Ja̧danö, ja̧ cuatrociento treinta y cuatro o̧biya baledibajenama, Dios weakwo̧ jö̧a̧linökwenö kwabö lotjakobe, sulabenö ja̧ököjayonö kwabö lotjakobe. Ja̧danö, jemi ikenama tupakwö ichakwo̧ sulabo̧ la'aka luwo̧ ömöledöma ichö Jerusalén comunidad söbebö lotjakobe, ja̧danö Dios ejubi söbebö lotjakobe. Ja̧ baledakwa̧ma, ojwe okwatö okobe jwiinö söbebö loi̧danö baledakobe, jwiinö Jerusalén comunidadbi, Dios ejubi söbebö lotjakobe. Dios omukwatö ujuninadanö, ja̧ cuatrociento treinta y cuatro o̧biya baledaja̧ ikena, kwakwabakwadö tjichakobe, ja̧danö kwakwabakwawö tjö̧jakobe, Jerusalénma jojodö deobe baibenanö kabatö.
Hebreos 9:15 - Dios Iwene15 Chömöledö Cristoma iteda ökwösöbu iyawö imidawinobe ökwödöma okwa dichawedö badibobö. Jo̧kwaobetjö̧ jo̧bama Diostjö jojodötjö ö'weje ja̧nö itedada iyawinobe, Dios 'yayi̧ balekwa yöbawö ujuni̧ma jamatö 'yo̧bö. Isabenö chömöledö, jojodöma Dios ajayinö yöbawö ujuni̧tjö weina okobe jwiinö tja̧ja̧kwoböma jwiobe. Jo̧kwaobetjö̧ jobadöma Dios lȩebakwawö̧da ja̧dö. Jo̧kwaijayonö Cristo woena Dios lȩebi̧tjö tjö̧jibinö pjaatinobe, Dios ajayinö yöbawö junö wei̧ söbebö loinobetjö̧. Isabenö, Cristoma woinobe jojodö tjusula tjumusidi̧ midawö. Jejenö midawö woinobetjö̧ okobe deinö Dios yöa̧lawö̧, Ötjö chömöledö, jö̧ba̧lö, Dios otiwi̧ iyakwa̧ tjemakwedö. Isabenö, jobadöma Dios iyakwa̧ tjemakobe, Dios damötjö, Chiyocha, jö̧ba̧lö, jö̧a̧linadanö. အခန်းကိုကြည့်ပါ။ |
Hebreos 9:15
52 ပူးပေါင်းရင်းမြစ်များ
Ja̧danö, ötjönö tjösödobetjö̧ tjeju junibadö, ja̧danö tjöjawujudö ya̧dönöbi, tjö̧ja̧wo̧dö ömadönöbi, tjabe'donöbi, tjojo'donöbi, tji̧tji̧munöbi yöne tjömöledönöbi junibadö, ja̧danö tjöbatjiju junibadöma, ötjönö ösödö tjujunibobetjö̧ isabenö tjujunibinatjö yelösöda bajalekwönönö balekwa iyakwo̧ Diosma, ja̧danö ju'wibi ba̧kwȩlö̧jatebö ja̧kwawa jobadönö iyakwo̧.
Ina yöbawijetö: —Tjo̧wi̧ yöta̧la chömöledö. Babema Diosnö ateba ökwödönö ite'ada̧lobö. Jo̧bama ökwödönö lȩlö̧jino edö pjabato̧. Ja̧danö, lȩlö̧jino edö ökwödö kwo̧'wo̧ luwo̧duwi ujuluwachibanö ja̧bo̧, itekwöda juluwachibanö tupakwö kwi̧'yaduwobö. Ja̧danö, lȩlö̧jino edö otiwa jawa iyo̧ Diosma, okobe deinö i̧tji̧munöma, jo̧ba suli̧ jwiinö batjibanö ja̧inawö̧nöma.
Weökakobe chömöledö. Baikwö yötawa: Dios öpöjojodö dö̧jayi, Dios i̧tji̧ma midawö woinobe, Dios ömöledö badibanö ja̧bö, ¿jö̧tö? Jau chömöledö, Jesúsma ökwödö sulabedönö, jo̧banö öpöjödadönö pjaatinobe. Ja̧danö, jejenö jo̧banö öpöjödadönö pjaatinobema, ¿iteda ömöledönö pjaatökenaji̧? Babema woina tupakwö, woawatjö yemidanö tjeachajinobema, ¿pjaatökenaji̧? Pjaatena chömöledö. Jemi tupakwöda pjabato̧ chömöledö iteda ömöledönöma, Dios lȩebakwa̧tjö ja'yubebi demapji jö̧ba̧lö.
Jau chömöledö, Diosma isabenö ökwödönö pjabato̧. Jo̧bada ökwödönö jwöinobe, iteda ömöledö badibobö. Ja̧danö, jemi tupakwöbi iteda jwöinawö̧nö pjabato̧ chömöledö. Ina böjȩnö ja̧nö, döpöjödi̧ jawa baledobe, ¿jö̧tö? Ja̧danö, sulabe jawa baledobe ökwödönöma, usula demawinö, ¿jö̧tö? Jo̧kwaijayonö, döpöjödi̧ jawa baledijayonö, ja̧danö sulabe jawa ökwödönö baledijayonö, okobe jwiinö ja̧ jawa balewö lobo̧ Diosma, ökwödönö pjaati̧ jawa baibanö. Jau chömöledö, ökwödö Diosnö ösödadöma, jo̧bada jwöinawö̧sa, iteda ömöledö badibobö. Ja̧danö, iteda ösödi̧danöda jwöinobe ökwödönöma chömöledö.
Ja̧danö, 'da̧batö ujuninawö̧nöma, Bidöma chitji̧danö tjichejekwakwedö, jö̧ba̧lö, jobadönö jwöinobe, jo̧banö tjösödo jö̧ba̧lö. Ja̧danö, jejenö jwöajawö̧nöma, sulabe jwibadö batjibobö ja̧inobe. Ja̧danö, Bidöma sulabe jwibadö, jö̧ba̧lö jö̧a̧lajawö̧nö, iteda dewinö dejatinö ujulubi iyinobe, jobadöbi tjujuna̧lo jö̧ba̧lö.
Jo̧bada ökwödönö ujuninobe, iteda yöbawö ujunina wene 'yayi̧ wene otidadö badibanö, ja̧danö jo̧bada pjaatobetjö̧, otiwanö yöbawadösa, ökwödöbi, ju'wedöbi isabenö ja̧kwawa kwujuna̧laduwobö. Ja̧danö, yödawi̧ wene, Dios yöbawö ujunina wene 'yayi̧ wenema, Moisés iwȩyudina Dios weina jawamaökö chömöledö, Dios O̧'wo̧ Luwo̧ jawada. Jau chömöledö, Moisés iwȩyudina laebi̧danö jojodö ja̧bö tjö̧jokobetjö̧, lȩekwa jo̧be jobadönö, jo̧kwajabetjö̧ Moisés iwȩyudinama sule wobaleda iyobe, ¿jö̧tö? Jo̧kwaijayonö Dios O̧'wo̧ Luwo̧ma, ja̧kwawa iyo̧.
Ja̧danö, Dios iwene pje'datakwawokobetjö̧, usula chemawijayonö, Dios ösödawö̧ ömöledö batjibakwedönö omukwatö, öpöjödachibökönö usula chemawobe. Jau Timoteo, öpöjödachibökönö usula chemawobe, cho̧'wo̧ 'dibachibö usula chemawi̧tjö jobadöbi Cristo Jesúsnö ösödö tjö̧jibakobetjö̧, ja̧danö jo̧bakwö mölejȩbetjö ba̧kwȩlö̧jatebö tjö̧jakobetjö̧.
Ja̧danö, Dios omudawö ujuninawö̧nö chöba̧ja̧dobe, Diosnö tjo̧'wo̧ wana̧lö tjomukwatobö, Aaa, isabenö ökwödöma ba̧kwȩlö̧jatebö ja̧kwawa dujuna̧lakwedösa, Dios jö̧a̧li̧danö, jö̧ba̧lö tjomukwatobö. Ja̧ ba̧kwȩlö̧jatebö ja̧kwawa dujuna̧lakwa̧ wenema omöna yöba̧lö̧kö̧ Diosma yöbawö ujuninobe, ina böjȩ otidakwa̧ abönö.
Ja̧danö Diosma mikwa jwiinö otiwa jawa iyö ökwödönö yöawinobe, bidöma sulabe jwibadö jö̧ba̧lö, ja̧danö ba̧kwȩlö̧jatebö ja̧kwawa dujuna̧lakwedö badibanö ja̧inobe. Ja̧danö, isabenö Dios jö̧a̧linadanö ba̧kwȩlö̧jatebö ja̧kwawa dujuna̧lakwedösa jö̧ba̧lö, Diosnö do̧'wo̧ wana̧lö dö̧jobe ökwödö Jesúsnö ösödadöma.
Ja̧danö, ju'wibi chömöledö. Kwömöledötjö ju'wedö, Jesúsnö ösödadönö ka̧lena ba̧kwaweju okwa tjödinobe. Ja̧danö, ka̧lena ba̧kwaweju okwa tjödiawö̧ kwo̧'wo̧duwi tjo̧bekwö kwö̧jinaduwobe, Ökwödöma jobadö tjö̧bi̧danö bakwainö ba̧dösa, jö̧ba̧lö. Isabenö, jobadö usula tjemawi̧ omukwatö kwo̧'wo̧duwi tjo̧bekwö kwö̧jinaduwobe. Ja̧danö chömöledö, ja̧ ajayinö möle, Jesúsnö kwösödinaduwobetjö̧ Jesúsnö öpöjödadötjö la'aka luwedöma kwiteaduwima tjeminobe. Jo̧kwaijayonö, ökwödöma me'dawachibökönö kwo̧'wo̧ luwo̧duwi ösöwanö kwö̧jinaduwobe, Ja̧ma wame jawa, jö̧ba̧lö. Dios ökwödönö iyi̧ma ja̧ wame jawatjö o̧penönö mikwawi̧, ba̧kwȩlö̧jatebö ji̧ jawa, jö̧ba̧lö, me'dawachibökönö kwö̧jinaduwobe. Isabenö chömöledö ökwödönö pjabatö yötawaduwakwö. Omukwataduwi ja̧ möle, ökwödö kwo̧'wo̧ luwo̧duwinö ösöwö kwö̧jinaduwama usula kwemawaduwijayonö.
Ja̧danö Abrahambi, iteda ömöledöbi, Diosnö tjo̧'wo̧ wana̧lö tjö̧jinobe, wotjenanö baibanö. Idöda tjiteboökena ju'wedö tjitebonö ja̧nö, Dios yöbawö ujunina iyemima ina tjeminokobe, idöda tjiteboma. Yayonö tjo̧'wo̧ ösöwanö tjuju̧kwinobe, Diosnö tjo̧'wo̧ wana̧lö, Ökwödö ba̧kwȩlö̧jatebö dö̧jakwemi ditebo, Dios iyakwemima, ju'wi möle iyakobe, jö̧ba̧lö. Chömöledö, jobadöma tjöwaisinobe, Böjȩnö ja̧nö Dios yöbawö ujunina iyakwemi demököma otiwa, jö̧ba̧lö. Ja̧danö tjöwaisinobe, Ökwödö ba̧kwȩlö̧jatebö ditebo dö̧jakwemima böjȩnömaökena, jö̧ba̧lö. Jobadöma jweinö omukwatö, Ökwödöma jelobeda jojodösa, ina ditebonöma ichiböködösa, jö̧ba̧lö, tjo̧'wo̧ ösöwanö tjuju̧kwinobe, Diosnö tjo̧'wo̧ wana̧lö.
Ja̧danö, jobe ichibö kwuju̧kwaduwemima Jesúsbi ö̧jobe, ökwösobu ebawinö dumusidi̧ midawinama. Jo̧bama ökwösobu ebawinö imidawenama Dios 'yayi̧ balekwa yöbawö ujuni̧ma jamatö 'yi̧nobe, ökwödönö pjabatö. Chömöledö, Jesús ökwösobuma, Tjo̧wi̧ Diosma jojodö tjusuli̧ma söbebö loa, jö̧ba̧lö, otiwanö jwöeba̧lobedanö jwöeba̧linobe. Jo̧kwaijayonö damötjö Abel ökwösobu jwöeba̧linadanömaökö, Jesús ökwösobu jwöeba̧linama. Abel ökwösobu nijibe ebawajobuma Abel jwöobedanö jwöinobe Diosnöma, Balekwa mikwa lȩbebi, jö̧ba̧lö. Jo̧kwaijayonö Jesús ökwösobuma jejenömaökö. Otiwanö jwöeba̧lobedanö jwöeba̧linobe, Tjo̧wi̧ tjusuli̧ma söbebö loa, jö̧ba̧lö. Jejenö Jesús imidawinobetjö̧ Dios 'yayi̧ balekwa yöbawö ujuni̧ma jamatö 'yi̧nobe, ökwödö Dios ö̧jobekwö, suli̧ jwibadöda kwichibaduwinö.
Chömöledö, Duluwo̧ Jesúsma ökwösobu ebawinö iteda Diosnö iyawö midawö ö'wö baibinobe. Ja̧danö, jo̧bama midawö ö'wö baibena, Dios 'yayi̧ balekwa yöbawö ujuni̧ma jamatö 'yi̧nobe. Chömöledö, Jesús ökwösobu ebawinö ö'wö baibiökwe, Dios 'yayi̧ balekwa yöbawö ujuni̧ jamatö 'yo̧bö, Diosma Jesúsnö wobajaletjö yemidanö tjeachajinö ja̧inobe. Ja̧danö, tjeachajinö ja̧inökwenöma ökwödönö la'aka te'ada̧lo̧ baibanö 'da̧batö ujuninobe Diosma, iteda a̧jwi̧mu o̧bȩja̧dödanöbedönö la'aka te'ada̧lo̧ baibanö. Ja̧danö chömöledö Diosnö, do̧'wo̧ luwo̧ okwa wene jwiinö badibobö pjabato̧nö ateba ökwödönöma. Jo̧banö ateba ökwödönö pjaatobö iteda ösödi̧da ja̧bö kwö̧jaduwobö. Ja̧danö, jo̧banö ateba ökwödönö pjaatobö Jesucristo ujulunö kwo̧'wo̧ luwo̧duwi okwanö otiwanö Dios ösödi̧danö balewachinadö bakibaduwobö. Isabenö chömöledö, Diosnö ba̧kwȩlö̧jatebö dösödaduwo, Jo̧bada, jö̧ba̧lö. Ba̧kwȩlö̧jatebö dösödaduwo, Jwiinö juluwo̧, jwiinö otiwo̧, jö̧ba̧lö. Chömöledö, biya̧ yötawi̧ma isabenö ji̧ jawa yötawa.
Ja̧danö chömöledö, ökwödö Dios ju'wedö i̧tji̧mu ötjabiwö̧ma jojodödasa. Diteba'obi dökwösobubi juna̧ladösa. Ja̧danö, woba jojodösa. Jo̧kwaobetjö̧ Jesúsbi, ökwödönö pjaatobö jojoda baibanö öbötjachinobe ökwödö woba jojodödanö. Isabenö Dios Itji̧ma jojoda öbötjachinobe woobö ökwödö dusula dumusidi̧ midawö. Ja̧danö, jo̧bama dumusidi̧ midawö woenama Awetjanö ujuluwinobe. Jo̧ba Awetjama yelösöda juluwo̧ jojodönö Diostjö 'da̧bachibö wotjobö öibobö. Jo̧kwaijayonö Jesúsma jo̧banö ujuluwinobetjö̧ Dios i̧tji̧mu babibinadönö Diostjö 'da̧bachibö wotjobö öbibökö. Chömöledö jo̧ba Awetjama ujulu jwibo̧ ökwödö Jesúsnö do̧batö eminadönö öibobö, Diostjö 'da̧bachibö wodoböma.
Isabenö, Jesúsma jwaikwöda i̧'yinobe Dios wei̧ a̧ja̧kwö. Jo̧kwaobetjö̧ chö̧ja̧wo̧dö, ökwödönö, Dios mölejȩbe kwö̧jaduwobö 'da̧batö ujuninawö̧nöma yötawaduwakwö. Dios Itji̧ Jesúsnö omukwata̧lö kwö̧jaduwo. Omukwataduwi. Jo̧ba Jesús yödawökweda, Bitema dö̧jibinö pjabato̧, jö̧ba̧lö. Chömöledö, Jesús, Dios yöawi̧ yöawobö weinökwema Diostjö jojodötjö ö'weje la'aka pjabato̧ baibanö jo̧. Jo̧banö omukwata̧lö kwö̧jaduwo chömöledö.
Ja̧danö chömöledö, jejenö baledinobe da'dö Abrahamnö. Abrahamma Diosnö o̧'wo̧ wana̧lö, Dios yöawi̧ ösödö ite'ada̧linobe, Dios yöbawö ujuninadanö isabenö baledakobe, jö̧ba̧lö. Döwaisa. Diosma jweinöda yöba̧lo̧ ¿jö̧tö? Ja̧danö Abrahamnö yöbawö junö jö̧a̧linobe, Isabenö ökwötjö tupadanö jojodö tjöba̧jekwachinö batjibobö pjatatocha, jö̧ba̧lö. Ja̧danö chömöledö, Diosma ju'wi jawabi jö̧a̧linobe Abrahamnö yöbawö junö jö̧a̧lena. Diosma Abrahamnö wanedakwawö yöawinobe, Abraham, ötjö yöbawö junö jö̧ta̧li̧danö badekwachökötjö̧ma ötjöda jawa, jö̧ba̧lö. Ja̧danö ötjödada lȩtebakwawakwo̧sa, jö̧ba̧lö, wanedakwawö yöawinobe Diosma Abrahamnöma. Chömöledö Diosma jelo̧, jo̧banö lȩebakwo̧ deobetjö̧, Ötjödada lȩtebakwawakwo̧sa, jö̧ba̧lö, wanedakwawö yöawinobe. Chömöledö Dios jejenö yöbawö junö jö̧a̧lina omukwatö döwaisachibobö jo̧be, Dios yöbawö junö jö̧a̧li̧danö isabenö badekwachakobe, jö̧ba̧lö.
Ja̧danö Abrahamma, Diosnö o̧'wo̧ wana̧lö, te'ada̧löda ite'ada̧linobe, Dios jö̧a̧lina badekwachenanö kabatö. Ime'dawachibinokobe, Tjo̧wi̧, chite'ada̧lökö. Chedemi Dios yöbawö ujuninama badekwachökena, jö̧ba̧lö. Jejenömaökö chömöledö. Abrahamma te'ada̧löda ite'ada̧linobe, 'du̧wekwachibökönö. Ja̧danö Diosma jweinöda yöbawö junö jö̧a̧linobetjö̧, Abraham, te'ada̧lo̧ma Dios yöbawö ujunina iyi̧ eminobe. Isabenö chömöledö, Abraham ite'ada̧linama ökwödönö i̧sebobe, Dios yöbawö junö jö̧a̧li̧danö isabenö badekwachakobe, jö̧ba̧lö.
Chömöledö, Dios, 'Yayi̧ balekwa yöbawö junö chiyakwo̧sa, jö̧ba̧lö, yöa̧linobetjö̧ döwaisachibobö jo̧be, Dios ajayinö yöbawö ujunina, iteda yöawi̧ Moisés iwȩyudinama ida̧ökö mikwawokobe, jö̧ba̧lö. Ja̧danö mikwawokobetjö̧, kamijido̧ damösado̧, kȩ'achajinado̧ lotji̧danö, Dios ajayinö yöbawö ujuninama söbebö loobö jo̧be. Chömöledö, ja̧ ajayinö yöbawö ujuninama lekwema jinökö. Juluwanö 'dö̧ibajina.
Ja̧danö Cristoma ¿tajawedö woinada, Dios 'yayi̧ balekwa yöbawö ujuni̧ma jamatö 'yo̧bö? Wanedö yötawaduwakwö chömöledö: Böjȩnö jojo bakwo̧ ösöja iwȩyudobe, ju'winö ö'wö baibaja̧ ikena u̧kwa itea emakwo̧ iminö wȩyudö, Biteda emakwo̧, jö̧ba̧lö. Ja̧danö, webö juno̧ma ina 'yaayi itea emakwo̧ma emokobe. Webö junö iwȩyudi̧ma mikwawokobe webö juno̧ ina 'yaa̧lobetjö̧. Jo̧bama ö'wö baibaja̧ ikenada webö ujunina jamatö 'yo̧be.
Chö̧ja̧wo̧dö, wene baledena tjo̧'wo̧ 'dibachibö, jwaikwöda, Diosnö tjo̧'wo̧ wana̧lö 'ya̧döma, Dios pjaatawö̧. Ja̧danö, jwaikwöda tji̧'yi̧ma tji̧sekwobe, Diosnöda do̧'wo̧ wana̧lö ja̧dösa, jö̧ba̧lö. Ja̧danö chö̧ja̧wo̧dö, jobadöma Dios yöbawö ujunina tjemakwedö, ba̧kwȩlö̧jatebö ja̧kwawama. Jau chö̧ja̧wo̧dö, Diosma yöbawö ujuninobe, Ötjönö ösödadönö ba̧kwȩlöjatebo ja̧kwawa chiyakwo̧sa, jö̧ba̧lö.
Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.
Isabenö babe usula kwemawaduwobö jo̧be chömöledö, ikenama ja'yubenö lekwajabetjö jejenö usula emawajadönö, Diosma ökwödö usula kwemawaduwaja̧tjö kwö̧bibajaduwinö otidö loakobe chömöledö. Jau chömöledö, Diosda, mikwa jwiinö otiwanö iyo̧da ökwödönö jwöinöbe, Cristokwö dötewanö ja̧nö, jo̧ba ba̧kwȩlö̧jatebö salöinö idejatobe ökwödö kwö̧jaduwobö, ja̧danö isabenö jo̧bakwö kwö̧jaduwakwedöja chömöledö. Ja̧danö chömöledö, ina böjȩnö kwö̧jaduwayi, Diosda 'diinö kwö̧jaduwobö pjaatakwo̧, ja̧danö pjolachibökönö kwö̧jaduwobö ujunakwo̧, ja̧danö kwujuluwaduwachibanö pjaatakwo̧ chömöledö.
Ja̧danö jejenö, böjȩnö ja̧nö Dioskwö dötewinö di̧'yi̧ma di̧sekwobe, Dioskwö ba̧kwȩlö̧jatebö ja̧dösa, jö̧ba̧lö. Chö̧ja̧wo̧dö, jejenö Diosma ökwödönö yöbawö ujuninobe, Ötjökwö ba̧kwȩlö̧jatebö kwö̧jaduwakobe, jö̧ba̧lö. Ja̧danö böjȩnö ja̧nö, Dioskwö dötewinö di̧'yi̧ma ja̧ Dios yöbawö ujunina i̧sekwö dö̧jobe, Ökwödöma isabenö Dioskwö ba̧kwȩlö̧jatebö ja̧dösa, jö̧ba̧lö.
Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja.
ကြော်ငြာတွေ