Hechos 13:48 - Dios Iwene

⁴⁸ Ikenama judío jojodöböködöma ja̧ yötjawi̧ a̧ja̧kwö ösödijadötö, Diosma webijetö ökwödönöbi iteda iwene, ji̧bakwawa wenema da̧ja̧kwobö, jö̧ba̧lö. Ja̧danö, Dios iwene jwiinö otiwa, jö̧ba̧lö, ösödijadötö. Jobadötjö ju'wedöma, Dioskwö ba̧kwȩlö̧jatebö tjö̧jakwedöma, Jesúsma dö̧jibinö pjabato̧, jö̧ba̧lö, Jesúsnö ösödö do̧batö emijadötö.

Hechos 13:48 ပူးပေါင်းရင်းမြစ်များ

Mateo 25:46

Ikenama, jobadö sulabedöma ökwöla nöolabe tji̧'yakwedö, jobetjö Dios lȩebi̧tjö ba̧kwȩlö̧jatebö usula tjemawobö, jo̧kwaijayonö otiwadöma ba̧kwȩlö̧jatebö ja̧kwawobe ja̧nö tji̧'yakwedö— jö̧ba̧lö yöawinobe Jesúsma.

Mateo 28:16

Jesús öba̧ja̧di̧ waisachadö a̧li̧nösamutjö bakwo̧bedöma Galilea nijibe tji̧'yinobe, ja̧danö 'ya̧jadö, Jesús yöawina'o mö'ösa'obe tji̧'yinobe.

Lucas 7:8

Jau Jesús, chöwaisa ödötjö chömöayo̧ otiwanö baibobö weköbitjö̧ma, ödötjö weköbijayonö, isabenö otiwanö baibakwo̧ chömöayo̧ma. Jau Jesús, ötjöbi chuluwedö tjömöayo̧ chö̧jobetjö̧, ja̧danö ötjöbi chömöayedö guardia jojodö tjuluwo̧ chö̧jobetjö̧ chöwaisa, weköbi̧ma isabenö juluwobe, ja̧danö ödötjö weköbitjö̧bi weköbi̧danö baibakobe jö̧ba̧lö. Ötjöma guardia jojonö chömöayo̧nö 'ya̧wi jö̧ba̧lö wetitjö̧ma, 'yo̧, ja̧danö ichi jö̧ba̧lö wetitjö̧ma, icho̧, ja̧danö midö cheminökwenö chömöayo̧nö baikwö otidi jö̧ba̧lö wetitjö̧ma, weti̧danö otido̧. Ja̧danö chöwaisa, ötjö mikwawö̧kö̧ chömöayedönö wetenama weti̧danö baleditjö̧ma, ökwö weköbi̧danö isabenö baledena, ötjötjö bajalekwönönö isabenö la'aka luwo̧köbobetjö̧. Jo̧kwajabetjö̧ ödötjö chömöayo̧ otiwanö baibobö weköbitjö̧ma, ödötjö weköbijayonö isabenö weköbi̧danö baledakobe. Chömöayo̧ isabenö otiwanö ö̧bibakobe— jö̧ba̧lö guardia luwo̧ yöa̧li̧ yötjawinobe Jesúsnö.

Juan 10:16

Ja̧danö, ju'wedöbi tjö̧jobe, ötjö cha̧jwi̧mu o̧bȩja̧döma, jelobe ju̧kwadö. Jobadönöbi öbibö chichejebobö jo̧be, ötjö chiwene tja̧ja̧kwobö. Ja̧danö, jobadöma chiwene tja̧ja̧kwakwedö. Bidö cha̧jwi̧mukwö, jelobe ju̧kwadö cha̧jwi̧mu chichejebakwawö̧kwö bakwo̧ iteba'odanö tjuju̧kwakwedö, tjajikwo̧ma bakwo̧da, ötjödachobetjö̧— yöawinobe Jesúsma jojodönö.

Juan 11:52

Caifás jejenö yöawi̧ma judío jojodönödama yöawinokobe, jojodö okobe deinö Jesús tjö̧jibinö ö'wöchakwa̧ yöawinobe, wajwiijayonö. Okobe deinö jelobebi jelobe ju̧kwadönöbi yöawinobe. Jesús ö'wöchakwa̧ma okobe deinö jojodö tjö̧jibinö ö'wöchakwo̧, jojodö Dios i̧tji̧mu batjibanö. Ja̧danö, jojodö jelobebi jelobe ju̧kwadöma bakwaibedödanö batjibanö Jesúsma jojodö tjö̧jibinö ö'wöchakobe.

Hechos 13:12

Jejenö balediökwe gobernadorma omukwatijetö, Ayö, jobadö yötjawaja̧, Tjuluwo̧ Jesúsnö yötjawaja̧ma isabenö jweinö yötjawajabe, jö̧ba̧lö. Jejenö omukwatö Jesúsnö ösödijetö, Jesúsma chö̧jibinö pjabato̧, jö̧ba̧lö.

Hechos 13:42

Ikenama Pablo, Bernabé judío jojodö yötjaweju latjebena jejutjö ba̧nö a̧ja̧kwajadötjö ju'wedöma 'ya̧wibö ösödö abebijadötö: —Babe ikena semanabi yökawaduwo, ja̧ yökawaja̧duwama— ösödö abebijadötö.

Hechos 15:2

Ja̧danö, Pablo, Bernabé, ja̧ yötjawi̧ a̧ja̧kwö öpöjödö wene juna̧lakwawijadötö ja̧ jawa yöbawadökwö. Lekwe labinö atada̧lö yöba̧lakwawijadötö, Jejenömaökö, jö̧ba̧lö. Jo̧kwaobetjö̧ Antioquíanö ju̧kwadöma, Jesúsnö ösödadöma omukwatijadötö, Pablonö, Bernabénö wedo Jerusalénbe tji̧'yo, Jesús webawedönöbi, Jesúsnö ösödadönö te'ada̧lakwawa jojodönöbi yötjawobö, jö̧ba̧lö. Jejenö omukwatö kabebö webijadötö Pablonö, Bernabénö Jerusalénbe tji̧'yobö. Jobadönö webijadötö yötjawobö Judea nijitjö ichajadö yötjawaja̧, judío jojodöböködönö yötjawaja̧ma. Jesús webawedönöbi, Jesúsnö ösödadönö te'ada̧lakwawa jojodönöbi abebö tja̧ja̧kwobö, ¿Dakwö ja̧dakwa̧da? jö̧ba̧lö, webijadötö Pablonö, Bernabénö tji̧'yobö. Ja̧danö, ju'wedöbi Pablokwö, Bernabékwö tji̧'yobö webijadötö, jobe ju̧kwadötjöma.

Hechos 15:31

Antioquíanö ju̧kwadö Jesúsnö ösödadöma ja̧ kwialusöja yöawobe a̧ja̧kwö jwiinö ösödijadötö.

Hechos 2:41

Ikenama Pedro yöawi̧ a̧ja̧kwö ba̧jekwadö ösödijadötö. Ja̧danö, ösödadöma ojwenö ubu̧datobö abebijadötö, Jesúsnö tjo̧'wo̧ tjöwana̧li̧ i̧sebö. Ja̧ mölema tres mil jenanö jojodöma Jesúsnö ösödijadötö.

Hechos 2:47

Kabatökönö, Diosma otiwanö jo̧, jö̧ba̧lö, ju̧kwiabijadötö. Ju'wedö jobe ju̧kwadöma tjo̧'wo̧ ösödinö edijadötö jobadönöma. Ju'wi möle jwiinö Duluwo̧ma ju'wedönöbi, ju'wedönö tjö̧jibinö pjaatawö̧ batjibanö pjabatijetö.

Hechos 20:13

Ikenama ötjöma, ju'wedö Pablo 'yi̧nadökwö ojwebenö chȩwa̧jijatö, Aso comunidadbe. Ja̧danö ökwödöma ojwebenö dȩwa̧jonö Pabloma wainö tebobenö ȩwa̧jijatö. Jo̧bama ajayima jö̧a̧lijatö ökwödönö, Asonö chichibena bakobe dȩwa̧jaduwo, jö̧ba̧lö.

Hechos 22:10

Ikenama Chuluwo̧nö abebö cha̧ja̧kwijatö, ¿Dakwö ja̧tobö weköbatjö? jö̧ba̧lö. Jejenö abebö cha̧ja̧kwökwe yöawijatö, A̧laibö 'ya̧wi Damascobe. Jobe jo̧ma yöawakobe ja̧köbakwa̧ma, jö̧ba̧lö, yöawijatö— yöbawijetö—.

Hechos 28:23

Jejenö, Ökwödönö yöbawi, jö̧ba̧lö, abebajadö, Pablo yöawakwa̧ möle badedö junijadötö. Ja̧ möle baibena jojodö ba̧jekwadö 'yi̧jadötö Pablo ejube. Ichibajadönö Pabloma möle baledibanö yöbawijetö Dios iwenema. Dios La'aka Luwo̧ ö̧jena wenebi yöbawijetö. Moisés iwȩyudinabi, Dios yöawi̧ yöbawadö damötjö tjiwȩyudinabi eda̧lö labebö lobö yöbawijetö Pabloma. Yöbawijetö, Jesúsma Dios yöbawö ujuninökwe jojodö tjö̧jibinö pjaatobö, jö̧ba̧lö, jojodö tjöwaisachibobö.

Hechos 8:8

Jo̧kwaiawö̧ Samarianö ju̧kwadöma tjo̧'wo̧ ösöwanö ju̧kwijadötö.

Romanos 11:7

Chömöledö, judío jojodötjö sule ja'yubenöda ösödadö tjuju̧kwobema, ¿dakwö domukwatobö jo̧beda? Baikwö labebö lobö yötawa chömöledö: Israel jojodöma sulabe jwibadö batjibobö tjisakwinobe, ¿jö̧tö? Jejenö tjisakwobema, ¿sulabe jwibadö batjibinaji̧? Batjibinokobe chömöledö. Sule Dios iteda ömöledö batjibanö 'da̧batö ujuninawö̧da sulabe jwibadö batjibinobe, ja̧danö ju'wedöma sule tjuu 'dibadöda batjibinobe chömöledö.

Romanos 13:1

Chömöledö, la'aka luwedö wetji̧ ja̧bö kwö̧jaduwo, Diosda jobadönö kabebö ujuninobetjö̧. Jau chömöledö, Diosda inesö la'aka luwo̧ma, ja̧danö jo̧bada okobe deinö böjȩ luwedönö kabebö junina.

Romanos 8:28

Jau chömöledö, Diosma isabenö ökwödönö pjabato̧. Jo̧bada ökwödönö jwöinobe, iteda ömöledö badibobö. Ja̧danö, jemi tupakwöbi iteda jwöinawö̧nö pjabato̧ chömöledö. Ina böjȩnö ja̧nö, döpöjödi̧ jawa baledobe, ¿jö̧tö? Ja̧danö, sulabe jawa baledobe ökwödönöma, usula demawinö, ¿jö̧tö? Jo̧kwaijayonö, döpöjödi̧ jawa baledijayonö, ja̧danö sulabe jawa ökwödönö baledijayonö, okobe jwiinö ja̧ jawa balewö lobo̧ Diosma, ökwödönö pjaati̧ jawa baibanö. Jau chömöledö, ökwödö Diosnö ösödadöma, jo̧bada jwöinawö̧sa, iteda ömöledö badibobö. Ja̧danö, iteda ösödi̧danöda jwöinobe ökwödönöma chömöledö.

1 Corintios 16:15

Chömöledö, Estéfanas mikwo̧nö, jo̧ba ömöledönöbi kwöwaisaduwa, Acaya niji ju̧kwadötjö ajayinö Jesúsnö ösödinadö jobadöma jö̧ba̧lö. Ja̧danö, jobadönö kwöwaisaduwa, jwaikwöda Dios ömöledönö pjatjatotö jö̧ba̧lö otidadö jö̧ba̧lö.

Efesios 1:11

Chömöledö, Diosma okobe jwiinö baledobö ösödi̧ma badekwachinö ja̧bo̧. Ja̧danö, ökwödönö, judío jojodönö omudawö junijetö Cristokwö bakobe dötewinö badibobö, jejenö badibobö omukwatö ösödinobetjö̧.

Efesios 1:19

Ja̧danö, Diosnö atebobe do̧batö kwöwaisachibaduwobö kwo̧'wo̧ luwo̧duwinö, Diosma jwiinö juluwo̧, jö̧ba̧lö.

Efesios 1:4

Ja̧danö ajayinö, böjȩ ina otidapjii Diosma omudawö junijetö ökwödönöma iteda ömöledö babibö, Jesúskwö bakobe dötewinö badibakwa̧ma. Ja̧danö, omudawö junijetö iteda öba a'otjö suli̧ jwiinö, wene jwibadö badibakwa̧ma.

Efesios 1:5

Chömöledö, Diosma ökwödönö ile niebobetjö̧ ida̧ökö ajayitjöda omukwatijetö ökwödönöma, Bidönöma ötjö chi̧tji̧mu batjibanö 'da̧batö chujunakwo̧sa, Jesús imidawakobetjö̧, jö̧ba̧lö. Jejenö omukwatö ösödinobetjö̧ Diosma omudawö junijetö ökwödönöma, iteda i̧tji̧mu badibobö.

2 Tesalonicenses 3:1

Ja̧danö, bajaleapo jawa baikwö yötawa: Diosnö akebaduwo ökwödönö chömöledö, Duluwo̧ jawa wene yödawi̧ma, tupakwö ina juluwanö yödawobö jelobebi, jelobebi. Ja̧danö, yödawi̧ a̧ja̧kwadöma otiwanö omukwatö tjösödobö akebaduwo, ökwödö kwösödinaduwadanö jobadöbi tjösödo jö̧ba̧lö.