Hebreos 10:24 - Dios Iwene

²⁴ Ja̧danö chö̧ja̧wo̧dö, ökwödöma dömöledökwö ja̧nö domajadenö budekwabinö yödawakwawobö jo̧be, Dömöledönö ösödabikwawö dö̧jaduwo, bakwelajatebö pjabatö, jö̧ba̧lö.

Hebreos 10:24 ပူးပေါင်းရင်းမြစ်များ

Proverbios 29:7

Ju'wibi yötawa: Jweinö omukwato̧ma jwibadönö edö omukwatobe, idöbi wene tju̧juna̧lakwawitjö̧ma lȩekwa yöbawo̧nö yötjawobö jo̧be, balada jwiijayonö. Ju'wedönö, balada juna̧la̧dönö tjedi̧danö bakwemiinö tjedobö jo̧be. Jo̧kwaijayonö sulabenö omukwato̧ma jwibadönöma balada juna̧la̧dönö bakwemiinö omukwatokobe. Ja̧danö, jwibadöbi wene tju̧juna̧lakwawitjö̧ma lȩekwa yöbawo̧nö yötjawobö jo̧be jö̧ba̧lö la'akatjöda omukwatokobe.

Hechos 11:29

Ikenama Dios yöawi̧ yöbawo̧ Agaboma, jejenö yöawiawö̧: —Balada pjabatakwawö wedo— jö̧ba̧lijadötö Jesúsnö ösödadöma. Jejenö jö̧ba̧lajadö balada ko̧ko̧dijadötö, bakwo̧nökwena tjujuna̧li̧tjö Judea nijibe wetjobö.

Romanos 11:4

Jejenö yöawiökwe, ¿dakwö atadinada Diosma chömöledö? Baikwö laebobe Dios Elíasnö atadinama: Ökwödamaökö Elías, ju'wedöbi tjuju̧kwobe chiwene yöbawadöma. Ötjöma ömadö siete milnö 'da̧batö chujunijatö, chömöayedönöma. Jobadöma jojodö tjösödökwe o̧'wo̧ jawa Baal mikwo̧nö, bȩbachibö ösödöködö, jö̧ba̧lö laebobe Dios Elíasnö atadinama.

Romanos 12:15

Ja̧danö ju'wedö tjo̧'wo̧ ösöwanö tjö̧jenama, jobadökwö kwo̧'wo̧ ösöwanö ösödö kwö̧jaduwo, ja̧danö ju'wedö o̧'wo̧ tjo̧achö tjubudekwenama, jobadökwö kwubudekwaduwo.

1 Corintios 10:33

Jau chömöledö, ötjö ja̧bö chö̧ji̧danö ja̧bö kwö̧jaduwo. Ötjöma okobe jwiinö ja̧bö chö̧ji̧ma, okobe deinö jojodö tjösödo jö̧ba̧lö, ja̧bö chö̧jobe chömöledö. Ja̧danö, ötjöda otiwanö chö̧jakwa̧ chomukwatökö chömöledö, ju'wedö otiwanö tjö̧jakwa̧ chomukwatobe, jobadöbi tjö̧jibo jö̧ba̧lö.

1 Corintios 9:22

Ja̧danö, tjo̧'wo̧ luwo̧nö me'dawadökwö chö̧jenama, cho̧'wo̧ luwo̧nö me'dawo̧danö ja̧tobe, jobadönö tjö̧jibanö pjabatö. Jau chömöledö, okobe deinö jojodökwö chö̧jenama, jobadödanö ja̧tobe, jobadönö tjö̧jibanö pjabatö. Okobe jwiinö ja̧to jö̧ta̧li̧ ja̧tobö chisakwobe chömöledö, jobadötjö ju'wedö tjö̧jibo jö̧ba̧lö.

2 Corintios 8:8

Chömöledö, jejenö yötawi̧ma, weawa baibanöma yötawökö, iyaduwi jö̧ba̧lö. Jau chömöledö, ju'wedö ösödabikwawö tjiyi̧ wene yötawajabe, jobadönö a̧ja̧kwö, bakwainö jobadö ösödabikwawö tjiyi̧danö ökwödöbi ösödabikwawö kwiyaduwojobö chöwaisakobetjö̧.

Gálatas 5:13

Chömöledö, Diosma ökwödönö jwöinobe, Moisés iwȩyudinatjö kwö̧jibaduwinö, ¿jö̧tö? Jo̧kwaijayonö, Aaa, Moisés iwȩyudina ömöayedödanöböködö dö̧jobetjö̧, jwaikwöda dösödi̧ jawada ja̧bö dö̧jo jö̧ba̧löma kwomukwataduwa chömöledö, kwömöledöduwi Jesúsnö ösödadönö ösödabikwawö ja̧nö, tjömöayedödanö ja̧nö pjabatakwawö kwö̧jaduwo chömöledö.

Gálatas 5:22

Jo̧kwaijayonö Dios O̧'wo̧ Luwo̧ do̧'wo̧ luwo̧nö otidi̧ma wainö ji̧ chömöledö. Baikwö yötawa: Dios O̧'wo̧ Luwo̧ otidi̧ma chömöledö, biya̧: ösödabikwawi̧bi, tjo̧'wo̧ ösöwi̧bi, tjo̧'wo̧ luwo̧nö wene jwiinö ja̧kwawabi, tjo̧'wo̧ 'dibachibö ja̧kwawabi, jojodönö dösölö̧jinö ja̧danö otiwanö ja̧awabi, jö̧tja̧li̧danö ja̧awabi,

Gálatas 5:6

Jau chömöledö, Cristo Jesúskwö dötewadö ja̧nö, Dios edemi dötade bajalesado̧ 'wibekwadö dö̧ji̧bi, 'wibekwöködö dö̧ji̧bi mikwawokobe chömöledö, ju'wida mikwawi̧ma. Jau chömöledö, Dios edemi jo̧ba yöawi̧ dösödi̧da mikwawi̧ma, ja̧danö dömöledö Jesúsnö ösödadönö ösödabikwawö ja̧nö di̧sebobe Dios yöawi̧ dösödi̧ma.

Gálatas 6:1

Chömöledö, wanedö yötawa: Ökwödötjö bakwo̧ sulabenö ja̧bö meitjö̧ma, ökwödö Dios O̧'wo̧ Luwo̧ yöawi̧ a̧ja̧kwadöma jo̧banö dösölö̧jinö pjabatö kwa̧lapedaduwonö. Ja̧danö, jejenö kwa̧lapedaduwenama, omukwatönö kwö̧jaduwo, jo̧ba sulabenö ja̧i̧danö ökwödöbi ja̧köbaduwobö kwösödaduwapji jö̧ba̧lö.

Colosenses 3:16

Chömöledö, Cristo jawa wene kwomajadeduwinö omukwatö kwö̧jaduwo, jo̧kwajabetjö̧ waisanö yökawakwawaduwo, ja̧danö waisanö kwöba̧ja̧dakwawaduwo kwömöledöduwikwö. Ja̧danö otiwanö pjabato̧ja jö̧ba̧lö, Diosnö ösödö lo̧köbaduwo, Salmos jawa lo̧awabi, Jesús jawa lo̧awabi, Dios O̧'wo̧ Luwo̧tjö öba̧ja̧di̧ lo̧awabi.

1 Tesalonicenses 5:11

Ja̧danö, jejenö jo̧betjö̧, ida̧ökö ja̧bö kwö̧jaduwi̧danö, tupakwö pjabatakwawö yöka̧lakwawaduwo, ja̧danö kwujuluwachibaduwanö yökawakwawaduwo.

2 Tesalonicenses 3:9

Chömöledö, ökwödönö yöbawö dö̧jobetjö̧, isabenö kwite'ada̧laduwobö wedo jö̧da̧linobe, jo̧kwaijayonö di̧sebi̧danö ökwödöbi ja̧bö kwö̧jaduwo jö̧ba̧lö, otidö dö̧jijatö.

1 Timoteo 6:18

Ja̧danö, balada luwedönö otiwanö ja̧tjobö yöbawidönö, baikwö wanedö yötawa: Otiwanö ja̧awa luwedö baibanö tjuju̧kwobö yöbawidönö, a̧'dȩlökönö ju'wedönö pjabatö.

Tito 2:4

Jau Tito, jobadö ya̧dö damöbedöma ya̧dö ina möayedödanö ja̧dönö tjöba̧ja̧do baikwö: Bakwujukwena otiwanö tjilekwekwena ösödö tjö̧jobö, ja̧danö otiwanö tji̧tji̧mukwena ösödö tjö̧jobö,

Tito 3:8

Jau Tito, biya̧ yötawaja̧ma, jweinö yötawajabe. Tito, biya̧ ökwönö yötawaja̧ma, Jesúsnö ösödadönö yökawobö chösöda. Ja̧danö, otiwanö tja̧ja̧kwobö webidönö, jobadö Diosnö ösödadöma jwaikwöda otiwanö ja̧awa ja̧badö batjibanö tjuju̧kwakobetjö̧. Jejenö ja̧bö ja̧kwawama otiwa, ja̧danö jojodönö pjaatakwawa ji̧.

Hebreos 13:1

Chömöledö yötawaduwakwö. Babe kwö̧ja̧wo̧döduwinö ösödabikwawö kwö̧jaduwi̧danö jemi tupakwöbi jwaikwöda ösödabikwawö kwi̧'yaduwo.

Hebreos 13:3

Ja̧danö, kwö̧ja̧wo̧döduwi ka̧lena ba̧kwawejunö ba̧jadönö pjakataduwo. Jobadönö kwo̧'wo̧duwi tjo̧bekwö edö, Ökwödöbi domajade okwanö jobadökwö bakobe usula emawö tjö̧baji̧danö ka̧lena ba̧kwawejunö ba̧jadösa, jö̧ba̧lö. Ja̧danö, ju'wedö usula emawadönöbi jejenö kwomukwataduwo, Jobadökwö bakobe usula tjemawi̧danö usula emawadösa domajade okwanö, jö̧ba̧lö. Chömöledö, ökwödöbi jojodököbaduwobetjö̧ kwöwaisaduwa, ja̧ usula emawakwawama jwiinö nii̧, jö̧ba̧lö.

Hebreos 3:13

Isabenö, tjöbebalö̧jönö ökwödödada kwite'ada̧laduwobö jo̧be chömöledö. Ja̧danö, bakwöta mölekwena dö̧ja̧wo̧dönö pjabatö yödawobö jo̧be, ina böjȩnö dö̧jayi. Pjabatö yödawo tjo̧'wo̧ tjujuluwachibanö, ökwödötjö ju'wedöma, tjuubiya 'dibö ja̧nö, jelobekwö idöda sulabenö tjomukwati̧da omukwatö tji̧'yapji jö̧ba̧lö. Chömöledö, wanedö yötawaduwakwö, suli̧ wanedöma: Suli̧ma omöna yöbawo̧ yöa̧li̧danö ji̧, jojodönö öbibö jelobekwö omukwatö tji̧'yobö. Jo̧kwaobetjö̧ kwö̧ja̧wo̧dönö yöbawö pjakataduwobö jo̧be, suli̧ma ökwödötjö ju'wedönö tjo̧'wo̧ luwo̧nö jelobekwö tjomukwatobö öibapji jö̧ba̧lö, Diosnö katjatibobö.

1 Juan 3:18

Chö̧ja̧wo̧dö chösödawö̧, sule yöba̧lödama yöda̧laduwoko, Dios ile niebi̧danö dö̧ja̧wo̧dönö ile nibebö dö̧jaduwo, jö̧ba̧löma. Yöba̧lödama yöda̧laduwoko, i̧seböbi di̧sebaduwo, dö̧ja̧wo̧dönö pjabatö do̧'wo̧ luwo̧nö isabenö lȩlö̧jino edö.