Hebreos 11:9 - Dios Iwene

⁹ Ja̧danö, Diosnö o̧'wo̧ öwana̧lobetjö̧ Abrahamma jobe Dios weajemi ichibö jobeda ö̧jinobe, ju'wedö tjitebonö, iteda itebomaökö. Jo̧ba jelobetjö 'yi̧nama jobe ju'wedö tjitebo nijima balewöda ö̧jinobe. Jobe ö̧jenama otiweju, 'diejunö ö̧jinokobe, iteda itebookobetjö̧. Sule chi̧wo̧dö tjöwö'yetjö otikwado̧ muchebö otidajejunöda ö̧jinobe, otiwökejunö, 'diökejunö. Ja̧danö itji̧ Isaacbi, ö'dö̧ Jacobbi jejenö tjö̧jinobe. Jobadöbi Dios yöbawö junö jö̧a̧linawö̧, Kwiteboduwi chiyocha, jö̧ba̧lö. Jo̧kwaijayonö jobadöbi ju'wedö tjitebonöda tjö̧jinobe chi̧wo̧dö tjöwö'yetjö otikwado̧da muchebö otidajejunöda, Abraham ö̧jinadanö.

Hebreos 11:9 ပူးပေါင်းရင်းမြစ်များ

Génesis 12:8

Ikenama jobetjö labebö 'yi̧jetö Abramma, öibajawö̧kwö mö'ösa'iju ju̧kwobekwö, Betel comunidadtjö ja̧wo̧ laebobekwö. Jobetjöma isa̧do̧tjö ejudanö debatö otidijetö. Jado̧ debatö otidajelöma ja̧wo̧ meajobekwö Betel comunidad ji̧jetö. Ja̧danö, ja̧wo̧ laebobekwö Ai comunidad ji̧jetö. Jobetjö, ju'wi juwö iyawemi otidijetö. Otidajo̧, Isabenö Jo̧ Dios chösödakwö, jö̧ba̧lö juwö iyijetö Isabenö Jo̧ Diosnö.

Génesis 13:18

Jejenö weiökwe Abramma isa̧do̧tjö otidinejuma ejatibö e'ewö 'yi̧jetö. 'Ya̧jo̧ Hebrón comunidad ö'öbönö ju̧kwijetö, towibiya owiawi ju̧kwena. Jobema jelo̧ itebo, Mamre mikwina. Abramma jobetjö otidijetö juwö iyawemi, Isabenö Jo̧ Diosnö ösödobö.

Génesis 13:3

Ikenama Neguevbetjö labebö ja'ö abiabö ȩwa̧jijadötö Betel nijibe. Ichibö 'yi̧jadötö Betel niji Ai niji 'da̧denö, ajayi isa̧do̧tjö o̧dodanö debatö otidö tjuju̧kwinobekwö.

Génesis 17:8

Abraham, bemi niji Canaán mikwemi, jelobetjö ichinadö kwö̧jaduwemima ökwönö, ökwötjö tupadanö jojodönöbi chiyakwo̧sa, ba̧kwȩlö̧jatebö ökwödö kwiteboduwi baibanö. Jao Abraham, ökwötjö tupadanö jojodöbi Tjuluwo̧ Dioschakwo̧sa — yöbawijetö Diosma Abrahamnöma.

Génesis 18:6

Ikenama Abrahamma eju okwa tebachibö webijetö Saranöma: —Sara, juluwanö emaji harina de trigo otiwa jawatjö, veintenö kilos jenanö. Ikenama pan yo̧bibö kwotido— webijetö.

Génesis 18:9

Ikenama jobadötjö bakwo̧ abebö a̧ja̧kwijetö Abrahamnöma: —¿Kwilekwo Saraja?— aebökwe: —Yada o̧do okwa— atadijetö Abrahamma.

Génesis 21:34

Ja̧ möle tupakwö ji̧jetö Abrahamma filisteos tjitebonö, lekwe.

Génesis 23:4

—Ötjöma jelobetjö ichina ökwödökwö jo̧sa. Ja̧danö atebaduwakwö: Mikwanö kwiyaduwotjö niji, chilekwonö chödo— abebijetö Abrahamma.

Génesis 25:27

Ja̧danö, Isaac i̧tji̧muma bötjachajadöma ida̧ökö damö ju̧kwijadötö. Abönö pöe Esaúma jwiinö pjuawa 'böawa waiso̧bina, ja̧danö, meje kweachakwawa ösödabina. Ja̧danö öjawo̧ Jacobma jejenö ji̧jökötö. Jo̧bama tjo̧'omanö yöba̧lo̧bina. Jo̧bama sule eju apetuda otidö ösödiabina.

Génesis 28:4

Ja̧danö, Diosma ökwönö, ökwötjö tupadanö jojodönöbi bemi niji iyakwo̧, Abrahamnö yöbawö ujuninadanö. Babema jelobetjö ichinadöda, ju'wedö tjitebonö ju̧kwadösa. Jo̧kwaijayonö ju'winö Diosma iyakobe bemi nijima ökwönö, ökwötjö tupadanö jojodönö kwiteboduwi baibanö— yöba̧lö junijetö Isaccma Jacobnö, Dios dösölö̧jinö edö pjaatakwa̧ jawa.

Génesis 31:25

Ja̧danö, Jacobma Galaad niji mö'ösa'iju jena o̧donö ji̧jetö, isa̧do̧tjö debatö otidajejunö. Labán, iteda ömöledö Jacobnö lubö ichajadöma jobe, Jacob ö̧jemi pjeanö isa̧do̧tjö debatö ejunö otidö ji̧jadötö.

Génesis 35:27

Ja̧danö, Jacobma ömöledökwö bajalianö ichibijadötö abe'do Isaac ö̧jobe, Mamre comunidadma. Jobema ju'wi imi Kiriat Arabat, jö̧ba̧lö mikwijetö. Ja̧danö babe molema ja̧ comunidadma Hebron mikwobe. Jobema Abraham, Isaac ajayinö tjuju̧kwinemi, jelobetjö ichajadö, ju'wedö tjitebonö ja̧nö.

Génesis 47:9

—Böjȩnö chö̧ji̧ma ciento treinta a̧yo, nöinömaökö. Cha'dödö lekwe tjö̧jinadanömaökö. Ja'yubeda chö̧ji̧jayonö, ötjöwe, usula emawö chö̧jinobe böjȩnöma— jö̧ba̧lijetö Jacobma faraónnöma.

Hebreos 6:17

Ja̧danö Diosbi jejenö i̧sebobö jö̧a̧linobe, jojodö tjöwaisachibinö, Isabenö Dios yöbawö ujuninadanö badekwachakobe, jo̧ba omukwati̧ balewachökönö, jö̧ba̧lö. Jo̧kwaobetjö̧ Diosma da'dödöminenö, Chiyakwo̧sa, jö̧ba̧lö, yöbawö junö jö̧a̧lena ju'wibi jö̧a̧linobe,Yöbawö junö jö̧ta̧li̧danö badekwachökötjö̧ma ötjödada lȩtebakwawakwo̧sa, jö̧ba̧lö. Jejenö Diosma i̧sebinobe, Yöbawö chujuni̧ma isabenö badekwachakobe, jö̧ba̧lö.