Hebreos 2:15 - Dios Iwene

¹⁵ Ja̧danö chömöledö, Jesús midawö woenama ökwödönö Awetjatjö 'döbebö pjaatinobe, ba̧kwȩlö̧jatebö Diostjö 'da̧bachibö woawatjö dö̧jibinö. Chömöledö, ökwödöma okobe jwiinö dö̧ji̧ma yebabinöda ji̧abinadösa, wodakwa̧ omukwatö. Ja̧ yedabi̧tjö dö̧jibobö yelösöda jwiinobe. Jejenö yebabinö dö̧jobetjö̧ Awetja ka̧lenasonö yö̧bebö ujuninawö̧da ji̧nadösa chömöledö. Jo̧kwaijayonö Jesúsma, ökwödö dumusidi̧ midawö woena Awetjanö ujuluwinobe, ökwödö jo̧batjö dö̧jibinö pjabatö. Ja̧danö, babema yebabökönöda ju̧kwadösa chömöledö, Jesúsma Awetjanö ujuluwinobetjö̧.

Hebreos 2:15 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 18:11

—Okobe jwiinö sulabo̧ kweachi̧tenia, yeabikwawa jawa meibobe ichejekwa sulabo̧nö, okobe jwiinö kweachi̧tenia, jo̧banö luanobedanö jo̧be.

Diosnö ösödo̧ Job mikwo̧ usula emawina jawa 18:14

Otiwanö chejunö jo̧sa jö̧a̧lijayonö, iteda ejutjö do̧batö tje'ewökwe jo̧banö, inesö yetjabökwe la'aka luwo̧ öba a'o tjujunobö tje'ewökwe, jo̧ba sulabo̧nö.

Diosnö ösödo̧ Job mikwo̧ usula emawina jawa 24:17

Okobe deinö jobadöma möle öpöjödadö. Jobadö yetjabi̧ma, yȩa'wo okwa ji̧maökö, yetjabi̧ma möle dewi̧, jojodö sulabenö ja̧tji̧ tjedapji jö̧ba̧lö.

Romanos 8:15

Jau chömöledö, isabenö Dios i̧tji̧mubedösa babema. Baikwö yötawa: Ajayinöma, suli̧ ömöayedödanö dö̧jinobe, ¿jö̧tö? Ja̧danö, suli̧ ömöayedödanö ja̧nö, yedabinobe, ¿jö̧tö? Jo̧kwaijayonö, yedaboböma jwiobe yelösöda babema. Jau chömöledö, Diosma weinobe iteda O̧'wo̧ Luwo̧nö, ökwödö do̧'wo̧ luwo̧nö ö̧jobö. Ja̧danö, jo̧ba Dios O̧'wo̧ Luwo̧ma, Diosda i̧tji̧mu badibobö ja̧inobe. Ja̧danö, Dios i̧tji̧mu badibobö ja̧inobetjö̧, babema yebabökönö adebena Dabe'do Diosnö, Chabe'dowe jö̧ba̧lö.

Romanos 8:21

Ja̧danö chömöledö, ja̧ möle badekwachenama, böjȩbi ka̧lenatjö laebakobe ichejekwa. Jau chömöledö, okobe jwiinö böjȩ jawama, suli̧ jwöachobe babema. Ja̧ suli̧ jwöachi̧ma, ka̧lena bo̧bedanö ichejekwa. Jo̧kwaijayonö, ja̧ möle badekwachenama, ka̧lena bo̧betjö laebakobe böjȩma ichejekwa, ja̧danö Diosma okobe jwiinö otiwachibanö ja̧akwo̧, ja̧ mölema.

2 Corintios 1:10

Ja̧danö, Diosma isabenö labi̧ jawatjö, debö di̧'yo jö̧da̧linatjö dö̧jibinö pjaatinobe. Ja̧danö jemi tupakwöbi dö̧jibinö pjaatakwo̧, chömöledö. Jau chömöledö, Diosnö do̧'wo̧ wana̧ladösa, isabenö tupakwö ökwödönö pjaatakwo̧ jö̧ba̧lö, ja̧danö ökwödö Corintio jojodönö ateba, ökwödöbi pjabatö Diosnö akebaduwobö, jejenö pjaatobö. Jejenö akebaduwiökwe Diosma isabenö tupakwöbi pjaatakobe chömöledö, ba̧jekwadö ökwödönö pjaataja̧ omukwatö, Diosnö tjösödakobetjö̧, otiwanö pjabato̧ja jö̧ba̧lö.

Gálatas 4:21

Ökwödötjö Dios weina Moisés iwȩyudina ömöayedödanö batjibobö ösödadönö baikwö abebö cha̧ja̧kwobe: Moisés iwȩyudina jawa ¿isabenö kwöwaisaduwiji̧?

2 Timoteo 1:7

Jau Timoteo, Diosma iteda O̧'wo̧ Luwo̧nö iyinobe ökwödönö, ja̧danö jo̧ba Dios iyinökwema yedaboböma pjabatö̧kö̧, ju'wida pjabato̧ jo̧bama. Jau Timoteo, Dios O̧'wo̧ Luwo̧ma dujuluwachibanö dö̧jobö pjabato̧, ja̧danö ösödabikwawö dö̧jobö pjabato̧, ja̧danö jweinö omukwatö dö̧jobö pjabato̧ Dios O̧'wo̧ Luwo̧ma. Ja̧danö, jejenö pjabato̧obetjö̧, jwaikwöda ja̧bö kwö̧jo Dios ja̧bö kwö̧jobö iyinama Timoteo.

Hebreos 2:16

Ja̧danö chömöledö, ökwödö jojodönöda, ángelesdönömaökö, Dios Itji̧ Awetjatjö dö̧jibinö pjaatinawö̧sa. Ökwödö, Abrahamtjö tupadanö jojodö ötjabiwö̧nö, jojodönöda pjaatinobe, ángelesdönömaökö.