Hebreos 9:7 - Dios Iwene

⁷ Jo̧kwaijayonö Diostjö jojodötjö ö'weje pjabatadö okobe deinöma tebachiatjinokobe okwasȩko̧nö, jwiinö inesösȩko̧nöma. Ö'weje pjabatadötjö sule bakwo̧da, Diostjö jojodötjö ö'weje la'aka pjabato̧da, bakwöta o̧bakwenada tebachiainobe okwasȩko̧nöma. Ja̧danö, Dios wei̧ma jo̧banö weinobe okwasȩko̧nö tebachö Diosnö tjökwösobu iyobö. Jo̧bama jejenö jojodö sulabenö ja̧tji̧ midö iyinobe, sulabenö ja̧tji̧ wajwitjobetjö̧ jelobekwö 'ya̧dö ja̧tji̧ma. Jo̧kwaijayonö jojodö tjusuli̧ midö iyawa iyakwa̧ abönö jo̧ba, Diostjö jojodötjö ö'weje la'aka pjabato̧ma iteda usuli̧ midö Dios söbebö loobö tjökwösobu iyinobe. Jejenö iteda usuli̧ midö iyinobe Dios öba a'o suli̧ jwibo̧danö ö̧jobö. Ikenama jojodö tjusuli̧ midö tjökwösobu iyinobe. Jejenö bakwöta o̧bakwenada, Diostjö jojodötjö ö'weje la'aka pjabato̧da Dios eju okwasȩko̧, jwiinö inesösȩko̧nö tebachiainobe Diosnö iyö. Ju'wedötjö bakwo̧bi deobe jȩko̧, okwasȩko̧, Dios ö̧jȩko̧nö tebachinama.

Hebreos 9:7 ပူးပေါင်းရင်းမြစ်များ

2 Samuel 6:7

Jejenö maoko jawa maiökwe, Diosma ödameakwinobe Uzanö, ja̧danö jenada Diosma Uzanö lȩbebö kwabö loinobe. Jejenö lȩebökwe, jenada Dios iteapjo ö'öbö ja̧nö ö'wö baibinobe Uzama, Dios iteapjo maajobetjö̧.

Éxodo 30:10

Ja̧danö, bakwöta o̧bakwena bakwötanöda, Aarónma japjo söinö 'dö̧ekwa'be juwawapjo yemidanö suli̧ jwiapjo baibanö juwö tjiyakwawö̧ tjökwösobu, jojodö tjusuli̧ muchekwa tjökwösobuma juwö iyawapjo, a̧petube junawapjotjö emibö Dios eju okwa tebachibö söinö 'dö̧ekwa'be juwawapjo i'yekiyanö sa̧sa̧obö jo̧be. Ja̧danö, bemi tupakwöma jejenö bakwöta o̧bakwena sa̧sa̧tjobö jo̧be Aarónbi, Aaróntjö tupadanö jojodöbi ba̧kwȩlö̧jatebö— webijetö Isabenö Jo̧ma Moisésnöma.

Isaías 28:7

Babe möle, ökwödönö ötjibo jö̧ba̧ladöma, 'dukwachawö̧ kwebachadö. Ubasobu o̧'dobubi, ju'wi nio ojwiyobi o̧wa̧lajadö, jobekwö 'dukwachawö̧ kwetjachobe. Dios yöawi̧ yöbawadöbi, Diostjö jojodötjö ö'weje pjabatadöbi, nöinö o̧wa̧lajadö jobekwö 'dukwachawö̧ kwebachadö. Jobadöma tji̧'wididanö tjedijayonö, okwa jawa tjöwaisachibanö tjedobö jwibadö, ja̧danö lȩekwa yötjawobö jö̧tja̧lenama, jweinö lȩekwa yötjawobö jwibadö, 'dukwachawö̧ tjö̧jobetjö̧.

Isaías 29:14

Jo̧kwajabetjö̧ yemidanö tjöbajale jalaka baibanö, jojodö edajitjökö jawa chi̧sebocha, yemidanöbi, yemidanöbi. Jobekwö i̧sȩbö, jobadötjö –Waisadösa, –jö̧ba̧ladö tjöwaisi̧ 'dö̧ibajobö ja̧takwo̧sa, jadanö jobadötjö, –Okwa jawa döwaisachibanö omukwatadösa, –jö̧ba̧lö yöba̧ladöma, labebö lobö yötjawobö jwitjakwedö, —jö̧ba̧lö yöawobe Diosma.

Isaías 3:12

Ötjö chömöledö Juda jojodöwe. Tjemu la'aka luwedö babibinadöma, sulabenö ja̧badö chömöledö Juda jojodönö, ja̧danö ya̧döda chömöledö israel jojodönö webö jadö. Chömöledöwe! Ökwödönö öbibö jwebebadöma, ö'öbönö ötjibawö̧ja, jweinö kwi̧'yaduwakwa̧ma wajwiköbaduwenanö baibanö.

Isaías 9:16

Jau, israel jojodö tjuluwedöma sulabenö ötjibajabe israel jojodönö, ja̧danö jobekwö sulabenö ötjibiawö̧, tjömöayedö israel jojodöma wajwibö omukwatadö, —Otiwanö omukwatakwawama, diyajö, —jö̧ba̧lö.

Efesios 4:18

Jobadöma yȩa'wo okwada ja̧dö, tjo̧'wo̧ luwo̧nöma, tjo̧'wo̧ luwo̧ jawa wajwitjobetjö̧. Ja̧danö, tjomajade 'ditjobetjö̧ Dios jawa tjöwaisachiboböma jwibadö. Jo̧kwaobetjö̧ Dios ba̧kwȩlö̧jatebö ja̧kwawa iyi̧ma jwibadö, wajwitjobetjö̧.

Hebreos 10:3

Jo̧kwaijayonö pjaatokobetjö̧ yemidanöbi yemidanö, bakwöta o̧bakwena Diostjö jojodötjö ö'weje la'aka pjabato̧ma iyiainobe jojodö tjusuli̧ midö. Ja̧danö bakwöta o̧bakwena jojodö tjomukwatobö jo̧be, ¡Ayö! Dios öba a'o ina sulabedöda dö̧jobetjö̧ yemidanöbi, yemidanö ö'weje la'aka pjabato̧ iyoböma jo̧be, jö̧ba̧lö.

Hebreos 6:19

Ja̧danö chömöledö, ökwödöma Diosnö do̧'wo̧ wana̧lö te'ada̧ladösa, Isabenö Dios yöbawö ujuninadanö badekwachakobe, jö̧ba̧lö. Jo̧kwaobetjö̧ Diosnö do̧dati̧danö do̧batö jwaikwöda 'ya̧dösa, jo̧banö do̧'wo̧ wana̧lö. Wanedö yötawa chömöledö. Ökwödö disowima tjolanö nönö nubö dönobe, a̧li̧ isuwokobö. Ja̧danö, a̧lachi'bo nuda'boma otiwa'bo, 'dia'bonöda nudobe. Chömöledö ökwödö jejenö 'dia'bonödanö ja̧dösa Dioskwö, iteda yöbawö ujunina wene do̧'wo̧ wana̧lö. Jejenö do̧'wo̧ wana̧lö döwaisobe, Bakwo̧ ökwödönö pjabato̧ma ö̧jobe, jö̧ba̧lö, Jesúsda. Jejenö döwaisobetjö̧ Diosnö do̧'wo̧ wana̧lö dite'ada̧lobe. Ja̧danö chömöledö, Jesús ökwödönö pjabato̧ma, böjȩtjö Diosnö la'aka iyadö Dios ö̧jineju okwa tupasȩko̧ tetjachinadanö teachinobe Dios mölejȩbe ö̧jobekwö. Jau chömöledö, sawana'wo tjöekwemi o̧pe Diosnö iyö tetjachinadanö Jesúsma teachinobe Dios mölejȩbe ö̧jobekwö.

Hebreos 7:27

Isabenö, jo̧bama böjȩnö ju̧kwadö Diostjö jojodötjö ö'weje pjabatinadödanö jö̧kö̧. Jobadöma suli̧ juna̧linadö. Ja̧danö, jobadöma Diosnö tjiyakwa̧ abönö idöda tjusuli̧ midö juwö tjiyinobe, suli̧ juna̧ladötjobetjö̧. Jemi ikenama, idöda tjusuli̧ midajadöma jojodö tjusuli̧ midö juwö tjiyinobe. Jo̧kwaijayonö jejenömaökö Jesús, jwiinö otiwo̧ma. Jesúsma iyinokobe jobadö juwö tjiyinadanö, bakwöta o̧bakwena tjiyi̧danöma. Jo̧bama bakwötanöda ökwösobu ebawinö imidawinobe okobe jwiinö jojodö tjusuli̧ma. Jesúsma jwiinö imidawinobe, yemidanö itedada iyawökönö.

Hebreos 9:3

Ja̧danö, okwasȩko̧bi ji̧nobe. Jȩko̧ teachakwawemi tjöekwado̧ tjötjebinado̧ma 'diinö tjöekwinobe. Jȩko̧ okwasȩko̧ma, Jwiinö inesösȩko̧, jö̧ba̧lö, ötjabinȩko̧. Jȩko̧ma Dios ö̧jinȩko̧. Jȩko̧, jwiinö inesösȩko̧ ö̧tjabinȩko̧ma okobe deinö tetjachobö weinokobe. Sule bakwo̧da, Diosnö la'aka iyo̧da, bakwöta o̧bakwenada tebachiainobe okwasȩko̧nö.