Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.
Hebreos 7:19 - Dios Iwene19 Isabenö chömöledö, Dios ajayinö wei̧, Dios wei̧ Moisés iwȩyudinama, jojodönö pjaatokobe Dioskwö suli̧ okobe jwiinö jwibadödanö tjichibobö. Jo̧kwaobetjö̧ Diosma yöbawö ujuninobe ju'wi wene, jwiinö mikwawi̧ wene, ajayinö weinatjö o̧penönö mikwawi̧ wenema. Ja̧ balekwa yöbawö ujuninatjö Diosma yöawobe, Tjo̧wi̧, jojodö ötjökwö suli̧ okobe jwiinö jwibadödanö tjichibobö jo̧be, jö̧ba̧lö. Isabenö chömöledö, Dios balekwa yöbawö ujuni̧ma ajayinö yöbawö ujuninatjö o̧penönö mikwawi̧, ökwödönö okobe jwiinö pjabatö. အခန်းကိုကြည့်ပါ။ |
Hebreos 7:19
29 ပူးပေါင်းရင်းမြစ်များ
Ina yöbawijetö: —¿Dakwö kwomukwataduwa chömöledö? ¿Moisés wȩyudö weina ja̧awa jojodö tjusuli̧ söbebö loi̧ma jo̧beji̧? Ja̧maökö chömöledö. Söbebö loökö. Wanedö yötawa: Moisés wȩyudö weina ja̧bö ju̧kwadöma ka̧lena ba̧kwaweju okwa ba̧jadödanö, ka̧lenasiju yö̧tjebawö̧danö ju̧kwadö. Jobadö tjö̧jibinö pjaatoböma jwiobe. Moisés wȩyudö weina ja̧tji̧ma tjö̧jibinö pjaatökö chömöledö. Tjusuli̧ söbebö loökö jejenöma. Ja̧danö, Diosma Moisés wȩyudö weina ja̧badönö yöawokobe, Bidöma suli̧ jwibadö batjibajabe, jö̧ba̧lö, Moisés wȩyudö weina tja̧ja̧kwobetjö̧. Jobadöma ju'wi möle Dios lȩebenama Dios lȩebi̧tjö tjemakwedö. Jo̧kwaijayonö, jejenömaökö Jesúsnö ösödadönöma. Jobadöma ka̧lena ba̧kwawejutjö tjö̧jibanö latjebawö̧danö ju̧kwadö chömöledö. Jobadöma, tjusuli̧ söbebö loinawö̧, ida̧ökö suli̧ jwibadö babibinadö. Jobadöma Dios lȩebi̧ma tjemökakwedö, ja̧ lȩebi̧tjö tjemakwa̧ tjö̧jibinö pjaatinawö̧ma— yöbawijetö Pabloma—.
Jau chömöledö, Moisés iwȩyudinama, ka̧lenadanö jo̧be. Ja̧danö ¿sulobeji̧ Moisés iwȩyudinama? Sulokobe chömöledö. Jo̧kwaijayonö, sulököjayonö, Moisés iwȩyudina cha̧ja̧kwenama, chusuli̧ chöwaisachibinobe chömöledö. Wanedö yötawa: Ajayinöma, ju'wedö tjitea ösödö chedinobe, ja̧ tjujuna̧li̧ma ötjöda chujuna̧lo jö̧ba̧lö. Jejenö chedijayonö, chomukwatinokobe, Sulabenö cheda, jö̧ba̧lö. Jemi ikenama, Dios weökwe, Moisés iwȩyudinama cha̧ja̧kwinobe, Ju'wedö tjiteama ösödö kweda, jö̧ba̧lö. Ja̧ Dios weina cha̧ja̧kwinökötjö̧ma, ösödö chedi̧ma chöwaisachiboko jö̧ta̧linena.
Jau chömöledö, Dios weina, jojodö baikwö ja̧bö tjö̧jo jö̧ba̧lö iwȩyudinobe Moisésma. Jo̧kwaijayonö, ja̧ iwȩyudinama ökwödönö pjaatoböma jwiinobe. Sulabe dujuna̧linobetjö̧, ökwödönö pjaatoböma jwiinobe. Jo̧kwaijayonö, Moisés iwȩyudina ökwödönö pjaatinököjayonö, Diosda ökwödönö pjaatinobe. Diosma iteda itji̧nö weinobe, jojo baibanö, sulabe juna̧ladödanö ichejekwo̧ baibanö. Jo̧bama ökwödödanö ichejekwinajayonö, sulabe jwibina jo̧bama. Ja̧danö Diosma jo̧banöda weinobe, sulabe dujuna̧li̧tjö dö̧jibobö. Ja̧danö, midawö woinobe, ökwödö sulabe dujuna̧li söbebö loobö.
ökwödöma döwaisa Dios weina Moisés iwȩyudina ja̧böma sulabe jwibadö baibakwawokobe, sule Jesucristonö ösödöda sulabe jwibadö badibobö jo̧be jö̧ba̧lö döwaisobe, ¿jö̧tö? Ja̧danö ökwödöbi judío jojodöböködödanö bakweminö Cristo Jesúsnö dösödinobe, dö̧jibinö ja̧bo̧ jö̧ba̧lö. Jau, ökwödöma Moisés iwȩyudina ja̧böma sulabe jwibadö badibijökötö, bakwo̧bi Moisés iwȩyudina ja̧böma sulabe jwibo̧ baibokobetjö̧. Ökwödöma Cristonö dösödijatö, sulabe jwibadö badibo jö̧ba̧lö, jo̧kwajabetjö̧ judío jojodöböködönö weköboko judío jojodö ja̧tji̧danö ja̧tjo jö̧ba̧lö— lȩtebijatö Pedronöma.
Jojodö ajayinö wajwitjina wene Diosma iteda ömöledönö i̧sebobö jö̧a̧lobe, inesö otiwi̧ wenema. Ja̧danö ja̧ wenema sule judío jojodönöda i̧sebobömaökö, judío jojodöböködönöbi ja̧ ajayinö wajwitjina wene i̧sebobe chömöledö. Ja̧ wajwitjina wenema biya̧ chömöledö, Cristoma kwo̧'wo̧ luwo̧duwinö ö̧jobetjö̧, inesö otiwobe mölejȩbe kwö̧jaduwakwedöja jö̧ba̧lö.
Isabenö chömöledö, böjȩtjö Diostjö jojodötjö ö'weje la'aka pjabato̧ iyi̧, ba̧kwöta o̧bakwena Dios wei̧ Moisés iwȩyudina a̧ja̧kwö iyi̧ma la'akatjöda pjaatinokobe jojodönö ba̧kwȩlö̧jatebö suli̧tjö dichawedö tjichibobö Dioskwö. Wanedö yötawaduwakwö chömöledö, jojodö tjo̧'wo̧ jawanö wanedöma: Jojo o̧'wo̧ jawama jojobö̧kö̧, ¿jö̧tö? Jojo ö̧ji̧ i̧sebijayonö o̧'wo̧ jawada jo̧be. Inesö jojobö̧kö̧. Chömöledö jejenö, jojo o̧'wo̧ jawama inesö jojobö̧kö̧ ji̧danö, jojodö Diosnö ajayinö tjiyinama inesö iyawa ji̧nökö. Ja̧ tjiyinama wanedöda wanekwachinobe ju'winö Diosnö iyakwa̧. Ja̧ ju'winö iyakwa̧ wanekwachinama Cristoda iyakwa̧. Isabenö chömöledö, Cristo iteda bakwötanöda iyawö dumusidi̧ imidawinobe ba̧kwȩlö̧jatebö ji̧nö, ökwödö, dusuli̧ma söbebö lobö.
Chömöledö, jobadöma ina tjite'ada̧lobe jo̧dawa'ye tjemobö öpöjödobetjö̧ Diosma, jwiinö otiwi̧ ba̧kwȩlö̧jatebö ji̧ jawa iyi̧tjö tjemoböma. Wainö omukwatinobe Diosma, jo̧dawa'ye jobadönöda iyakwa̧ badekwachökönö. Biya̧ Dios omukwatinama: Ökwödö jobadö damötjö Diosnö tjo̧'wo̧ wana̧lö ji̧nadökwö bakobe Dioskwö ja̧nö, iteda jwiinö otiwi̧ jawa, ba̧kwȩlö̧jatebö ji̧ jawa iyi̧ demobö omukwatinobe. Ja̧ möleda Dios yöbawö ujunina iyakwa̧ma badekwachakobe, jobadö damötjö Diosnö tjo̧'wo̧ wana̧linadönöbi, ökwödönöbi, bakobe badibena.
Jo̧kwaijayonö Diosma ja'yubebi o̧'wo̧ ösöwanö edokobe jo̧banö tjo̧'wo̧ wana̧löködönöma. Chömöledö, Diosnö tjo̧'wo̧ wana̧lö tjö̧ji̧da, Enoc ö̧jinadanö, Dios iteda o̧'wo̧ ösöwanö edi̧ma. Jo̧kwaobetjö̧, Diosnö ichibo jö̧ba̧lo̧ma Diosnö ösödobö jo̧be, Isabenö Diosma jo̧, jö̧ba̧lö. Ja̧danö, Diosnö ichibo jö̧ba̧lo̧ma Diosnö ösödobö jo̧be, Diosma otiwa jawa iyakwo̧ itenöda ösödö ichibobö isakwo̧nöma, jö̧ba̧lö.
Jo̧kwaijayonö Cristoma ömöayo̧nötjö o̧penönö inesö jo̧. Isabenö, jo̧bama Dios Itji̧. Ja̧danö, jo̧bama Dios i̧tji̧mu babibinadö tjuluwo̧. Ja̧danö, jobadönö otiwanö te'ada̧lo̧. Wanedö yötawa: Ökwödö, okobe deinö Cristonö ösödadöma o̧dodanö, Dios otidinejudanö döwanekwachobe. Ja̧danö Cristo, Dios Itji̧ma, Dios otidineju la'aka luwo̧danö jo̧, ökwödö Duluwo̧. Isabenö chömöledö, ökwödöma Dios otidinejuda wanekwachadösa yebabökönö jwaikwöda di̧'yitjö̧ma, Diosnö do̧'wo̧ wana̧lö. Jau chömöledö, ökwödöma Dios otidinejuda wanekwachadösa jwaikwöda Diosnö do̧'wo̧ wana̧lö di̧'yitjö̧ma, do̧'wo̧ luwo̧nö ösöwö, Cristoma dö̧jibinö pjaatinobetjö̧ Dios i̧tji̧mu babibinadösa, ja̧danö Dioskwö ba̧kwȩlö̧jatebö dö̧jakwedösa, jö̧ba̧lö.
Jo̧kwaobetjö̧ Jesúsma, Diostjö jojodötjö ö'weje la'aka pjabato̧ baibanö jo̧obetjö̧ Diosnö yöbawö, abebö yebabökönö dichibaduwo chömöledö. Isabenö, Diosma ökwödönö lȩlö̧jino edobetjö̧, ökwödönö pjabato̧ do̧'wo̧ tjo̧bekwö dö̧jenama. Chömöledö, Dios, lȩlö̧jino edö pjabato̧nö do̧'wo̧ luwo̧ okwanö dichibenama, jo̧bakwö ö'wachö döbamatobe.
Chömöledö, Dios jejenö yöbawö junö jö̧a̧lina omukwatö ökwödönö pjaatobe domajadenö, Dios yöbawö junö jö̧a̧li̧danö isabenö badekwachakobe. Balewachökakobe, jö̧ba̧lö. Ja̧danö dötölataja jawa, balewachökö jawa, laebobe Dios jejenö yöbawö ujuninatjö. Abönö jawa biya̧: Diosma yöbawö ujuninobe, Pjatatocha, jö̧ba̧lö. Döwaisa, Diosma omöna yöba̧lökö ¿jö̧tö? Jo̧kwaobetjö̧ döwaisa, Dios jö̧a̧li̧ma balewachökakobe. Isabenö badekwachakobe, jö̧ba̧lö. Jemi ikenama Dios ju'wi jawabi jö̧a̧linobe, wanedakwawö yöbawö. Ötjö jö̧ta̧li̧danö badekwachökötjö̧ma ötjöda jawa. Ja̧danö ötjödada lȩtebakwawakwo̧sa, jö̧ba̧lö, wanedakwawö yöawinobe. Jejenö a̧ja̧kwö döwaisachiba chömöledö, Dios jö̧a̧li̧ma la'akatjöda balewachökakobe, jö̧ba̧lö. Do̧'wo̧ luwo̧ okwanö ösöwö, juluwachibanö ja̧dösa chömöledö, Dios jö̧a̧li̧danö isabenö badekwachakobe, jö̧ba̧lö. Chömöledö ja̧ dötölataja jawa, Dios yöbawö ujuninabi̧, Dios ja̧ wanedakwawö yöawinabi la'akatjöda balewachökakobe. Jo̧kwaobetjö̧ chömöledö ökwödö, Dios ö̧jobekwö döbibajinadöma, jo̧banö do̧'wo̧ wana̧lö, do̧'wo̧ luwo̧ okwanö ösöwö juluwachibanö di̧'yaduwo, Ökwödöma Dios yöbawö ujunina badekwachakwa̧ te'ada̧ladösa, jö̧ba̧lö. Jelobekwö domukwatobö jwiobe, Aaa, Dios jö̧a̧linadanö badekwachökena, jö̧ba̧lö. Isabenö chömöledö, Diosma omöna yöawoböma jwibo̧. Jo̧ba yöbawö ujuninadanö, wanedakwawö yöawinama isabenö badekwachakobe. Jo̧kwaobetjö̧ ökwödö jo̧banö do̧'wo̧ wana̧lö di̧'yobö jo̧be, do̧'wo̧ luwo̧ okwanö ösöwö juluwachibanö, Dios yöbawö ujuninama balewökönö waekwökakobe, jö̧ba̧lö.
Ja̧danö chömöledö, Dios iwenetjö laebobe, Dios iteda Itji̧nö yöawinama, Ökwöma Melquisedec ötjötjö jojodötjö ö'weje la'aka pjabato̧ ö̧jinadanö ö'weje la'aka pjabato̧ baibanö kwö̧jakwo̧ja, jö̧ba̧lö. Ja̧danö, Diosma ¿tajawedö jejenö yöawinada, Itji̧ma Melquisedecdanö ö̧jakobe, ju'wedö ö'weje pjabatadö, Levítjö tupadanö jojodödanöbö̧kö̧? jö̧ba̧lö. Jobadö Levítjö tupadanö jojodönöda Diostjö jojodötjö ö'weje pjabatö tjotidobö wetjinawö̧. Chömöledö döwaisa, Dios wei̧ Moisés iwȩyudinatjö baikwö laebobe: Diosma Levítjö tupadanö jojodönöda 'da̧batö ujuninobe Diostjö jojodötjö ö'weje pjabatö tjotidobö. Ja̧danö, jobadö, Diostjö jojodötjö ö'weje pjabatadöma otidiatjinobe, Dios wei̧ Moisés iwȩyudinatjö wei̧danö, jojodö tjiyi̧ Diosnö iyö. Jejenö otidiatjinobe jojodö Diosnö tjiyi̧ iyö, jojodö Dioskwö tjichibobö suli̧ jwibadödanö. Jo̧kwaobetjö̧ ¿tajawedö jelo̧, wainö Diostjö jojodötjö ö'weje pjabato̧ baibanö jo̧ ichobö ji̧nada? Yötawaduwakwö chömöledö. Jobadö Diostjö jojodötjö ö'weje pjabatadö tjotidi̧, Dios wei̧ Moisés iwȩyudinatjö wei̧danö tjiyi̧ma pjaatinokobe jojodönö, Dioskwö suli̧ okobe jwiinö jwibadödanö tjichiboböma. Jobadö ö'weje pjabatadö tjotidi̧ma okobe jwiinö pjaatitjö̧ma jojodö Dioskwö suli̧ jwibadödanö tjichibobö, Diosma jelo̧ ö'weje pjabato̧ baibanö jo̧nö, iteda Itji̧nö yötawokoinena, Ökwöma ötjötjö jojodötjö ö'weje la'aka pjabato̧ kwö̧jakwo̧ja, jö̧ba̧lö. Ajayinö Diostjö jojodötjö ö'weje pjabatadö tjotidi̧ mikwawitjö̧ma jelo̧ ö'weje pjabato̧ baibanö jo̧ ichobö jwitoinena. Isabenö, jelo̧ wainö jo̧, Levítjö tupadanö jojo Aaróndanöbö̧kö̧ ichoböma jwitoinena ajayinö Diostjö jojodötjö ö'weje pjabatadö tjotidi̧ mikwawitjö̧ma. Isabenö chömöledö, ajayinö Diostjö jojodötjö ö'weje pjabatadö tjotidi̧ pjaatokobetjö̧ jojodö Dioskwö suli̧ jwibadödanö tjichibobö, Diosma jelo̧nö yöawinobe. Isabenö jelo̧nö yöawinobe, Melquisedec, emöbi jemökökwedanö, ja̧danö la'akatjöda wobinö̧kö̧danö wainö jo̧nöma. Jau chömöledö, jelo̧ wainö jo̧nö yöawinobe Diosma, ajayinö Diostjö jojodötjö ö'weje pjabatadö tjotidena teachakwo̧nöma.
Ja̧danö chömöledö, ju'wi jawabi ökwödönö i̧sebobe döwaisachibobö, Dios 'yayi̧ balekwa yöbawö ujuni̧ma ajayinö yöbawö ujuninatjö o̧penönö mikwawi̧, jö̧ba̧lö. Biya̧da: Diosma wanedakwawö yöbawö, Jö̧ta̧li̧danö badekwachökötjö̧ma ötjöda jawa, jö̧ba̧lö, iteda Itji̧ Jesúsnö 'da̧batö ujuninobe. Jejenö wanedakwawö yöbawö 'da̧batö ujuninobe Itji̧ Jesúsnö, Ökwöma ba̧kwȩlö̧jatebö ötjötjö jojodötjö ö'weje la'aka pjabato̧ kwö̧jakwo̧ja, jö̧ba̧lö. Jo̧kwaijayonö jejenö la'akatjöda yöawinokobe Diosma jo̧banö böjȩtjö ö'weje pjabatadönö, ajayinö yöbawö ujunina weina otidadönöma. Itji̧nöda jejenö wanedakwawö yöbawö 'da̧batö ujuninobe, 'yayi̧ balekwa yöbawö ujunina otidakwo̧nöda. Baikwö laebobe Dios iwenetjö, Dios iteda Itji̧nö yöawinama: Ötjö jojodö tjuluwo̧ma, chiminö 'da̧batö chujunakwö, ba̧kwȩlö̧jatebö ötjötjö jojodötjö ö'weje pjabato̧ kwö̧jobö. Ja̧ jö̧ta̧li̧ma balewachökakobe. Ötjö jö̧ta̧li̧danö isabenö baledakobe. Jejenö Diosma, wanedakwawö yöbawö iteda Itji̧nö yöbawö ujuninobe, 'yayi̧ balekwa yöbawö ujunina otidakwo̧nöma.
Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.
Jo̧kwaijayonö Diosnö mölejȩbe la'aka iyo̧ Jesús otidi̧ma böjȩtjö Diostjö jojodötjö ö'weje pjabatadö tjotidinatjö jwiinö o̧penönö mikwawobe. Chömöledö döwaisa, Dios ajayinö da'dödöminenö yöbawö ujuninatjö wei̧ma, Ötjökwö bakwainö omukwatö, weti̧ a̧ja̧kwöda kwuju̧kwaduwo, jö̧ba̧lö, weinobe. Ja̧danö, Diostjö jojodötjö ö'weje pjabatadöma babebi Dios ajayinö yöbawö ujuninatjö wei̧danö otidö tjiyobe, Dios wei̧ Moisés iwȩyudinadanö. Jo̧kwaijayonö Jesús, jojodötjö Diostjö ö'weje pjabato̧ma Dios 'yayi̧ balekwa yöbawö ujunina otidobe. Ja̧danö chömöledö, Dios 'yayi̧ balekwa yöbawö junö jö̧a̧li̧ma ajayinö yöbawö junö jö̧a̧linatjö o̧penönö mikwawi̧, jojodönö pjabatö. Ja̧danö, ja̧ 'yayi̧ balekwa yöbawö ujuni̧ma Dios ajayinö yöbawö ujuninatjö o̧penönö mikwawobetjö̧, jojodönö pjabatö, Jesús otidi̧bi ajayinö Diostjö jojodötjö ö'weje pjabatadö tjotidinatjö o̧penönö mikwawobe.
Ja̧danö, Dios ajayinö yöbawö ujunina jawama, Dios böjȩtjö eju ji̧nejubi, okobe jwiinö jeju okwa ö'weje pjabatadö tjotidinabi ökwödönö wanedö yöawobe chömöledö. Ja̧ wanedi̧ jawama ökwödönö öba̧ja̧dobe babe dö̧ji̧. Isabenö ökwödönö öba̧ja̧dobe, Diostjö jojodötjö ö'weje pjabatadö tjiyinama mikwawokobe jojodö Dioskwö, wene jwiinö tjichibobö, jö̧ba̧lö. Ja̧danö, ö'weje pjabatadö tjiyi̧, jojodö tjiyökwe, ökwösöbu lilibö, ja̧danö ju'wi Diosnö ösödö tjiyi̧bi pjaatinokobe jojodönö, tjo̧'wo̧ luwo̧ okwanö. Diostjö jojodötjö ö'weje la'aka pjabato̧ma bakwöta o̧bakwena tebachiainobe Dios eju, okwasȩko̧nö Diosnö iyö. Jo̧kwaijayonö jo̧ba iyi̧ma la'akatjöda pjaatinokobe jojodö tjöwaisobö, Tjo̧wi̧ Dioskwö ichibadösa wene jwiinö, jö̧ba̧lö. Jojodöma ina tjo̧'wo̧ tjo̧bekwöda tjö̧jinobe, Ina wene juna̧ladösa. Dioskwö ichiböködösa, jö̧ba̧lö.
Ja̧danö chö̧ja̧wo̧dö, kwomukwataduwi̧ balewachö, böjȩ jawatjö 'da̧bachibö Diosnö tjekachajaduwo, kwo̧'wo̧ luwo̧duwi okwanö jo̧bakwö 'dötewinö ja̧nö. Ja̧danö, jo̧banö tjekachajaduwiökwe Diosma ökwödökwö 'dötewinö ö̧jobe. Chö̧ja̧wo̧dö, ökwödöma sulabenö ja̧bö ju̧kwadöja. Ja̧ sulabenö ja̧köbaduwi̧ kabatibö otiwanö ja̧bö kwö̧jaduwo. Yelösöda ökwödöma dötölatajanö omukwatadöja, Diosnö ösödöbi, böjȩ jawa ösödöbi. Ja̧ kwomajadeduwinö sulabenö kwomukwataduwi̧ma kabatibö otiwanöda kwomukwataduwo.
ကြော်ငြာတွေ