Hechos 20:20 - Dios Iwene

²⁰ Jejenö baledijayonö ötjöma yayonö yebabökönö yöbawiachijatö ökwödönö. Bakwöta jawabi jwiinö yöbawiachijatö kwöwaisachibaduwobö do̧'wo̧ luwo̧ jawama. Judío jojodö yötjaweju okwabi, ökwödö kwejuduwikwenabi tebachö yöbawiachijatö ökwödönöma.

Hechos 20:20 ပူးပေါင်းရင်းမြစ်များ

Marcos 4:34

Jobadö ba̧jekwadö ökömanö ichajadönö wanedö yöawakwawada yöbawiabijetö Jesúsma, yöbawöda, labebö lobökönö. Jo̧kwaijayonö iteda öba̧ja̧di̧ waisachadönöma, itekwödada babibö okobe jwiinö labebö lobö yöbawiabijetö.

Hechos 2:46

Ju'wi möle jwiinö Jesúsnö ösödadöma bakwainö omukwata̧lö, Dios eju okwa tebachö ji̧abijadötö. Tjejubiyatjö kwanöbi tebachö ji̧abijadötö, tjo̧'wo̧ ösöwanö, sulabenö tjomukwati̧ jwiinö.

Hechos 20:27

Diosma ji̧kwa wene kwöwaisachibaduwobö ösödo̧. Jo̧kwaobetjö̧ ötjöma okobe jwiinö ji̧kwa wene yötawijatö, kwöwaisachibaduwobö Dios ösödi̧ma. Jejenö yötawinobetjö̧ yötawi̧ öpöjödinadö Dios lȩebi̧tjö ji̧bakwawa jwitji̧ma ötjö jawamaökö chömöledö. Idöda jawa— yöbawijetö Pabloma Jesúsnö ösödadönö te'ada̧lakwawa jojodönö.

Hechos 20:31

Jo̧kwaobetjö̧ yöta̧la chömöledö, otiwanö kwite'ada̧laduwo ökwödödabi, ökwödö kwite'ada̧laduwawö̧nöbi. Kwomukwataduwo, ötjöma wa̧pötakwa o̧biya jenanö mölebi, yö̧tebi budekwabinö lȩbebö yöbawiachijatö. Kwite'ada̧laduwo ökwödödabi, ökwödö kwite'ada̧laduwawö̧nöbi— yöbawijetö Pabloma.

Hechos 5:2

Ja̧ niji midö tjemaja̧ baladama ö'wiawijadötö Ananíasma, ja̧danö, ilekwobi. Jobadöma jelobekwö omukwatijadötö, Biya̧ baladama okobe jwiinö diyökö Jesús webawedönöma, jö̧ba̧lö. 'Da̧batö dujunaja̧ma yöbawökönö, omöna iyö yödawo, Biya̧ okobe jwiinö balada pjabatö diya, jö̧ba̧lö. Jejenö omukwatijadötö Ananíasma, ilekwobi, tjemaja̧ baladama ö'wiawö. Ikenama, jejenö omukwatö, Ananíasma balada iyö 'yi̧jetö Jesús webawedö tjuju̧kwobekwö. Ichibö tjomukwati̧danö omöna yöba̧lö iyijetö.

Hechos 5:42

Ju'wi möle jwiinö Dios ejutjöbi jojodö tjejubiyatjöbi kabatibökönö yöbawijadötö, Dios yöbawö junö wetocha jö̧a̧linökwema Jesúsda, jo̧ba̧lö.

1 Corintios 12:7

Jau chömöledö, Dios O̧'wo̧ Luwo̧ma bakwo̧nökwena do̧'wo̧ luwo̧nö jo̧, ¿jö̧tö? Ja̧danö, do̧'wo̧ luwo̧nö ja̧nö, ökwödönötjö iteda ujulu wainökwena i̧sekwobe chömöledö, okobe deinö bakobe pjadatakwawo jö̧ba̧lö.

1 Corintios 14:6

Yötawaja̧ labebö lobö yötawa chömöledö. Ökwödökwö ichibö, ju'wedö tjiwenenö yötawitjö̧ma, ökwödönö pjatatökena ichejekwa, kwa̧ja̧kwaduwokobetjö̧, ¿jö̧tö? Jo̧kwaijayonö, Dios ötjönö i̧sebina wene ökwödönö kwiweneduwinö yötawitjö̧bi, ja̧danö waisakwawa ji̧ wene yötawitjö̧bi, ja̧danö Dios yöawi̧ yötawitjö̧bi, ja̧danö ökwödönö chöba̧ja̧ditjö̧bi, jejenö ja̧bö ökwödönö pjatatena chömöledö.

1 Corintios 15:3

Jau chömöledö, inesö mikwawi̧ wene ötjö cha̧ja̧kwina wenema ökwödönö yötawijatö. Ja̧ yötawina wenema biya̧ chömöledö: Damötjö Dios iwene wȩyudinadö imidawakwo̧nö tjiwȩyudinadanö, Cristoma midawö woinobe, ökwödö dusuli̧ imidawo jö̧ba̧lö.

Deuteronomio 4:5

—Isabenö ökwödönö yötawi̧ a̧ja̧kwö kwö̧jaduwobö jo̧be chömöledö, baikwö yötawa: Okobe jwiinö chuluwo̧ Isabenö Jo̧ Dios ötjönö weinama, jweinö balewö lobökönö ökwödönö webö yötawobe, baikwö ja̧bö kwö̧jaduwo, jö̧ba̧lö, kwiteboduwinö kwö̧jaduwenama, Dios wei̧danö otiwanö a̧ja̧kwö kwö̧jaduwakobetjö̧.

Filipenses 3:1

Chömöledö, böja kwialusöja wȩyudö katatakwa̧ abönö, baikwö yötawaduwakwö: Duluwo̧kwö dötewanö ja̧nö, kwo̧'wo̧duwi ösöwachibanö kwö̧jaduwo. Jejenö ba̧kwȩlö̧jatebö wȩyudajichobe chömöledö, ja̧danö jejenö wȩyukwama chöpöjödachibokobe chömöledö, isabenö ökwödönö pjaati̧ jö̧ba̧lö.

Colosenses 1:28

Jo̧kwajabetjö̧, Cristonö yödawobe okobe deinö jojodönö chömöledö. Jau chömöledö waisanö omukwatö okobe deinö jojodönö lȩbebö yödawobe, ja̧danö jobadönö döba̧ja̧dobe, jobadö bakwo̧nökwena Cristokwö dötewanö ja̧nö tjo̧'wo̧ luwo̧nö tjöda̧peacho jö̧ba̧lö, ja̧danö wanedö yötawa jejenö da̧peachajadönö Dios öba a'o öbibö dujuno jö̧ba̧lö.

2 Timoteo 4:2

Dios iwene yökawo jö̧ba̧lö. Ja̧danö ja̧ yökawo jö̧ta̧laja̧ma, sule wene jwienadamaökö, wene jwienabi, wene jȩnabi yayonö yökawobö jo̧be. Jau Timoteo, ba̧kwȩlö̧jatebö kwo̧'wo̧ 'dibachibö ja̧nö, otiwanö kwöba̧ja̧dobö jo̧be jojodönö. Baikwö yötawa: Jwekebobö baibenama, jwekebobö jo̧be, ja̧danö lȩkebobö baibenama, lȩkebobö jo̧be, ja̧danö tjujuluwachibanö yökawobö baibenama, tjujuluwachibanö yökawobö jo̧be.