Hebreos 2:17 - Dios Iwene17 Jo̧kwaobetjö̧ Dios Itji̧ma ökwödö jojodönö pjaatobö jojo babiböda öbötjachinobe. Ángelso̧danö baibinokobe Dios Itji̧ma. Jojoda baibinobe. Jojodanö bakwainö babibö öbötjachinobe. Chömöledö ju'wima jwiinobe Jesús jojodönö pjaatoböma. Jojo babiböda dö̧jibinö pjaatinobe. Ja̧danö, chömöledö Dios Itji̧ma jojoda baibinobetjö̧ Diostjö jojodötjö ö'weje la'aka pjabato̧ baibanö jo̧. Ja̧danö chömöledö, döwaisa. Böjȩtjö Diostjö jojodötjö ö'weje pjabatadöma jojodö Diosnö tjiyi̧ iyadö, tjumusidi̧ midö. Jejenö jobadö Diostjö jojodötjö ö'weje pjabatadö jojodönö tjite'ada̧li̧danö Dios Itji̧, Diostjö jojodötjö ö'weje la'aka pjabato̧ baibanö jo̧ma jojodönö ite'ada̧lobe. Ja̧danö, Dios Itji̧ma jojodaobetjö̧ jojodönö baledi̧ma jo̧banöbi baledinobe. Jejenö baledobetjö̧ Dios Itji̧ma jojodönö baledi̧ öwaisachibinobe. Ja̧danö, jojodönö baledi̧ öwaisobetjö̧ Dios Itji̧ma, Diostjö jojodötjö ö'weje la'aka pjabato̧ jo̧ babibajo̧ma lȩlö̧jino edö jwaikwöda Dios wei̧ a̧ja̧kwö pjaatinobe jojodönöma. Ja̧danö, jo̧ba Dios Itji̧ma, ökwösobu ebawinö itedada iyawinobe. Ja̧danö, itedada iyawö dumusidi̧ midawö woinobe, Diosma ökwödö dusuli̧ söbebö loobö. အခန်းကိုကြည့်ပါ။ |
Hebreos 2:17
37 ပူးပေါင်းရင်းမြစ်များ
Baikwö yöawinobe Gabrielma Danielnö: —Diosma omukwatö ujunajabe, kwömöledö Israel jojodönö tjö̧jibinö pjaatakwa̧ abönö, ina cuatrociento noventa o̧biya tjöbaledobö jo̧be jö̧ba̧lö. Ja̧danö, Dios badedö ujunina möle badekwachenama, tjusulatjö tjö̧jibinö pjaatakobe. Sulabenö ja̧tji̧ katjatibobö ja̧akobe, ja̧danö tjusula söbebö loakobe, okobe jwiinö suli̧ söbebö loakobe. Ja̧danö ja̧ mölema Diosda yöbawö weakobe, bakwainö otiwanö ba̧kwȩlö̧jatebö yöbawö weakobe. Ja̧ mölema Dios yöawi̧ yöbawo̧ Jeremías iwȩyudinadanö badekwachakobe, ja̧danö ökwö kwi̧'wi̧dinö kwedinadanö badekwachakobe, ja̧danö Jerusalénnö jȩju Dios ejuma, yemidanö isabenö Dios eju baibanö dichö loakobe.
Weökakobe chömöledö. Baikwö yötawa: Dios öpöjojodö dö̧jayi, Dios i̧tji̧ma midawö woinobe, Dios ömöledö badibanö ja̧bö, ¿jö̧tö? Jau chömöledö, Jesúsma ökwödö sulabedönö, jo̧banö öpöjödadönö pjaatinobe. Ja̧danö, jejenö jo̧banö öpöjödadönö pjaatinobema, ¿iteda ömöledönö pjaatökenaji̧? Babema woina tupakwö, woawatjö yemidanö tjeachajinobema, ¿pjaatökenaji̧? Pjaatena chömöledö. Jemi tupakwöda pjabato̧ chömöledö iteda ömöledönöma, Dios lȩebakwa̧tjö ja'yubebi demapji jö̧ba̧lö.
Isabenö chömöledö, Jesús Abe'do, ja̧danö ökwödö, Dios ju'wedö i̧tji̧mubi mölejȩbe Dabe'doma bakwo̧da. Jo̧kwaobetjö̧ Diosma ajayinöma otiwanö badedö ujuninobe iteda i̧tji̧muma bakobe dö̧jobö Dios jwiinö otiwi̧ ö̧jobema, okobe deinö, Jesúsbi, ökwödö Dios ju'wedö i̧tji̧mubi. Ja̧danö chömöledö, ökwödöda ju'wedö Dios i̧tji̧muma, Jesúsnö ösödadö. Ja̧danö, ökwödö mölejȩbe Dabe'dobi Jesús Abe'dobi bakwo̧da, Diosda. Isabenö chömöledö, Jesús, ökwödö dusuli̧ dichö lobinabi, ja̧danö ökwödö dichö loinawö̧bi Dabe'doma bakwo̧da. Ja̧danö, Dabe'do bakwo̧daobetjö̧ Jesúsma o̧'wo̧ ösöwanö, tabakwökönö öabobe ökwödönö, Chö̧ja̧wo̧dö, jö̧ba̧lö.
Ja̧danö chömöledö, ökwödö Dios ju'wedö i̧tji̧mu ötjabiwö̧ma jojodödasa. Diteba'obi dökwösobubi juna̧ladösa. Ja̧danö, woba jojodösa. Jo̧kwaobetjö̧ Jesúsbi, ökwödönö pjaatobö jojoda baibanö öbötjachinobe ökwödö woba jojodödanö. Isabenö Dios Itji̧ma jojoda öbötjachinobe woobö ökwödö dusula dumusidi̧ midawö. Ja̧danö, jo̧bama dumusidi̧ midawö woenama Awetjanö ujuluwinobe. Jo̧ba Awetjama yelösöda juluwo̧ jojodönö Diostjö 'da̧bachibö wotjobö öibobö. Jo̧kwaijayonö Jesúsma jo̧banö ujuluwinobetjö̧ Dios i̧tji̧mu babibinadönö Diostjö 'da̧bachibö wotjobö öbibökö. Chömöledö jo̧ba Awetjama ujulu jwibo̧ ökwödö Jesúsnö do̧batö eminadönö öibobö, Diostjö 'da̧bachibö wodoböma.
Isabenö, Jesúsma jwaikwöda i̧'yinobe Dios wei̧ a̧ja̧kwö. Jo̧kwaobetjö̧ chö̧ja̧wo̧dö, ökwödönö, Dios mölejȩbe kwö̧jaduwobö 'da̧batö ujuninawö̧nöma yötawaduwakwö. Dios Itji̧ Jesúsnö omukwata̧lö kwö̧jaduwo. Omukwataduwi. Jo̧ba Jesús yödawökweda, Bitema dö̧jibinö pjabato̧, jö̧ba̧lö. Chömöledö, Jesús, Dios yöawi̧ yöawobö weinökwema Diostjö jojodötjö ö'weje la'aka pjabato̧ baibanö jo̧. Jo̧banö omukwata̧lö kwö̧jaduwo chömöledö.
Ja̧danö Jesús, Diostjö jojodötjö ö'weje la'aka pjabato̧ baibanö jo̧ma, jojodö tjime'dawi̧ baledi̧ma waiso̧. Ja̧danö jo̧banöbi, böjȩnö ö̧jena ime'dawinö baledijayonö la'akatjöda sulabenö ja̧inokobe. Chömöledö, Jesúsma jojodö tjime'dawi̧ma öwaisobetjö̧ ökwödönö pjaatobö waiso̧. Jejenö Jesúsda ökwödönö lȩlö̧jino edö Diostjö jojodötjö ö'weje la'aka pjabato̧ baibanö jo̧ma.
Jo̧kwaobetjö̧ chömöledö, Dios ö̧jobekwö, jo̧banö abebö ichakwa̧ma yekabiduwa. Jesús, ökwödönö lȩlö̧jino edo̧, ökwödönö pjaatobö waiso̧ma jobeda, Dios öba a'o jo̧. Chömöledö, jo̧bama Diostjö jojodötjö ö'weje la'aka pjabato̧. Jo̧kwaobetjö̧ yekabiduwa Diosnö abeböma. Ja̧danö ¿böjȩtjö Diostjö jojodötjö ö'weje la'aka pjabato̧ ö̧jinaja? Jo̧ba otidinama ¿tajida? Chömöledö, böjȩtjö Diostjö jojodötjö ö'weje la'aka pjabatinama jojo. Diosma jojodötjö 'da̧batö ujuninökwe, ö'weje la'aka pjabato̧ baibanö. Jo̧bama Diosnö iyiainobe, jojodö Diosnö ösödö tjiyi̧bi, jojodö tjumusidi̧ midö iyawabi.
Ja̧danö, Diosma iteda wei̧ a̧ja̧kwö kabatajo̧nö, Jesúsnöma kabebö öwaninobe Diostjö jojodötjö ö'weje la'aka pjabato̧ baibanö. Jo̧kwaijayonö Jesúsma böjȩtjö ö'weje la'aka pjabato̧danöbö̧kö̧, Aaróntjö tupadanö jojodödanö. Diosma Jesúsnö jö̧a̧linobe, Ökwöma Melquisedec mikwo̧ ötjötjö jojodötjö ö'weje la'aka pjabato̧ ö̧jinadanö ö'weje la'aka pjabato̧ baibanö kwö̧jakwo̧ja, jö̧ba̧lö.
Ja̧danö, jo̧ba böjȩtjö Diostjö jojodötjö ö'weje la'aka pjabato̧ma me'dawadönö pjaatobö öwaisina, sulabenö ja̧tji̧ wajwitjobetjö jelobekwö 'ya̧dönöma. Ja̧danö, böjȩtjö Diostjö jojodötjö ö'weje la'aka pjabato̧ma ösödö jwebebö pjabatina, jobadö me'dawadönöma. Itedabi jojo. Ja̧danö, jo̧babi ju'wikwenama ime'dawachibinö ji̧nö jo̧obetjö̧ waisö pjabatiainobe ömöledönö, me'dawadönöma, juluwachibö tji̧'yobö.
Ja̧danö chömöledö, Cristobi, itedadama 'da̧batakwawö ujunawinokobe, ö'weje la'aka pjabato̧ baibanö ö̧jobö. Diosda Cristonö, iteda Itji̧nöma 'da̧batö ujuninobe Diostjö jojodötjö ö'weje la'aka pjabato̧ ö̧jobö. Ja̧danö, Dios iteda Itji̧nö yöawina baikwö laebobe Dios iwenetjö: Chitji̧, babe möle yötawa, ökwöma ötjö Chitji̧ja, jö̧ba̧lö. Ja̧danö ökwö Kwabe'dosa, jö̧ba̧lö, yötawa babe mölema. Jejenö laebobe Dios iwenetjö.
Jo̧kwaobetjö̧ chömöledö, Jesúsda Dios 'da̧batö ujuninökwema Diostjö jojodötjö la'aka pjabato̧ baibanö, ökwödö jojodönö pjaatobö. Ja̧danö, jo̧bama la'akatjöda jojodönö o̧'wo̧ sulinö edö̧kö̧. Ja̧danö chömöledö, jo̧bama la'akatjöda taba̧lö̧ji̧ jawa ja̧bö̧kö̧. Ja̧danö, jo̧bama sulabedökwö pjabacha̧löma jö̧kö̧. Ja̧danö chömöledö, jo̧bama Dios öwaisachobekwöchobe ö̧bemi, inesö la'aka luwo̧ ö̧bena bo̧, mölejȩbe.
Jo̧kwaobetjö̧ döwaisachibobö jo̧be, Isabenö Jesúsma ju'wedö Diostjö jojodötjö ö'weje pjabatinadö, Dios ajayinö webö 'da̧batö ujuninawö̧nötjö o̧penönö mikwawo̧, jö̧ba̧lö. Jobadöma jojodö. Suli̧ juna̧linadö. Jo̧kwaijayonö babema, Dios ajayinö weinatjö baikwöma Dios iteda iminö 'da̧batö ujuninobe iteda Itji̧nö, Jesúsnöma. Diosma iteda iminö Jesúsnö 'da̧batö ujuninobe ajayinö Diostjö jojodötjö ö'weje pjabatadö tjotidena teachobö. Ja̧danö, jo̧ba Jesúsma jwiinö otiwo̧. Suli̧ma yelösöda jwibo̧. Ja̧danö, jo̧banöda Diosma iteda iminö 'da̧batö ujuninobe, ba̧kwȩlö̧jatebö suli̧ jwibo̧nöma, Diostjö jojodötjö ö'weje la'aka pjabato̧ baibanö. Isabenö chömöledö, Jesúsma ajayinö Diostjö jojodötjö ö'weje pjabatinadönötjö o̧penönö mikwawo̧. Ja̧danö, jo̧ba Diostjö jojodötjö ö'weje la'aka pjabato̧ baibanö jo̧ma otidobe Dios 'yayi̧ balekwa yöbawö ujunina, o̧penönö yöbawö ujuninama jamatö 'yo̧bö.
Chömöledö, ötjö yötawi̧tjö inesö ji̧ma biya̧: Ida̧ökö dujuna̧lobe ökwödönö pjabato̧nö, Diostjö jojodötjö ö'weje la'aka pjabato̧ baibanö jo̧nöma. Ja̧danö, jo̧bama suli̧ jwibo̧. Ja̧danö, ba̧kwȩlö̧jatebö ökwödönö pjabato̧. Jo̧bama mölejȩbekwö kabekwajo̧ Jwiinö Otiwo̧ Dios ö̧bemi öwaisobekwöchobe öbamatinobe. Jo̧bama Jesúsda.
Ja̧danö chömöledö, döwaisa böjȩtjö Diostjö jojodötjö ö'weje la'aka pjabato̧ otidinama. Dios wei̧ Moisés iwȩyudina ö'weje la'aka pjabato̧nö weinobe jojodö tjusuli̧ midö ajikwakwawedönö kwabö iyobö, kwaajökwe ökwösobu liliobö. Jejenö lilibö iyobe ö'weje la'aka pjabato̧ma Diosnö, Dios jojodö sulabenö ja̧tji̧ söbebö loobö. Ja̧danö, ju'wi jojodö Diosnö ösödö tjiyi̧bi iyobö weinobe ö'weje la'aka pjabato̧nöma. Jejenö böjȩnö ja̧nö iyö otidiainobe ö'weje la'aka pjabato̧ma. Jo̧kwaobetjö̧ mölejȩbe Diostjö jojodötjö la'aka pjabato̧ baibanö jo̧ Jesús, ajayinö ö'weje pjabatadö tjotidena tebachinama jo̧babi iteda Diosnö iyi̧ ujuna̧lobö jo̧be.
Ja̧danö chömöledö, Cristo ichenama, Diostjö jojodötjö ö'weje la'aka pjabato̧ baibanö jo̧ma, Dios ajayinö yöbawö junö weinama otidinokobe, böjȩnö ju̧kwadötjö ö'weje pjabatadö tjotidi̧danö. Cristo iyinama wainö ji̧na. Cristo, Diostjö jojodötjö ö'weje la'aka pjabato̧ baibanö jo̧ma itedada iyawö imidawinobe. Jejenö itedada iyawö midawö ökwödönö pjaatinobe, okobe jwiinö Dios otiwi̧ iyi̧tjö dujuna̧lobö. Cristoma woinobe dusula dumusidi̧ midawö, iteda ökwösobu ebawinö. Jemi ikenama mölejȩbekwö kabekwachajo̧ Dios eju okwa teachinobe, jojodö otikwökejunö, Dios mölejȩbe ejunöda. Chömöledö jejuma jwiinö mikwaweju, jojodö jo̧ba eju tjotidinejutjö o̧penönö mikwaweju. Ja̧danö, Cristoma Dios mölejȩbetjö ejunö tebachö, jwiinö inesösȩko̧, Dios ö̧jȩko̧kwö teachinobe. Ja̧danö, Cristoma bakwöta o̧bakwena, jelebabi jeleba böjȩnö Diostjö jojodötjö ö'weje la'aka pjabato̧ teachi̧danö teachinokobe. Cristoma bakwötanöda tebachö ba̧kwȩlö̧jatebö jojodö tjusula tjumusidi̧ imidawinobe. Ja̧danö, böjȩtjö Diostjö jojodötjö ö'weje la'aka pjabato̧ iyinadanö iyö teachinokobe Cristoma, pakaya itji̧, chiwo tjökwösobu iyö jojodö Diosnö tjumusidi̧ tjimidinadanö. Cristoma okwasȩko̧, jwiinö inesösȩko̧nö teachinobe, iteda ökwösobuda iyö, dö̧jibinö ba̧kwȩlö̧jatebö pjaatinobuma. Chömöledö, Cristo itedada iyawö, dusula dumusidi̧ imidawinawö̧ ökwödö Dios ömöledö babibinadöma isabenö Dios otiwi̧ iyi̧tjö demakwedösa.
ကြော်ငြာတွေ