Hechos 14:17 - Dios Iwene

¹⁷ Jejenö ujunibinajayonö Diosma iteda pjaati̧ma ba̧kwȩlö̧jatebö i̧sebijetö. Jo̧kwaobetjö̧, israel jojodöböködö, wainö sulabenö ja̧bö ju̧kwadöma Diosnö wajwitjijayonö jo̧ba otiwanö pjaati̧ma edijadötö. Ja̧danö ¿ökwödöja? Babebi Dios otiwanö pjaati̧ma kwedaduwobe. ¿Tajida jo̧ba pjaati̧ma? Biya̧: Ojwiyo o̧bi̧ weobe kwujuninaduwi̧ pokwobö, ju'wi möle kwukwaduwakwa̧ma. Ja̧danö, otiwanö kwö̧jaduwobe, kwakwawa kwanö, Dios pjaati̧ma. Ja̧danö, kwo̧'wo̧duwi ösöwachibanö kwö̧jaduwobö pjaatobe Diosma. Jau, damötjöbi Diosma iteda pjaati̧ma i̧sebinobe. Ja̧danö, babebi i̧sebobe Diosma iteda pjaati̧ma ökwödönöma. Jo̧kwaobetjö̧ jo̧banöda kwösödaduwo, ökwödönömaökö— yöbawijadötö Pablo, Bernabé.

Hechos 14:17 ပူးပေါင်းရင်းမြစ်များ

1 Reyes 18:1

Lekwe möle, döbalataja o̧biya baledibanö ojwiyo o̧binokobe Israel nijitjö. Jemi ikenama, wapöbakwa o̧ba ja'ö, Isabenö Jo̧ma iteda yöawi̧ yöawinobe Eliasnö, —Tjowita Elias, babe Acab ö̧jobekwö kwi̧'yo, ja̧danö Acab öba a'o kwöwawacho, ja̧danö jemi ikenama ojwiyo yemidanö o̧bobö wetocha, —jö̧ba̧lö.

Diosnö ösödo̧ Job mikwo̧ usula emawina jawa 36:31

—Jejenö iteda inesö ujulunö, bö̧je jojodö tjitebokwena ju̧kwadönö teada̧lö webo̧, ja̧danö tju̧kwa̧ nöinö tjujuna̧lobö, otiwanö iyo̧.

Diosnö ösödo̧ Job mikwo̧ usula emawina jawa 37:6

Jau, nieve jawa webo̧ Diosma, –Nijakwö tjoduwi, –jö̧ba̧lö, ja̧danö ojwiyo nöobö o̧bobö webo̧, –Nijinö tobebi, –jö̧ba̧lö.

Diosnö ösödo̧ Job mikwo̧ usula emawina jawa 5:10

—Jau Job, baikwö yötawakwö Dios otidi̧ jawama: Diosma ojwiyo o̧bobö webo̧, döbatjiju otiwanö pokwakobetjö̧, ojwiyo otiwanö webo̧ Diosma.

Isaías 22:13

Jo̧kwaijayonö, jobekwö omukwatökönö, kwo'woduwi ösöwanö ba'ali junadöja. Jau, Dios wei̧ a̧ja̧kwökönö, baikwö yöba̧ladöja: –Pakayadönöbi, obejadönöbi kwabajadö, itebia kwanö, ubasobu o̧'dobu owö, ba'ali dujunaduwo. Jau, itekwai möle debö di̧'yakwedösa, jo̧kwajabetjö̧ babe möle kwanöbi, owöbi ba'ali dujunaduwo, –jö̧ba̧lö, Dios wei̧ a̧ja̧kwökönö sulabenö yöba̧ladöja, —jö̧ba̧lö laebobe Dios Jerusalen jojodönö yöawi̧ma.

Isaías 40:21

Diosnö wajwiköbaduwiji̧? Jo̧banö la'akatjöda kwa̧ja̧kwinaduwökiji? Damötjö baledinama, ökwödönö yötjawinökiji̧? Bö̧jȩ ajayinö otidö juninama, Diosda jö̧ba̧lö wajwiköbaduwiji̧?

Isaías 5:6

Jau, niji mikwawökemi baibanö söbebö lotocha chöbatjoma. Bemi tupakwö ubasa'ba bajale 'wibö chotidökakwo̧sa, ja̧danö niji sobö chotidökakwo̧sa, bakwainö tebo jawa sȩakada, ja̧danö ju'wi sula'woda chöbatjotjö pokwakobetjö. Ju'wibi ojwiyo o'wiju tjöteba̧lakwo̧sa, ja̧dano wetökakwo̧sa, chöbatjo ji̧nemi ojwiyo o̧boböma, —jö̧ba̧lö Dios ökwödönö abebö a̧ja̧kwi̧ yötawaduwakwö.

Mateo 5:45

Jejenö ja̧köbaduwo, mölejȩbe jo̧ kwabe'doduwi i̧tji̧mu otiwanö ja̧bö tjö̧ji̧danö otiwanö ja̧bö kwö̧jaduwakobetjö̧. Jau chömöledö, kwabe'doduwima, sulabedönöbi, otiwadönöbi pjabatö bakweminö möle jawo̧nö idejatobö webo̧, ¿jö̧tö? Ja̧danö, sulabenö ja̧badönöbi, otiwanö ja̧badönöbi pjabatö, ojwiyo o̧bobö webo̧, ¿jö̧tö? Jau chömöledö, kwabe'doduwima okobe deinö jojodönö pjabato̧.

Lucas 6:35

Jo̧kwajabetjö̧ baikwö wetaduwakwö: Kwöpöjojodönö kwösödaduwo, ja̧danö jobadönö otiwanö ja̧köbaduwo. Jojodönö kwitea kwöbalewaduwenama, tupakwö tjetjatakwa̧ omukwatökönö kwöbalewaduwo, tjetjatökötjö̧ma jo̧kwada jö̧ba̧lö. Jau chömöledö, jejenö ja̧bö kwö̧jaduwiökwe, Diosma isabenö otiwanö ökwödönö iyakwo̧ mölejȩbetjö. Ja̧danö, ju'wibi yötawaduwakwö, jejenö ja̧bö kwö̧jaduwitjö̧ma kwi̧sebaduwena, Isabenö okobe jwiinö juluwo̧ Dios i̧tji̧mu otiwadösa, jö̧ba̧lö, Kwabe'doduwi ja̧i̧danö bakwainö ja̧köbaduwobetjö̧. Jau chömöledö, Diosma sulabenö ja̧badönöbi, otiwanö iyaja̧ ösödinö omukwatöködönöbi dösölö̧jinö pjabato̧, jo̧kwajabetjö̧ jo̧ba pjaati̧danö pjakataduwenama, Dios i̧tji̧mu otiwadösa, jö̧ba̧lö kwi̧sekwaduwobe.

Hechos 14:18

Jejenö tjöwaisachibobö yötjawijayonö jojodöma tjuu 'diinö do̧batijöködötö, Juwö iyö dösödodönö, jö̧ba̧lö. Jo̧kwaijayonö lekwe yötjawiawö̧ bajaliyanö yöba̧lijadötö, Jau kwatjö̧ma, iyö dösödökena, jö̧ba̧lö.

Hechos 17:26

Ja̧danö, jo̧bama ajayinöma bakwo̧ jojonö otidijetö. Jo̧batjö̧ma jojodöma ba̧jekwachinö ja̧bijetö böjȩ bakwameachibanö, tjitjebokwenada tjuju̧kwobö. Jo̧bada jojodö tjöbötjachakwa̧bi, wotjakwa̧bi, tjuju̧kwakwemibi yöbawö juno̧ma.

Deuteronomio 11:14

isabenö o̧bakwena ojwiyo otiwanö o̧bobö weakobe, kwöbatjiju otiwanö pokwobö. Jau chömöledö, o̧bakwena ajayinö ojwiyo o̧bo jö̧a̧lenabi, bajaleapo o̧bo jö̧a̧lenabi, otiwanö o̧bo jö̧a̧lidanö ojwiyo o̧bobö weakobe. Ja̧danö jejenö ojwiyo o̧bobö weobetjö̧, otiwanö kwöbatjiju wa̧ji̧ kwemaduwakwedöja, kwakwawa jawa batjo wa̧ji̧bi, uba batjo wa̧ji̧bi, olivo batjo wa̧ji̧bi,

Deuteronomio 28:12

Wanedö yötawa chömöledö, Isabenö Jo̧ma iteda itea lödaweju mölejebe juna̧lo̧, ja̧danö wei̧ a̧ja̧kwö kwö̧jaduwiökwe, ja̧ lödaweju po̧bebö, ökwödönö iyakobe, baikwö yötawa: Kwiteboduwitjö ojwiyo o̧bobö baibenama, lödaweju po̧bebö, ojwiyo o̧bobö weakobe, ja̧danö okobe jwiinö otidö kwö̧jaduwitenia, otiwanö iteatjö ökwödönö iyö pjaatakobe. Ja̧danö, jejenö pjabatö ökwödönö iyobetjö̧, ba̧jȩkwachinö kwujuna̧laduwakwedöja, ju'wedö tjitebokwena jojodönö kwiteaduwi kwöbalewaduwenanö baibanö. Jo̧kwaijayonö, jobadö ökwödönö tjöbalewakwa̧ akebaduwobö jwiakobe, ida̧ökö otiwanö kwujuna̧laduwakobetjö̧.

1 Timoteo 6:17

Cristonö ösödadötjö balada luwedönö baikwö yöbawidönö Timoteo, Aaa, ju'wedönötjö o̧penönöbedösa, jö̧ba̧lö tjomukwatokobö. Ja̧danö, böjȩ jawa tjujuna̧li̧, tupakwö jwiakwa̧ jawa tjujuna̧li̧ma tjo̧'wo̧ tjöwana̧lokobö yöbawidönö, Diosnöda tjo̧'wo̧ tjöwana̧lobö jo̧be. Jau, jo̧ba Diosda okobe jwiinö ökwödönö iyo̧ma, do̧'wo̧ ösöwanö dö̧jobö.