Hebreos 6:8 - Dios Iwene

⁸ Jo̧kwaijayonö chömöledö, jayu batjoma abönö juwökönö, ja̧danö 'dawödö, sobö tjotidökötjö̧ma tjujunaja̧ma otiwanö pokwökena. Sȩi̧da ötjebiyada pokwena. Ja̧danö, Diosma jemi edö lȩebobe, Sula, sȩa'woda. Juwö lotocha, jö̧ba̧lö. Chömöledö jejenö yötawajökwe, jelobekwö omukwatö, Jesústjö 'da̧bachibö 'yo̧ ö̧ji̧ma. Jo̧ba ö̧ji̧tjö suli̧da laebobe, batjo sula'wo pokwayudanö. Ja̧danö Diosma, jo̧banö lȩbebö ö̧ji̧tjö suli̧ma juwö loakwo̧.

Hebreos 6:8 ပူးပေါင်းရင်းမြစ်များ

Génesis 4:11

Caín, kwöja̧wo̧nö kwabö loköbajobetjö̧ ökwönö lȩtebakwö. Bena kwöjawo̧ ökwösobu nijinö 'dukwibajabetjö̧ bena kwitebo baibanö kwö̧jo jö̧ka̧lijayonö kwö̧joböma jwia.

Génesis 5:29

Jo̧ba itji̧nö midijetö Noé, jö̧ba̧lö. Ja̧ imi, Noé jö̧ba̧löma baikwö wanekwachobe: Bitema ökwödönö pjaatakwo̧. Jo̧bama bemi niji, Isabenö Jo̧ leebinemi labinö dotodi̧tjö dö'wachobö pjaatakwo̧, jö̧ba̧lö. Jejenö jö̧ba̧lö, wanekwachobe ja imi, Noé jö̧ba̧löma.

2 Samuel 23:7

Ja̧danö jakajaye baledi̧danö baledakobe jobadö sulabedönö. Sȩaka juwö loakwo̧ma, 'dii jawatjö otikwa jawanö, palapinöö̧kö̧, otokwötenöö̧kö̧ sobö pukwebö, sȩaka ubinö juwö lobo̧, ja̧danö jejenö juwö loi̧danö, Diosma söbebö lobö lȩebakobe sulabedönö, —jö̧ba̧lö iwȩyudinobe Davidma, bajaleapo i̧wȩyudinama.

Diosnö ösödo̧ Job mikwo̧ usula emawina jawa 31:40

—Jau, ju'wedö tjitea niji chönaukwinatjö̧ma, trigo pokwo jö̧a̧lemi sȩötjeda pokwobö jȩna, ja̧danö cebada pokwo jö̧a̧lemi, sula'woda pokwobö jȩna, —jö̧ba̧lö yöa̧linobe Jobma, ötjönö baledi̧ma, sulabenö ja̧tiökwe lȩbebö̧kö̧ Diosma, jö̧ba̧lö. Jejenö yöba̧lajo̧, Jobma yöba̧lö kaatibinobe.

Isaías 27:4

dameakwö̧kö̧sa, chöbatjobedönö. —Chöbatjobedönö pjatatobö jö̧ta̧la, tjöpöjojodö sȩakadanö ichejekwadönöbi, ju'wi sula'wodanö ichejekwadönöbi chölakwabikwawobö jö̧ta̧la. Ja̧danö jobadökwö chölakwabikwawobö ji̧tjö̧ma, jobadönö ja̧tö lotena, ja̧danö juluwajo̧, jobadönö juwö lotena.

Mateo 25:41

Jemi ikenama wajwitobekwöchobe ju̧kwadönö yötawocha: Ökwödö sulabedöma chö̧jelö labebaduwi. Dios Awetjanöbi, iteda ömöayedönöbi lȩebobö Dios otidö ujuninola ökwöla nöolabe 'ya̧duwi, jobetjö Dios lȩebi̧tjö kwemaduwo jö̧ba̧lö.

Mateo 3:10

Dios lȩebakwa̧ma isabenö yöneawachibobe, baikwö wanedö yötawa: Sulabenö tjomukwati̧ kabatibö balewachöködöma, towi wa̧jokowidanö ichejekwadö, ja̧danö Dios lȩebakwa̧'a o̧to̧mö'ama, juluwanö wa̧jokowi la'aka jubö loakwa̧'a jo̧be. Ja̧danö, okobe jwiinö wa̧jokowibiyama, Diosma jubö lobö ökwölanö ujuwakobe— jö̧ba̧lö wanedö yöawinobe Juanma.

Mateo 7:19

Jau chömöledö, sulabenö yöbawadöbi ja̧danö. Towinö wa̧ji̧ jawa edö kwöwaisaduwi̧danö, jobadö ja̧tji̧ edö kwöwaisaduwakobe jobadönö, otiwanö yöbawadö tjö̧jojobö, sulabenö yöbawadö tjö̧jojobö jö̧ba̧lö. Ja̧danö, sulabenö yöbawadönö isabenö lȩekwa ja̧kobe, baikwö wanedö yötawa: Okobe jwiinö suli̧ jawa wa̧ji̧owibiyama, jubö lobö tjujuwakwa̧owibiya— jö̧ba̧lö wanedö yöawinobe Jesúsma.

Marcos 11:14

Wa̧jiökökwe Jesúsma jowi edinö jö̧ba̧lijetö: —Bemi tupakwöma ökwö bowi towima wa̧jökakwowija. Jojodöma tjukwökakobe ökwö bowi towi wa̧jokobetjö̧—jö̧ba̧lijetö Jesúsma. Jejenö jowi yöa̧li̧ma Jesús öba̧ja̧di̧ waisachadöma ja̧nö a̧ja̧kwijadötö.

Marcos 11:21

Ikenama, Pedroma, Jesús towi lȩbebö jö̧a̧lina omukwatö jö̧ba̧lijetö Jesúsnöma: —Ba̧ja̧dakwawa jojo edi. Ökwö lȩkebinowima woinobe—jö̧ba̧lijetö Pedroma.

Juan 15:6

Ja̧danö, ötjökwö dötewinö jö̧ködöma ubasa'ba opjiya 'döbebö loawa opjiya kököachibi̧, emibö ökwölanö ubinö juwawakwa̧ opjiyadanö ja̧dö— yöawinobe Jesúsma öba̧ja̧di̧ waisachadönöma.

Deuteronomio 29:28

Jwiinö jobadönö ödameakwobetjö̧, Isabenö Jo̧ma jobadönö tjitebo nijitjö 'yebö loinobe, ja̧danö ju'wedö tjitebonö tjö̧jobö ikwö loinobe, ja̧danö jejenö ikwö loinobetjö̧, bemi nijitjö deinö, jelobetenia tju̧ju̧kwobe babema, –jö̧ba̧lö labebö lobö tjatadakobe.

Hebreos 10:27

Chömöledö, bakwo̧ Jesúsnö kabatibajo̧ sulabenö ja̧ena, ja̧ sulabenö ja̧i̧ma Diosma söbebö lookobe. Jo̧bama ju'wi möle Dios öba a'ö ja̧nö Dios labinö lȩbebö yöawi̧ a̧ja̧kwakwo̧, yelösöda. ¡Ayö! Diosma jwiinö ölabikobe jo̧banö, Jesúsnö kabatibö sulabenö ja̧bö jo̧nöma. Jo̧banö i̧sebakobe iteda jwiinö ölabi̧, ökwöla jwiinö tubi̧danö ölabi̧ma. Ja̧ Dios jwiinö ölabi̧ma jo̧ba öpöjojodönö juwö loakwola tubi̧danö ölabi̧. Chömöledö Dios jwiinö ölabi̧ma ¿ökwödönö i̧sekwobö dösödiji̧? Döpöjöda. Labobe yelösöda. Jo̧kwaobetjö̧ jweinö omukwatö Jesúsnö ösödö kwi̧'yaduwo, jo̧banö kabatibökönö.

Hebreos 12:17

Chömöledö kwöwaisaduwa, Esauma ja̧ ju'winö emibakwa̧ mikwanö iyina tupakwöma, ju'wi omukwatinobe. Ja̧danö, abe'donö budekwabinö aeba̧linobe abönö pöe Diosnö aebakwa̧ aebobö, jo̧banö pjaatobö. Yelösöda budekwabinö aeba̧linobe, Diosnö abebi ötjönöbi pjaatobö chabe'do, jö̧ba̧lö. Budekwabinö aeba̧lijayonö abe'do jo̧banö aebi̧, Diosnö pjaatobö aebi̧ma jwiinobe Esaúnöma. Chömöledö, tjöbeba̧lö̧jönö kwite'ada̧laduwo ökwödötjö bakwo̧ Esau sulabenö omukwatinadanö omukwatapji jö̧ba̧lö, Dios otiwanö iyi̧ma mikwawokobe, jö̧ba̧lö, böjȩ jawada isakwö.

Apocalipsis 20:15

Ja̧danö, jojodöma, ba̧kwȩlö̧jatebö ja̧kwawa juna̧ladö tjimi ba̧ja'ye okwa wȩyukwöködöma, joola, ökwöla ubola nöola okwa ba̧kwȩlö̧jatebö tjö̧jakwedö.