danö, lȩlö̧jino edö ökwödö kwo̧'wo̧ luwo̧duwi ujuluwachibanö ja̧bo̧, itekwöda juluwachibanö tupakwö kwi̧'yaduwobö. Ja̧danö, lȩlö̧jino edö otiwa jawa iyo̧ Diosma, okobe deinö i̧tji̧munöma, jo̧ba suli̧ jwiinö batjibanö ja̧inawö̧nöma.
Jobadöma ajayinö yöbawijadötö Dios jojodö tjö̧jibinö ja̧obö weakwo̧ usula emawajo̧ woakwa̧ma. Yöbawijadötö, Dios jojodö tjö̧jibinö pjaatobö weakwo̧ma, wobajo̧ Dios yemidanö tjeachajinö ja̧akwo̧, jö̧ba̧lö. Jejenö ja̧bö, jo̧bama abönö tjeachajinö ja̧ökwe baibakwo̧, jö̧ba̧lö, yöbawijadötö. Jejenö wȩyudö yöbawijadötö jo̧ba, abönö yemidanö teachajinö ja̧ökwe baibakwo̧ma, tjo̧'wo̧ luwo̧ okwa dewachibanö ji̧bakwawa wene yöawakwo̧, judío jojodönöbi, judío jojodöböködönöbi, jö̧ba̧lö, yöbawijadötö damötjö, Dios yöawi̧ yöbawinadöma. Chuluwo̧, ötjöma jobadö damötjö tjiwȩyudinadanö bakwainö yöbawo̧sa— yöbawijetö Pabloma Agripanö.
Jemi tupakwöma, Diosma junijetö Jesúsnöma, la'aka luwo̧ baibanö. Ja̧danö, Diosma Jesús kaekwajinö ja̧bijetö. Ikenama Diosma kabekwajo̧nö iteda öwaisobekwöchobe öbamatobö webijetö, ökwödö Duluwo̧ baibanö, ökwödö dö̧jibinö pjabato̧nö. Jo̧bama ökwödö israel jojodö domukwati̧ma balewachö domukwatobö pjabato̧, ja̧danö ökwödö dusuli̧ma söbebö lobo̧, jo̧bama.
Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.
ökwödö Dios ömöledö Corintionö ko̧ko̧kwö ba̧jadönö. Ökwödönö Diosma jwöinobe, ja̧danö omudawö ujuninobe, iteda ömöledö bakibaduwobö. Jau chömöledö, ökwödöbi, okobe deinö ju'wedö Duluwo̧ Jesucristonö ösödadöbi, Duluwo̧ma bakwo̧da, Jesucristoda. Ja̧danö, Cristo Jesúskwö bakobe dötewinö ja̧nö, Dios ömöledöbedösa chömöledö.
Jau chömöledö, yödawi̧ma isabenö öwawinö yödawobe, jo̧kwaijayonö öpöjödadöma böjȩ jojodö tjösödökwe Awetja omöna yöa̧li̧ tjösödobetjö̧ yödawi̧ tjöpöjödobe chömöledö. Jau chömöledö, wanedö yötawa: Awetjama jobadönö ja̧obe, tjomukwati̧nö yȩa'wo okwa tjö̧ji̧danö tjomukwatobö, otiwa jawa wene dejati̧ tjedapji jö̧ba̧lö. Jau chömöledö, Duluwo̧ Cristoma iteda Abe'do Diosdanö bakwainö jo̧, ja̧danö jojodönö salöinö idejatobö ösödo̧, jo̧banö ösödö tjö̧jibakobetjö̧. Jo̧ba salöinö idejati̧ wene otiwa jawa weneda yödawobe jojodönö chömöledö, jo̧kwaijayonö ja̧ salöinö dejati̧ tjedapji jö̧ba̧lö, Awetjama öpöjödadönö omöna yöa̧lobe.
Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.
Ja̧danö chömöledö, ajayinö Diosma ökwödönöma, Otiwa jawa chiyocha, jö̧ba̧lö, yöbawö junijetö. Ja̧ otiwa jawa iyakwa̧tjö ida̧ökö ja'yubeda iyinobe, iteda O̧'wo̧ Luwo̧nöma. Ja̧ ja'yubeda iyinama i̧sebobe, Diosma isabenö iteda ajayinö yöbawö ujunina ja̧bo̧, jö̧ba̧lö. Ju'winö okobe jwiinö iyakwo̧, jö̧ba̧lö, i̧sebobe. Ja̧danö, ökwödöma te'ada̧löda dö̧jobe, Isabenö ju'winö okobe jwiinö iyakwo̧, jö̧ba̧lö. Chömöledö, Diosma jejenö otiwanö ja̧inobetjö̧ jo̧banö dösödaduwo, Jwiinö otiwo̧, jö̧ba̧lö.
Ja̧danö, Diosnö atebobe kwo̧'wo̧ luwo̧duwinö do̧batö kwöwaisachibaduwobö Dios ökwödönö jwiinö otiwa jawa iyi̧ma, tjo̧'wo̧ luwo̧ jawa. Chömöledö, Diosma jwöbijetö ökwödönöma iteda ömöledö bakibaduwobö. Ja̧danö, ökwödönö, iteda ömöledö babibadönöma, jwiinö otiwi̧, kwo̧'wo̧ luwo̧duwi jawa iyobö jwöbijetö Diosma ökwödönöma.
Isabenö chömöledö, Diosma lȩlö̧jino edobetjö̧, Jesúsnö kwösödaduwenama, Jesúsma dö̧jibanö pjabato̧, jö̧ba̧lö, ökwödöma ji̧bakwawanö kwö̧jibinaduwobe. Chömöledö ji̧bakwawanö kwö̧jibaduwoböma ¿ökwödöda ja̧köbakwawinaduwaji̧, kwujuluduwinö? Jejenöma ja̧awakwawinöködöja. Ja'yubebi ji̧bakwawanö kwö̧jibaduwobö ja̧köbakwawaduwoböma jwiobe. Diosda mikwa jwiinö otiwa jawa iyö kwö̧jibaduwinö pjaatinobe chömöledö, otiwanö ja̧bö kwö̧jaduwököjayonö.
Yȩa'wo okwa kwebachö ja̧dö sulabenö ja̧tjijayonö ökwödöma jobadökwöma pjabacha̧löma kwö̧jaduwa chömöledö. Jobadö sulabenö ja̧badönö jweinö yöka̧laduwo, Ökwödöma sulabenö ja̧köbaduwobe, jö̧ba̧lö. Jejenö ja̧bö ökwödöma dewinö dejati̧danö kwidejataduwakobe, jobadö sulabenö ja̧tjobema, öwaitjöda öwawobö.
Ja̧danö, jo̧ba balekwo̧ iyawina Cristoma Dios wei̧ a̧ja̧kwö jojodö tjusula tjumusidi̧ midawö itedada bakwötanöda iyawinobe. Jejenö imidawinobetjö̧ ökwödöma Dios öba a'o suli̧ jwibadöda ja̧dösa. Isabenö, Cristoma balekwo̧ iyawina, böjȩtjö Diostjö jojodötjö ö'weje pjabatadö tjotidena tebachinama, ökwödö Dios öba a'o suli̧ jwibadö dö̧jobö. Isabenö chömöledö, Cristoma Dios wei̧ a̧ja̧kwö, itedada bakwötanöda iyawö jojodö dusula dumusidi̧ imidawinobetjö̧, ökwödöma Dios öba a'otjö ba̧kwȩlö̧jatebö suli̧ jwibadö babibinadösa.
Isabenö chömöledö, Cristoma kaatinobe iteda otidawa, jojodö tjö̧jibinö okobe jwiinö pjabatö. Jo̧ba otidawatjö ja'yubebi ji̧binokobe chömöledö. Isabenö, iteda bakwötanöda okobe jwiinö midawö okobe jwiinö jojodö tjö̧jibinö pjaatinobe, Dios öba a'otjö suli̧ jwibadö batjibanö pjaatawö̧nöma. Ja̧danö, jobadö suli̧ jwibadö babibinadöma ba̧kwȩlö̧jatebö Dios öba a'o suli̧ jwibadöda tjö̧jakwedö.
Jo̧kwaijayonö Diosma ja'yubebi o̧'wo̧ ösöwanö edokobe jo̧banö tjo̧'wo̧ wana̧löködönöma. Chömöledö, Diosnö tjo̧'wo̧ wana̧lö tjö̧ji̧da, Enoc ö̧jinadanö, Dios iteda o̧'wo̧ ösöwanö edi̧ma. Jo̧kwaobetjö̧, Diosnö ichibo jö̧ba̧lo̧ma Diosnö ösödobö jo̧be, Isabenö Diosma jo̧, jö̧ba̧lö. Ja̧danö, Diosnö ichibo jö̧ba̧lo̧ma Diosnö ösödobö jo̧be, Diosma otiwa jawa iyakwo̧ itenöda ösödö ichibobö isakwo̧nöma, jö̧ba̧lö.
Chömöledö Cristoma iteda ökwösöbu iyawö imidawinobe ökwödöma okwa dichawedö badibobö. Jo̧kwaobetjö̧ jo̧bama Diostjö jojodötjö ö'weje ja̧nö itedada iyawinobe, Dios 'yayi̧ balekwa yöbawö ujuni̧ma jamatö 'yo̧bö. Isabenö chömöledö, jojodöma Dios ajayinö yöbawö ujuni̧tjö weina okobe jwiinö tja̧ja̧kwoböma jwiobe. Jo̧kwaobetjö̧ jobadöma Dios lȩebakwawö̧da ja̧dö. Jo̧kwaijayonö Cristo woena Dios lȩebi̧tjö tjö̧jibinö pjaatinobe, Dios ajayinö yöbawö junö wei̧ söbebö loinobetjö̧. Isabenö, Cristoma woinobe jojodö tjusula tjumusidi̧ midawö. Jejenö midawö woinobetjö̧ okobe deinö Dios yöa̧lawö̧, Ötjö chömöledö, jö̧ba̧lö, Dios otiwi̧ iyakwa̧ tjemakwedö. Isabenö, jobadöma Dios iyakwa̧ tjemakobe, Dios damötjö, Chiyocha, jö̧ba̧lö, jö̧a̧linadanö.
Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma.
isabenö mölejȩbe dö̧jakwedösa, jö̧ba̧lö, ja̧danö isabenö Dios iteda i̧tji̧munö iyakwa̧ demakwedösa jö̧ba̧lö. Jau chömöledö, ja̧ Dios ökwödönö iyakwa̧ma, la'akatjöda suli̧ waekwökö ji̧, ja̧danö suli̧ jwöachökö ji̧, ja̧danö 'dö̧ibajökö ji̧. Ja̧danö, Diosma ja̧ ökwödönö iyakwa̧ma mölejȩbe ujuninobe, jobe dichibena ökwödönö iyobö.
Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.
Jo̧kwaijayonö bakwo̧, Ötjöma sulabenö ja̧tajabe, jö̧ba̧lö, yöba̧lo̧ma jweinö omukwato̧. Ja̧danö, jo̧bama sulabenö ja̧ena Diosnö yöbawö lobo̧, Dios, sulabenö ja̧tajabe, jö̧ba̧lö. Jejenö Diosnö sulabenö ja̧aja̧ yöbawö loiökwe Diosma ja̧ sulabenö ja̧aja̧ma söbebö loobe. Jejenö yöbawö loobetjö̧ jo̧bama Dios öba a'otjö suli̧tjö dichö lobawo̧da jo̧. Chö̧ja̧wo̧dö, Diosma jejenö yöbawö ujuninobe, Bakwo̧ sulabenö ja̧aja̧ yöbawö loena ja̧ sulabenö ja̧aja̧ söbebö lotocha, jö̧ba̧lö. Ja̧danö, Diosma yöbawö ujuni̧danö ja̧bo̧ ¿jö̧tö? Jau chö̧ja̧wo̧dö. Diosma jweinö yöba̧lo̧. Jejenöobetjö̧ döwaisa jo̧banö yöbawö lodena sulabenö ja̧di̧ma söbebö loobe. Jejenö ökwödöma sulabenö ja̧di̧tjö dichö loawö̧da babibadösa. Jo̧kwaobetjö̧ chö̧ja̧wo̧dö, sulabenö ja̧köbaduwena Diosnö yöbawö loköbaduwo.
Jau, sulabenö ja̧bökönö 'yo̧ma Dios wei̧ a̧ja̧kwö i̧'yobe. Jo̧kwaijayonö sulabenö ja̧bö 'yo̧ma Awetjada öibökwe, Awetjakwöda dötewinö 'yo̧. Isabenö chömöledö döwaisa, ajayitjöda babe baibanö Awetjama sulabenö ja̧böda jo̧, jö̧ba̧lö. Jo̧kwaobetjö̧ sulabenö ja̧bö 'yo̧ma ¿tikwö i̧'yobeda? Awetjakwöda dötewinö 'yo̧, Awetja sulabenö ja̧i̧danö ja̧bö. Ja̧danö chö̧ja̧wo̧dö, Dios Itji̧ma böjȩkwö ichinobe Awetjanö ujuluwobö, jo̧ba jojodönö sulabenö ja̧tjobö öibi̧ma juluwokobö.
Jo̧kwaijayonö suli̧ jawama teatakwawokobe, jwiinö otiwi̧ jawada. Jobema, 'yayi̧ Jerusalénöma, otiwakwö sulabekwö pjaacha̧lokobe. Ja̧danö, ba̧kwȩlö̧jatebö omöna yöba̧ladöbi tebachöködö. Tjimibiya wȩyukwadöda tetjachobe, Bidöma Dios ö̧jobe tebachö ja̧dö, jö̧ba̧lö, jö̧tja̧lawö̧da. Jobadöma, tjimibiya ba̧jadö, Obeja Itji̧danö Jo̧ u̧kwa kwialu'ye okwa.
ကြော်ငြာတွေ