Woakwa̧ abönö yöbawijetö Joséma ömöledönö: —Chömöledö, ötjöma tjo̧wi̧ pöebo̧sa, wotakwa̧ma lekwokobe. Ja̧danö, yötawaduwakwö: Diosma isabenö pjaatakobe ökwödönöma, bena Egipto nijitjö̧ öbibö labebö. Ja̧danö Diosma jelobe öbibö e'ewakobe ökwödönöma, ajayinö da'dödöminenö, Okwötjö tupadanö jojodönö niji chiyocha, jö̧ba̧lö, yöawinobekwö. Jau chömöledö. Da'dödömine Abrahamnö, Isaacnö, dabe'do Jacobnö jejenö iteda iwene yöbawö ujuninobe Diosma, Ökwödötjö tupadanö jojodönö niji, idöda tjitebo baibanö chiyocha, jö̧ba̧lö—yöbawijetö Joséma ömöledönöma, woakwa̧ abönö.
Hechos 20:32 - Dios Iwene32 Ina yöbawijetö: —Tjo̧wi̧ yöta̧la chömöledö. Babema Diosnö ateba ökwödönö ite'ada̧lobö. Jo̧bama ökwödönö lȩlö̧jino edö pjabato̧. Ja̧danö, lȩlö̧jino edö ökwödö kwo̧'wo̧ luwo̧duwi ujuluwachibanö ja̧bo̧, itekwöda juluwachibanö tupakwö kwi̧'yaduwobö. Ja̧danö, lȩlö̧jino edö otiwa jawa iyo̧ Diosma, okobe deinö i̧tji̧munöma, jo̧ba suli̧ jwiinö batjibanö ja̧inawö̧nöma. အခန်းကိုကြည့်ပါ။ |
Hechos 20:32
37 ပူးပေါင်းရင်းမြစ်များ
Ja̧danö, jo̧ba Bernabéma otiwanö omukwatö, Diosnö jwiinö ösödö ji̧abijetö. Dios O̧'wo̧ Luwo̧ iteda o̧'wo̧ luwo̧ okwanö öba̧ja̧di̧ ösödö ji̧abijetö jo̧ba, Bernabéma. Ja̧danö, jo̧bama Antioquíabe wetjajökwe 'ya̧jo̧ edö ösödijetö. Bidö judío jojodöböködönöma Diosma lȩlö̧jino edö pjaatinobe, jö̧ba̧lö, ösödijetö. Ikenama Bernabéma Jesúsnö ösödadönö tjo̧'wo̧ ösöwachibanö tjomukwatobö yöba̧lijetö, Jesúsnö kabatibökönö kwo̧'wo̧ kwöwana̧laduwo, jö̧ba̧lö. Ja̧danö, Bernabéma Antioquíanö ja̧nö Jesús ö̧jina yöawiawö̧ ba̧jekwadö ju'wedö Antioquíanö ju̧kwadöbi, Jesúsma dö̧jibinö pjabato̧, jö̧ba̧lö, ösödijadötö Jesúsnöma.
Jobe comunidadkwena ja̧nö Pablo, Bernabé Jesúsnö ösödadötjö ju'wedönö kabebijadötö Jesúsnö ösödadönö te'ada̧lakwawa jojodö batjibanö. Ikenama Pablo, Bernabé, Jesúsnö ösödadönö te'ada̧lakwawa jojodökwö, tju̧kwa kwökönö ö̧tö̧chö, Diosnö abebijadötö, Bidö te'ada̧lakwawa jojodönö otiwanö te'ada̧li, jö̧ba̧lö.
Ja̧danö, tjolanö ichibö jobetjö ȩwa̧jijadötö isowinö Antioquíabe, ajayinö tjichinobekwö. Ajayinöma Pablo, Bernabé, Antioquíabetjö labebijadötö, Dios iwene yöbawö. Jobe ju̧kwadöma, Jesúsnö ösödadöma jobetjö webijadötö Pablonö, Bernabénö jelobe yöbawö tji̧'yobö. Ajayinö tji̧'yakwa̧ abönö jobe ju̧kwadöma Diosnö abebijadötö Pablonö, Bernabénö ite'ada̧lobö, ja̧danö, jobadönö pjaatobö yötjawonö. Ida̧ökö Pablo, Bernabé 'yi̧nadöma lekwe möle jelobebi jelobebi 'ya̧nö yöbawö kabatakwawijadötö Dios weinama.
Jejenö tjölabijayonö Pablo, Bernabé juluwanö ȩwa̧jijöködötö. Ina lekwe ju̧kwijadötö jobema. Yebabökönö yöbawiabijadötö Duluwo̧ Jesúsnö. Ja̧danö, yebabökönö, Diosma jojodönö lȩlö̧jino edo̧, jö̧ba̧lö, yöbawijadötö. Ja̧danö, Diosma iteda ujulu iyijetö Pablonö Bernabénö. Jobadöma Dios ujulunö jojodö edajitjökö jawa i̧sebijadötö. Jejenö ja̧bö jojodönö i̧sebijadötö, Ökwödöma Dios ujulunö otidadösa, jö̧ba̧lö. Ja̧danö, Diosma iteda ujulu iyö i̧sebijetö jojodönö, Bidö yötjawi̧, Dios lȩlö̧jino edo̧, jö̧ba̧lö, yötjawi̧ma, ötjöda, Diosda yötawi̧ jweinö yöbawadö, jö̧ba̧lö.
Jau chömöledö, usula chemawena Jerusalénbe chȩwa̧jobema. Yayonö Jerusalénbe chȩwa̧jocha. Jejenö Jerusaléntjö usula chemawitjö̧ma usula chemawena. Isabenö yöta̧la. Ötjöma böjȩnö chö̧ji̧ wame jawama ba̧wa̧lö̧jinö edökösa. Ja̧ jawa mikwawökö chömöledö. Biya̧da ba̧wa̧lö̧jinö edo̧sa chömöledö: Otiwa wene yötawoböda ba̧wa̧lö̧jökwesa. Dios jojodönö lȩlö̧jino edö tjö̧jibinö pjaatinobe, jö̧ba̧lö, yötawoböda ba̧wa̧lö̧jökwesa chömöledö. Jejenö Duluwo̧ Jesúsma ötjö yötawoböda weijatö. Jo̧kwaobetjö̧ jo̧ba yötawobö weinama ¿dakwö yötawököjö? Yöbawo̧sa chömöledö. Ötjöma wotenanö baibanö yötawocha Dios weinama— yöbawijetö Pabloma.
Jobadöma tjöbajale tjewawadödanö tjuju̧kwobe, tjo̧'wo̧ luwo̧ jawama. Jobadönö, yȩa'wo okwa ju̧kwadönö yökawobö wetokwöcha, jobadöma yȩa'wo okwatjö labebö dewinö ju̧kwadö batjibobö. Jobadöma, Awetja ösödi̧ ja̧bö tjuju̧kwi̧tjö kabatibö Dios ösödi̧da ja̧bö tjuju̧kwobö wetokwöcha. Ja̧danö ötjönö tjösöditjö̧ma tjusuli̧ söbebö loakobe Diosma. Ja̧danö jobadöma suli̧ jwibadö batjibinö Dios ja̧inawö̧danö jobadöbi batjibakobe, suli̧ jwibadö batjibakwedöma. Jejenö jö̧ba̧lö iwene jwöi̧ma cha̧ja̧kwijatö, chuluwo̧—jö̧ba̧lijetö Pabloma la'aka luwo̧ Agripanöma.
Ja̧ mölema okobe deinö Jesúsnö ösödadöma Judeanö ju̧kwadöbi Galileanö ju̧kwadöbi Samarianö ju̧kwadöbi otiwanö ju̧kwijadötö, usula emawökönö. Ja̧danö, Dios O̧'wo̧ Luwo̧ pjaatobetjö̧ Diosnö omukwatö tjo̧'wo̧ luwo̧nö ösödö juluwijadötö, tjo̧'wo̧ luwo̧ jawama. Ja̧danö, Diosnö otiwanö yebabinö omukwata̧lö ju̧kwijadötö. Ja̧danö, Dios O̧'wo̧ Luwo̧ pjaatobetjö̧ ba̧jekwachijadötö Jesúsnö ösödadöma.
Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.
ökwödö Dios ömöledö Corintionö ko̧ko̧kwö ba̧jadönö. Ökwödönö Diosma jwöinobe, ja̧danö omudawö ujuninobe, iteda ömöledö bakibaduwobö. Jau chömöledö, ökwödöbi, okobe deinö ju'wedö Duluwo̧ Jesucristonö ösödadöbi, Duluwo̧ma bakwo̧da, Jesucristoda. Ja̧danö, Cristo Jesúskwö bakobe dötewinö ja̧nö, Dios ömöledöbedösa chömöledö.
Ja̧danö chömöledö, ajayinö Diosma ökwödönöma, Otiwa jawa chiyocha, jö̧ba̧lö, yöbawö junijetö. Ja̧ otiwa jawa iyakwa̧tjö ida̧ökö ja'yubeda iyinobe, iteda O̧'wo̧ Luwo̧nöma. Ja̧ ja'yubeda iyinama i̧sebobe, Diosma isabenö iteda ajayinö yöbawö ujunina ja̧bo̧, jö̧ba̧lö. Ju'winö okobe jwiinö iyakwo̧, jö̧ba̧lö, i̧sebobe. Ja̧danö, ökwödöma te'ada̧löda dö̧jobe, Isabenö ju'winö okobe jwiinö iyakwo̧, jö̧ba̧lö. Chömöledö, Diosma jejenö otiwanö ja̧inobetjö̧ jo̧banö dösödaduwo, Jwiinö otiwo̧, jö̧ba̧lö.
Ja̧danö, Diosnö atebobe kwo̧'wo̧ luwo̧duwinö do̧batö kwöwaisachibaduwobö Dios ökwödönö jwiinö otiwa jawa iyi̧ma, tjo̧'wo̧ luwo̧ jawa. Chömöledö, Diosma jwöbijetö ökwödönöma iteda ömöledö bakibaduwobö. Ja̧danö, ökwödönö, iteda ömöledö babibadönöma, jwiinö otiwi̧, kwo̧'wo̧ luwo̧duwi jawa iyobö jwöbijetö Diosma ökwödönöma.
Jejenö Cristoma Dios ömöledö babibinadönö, bakwo̧nökwena, iyabinobe tjotidawakwena, okobe deinö Dios ömöledö babibinadönö öbibö tjöba̧ja̧dobö. Jejenö öbibö tjöba̧ja̧do jö̧ba̧lö, iyabinobe Cristoma, okobe deinö Dios ömöledö babibinadöma otiwanö tjotidobö Dios weinama. Ja̧danö, okobe deinö Cristo iteba'obedöma tjo̧'wo̧ luwo̧nö jemi tupakwö juluwachibanö tji̧'yobö iyabinobe tjotidawakwenama.
Ja̧danö, ökwödö okobe deinö jo̧ba iteba'obedöma, ba̧jekwadö dö̧jobe, jojo iteba'onö nöinö ji̧danö. Iteba'onöma nöinö jo̧be, iwe'ijubi. Ja̧danö, iwe'iju otiwanö bakweminö 'yo̧bö u̧yu̧ki̧ju junekwemibi jo̧be. Ja̧danö jo̧be ökwödö Jesús iteba'obedöma. Ju'wedö Jesúsnö ösödadökwö bakweminö pjabatakwawö di̧'yobö jojo u̧yu̧ki̧ju junekwi̧danö junekwadösa. Ja̧ma ¿dakwö jö̧ba̧lö jö̧a̧lobeda? Biya̧, chömöledö: Bakwo̧nökwena otiwanö pjabatö ja̧nö, bakwo̧ jelo̧nö pjabatö, bakwo̧ jelo̧nö pjabatö, ja̧danö dö̧jitjö̧ma otiwanö bakweminö dichibakwedösa, do̧'wo̧ luwo̧ma. Ja̧danö tupakwö juluwachibanö 'ya̧nö döda̧peachena, do̧'wo̧ luwo̧ma. Ja̧danö, bakwo̧nökwena ösödanö pjabatakwawanö dotiditjö̧ma, do̧'wo̧ luwo̧ma jemi tupakwö bakweminö dichibakwedösa, jojodönö jwiinö ösödakwawanö.
Babema öwaitjöda yötawa chömöledö. Bakwo̧ ilekwobökujukwö jo̧bi, bakwuju jilekwebö̧kö̧kwö ju̧jubi, ju'wi jwiinö taba̧lö̧ji jawa ja̧badöbi Dios Cristokwö webö tjö̧jobekwöma yelösöda tetjachökakwedö. Ja̧danö, bakwo̧, böjȩ jawada ösödanö edö, Diosnö omukwatökönö böjȩ jawada ösödö edo̧ma Dios Cristokwö webö tjö̧jobekwö teachökakwo̧.
Wanedö yötawa chömöledö: Jo̧batjö pokwö kwö̧jaduwobe ichejekwa, jo̧kwajabetjö̧ kwö̧jaduwi̧ bö'diama 'diinö jo̧banö do̧ba̧lö kwöda̧peachaduwo, jo̧banö jwaikwöda ösödö kwö̧jaduwakobetjö̧. Jau chömöledö, jejenö ökwödönö tjöba̧ja̧dinadanö kwö̧jaduwo, ja̧danö jwaikwöda Diosnö ösödö kwö̧jaduwo, otiwanö pjabato̧ja jö̧ba̧lö.
Isabenö chömöledö, Cristoma kaatinobe iteda otidawa, jojodö tjö̧jibinö okobe jwiinö pjabatö. Jo̧ba otidawatjö ja'yubebi ji̧binokobe chömöledö. Isabenö, iteda bakwötanöda okobe jwiinö midawö okobe jwiinö jojodö tjö̧jibinö pjaatinobe, Dios öba a'otjö suli̧ jwibadö batjibanö pjaatawö̧nöma. Ja̧danö, jobadö suli̧ jwibadö babibinadöma ba̧kwȩlö̧jatebö Dios öba a'o suli̧ jwibadöda tjö̧jakwedö.
Isabenö, chömöledö ajayinö Jesúsnö, bakwo̧danö yöbawinadö yötjawina kwomukwataduwo. Babe mölema ju'wedö ba̧jekwadö jelobekwö omukwatö yötjawi̧ma jo̧be, ju'wi jawabi, ju'wi jawabi. Ja̧danö, jelobekwö omukwatö yötjawobe, Moisésnö weina a̧ja̧kwö dö̧jobö jo̧be, dukwobö wei̧ma, jö̧ba̧lö. Ja̧danö, Moisésnö weina kwukwaduwobö a̧ja̧kwö kwö̧jaduwitjö̧ma juluwachibanö kwi̧'yaduwena kwo̧'wo̧ luwo̧duwinö, jö̧ba̧lö, jelobekwö omukwatö yötjawobe. Chömöledö, kwakwawamaökö ökwödönö do̧'wo̧ luwo̧nö juluwachibanö kwi̧'yaduwoböma, Dios jawada. Diosma ökwödönö pjabatö lȩlö̧jino edobetjö̧ do̧'wo̧ luwo̧nö juluwachibanö di̧'yobe. Chömöledö ju'wedö jelobe omukwatö yötjawi̧ma öpöjödaduwi. Ajayinö yöbawinadö Jesúsnö isabenö ji̧ yötjawinada omukwatö kwuju̧kwaduwo.
Isabenö chömöledö, Jesús Abe'do, ja̧danö ökwödö, Dios ju'wedö i̧tji̧mubi mölejȩbe Dabe'doma bakwo̧da. Jo̧kwaobetjö̧ Diosma ajayinöma otiwanö badedö ujuninobe iteda i̧tji̧muma bakobe dö̧jobö Dios jwiinö otiwi̧ ö̧jobema, okobe deinö, Jesúsbi, ökwödö Dios ju'wedö i̧tji̧mubi. Ja̧danö chömöledö, ökwödöda ju'wedö Dios i̧tji̧muma, Jesúsnö ösödadö. Ja̧danö, ökwödö mölejȩbe Dabe'dobi Jesús Abe'dobi bakwo̧da, Diosda. Isabenö chömöledö, Jesús, ökwödö dusuli̧ dichö lobinabi, ja̧danö ökwödö dichö loinawö̧bi Dabe'doma bakwo̧da. Ja̧danö, Dabe'do bakwo̧daobetjö̧ Jesúsma o̧'wo̧ ösöwanö, tabakwökönö öabobe ökwödönö, Chö̧ja̧wo̧dö, jö̧ba̧lö.
Chömöledö Cristoma iteda ökwösöbu iyawö imidawinobe ökwödöma okwa dichawedö badibobö. Jo̧kwaobetjö̧ jo̧bama Diostjö jojodötjö ö'weje ja̧nö itedada iyawinobe, Dios 'yayi̧ balekwa yöbawö ujuni̧ma jamatö 'yo̧bö. Isabenö chömöledö, jojodöma Dios ajayinö yöbawö ujuni̧tjö weina okobe jwiinö tja̧ja̧kwoböma jwiobe. Jo̧kwaobetjö̧ jobadöma Dios lȩebakwawö̧da ja̧dö. Jo̧kwaijayonö Cristo woena Dios lȩebi̧tjö tjö̧jibinö pjaatinobe, Dios ajayinö yöbawö junö wei̧ söbebö loinobetjö̧. Isabenö, Cristoma woinobe jojodö tjusula tjumusidi̧ midawö. Jejenö midawö woinobetjö̧ okobe deinö Dios yöa̧lawö̧, Ötjö chömöledö, jö̧ba̧lö, Dios otiwi̧ iyakwa̧ tjemakwedö. Isabenö, jobadöma Dios iyakwa̧ tjemakobe, Dios damötjö, Chiyocha, jö̧ba̧lö, jö̧a̧linadanö.
Jobadönö a̧ja̧kwökönaduwi chösödawö̧ chömöledö, wainö ja̧bö kwö̧jaduwobö jo̧be chömöledö, baikwö yötawa: Jobadö yötjawi̧ ösödadöma omöna wene ösödadö, jo̧kwaijayonö jejenöböködöja ökwödöma. Ökwödöma omöna wene ösödöködöja, isabenö weneda ösödadöja, isabenö Diosda yöawi̧ kwösödaduwobetjö̧, ¿jö̧tö? Jo̧kwajabetjö̧ jwaikwöda Dios yöawi̧ ösödö kwujuluwaduwachibanö kwö̧jaduwo, ja̧danö Dios O̧'wo̧ Luwo̧kwö dötewanö ja̧nö, Diosnö abebö kwö̧jaduwo.
ကြော်ငြာတွေ