Hebreos 9:11 - Dios Iwene

^11-12 Ja̧danö chömöledö, Cristo ichenama, Diostjö jojodötjö ö'weje la'aka pjabato̧ baibanö jo̧ma, Dios ajayinö yöbawö junö weinama otidinokobe, böjȩnö ju̧kwadötjö ö'weje pjabatadö tjotidi̧danö. Cristo iyinama wainö ji̧na. Cristo, Diostjö jojodötjö ö'weje la'aka pjabato̧ baibanö jo̧ma itedada iyawö imidawinobe. Jejenö itedada iyawö midawö ökwödönö pjaatinobe, okobe jwiinö Dios otiwi̧ iyi̧tjö dujuna̧lobö. Cristoma woinobe dusula dumusidi̧ midawö, iteda ökwösobu ebawinö. Jemi ikenama mölejȩbekwö kabekwachajo̧ Dios eju okwa teachinobe, jojodö otikwökejunö, Dios mölejȩbe ejunöda. Chömöledö jejuma jwiinö mikwaweju, jojodö jo̧ba eju tjotidinejutjö o̧penönö mikwaweju. Ja̧danö, Cristoma Dios mölejȩbetjö ejunö tebachö, jwiinö inesösȩko̧, Dios ö̧jȩko̧kwö teachinobe. Ja̧danö, Cristoma bakwöta o̧bakwena, jelebabi jeleba böjȩnö Diostjö jojodötjö ö'weje la'aka pjabato̧ teachi̧danö teachinokobe. Cristoma bakwötanöda tebachö ba̧kwȩlö̧jatebö jojodö tjusula tjumusidi̧ imidawinobe. Ja̧danö, böjȩtjö Diostjö jojodötjö ö'weje la'aka pjabato̧ iyinadanö iyö teachinokobe Cristoma, pakaya itji̧, chiwo tjökwösobu iyö jojodö Diosnö tjumusidi̧ tjimidinadanö. Cristoma okwasȩko̧, jwiinö inesösȩko̧nö teachinobe, iteda ökwösobuda iyö, dö̧jibinö ba̧kwȩlö̧jatebö pjaatinobuma. Chömöledö, Cristo itedada iyawö, dusula dumusidi̧ imidawinawö̧ ökwödö Dios ömöledö babibinadöma isabenö Dios otiwi̧ iyi̧tjö demakwedösa.

Hebreos 9:11 ပူးပေါင်းရင်းမြစ်များ

Génesis 49:10

Ina yöbawijetö: —Isabenö yötawa, Judá: Ökwötjö tupadanö jojodöma ba̧kwȩlöjatebö la'aka luwedö webö tjuju̧kwakwedö. Jejenö webö tjö̧bakobe bakwo̧, inesö la'aka luwo̧ ichenanö kabatö. Jo̧ba inesö la'aka luwo̧ma okobe deinö jojodö tjuluwo̧ ö̧jakwo̧— yöbawijetö Jacobma itji̧ Judánöma.

Isaías 59:20

Baikwö yöawobe Isabenö Jo̧ma: Ja̧ möle tjö̧jibinö pjabato̧ma Sion mösa'obe ichibakwo̧, ja̧danö Jacob itji̧mu tupadanö jojodötjö, sulabenö ja̧bö tjö̧ji̧ kabatibö balewachadönö tjö̧jibinö pjaatakwo̧, jö̧ba̧lö yöawobe.

Mateo 11:3

—Juan ichakwo̧ yöawinökwema, ¿ökwödaji̧? ¿Jelo̧ tupakwö ichakwo̧nöda dite'ada̧lobö jo̧beji̧?— jö̧ba̧lö abebö tja̧ja̧kwinobe.

Mateo 2:6

Judea niji comunidad Belenma, ja'yuwemijayonö, ju'wi Judea niji comunidadteniatjö nijakwönönöma mikwawokobe Belenma, isabenö mikwawemi, jobetjö la'aka luwo̧ ichakobetjö̧, ja̧danö jo̧bama chömöledö Israel jojodönö ite'ada̧lakobe, jö̧ba̧lö iwȩyudinobe—.

Marcos 14:58

—Bite yöawi̧ma da̧ja̧kwijatö, baikwö: Dios ejuma, jojodö otikwejuma, 'dobö lobö jeleju, jojodö otikwökeju wa̧pötakwa möle baledenanö chotidakwo̧sa, jö̧ba̧lö yöawi̧ da̧ja̧kwijatö—jö̧ba̧lijadötö.

Juan 1:14

Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.

Juan 4:25

Ikenama, jobujuma jö̧ja̧linobe Jesúsnö: —Ötjöma chöwaisa, Dios weakobe dö̧jibinö otido̧nö, jö̧ba̧lö. Jo̧ba, Dios weakwo̧ma ichakobe. Jo̧bama Cristo, jö̧ba̧lö, ötjabökwe. Jo̧ba ichenama okobe jwiinö i̧sebakobe ökwödö döwaisachibanö— jö̧ja̧linobe.

Hechos 7:48

Jejenö baledijayonö, La'aka Luwo̧ Diosma jojodö tjotidinejunöma jö̧kö̧. Damötjö Dios iteda yöawi̧ yöbawo̧nö wanedö iwȩyudobö yöbawijetö, domukwatobö, Diosma jwiinö nöbo̧, jwinö juluwo̧, jö̧ba̧lö.

2 Corintios 4:18

Jau chömöledö, böjȩnö baledi̧ jawa edö omukwatöködösa, dedi̧ jawama chömöledö, ökwödöma dedökö ji̧ jawada omukwatadösa. Jau chömöledö, babe dedi̧ jawama, lekwema jö̧kö̧ ji̧, ja̧danö juluwanö 'dö̧ibakobe, jo̧kwaijayonö dedökö ji̧ jawama ba̧kwȩlö̧jatebö ja̧kobe chömöledö, ja̧danö la'akatjöda 'dö̧ibökakobe. Jo̧kwajabetjö̧, böjȩnö ja̧nö usula demawijayonö, do̧'wo̧ tjo̧bekwöma kadatibokobe chömöledö, isabenö tupakwö otiwakobe jö̧ba̧lö.

2 Corintios 5:1

Jau chömöledö, döwaisa, babe diteba'oma lekwe jö̧kö'o, baikwö wanedö yötawa: Babe diteba'oma, sule löwötedanö ichejekwa, jo̧kwaijayonö ja̧'o woenama, balekwa'o ba̧kwȩlö̧jatebö ja̧kwa'o dujuna̧lakwedösa ökwödö Jesúsnö ösödadöma. Ja̧danö ja'oma, Diosda otidö iyakwa'o, chömöledö, ja̧danö jojodö tjotidöte löwötedanö ichejekwökakobe, Diosda inesö otiweju otidinejudanö ichejekwakwa'o chömöledö.

Colosenses 2:11

Ja̧danö, Cristonö dötewadö kwö̧jaduwobetjö̧, isabenö 'wibekwadöja chömöledö. Ja̧ 'wiekwa yöta̧li̧ma, wame jojodö tjötade bajalesado̧ 'witjekwi̧ma yöta̧lökö chömöledö, ju'wi tjo̧'wo̧ luwo̧ jawa 'wiekwada yötawa, Cristo ja̧i̧da. Cristoma ajayi sulabenö kwösödinaduwa 'wibebö loinobe ichejekwa, ja̧ ujulutjö kwö̧jibaduwinö ja̧bö, jo̧kwajabetjö̧ isabenö 'wibekwadöja chömöledö.

Hebreos 10:1

Isabenö chömöledö, böjȩtjö Diostjö jojodötjö ö'weje la'aka pjabato̧ iyi̧, ba̧kwöta o̧bakwena Dios wei̧ Moisés iwȩyudina a̧ja̧kwö iyi̧ma la'akatjöda pjaatinokobe jojodönö ba̧kwȩlö̧jatebö suli̧tjö dichawedö tjichibobö Dioskwö. Wanedö yötawaduwakwö chömöledö, jojodö tjo̧'wo̧ jawanö wanedöma: Jojo o̧'wo̧ jawama jojobö̧kö̧, ¿jö̧tö? Jojo ö̧ji̧ i̧sebijayonö o̧'wo̧ jawada jo̧be. Inesö jojobö̧kö̧. Chömöledö jejenö, jojo o̧'wo̧ jawama inesö jojobö̧kö̧ ji̧danö, jojodö Diosnö ajayinö tjiyinama inesö iyawa ji̧nökö. Ja̧ tjiyinama wanedöda wanekwachinobe ju'winö Diosnö iyakwa̧. Ja̧ ju'winö iyakwa̧ wanekwachinama Cristoda iyakwa̧. Isabenö chömöledö, Cristo iteda bakwötanöda iyawö dumusidi̧ imidawinobe ba̧kwȩlö̧jatebö ji̧nö, ökwödö, dusuli̧ma söbebö lobö.

Hebreos 12:27

Chömöledö, ja̧ yöbawö ujuninama baikwö wanekwachobe: Böjȩnö ju̧kwi̧bi, mölejȩnö ju̧kwi̧bi, Dios otidinama, ju'winö jwiakobe. Ja̧ ju̧kwi̧ma ba̧kwȩlö̧jatebö ji̧ jawaokobetjö̧ söbebö loakobe, jwiinö baibanö. Ba̧kwȩlö̧jatebö ji̧ jawada ji̧bakobe, Dioskwö, iteda ba̧kwȩlö̧jatebö webö ö̧jobema. Ja̧danö chömöledö, jobekwö, Dios ba̧kwȩlö̧jatebö webö ö̧jobekwöda dichibakwedösa. Isabenö jobema, böjȩnö dö̧jeminötjö o̧penönö otiwemima.

Hebreos 13:14

Isabenö chömöledö, böjȩnö ja̧nö usula emawö ja̧dösa Jesúsnö dösödobetjö̧. Yayonö jwaikwöda tupakwö di̧'yaduwo jo̧bakwö, Böjȩma ba̧kwȩlö̧jatebö ji̧ ditebomaökö, jö̧ba̧lö, döwaisobetjö̧. Jesúsma ökwödö dusula dumusidi̧ itedada imidawinobetjö̧ ba̧kwȩlö̧jatebö dö̧jakwedösa ba̧kwȩlö̧jatebö ji̧ ditebobema. Döwaisa, böjȩma ju'winö 'dö̧ibajakobe. Jo̧kwaijayonö ökwödöma dite'ada̧lobe ba̧kwȩlö̧jatebö ji̧ diteboma, la'akatjöda 'dö̧ibajökemima. Jo̧kwaobetjö̧ chömöledö, böjȩnö ja̧nö Jesús, dumusidi̧ midawö iyawinanöda kwo̧'wo̧duwi wana̧lö kwi̧'yaduwo.

Hebreos 2:17

Jo̧kwaobetjö̧ Dios Itji̧ma ökwödö jojodönö pjaatobö jojo babiböda öbötjachinobe. Ángelso̧danö baibinokobe Dios Itji̧ma. Jojoda baibinobe. Jojodanö bakwainö babibö öbötjachinobe. Chömöledö ju'wima jwiinobe Jesús jojodönö pjaatoböma. Jojo babiböda dö̧jibinö pjaatinobe. Ja̧danö, chömöledö Dios Itji̧ma jojoda baibinobetjö̧ Diostjö jojodötjö ö'weje la'aka pjabato̧ baibanö jo̧. Ja̧danö chömöledö, döwaisa. Böjȩtjö Diostjö jojodötjö ö'weje pjabatadöma jojodö Diosnö tjiyi̧ iyadö, tjumusidi̧ midö. Jejenö jobadö Diostjö jojodötjö ö'weje pjabatadö jojodönö tjite'ada̧li̧danö Dios Itji̧, Diostjö jojodötjö ö'weje la'aka pjabato̧ baibanö jo̧ma jojodönö ite'ada̧lobe. Ja̧danö, Dios Itji̧ma jojodaobetjö̧ jojodönö baledi̧ma jo̧banöbi baledinobe. Jejenö baledobetjö̧ Dios Itji̧ma jojodönö baledi̧ öwaisachibinobe. Ja̧danö, jojodönö baledi̧ öwaisobetjö̧ Dios Itji̧ma, Diostjö jojodötjö ö'weje la'aka pjabato̧ jo̧ babibajo̧ma lȩlö̧jino edö jwaikwöda Dios wei̧ a̧ja̧kwö pjaatinobe jojodönöma. Ja̧danö, jo̧ba Dios Itji̧ma, ökwösobu ebawinö itedada iyawinobe. Ja̧danö, itedada iyawö dumusidi̧ midawö woinobe, Diosma ökwödö dusuli̧ söbebö loobö.

Hebreos 3:1

Isabenö, Jesúsma jwaikwöda i̧'yinobe Dios wei̧ a̧ja̧kwö. Jo̧kwaobetjö̧ chö̧ja̧wo̧dö, ökwödönö, Dios mölejȩbe kwö̧jaduwobö 'da̧batö ujuninawö̧nöma yötawaduwakwö. Dios Itji̧ Jesúsnö omukwata̧lö kwö̧jaduwo. Omukwataduwi. Jo̧ba Jesús yödawökweda, Bitema dö̧jibinö pjabato̧, jö̧ba̧lö. Chömöledö, Jesús, Dios yöawi̧ yöawobö weinökwema Diostjö jojodötjö ö'weje la'aka pjabato̧ baibanö jo̧. Jo̧banö omukwata̧lö kwö̧jaduwo chömöledö.

Hebreos 4:15

Ja̧danö Jesús, Diostjö jojodötjö ö'weje la'aka pjabato̧ baibanö jo̧ma, jojodö tjime'dawi̧ baledi̧ma waiso̧. Ja̧danö jo̧banöbi, böjȩnö ö̧jena ime'dawinö baledijayonö la'akatjöda sulabenö ja̧inokobe. Chömöledö, Jesúsma jojodö tjime'dawi̧ma öwaisobetjö̧ ökwödönö pjaatobö waiso̧. Jejenö Jesúsda ökwödönö lȩlö̧jino edö Diostjö jojodötjö ö'weje la'aka pjabato̧ baibanö jo̧ma.

Hebreos 7:1

Chömöledö, Melquisedec, bi'yenö yötawökwenö jemi tupakwö yötawaduwakwö. Jo̧bama Salém jojodö tjuluwo̧ bi̧na. Ja̧danö, Melquisedecma böjȩbi mölejȩbi La'aka Dios kabebö ujuninökwe, Diostjö jojodötjö ö'weje pjabato̧ baibanö. Ja̧danö döwaisa, ökwödö diwenenö Melquisedec, jö̧ba̧lö, Jojodö tjuluwo̧, jweinö omukwatö jo̧, jö̧ba̧lö, wanekwachobe. Ja̧danö, jo̧ba Melquisedecma Salém jojodö tjuluwo̧. Jejenö, Salém jojodö tjuluwo̧, jö̧ba̧lö, diwenenö, Jojodönö ösödö webo̧, jö̧ba̧lö, wanekwachobe. Ja̧danö, ju'wibi yötawaduwakwö. Melquisedecma ojo'dobi abe'dobi debina. A'dödöbi debina. Jo̧bama emöbi jemökökwe. Ja̧danö, la'akatjöda wobinö̧kö̧. Isabenö, Melquisedecma Dios Itji̧danö ba̧kwȩlö̧jatebö Diostjö jojodötjö ö'weje pjabato̧. Ja̧danö, Melquisedec da'dömine Abrahamnö damötjö öbadekwajina yötawaduwakwö. Damötjö Melquisedecma Abrahamnö öbadekwajinobe, öpöjojodö la'aka luwedönö 'böbabikwawö lobö ȩwa̧jo̧nö. Ja̧danö Melquisedecma, Abrahamnö badekwajö yöawinobe, Diosma ökwönö otiwanö pjaatakobe, jö̧ba̧lö. Ja̧danö, Abrahamma Melquisedecnö iyinobe öpöjojodötjö emaja̧, domulataja jawa o'wotjö bakwa'wo.

1 Juan 5:20

Ja̧danö chö̧ja̧wo̧dö, ju'wi jawabi döwaisa, biya̧: Dios Itji̧ Jesucristoma böjȩnö ichinobe Isabenö Jo̧ Diosnö döwaisachibanö yöbawö. Ja̧danö, babema Dioskwöbi Itji̧ Jesucristokwöbi bakobe dötewinö 'ya̧dösa. Chö̧ja̧wo̧dö, Jesucristoma isabenö jo̧ Diosda. Ja̧danö, jo̧ba Jesucristoma ökwödönö pjaatinobe, do̧'wo̧ luwo̧nö ba̧kwȩlö̧jatebö dö̧jobö.

2 Juan 1:7

Ja̧danö chö̧ja̧wo̧dö, ba̧jekwadö tjö̧jobe ökwödötjö labebö kwebachadö, ökwödönö jelobekwö kwomukwataduwobö ötjibotö jö̧ba̧lö yöbawadöma. Jobadöma omöna yöbawadö, Jesúsma Dios weinökwemaökö, jö̧ba̧lö. Ja̧danö, Jesúsma jojo babibinö̧kö̧, jö̧ba̧lö, omöna yöbawadö. Ja̧danö, Jojodö tjö̧jibinö pjabatö̧kö̧, jö̧ba̧lö, yelösöda omöna yöbawadö. Jejenö yöbawadöma jojodönö jelobekwö tjomukwatobö ötjibotö jö̧ba̧lö yötjawobe. Jobadöma jelo̧ jojo, Cristo öpöjojo ötjabökwe omöna yöawi̧danö omöna yöbawadö.