Hebreos 7:25 - Dios Iwene

²⁵ Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

Hebreos 7:25 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 22:17

Jobadöma Diosnö öpöjödö, –Da̧ja̧kwobö döpöjöda, dö̧jelö labebi, –jö̧tja̧linobe. Jobadöma Okobe Jwiinö Juluwo̧ Diosnö tjomukwatinobe, –Da̧ja̧kwököjayonö, ökwödönö lȩeboböma jwibo̧, –jö̧ba̧lö.

Diosnö ösödo̧ Job mikwo̧ usula emawina jawa 23:3

—Ötjöwe! Dios ö̧jemi chöwaisitjö̧ma, ja̧danö jo̧ba öba a'o chichibobö ji̧tjö̧ma, otiwo jö̧a̧lena, baikwö yöta̧la:

Isaías 45:22

Jau, ötjöda Diosbo̧ma, jo̧kwajabetjö̧ sulabenö kwomukwataduwi̧ kabatibö, balewachö ötjönö kwösödaduwo, ökwödönöbi kwö̧jibaduwinö pjatatakobetjö̧. Jau, okobe deinö bö̧jȩnö ju̧kwadö, bö̧jȩ bakwachö̧je ju̧kwadöbi ötjönö kwödösaduwo, ötjöda Diosbo̧chobetjö̧, ja̧danö jelo̧ diosbo̧ma deobetjö̧.

Isaías 53:12

Jo̧kwajabetjö̧ ba̧jȩkwadönö jo̧banö chiyakwo̧sa, ömöayedö batjibanö. Ja̧danö juluwajo̧, inesö juluwadönö emakwo̧, iteda ömöayedö batjibanö. Jobekwö chiyocha chömöayo̧nö, öpöjödökönö, jo̧banö kwabö lotjobö iyawinobetjö̧. Jo̧banö tjomukwatinobe, —Bitebi Dios wei̧ a̧ja̧kwöködötjö bakwo̧, —jö̧ba̧lö, jo̧kwaijayonö jo̧bama ba̧jȩkwadö tjusula emawinobe, ja̧danö weti̧ a̧ja̧kwöködönö pjabatö aebinobe, jobadö tjö̧jibobö, jö̧ba̧lö yöa̧lobe Diosma, iteda ömöayo̧nö.

Isaías 59:16

Ökwödönö edö, —Tajawedö jojodö sulabenö ja̧tjawö̧nö pjabato̧ deobejö? Tajawedö bakwo̧bi tjö̧'da̧de jamatö, sulabenö ja̧tji̧ katjatibobö weokobejö? Bakobe sulabedö israel jojodöma, —jö̧ba̧lö öpöjödö edajabe. Jo̧kwajabetjö̧ jelo̧ pjabato̧ deiökwe, Diosda dö̧jibinö pjaatakwo̧. Bakwainö otiwanö ja̧bö jo̧ ö̧jobetjö̧, iteda ujulu i̧sȩbö dö̧jibinö pjaatakwo̧.

Isaías 63:1

—Ayö, ite Edom nijitjö icho̧, Edom niji comunidad Bosratjö, ökamijido̧ duwa̧do̧ 'dubawo̧ma, tida? Jo̧ba baikwö icho̧ma, inesö la'aka luwo̧ 'duawajiadanö 'dubawö, inesö ujulunö kwebacho̧ma, tida? —jö̧ba̧lö abebö cha̧jakwökwe, icho̧ma baikwö atado̧: —Ötjöma kwö̧jibaduwinö pjatatobö juluwo̧ Diossa, chujulunö kwö̧jibaduwinö pjatataja̧ wene yöbawö icho̧sa, —jö̧ba̧lö.

Daniel 3:15

Isabenö jejenö kwöpöjödaduwatjö̧ma, bakwötanö ina lȩlö̧jinö chedena, yemidanö kwösödaduwobö chite'ada̧lena. Jo̧kwajabetjö̧ yemidanö lo̧awa jawa ökwöi̧ kwa̧ja̧kwaduwenama, nijakwö bȩbachibö kwösödaduwo, ja̧danö jejenö kwösödaduwitjö̧ma, wene jwiena. Jo̧kwaijayonö kwösödaduwökötjö̧ma juluwanö ökwödönö ökwöla jwiinö tubola 'dii jawa otikwolanö ikwö lotakwawö̧ja. Ja̧danö jejenö ikwö lotitjö̧ma, ¿tida ökwödönö pjaatakwo̧ma? ¡Deakobe! Diosbedötjöbi bakwo̧bi deakobe, kwö̧jibaduwinö pjaatobö juluwo̧ma —jö̧ba̧lö yöawinobe Nabucodonosorma.

Daniel 3:17

Yöka̧lajadanö ökwödönö ökwölanö ikwö loköbitjö̧ma, Duluwo̧ma, wei̧ a̧ja̧kwö dösödökwe Diosma isabenö juluwo̧, okwöla jwiinö tubinö ubolatjö dö̧jibanö pjaatobö. Ja̧danö duluwo̧ Nabucodonosor, dedemi Diosma isabenö kwujulutjö dö̧jibinö pjaatakwo̧.

Daniel 3:29

Jo̧kwajabetjö̧ babema 'yayi̧ weawa wetobe baikwö: Bakwo̧bi bidö tjuluwo̧ Diosnö sulabenö yöa̧lobö jwiobe, okobe deinö chömöayedötjö tjitebotenia jojodöbi, bakwosokwena jojodöbi, wainökwena yöba̧ladöbi, otiwanö yötja̧lobö jo̧be bidö Sadracbi Mesacbi Abednegobi tjösödökwe Diosnö. Ja̧danö bakwo̧ jo̧banö sulabenö yöa̧litjöma, jo̧banö bulabinö lotjakwo̧, ja̧danö ejuma jwiinö pjolö lotjakweju, inasoda baibanö. Isabenö tjuluwo̧ Diosdanöbo̧ma deobe, jo̧ba pjaataja̧danö ömöayedönö tjö̧jibinö pjabato̧ma deobe— jö̧ba̧lö yöa̧linobe Nabucodonosorma.

Daniel 6:20

Yöne ichibö, o̧'wo̧ tjo̧achö jwöinobe: —Yabalo̧ Dios ömöayo̧ Daniel, ¿ba̧kwȩlö̧jatebö wei̧ a̧ja̧kwö kwösödökwe Diosma, didibatjö kwö̧jibinö pjaatobö ujuluwaji̧?— jö̧ba̧lö.

Daniel 9:16

Chuluwo̧ Dios, Jerusalén comunidadma ökwöda kwitebo comunidad, ja̧danö ökwö kwejuma, Jerusalén mösa'onöda jȩju. Ja̧danö, ökwödö da'dödöbi, ökwödöbi sulabenö ja̧dobetjö̧, okobe deinö tjitebokwena dipjeanö ju̧kwadöma sulabenö tjomukwatobe Jerusalén comunidad, jwiinö Dios öpöjödö lȩebinemi jö̧ba̧lö. Ja̧danö kwömöledö Israel jojodönö sulabenö tjomukwatobe, Dios öpöjödö lȩebawö̧ jö̧ba̧lö. Jo̧kwajabetjö̧ baikwö atebakwö chuluwo̧, isabenö ba̧kwȩlö̧jatebö otiwanö ja̧bo̧ja chuluwo̧, jo̧kwajabetjö̧ Jerusalénnö ju̧kwadönö kwödameakwaja̧ kakatibobö atebakwö, ja̧danö tupakwö lȩbebökönö lȩlöinö kwedobö atebakwö, dipjeanö ju̧kwadöma ökwöda kwitebo Jerusalén comunidad otiwanö tjomukwatakobetjö̧.

Juan 14:13

Ja̧danö, ökwödö okobe jwiinö ötjönö akebaduwi̧ chiyakwo̧sa, ötjö chiminö akebaduwi̧ma. Jejenö chiyakwo̧sa, jojodöma, ötjö chiyi̧ edö Chabe'do Diosnö tjösödobö.

Juan 14:16

Ja̧danö, ökwödö ötjönö ösödadönöma, Chabe'donö atebocha jelo̧ Pjabato̧nö weobö, ötjö chȩwa̧jabe okobe balekwo̧nö. Jo̧ba pjabato̧ma ökwödökwö ba̧kwȩlö̧jatebö ö̧jakwo̧.

Juan 14:6

—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Romanos 5:10

Weökakobe chömöledö. Baikwö yötawa: Dios öpöjojodö dö̧jayi, Dios i̧tji̧ma midawö woinobe, Dios ömöledö badibanö ja̧bö, ¿jö̧tö? Jau chömöledö, Jesúsma ökwödö sulabedönö, jo̧banö öpöjödadönö pjaatinobe. Ja̧danö, jejenö jo̧banö öpöjödadönö pjaatinobema, ¿iteda ömöledönö pjaatökenaji̧? Babema woina tupakwö, woawatjö yemidanö tjeachajinobema, ¿pjaatökenaji̧? Pjaatena chömöledö. Jemi tupakwöda pjabato̧ chömöledö iteda ömöledönöma, Dios lȩebakwa̧tjö ja'yubebi demapji jö̧ba̧lö.

Romanos 5:2

Ja̧danö, ju'wibi chömöledö. Jesúsda dö̧jibinö pjabato̧, jö̧ba̧lö dösödiökwe, Diosma mikwa jwiinö otiwa jawa iyinobe ökwödönöma. Ja̧danö, do̧'wo̧ ösöwanö dö̧jobe, isabenö Dios dewinö idejatena duju̧kwakwedösa jö̧ba̧lö. Ja̧bi Cristoda ja̧ina chömöledö.

Romanos 8:34

Ja̧danö, ¿bakwo̧bi ö̧jobeji̧, ökwödönö, Bidöma Dios lȩebakwawö̧, jö̧ba̧lö yöawakwo̧ma? ¿Cristo Jesúsda jejenö yöawenaji̧? Yöbawö̧kö̧ chömöledö, Cristoda midawö woinobe, ökwödö dö̧jibobö. Ja̧danö, midawö wobajo̧, woawatjö tjeachajinobe. Ja̧danö, tjebachajo̧, babema Abe'do Dios öwaisobekwöchobe jo̧ jo̧bama. Ja̧danö, öwaisobekwöchobe ja̧nö, Bidönö ötjönö ösödadönö lȩkeba, jö̧ba̧lö webo̧ chömöledö.

1 Corintios 1:21

Jau chömöledö, Diosma iteda waisanö omukwati̧ma i̧sebobe, baikwö yötawa. Böjȩ jojodö idöda waisanö tjomukwati̧ omukwatö Diosnö tjöwaisachibinokobe, ¿jö̧tö? Ja̧danö, böjȩ jojodö tjedemi, yödawi̧ wene Jesús midawö woina wenema waisakwawa jwii̧ wene jo̧be, ¿jö̧tö? Jo̧kwaijayonö Diosma waisanö omukwatö, ja̧ Jesús midawö woina wene ösödadönöda dö̧jibinö ja̧bo̧ chömöledö.

Efesios 2:18

Chömöledö, Jesúsma midawö woinobetjö̧, ökwödö judío jojodönöbi ökwödö judío jojodöböködönöbi, Dios O̧'wo̧ Luwo̧ma, bakwo̧da tebachibö öjamatinawö̧sa. Ja̧danö, bakwo̧da tebachibö öjamatinawö̧dobetjö̧ ökwödöma okobe deinö Dabe'do Diosnö abebadösa.

Efesios 3:12

Chömöledö ökwödöma Cristo Jesúsnö dösödobetjö̧ Dios ö̧jobekwö yebabökönö tebachibö abebadösa, Diosma ökwödö adebi̧ma isabenö a̧ja̧kwo̧, jö̧ba̧lö.

Efesios 3:20

Jo̧kwaobetjö̧ chömöledö, jo̧banö dösödaduwo, Diosma jwiinö otiwo̧, jö̧ba̧lö. Jo̧bama do̧'wo̧ luwo̧nö ö̧jobe, iteda ujulunö pjabatö ökwödönö. Jo̧banö adebenama pjabato̧, iteda ujulunö. Ja̧danö, Diosma otiwanö tupakwö pjaatobe. Ökwödö omukwatö adebi̧tjö bajalekwönönö otiwanö tupakwö pjaatobe.

Filipenses 3:21

Jo̧ba ichenama, diteba'o böjȩ jawasa'o balewachinö ja̧akobe chömöledö, iteda iteba'o otiwa'o juluwa'odanö ökwödöbi dujuna̧lakobetjö̧. Jau chömöledö, Duluwo̧ Jesucristoma okobe jwiinö juluwo̧, okobe deinöbi okobe jwiinöbi ujuluwo jö̧ba̧lö, ja̧danö ja̧ iteda ujulunö, döbalewachinö ja̧akwo̧.

1 Timoteo 2:5

Jau, Diosma bakwo̧da, jelo̧ma deobe, ¿jö̧tö? Ja̧danö Diostjö jojodötjö ö'weje pjabato̧ma bakwo̧da, jojo babibina Cristo Jesúsda.

2 Timoteo 1:12

Ja̧danö, jejenö ötjönö 'dabatö ujuninobetjö̧, babema ka̧lena chö̧bobe Timoteo. Jo̧kwaijayonö, ka̧lena chö̧bijayonö, ja̧ wenetjö chötabakwökö, cho̧'wo̧ chöwana̧lökwenö chöwaisobetjö̧. Jau Timoteo, cho̧'wo̧ chöwana̧lökwenö chöwaisa, Isabenö juluwo̧ cho̧'wo̧ luwo̧nö ite'ada̧lobö, jö̧ba̧lö, yemidanö ichakwa̧ möle baibenanö kabatö.

Hebreos 11:6

Jo̧kwaijayonö Diosma ja'yubebi o̧'wo̧ ösöwanö edokobe jo̧banö tjo̧'wo̧ wana̧löködönöma. Chömöledö, Diosnö tjo̧'wo̧ wana̧lö tjö̧ji̧da, Enoc ö̧jinadanö, Dios iteda o̧'wo̧ ösöwanö edi̧ma. Jo̧kwaobetjö̧, Diosnö ichibo jö̧ba̧lo̧ma Diosnö ösödobö jo̧be, Isabenö Diosma jo̧, jö̧ba̧lö. Ja̧danö, Diosnö ichibo jö̧ba̧lo̧ma Diosnö ösödobö jo̧be, Diosma otiwa jawa iyakwo̧ itenöda ösödö ichibobö isakwo̧nöma, jö̧ba̧lö.

Hebreos 13:15

Ja̧danö chömöledö, ju'wi Diosnö iyö dumusidi̧ midawama jwiobe. Jesús iteda iyawinada jo̧be. Jejenö ji̧jayonö babe mölema ökwödöma Diosnö diyi̧danö juna̧ladösa, Jesús imidawinobetjö̧. Ja̧danö ¿tajida babe Diosnö diyi̧ma? Biya̧ chömöledö: Babe böjȩnö ja̧nö, Diosnö diyi̧ma jo̧banö ba̧kwȩlö̧jatebö abebö, ösödö, Dios ökwöma jwiinö otiwo̧ja, jwiinö pjabato̧ja, jö̧ba̧lö, dö̧ji̧.

Hebreos 2:18

Isabenö chömöledö, Dios Itji̧ jojo baibanö öbötjachinobetjö̧ ökwödönö okobe jwiinö waisö pjaatobe. Ökwödönö lȩlö̧jino edö, Dios wei̧ okobe jwiinö a̧ja̧kwö dö̧jibinö pjaatinobe. Ja̧danö, dö̧jibinö pjaati̧damaökö chömöledö. Böjȩnö ja̧nö usula demawena jo̧bama ökwödönö pjabato̧ jelobekwö omukwatö, Dios yöawi̧ öpöjödö di̧'yapji jö̧ba̧lö. Yelösöda Dios Itji̧ma jwiinö waiso̧, usula demawena jelobekwö omukwatö di̧'yobö domukwati̧ma. Isabenö waiso̧ jo̧banöbi jejenö baledinobetjö̧. Jo̧bama böjȩnö ja̧nö usula emawinobe. Ja̧danö, usula emawobetjö̧ jo̧babi omukwatinobe, Jelobekwö omukwatö chi̧'yo, jö̧ba̧lö, usula emawökönö. Jo̧kwaijayonö jelobekwö omukwatö i̧'yinokobe. Dios Itji̧ma jwaikwöda jemi tupakwö i̧'yinobe, Dios wei̧ a̧ja̧kwö. Chömöledö, jejenö jo̧banö baledinobetjö̧ Dios Itji̧ma ökwödö jojodö usula emawö domukwati̧ öwaisobe. Ja̧danö, jejenö öwaisobetjö̧ jo̧bama ökwödönö jwiinö pjabato̧ jemi tupakwö jwaikwöda Dioskwö di̧'yobö.

Hebreos 2:9

Jo̧kwaijayonö döwaisa, Ida̧ökö bakwo̧ inesö jo̧ ö̧jobe, jö̧ba̧lö, Jesúsda, Dios Itji̧. Ja̧danö, Diosma jo̧banö weinobe böjȩkwö jojo baibanö öbötjachobö. Jejenö Jesúsma böjȩnö ja'yubeda lekwe ö̧jinobe, ángelesdönötjö ja'yubeda baikwönöda ja̧nö, jojodö tjö̧ji̧danö. Isabenö chömöledö, Dios ökwödö jojodönö lȩlö̧jino edobetjö̧ iteda Itji̧ Jesúsnö weinobe usula emawobö, dumusidi̧ midawö. Jejenö Jesúsma jojodö tjowobalema balekwo̧da woinobe, jojodö tjo̧'wo̧ luwo̧nö wotjokobö. Ja̧danö, Jesús usula emawö midawö ö'wö baibiökwe Diosma jo̧banö edinobe, Bitema jwiinö otiwo̧, ötjö chö̧bemi chöwaisobekwöchobe inesö ö̧bena öbamatakwo̧, jö̧ba̧lö. Isabenö chömöledö, ökwödö jojodö böjȩnö inesö jojodöböködö dö̧jijayonö do̧'wo̧ luwo̧ okwanö döwaisa bakwo̧nö, jwiinö inesö jo̧nöma. Jo̧bama Jesúsda, midawö wobinama. Isabenö, jo̧bama inesö la'aka luwo̧.

Hebreos 5:7

Ja̧danö, Jesúsma, böjȩnö jojo babibö bötjachajo̧ma yelösöda usula emawinobe. Ja̧danö Diosnö, woawatjö ö̧jibinö juluwo̧ Diosnöma budekwabinö aebinobe woawatjö ö̧jibinö pjaatobö. Jo̧kwaijayonö Diosma, ö̧jibinö pjabatökönö weinobe usula emawö woobö. Chömöledö ¿Diosma a̧ja̧kwinököji̧ iteda Itji̧ ubudekwi̧ma? Isabenö a̧ja̧kwinobe, Jesúsma Diosnö yebabinö edö jo̧ba wei̧ a̧ja̧kwöda ö̧jinobetjö̧.

Hebreos 7:16

Isabenö chömöledö, Dios wei̧ Moisés iwȩyudinama weinokobe Jesúsnö, Diostjö jojodötjö ö'weje la'aka pjabato̧ baiboböma. Jo̧bama Levítjö tupadanö jojobö̧kö̧obetjö̧ weinokobe. Jesús ö'weje la'aka pjabato̧ baibanöma jejenöma ji̧nokobe. Jesúsma, Melquisedec mikwo̧ ba̧kwȩlö̧jatebö ö̧ji̧danö, iteda ba̧kwȩlö̧jatebö ö̧ji̧ ujulunöda Diostjö jojodötjö ö'weje la'aka pjabato̧ baibinobe.

Hebreos 7:19

Isabenö chömöledö, Dios ajayinö wei̧, Dios wei̧ Moisés iwȩyudinama, jojodönö pjaatokobe Dioskwö suli̧ okobe jwiinö jwibadödanö tjichibobö. Jo̧kwaobetjö̧ Diosma yöbawö ujuninobe ju'wi wene, jwiinö mikwawi̧ wene, ajayinö weinatjö o̧penönö mikwawi̧ wenema. Ja̧ balekwa yöbawö ujuninatjö Diosma yöawobe, Tjo̧wi̧, jojodö ötjökwö suli̧ okobe jwiinö jwibadödanö tjichibobö jo̧be, jö̧ba̧lö. Isabenö chömöledö, Dios balekwa yöbawö ujuni̧ma ajayinö yöbawö ujuninatjö o̧penönö mikwawi̧, ökwödönö okobe jwiinö pjabatö.

Hebreos 7:8

Ja̧danö chömöledö, ju'wibi yötawaduwakwö. Melquisedecma isabenö inesö ji̧na, Levítjö tupadanö jojodönötjöbi o̧penönö ji̧na. Jobadö Levítjö tupadanö jojodö, tjömöledö tjiyi̧ eminadöma woba jojodöbinadö. Jo̧kwaijayonö Dios iwenetjö Melquisedecnö yöawobe edö döwaisobe, Melquisedecma la'akatjöda wobinö̧kö̧, jö̧ba̧lö. Jo̧bama Levítjö tupadanö jojodanöbö̧kö̧. Wainö ji̧na. Jo̧ba Melquisedecma jwiinö inesö ji̧na.

Hebreos 9:24

Chömöledö, Cristoma böjȩtjö jojodö tjotidinejutjö jwiinö inesösȩko̧nö teachinokobe. Jo̧bama teachinokobe wanekwachejunö, Dios mölejȩbe inesö ejunö wanekwachejunöma. Cristoma, Dios mölejȩbe inesö ejunöda teachinobe, ökwödönö pjaatobö. Ja̧danö, Dios mölejȩbe inesö eju tebachinama, Dios öba a'o ja̧nö Diosnö aebobe ökwödönöma.

Judas 1:24

Okobe deinö Diosnö dösödaduwo chömöledö, jo̧bada meköbaduwapji jö̧ba̧lö pjabato̧ma, ja̧danö jo̧bada iteda inesö dewinö salöinö öba a'o wene jwiinö kwö̧jaduwobö pjabato̧ma, kwo̧'wo̧duwi jwiinö ösödachibanö.