Hebreos 1:2 - Dios Iwene

^2-3 Jau chömöledö, damötjö da'dödöminema Dios yöawi̧ yöbawadö yötjawi̧ a̧ja̧kwijadötö. Jo̧kwaijayonö ökwödö Dios yöawi̧ da̧ja̧kwi̧ma damötjö da'dödömine tja̧ja̧kwinatjö o̧penönö mikwawi̧ wene da̧ja̧kwijatö, Dios Itji̧da yöawina da̧ja̧kwobetjö̧. Ja̧ yöawina da̧ja̧kwinama jwiinö mikwawi̧ yöawina. Chömöledö, Diosma böjȩkwö webijetö iteda Itji̧nö, iteda yöawi̧ yöawobö jojodönö, Dios Itji̧ ö̧jinanö ju̧kwadönöma. Ja̧danö, ökwödöbi, jobadötjö tupadanö jojodöma, Dios Itji̧ yöawi̧ tja̧ja̧kwina da̧ja̧kwijatö. Ökwödöma jejenö Dios yöawi̧ a̧ja̧kwinadösa. Da'dödömine tja̧ja̧kwinadanömaökö, Dios Itji̧ yöawina weneda da̧ja̧kwijatö. Ja̧danö chömöledö, Dios Itji̧nö yötawaduwakwö. Dios Itji̧ma isabenö jwiinö inesö jo̧. Jo̧bama Dios 'da̧batö ujuninökwe, okobe jwiinö böjȩnö ju̧kwi̧bi, mölejȩnö ju̧kwi̧bi la'aka luwo̧ baibanö. Isabenö jo̧ba, okobe jwiinö la'aka luwo̧ baibanö Dios 'da̧batö ujuninökweda jojodönö otiwanö pjabatina, dusuli̧ma Dios söbebö loobö. Jejenö pjaataja̧ ikena böjȩtjö mölejȩbekwö kabekwajo̧ ichibö inesö ö̧bena bamatijetö, Jwiinö Juluwo̧ Dios ö̧bemi öwaisobekwöchobe. Isabenö chömöledö, Dios Itji̧, mölejȩnö inesö ö̧bena bo̧ma jwiinö inesö bo̧. Ja̧danö, ju'wibi yötawaduwakwö Dios Itji̧nö, Dios damötjö 'da̧batö ujuninökwe okobe jwiinö la'aka luwo̧ baibanö jo̧nöma. Okobe jwiinö böjȩnö ju̧kwi̧bi, mölejȩnö ju̧kwi̧bi Diosma iteda itji̧nötjö otidijetö. Ja̧danö, okobe jwiinö böjȩnö ju̧kwi̧ma Dios Itji̧ iteda ujulunö webo̧ ina ju̧kwo. Isabenö chömöledö, Dios Itji̧, okobe jwiinö otidina, okobe jwiinö ina ju̧kwobö webo̧ma jwiinö inesö jo̧. Ja̧danö chömöledö, jo̧ba Dios Itji̧ma jwiinö otiwo̧. Jo̧bama bakwainö Diosdanö jo̧. Dios jwiinö otiwi̧danö jo̧ba Dios Itji̧bi bakwainö jwiinö otiwo̧. Ja̧danö, Dios Itji̧ma Dios jwiinö otiwi̧danö bakwainö jo̧obetjö̧, okobe jwiinö Dios jwiinö otiwi̧ma jo̧batjöda salöinö idejati̧danö i̧sebinobe. Isabenö chömöledö, Dios Itji̧, Dios jwiinö otiwi̧danö otiwo̧ma ökwödönöma Dios otiwi̧ i̧sebo̧. Ja̧danö, ökwödö dö̧ji̧ma jo̧ba Dios jwiinö otiwo̧ Itji̧tjö, jwiinö inesö jo̧tjöda Dios yöawina a̧ja̧kwinadösa.

Hebreos 1:2 ပူးပေါင်းရင်းမြစ်များ

Génesis 49:1

Ikenama Jacob jwöbijetö i̧tji̧munö jo̧ba ö̧jobekwö tjichobö. Ichajadönö webijetö: —Chi̧tji̧mu, ko̧ko̧kwibö ja̧duwi ötjö yötawi̧, ökwödönö ju'winö baledakwa̧ yötawi̧ kwa̧ja̧kwaduwo.

Isaías 2:2

—Yadakwö löji möle baibenama, Isabenö Jo̧ eju ja̧'o mösa'oma, isabenö nöinö mikwawa'o ja̧kobe, okobe jwiinö mösa'ijutjö, Dios eju ja̧'o mösa'oda inesö la'aka mösa'o ja̧kobe. Jau, ja̧ mösa'oda kabebö ujunakobe Diosma, okobe jwiinö jele'otjö bajalekwönönö inesö mikwawa'o mösa'o baibanö, ja̧danö bö̧jȩ bakwemeachibanö ju̧kwadö tjitebokwena jojodöma ja̧'o jo̧bekwö tji̧'yakwedö.

Isaías 44:24

Baikwö yöa̧lobe ökwödönö tjöbeba̧lö pjabato̧, ina kwojo'do jukwa'wo okwa ina kwö̧jaduwayi dadö otidina Isabenö Jo̧ Diosma: Ötjöma okobe jwiinö otidina Isabenö Jo̧ Diossa. Ötjöda mölejȩ sedatö nöninasa, ötjöda jo̧dawa'ye bö̧jȩbi dadö otidinasa.

Isaías 45:12

Ötjödasa bö̧jȩ otidinama, ja̧danö otidajo̧, ötjödasa jojodönö chotidijatö, bö̧jenö tjö̧jakobetjö̧. Ötjödasa mölejȩ sedatö nöninama, ja̧danö ötjödasa si̧li̧'idö tjö̧lakwena tjö̧lobö webinama.

Isaías 45:18

Jau chömöledö, Diosda bö̧jebi, mölȩjȩbi otidinama, ja̧danö bö̧jȩ otidö ujuninenama, jojodö deö̧jȩ baiboböma otidö ujuninokobe, jojodö tjuju̧kwakwemi baibo jö̧ba̧lö, bö̧jȩ otidö ujuninobe. Ja̧danö, jobekwö otidö junina Isabenö Jo̧ Diosma, baikwö yöawobe: Ötjödasa Isabenö Jo̧ma, jelo̧ ötjödanöbo̧ma deobe.

Daniel 10:14

Jau Daniel, ökwö kwömöledö Israel jojodönö 'dö̧ibaji̧ möle baledakwa̧ kwöwaisachibobö yöbawö chichajabe, kwedina jawama 'dö̧ibaji̧ möle baledakwa̧ kwedinobetjö̧— jö̧ba̧lö yöawinobe.

Daniel 2:28

Jo̧kwaijayonö mölejȩbe Dios ö̧jobe, jojodö wajwitji̧ jawa i̧sebo̧ma, ja̧danö jo̧bama ökwö inesö la'aka luwo̧ Nabucodonosornö i̧sebinobe 'dö̧ibaji̧ möle baledakwa̧ma. Kamapjonö ba̧nö kwi̧'wi̧dikwinabi, ju'wi kwi̧'wi̧didanö kwedinabi baikwö yötawa:

Mateo 13:39

ja̧danö sula'wosa'ye ikwö juno̧nö badekwachi̧ma, Awetjanö badekwachobe. Ja̧danö, batjonö wa̧ji̧ emö tjotidi̧ badekwachi̧ma, 'dö̧ibaji̧ möle jawa badekwachobe, ja̧danö batjonö wa̧ji̧ emö otidadönö badekwachi̧ma, ángelesdönö badekwachobe.

Mateo 17:5

Pedro ina jejenö yöa̧lonö, ojwiyo'wo dewinö dejata'wo jobadö tjöwamenö öwawachinobe, ja̧danö ja'wotjö̧ iwene ökwöinobe baikwö ökwöi̧ma: —Bitema ötjöda chösödökwe chitji̧, cho̧'wo̧ ösöwanö chedobe jo̧banö. Jo̧banö kwa̧ja̧kwaduwo— jö̧ba̧lö iwene ökwöinobe.

Mateo 21:38

Jejenö omukwatö, itji̧nö weinobe, jo̧kwaijayonö, batjo luwo̧ itji̧nö tjedenama, batjo otidadöma yötja̧lakwawinobe idödada: Bitema iteda abe'do woaja̧ okobe, abe'do otidaja̧ omudajibakwo̧, jo̧kwajabetjö̧ bitenö kwabö loditjö̧ma, biyu öbatjoajayuma ökwödöda döbatjo baibakobe, jö̧ba̧lö omukwatakwawö yötja̧lakwawinobe.

Mateo 26:63

Jo̧kwaijayonö, Jesúsma atadökönö ö̧jinobe. Atadökönö ö̧jiökwe, ö'weje pjabatadö la'aka tjuluwo̧ma Jesúsnö weinobe: —'Yaba̧lo̧ Dios iminö jweinö kwatadobö wetakwö: ¿Ökwöma Dios weakwo̧ jö̧a̧linökwe, Dios itji̧köbiji̧?— jö̧ba̧lö.

Mateo 28:18

Ikenama Jesúsma jobadö tjö̧jobekwö ichö yöawinobe: —Mölejȩtjöbi, böjȩtjöbi okobe deinö la'aka tjuluwo̧ batibanö ja̧ajabe Diosma,

Mateo 3:17

Ja̧danö, mölejȩbetjö Dios iwene ökwöinobe, baikwö ökwöi̧ma: —Bitema ötjöda chösödökwe chitji̧. Cho̧'wo̧ ösöwanö chedökwe bitema— jö̧ba̧lö ökwöinobe.

Marcos 1:1

Ötjöma, Marcos mikwo̧sa. Biya̧ wene chiwȩyuda, otiwa jawa wene yöbawö. Ja̧ otiwa jawa wenema Jesucristo ö̧jina wene, Dios Itji̧. Abönö yötawa, ja̧ otiwa jawa wene ajayi baledina.

Marcos 12:6

Ikenama la'aka luwo̧ wea̧linawö̧tjöma okobema bakwo̧da, la'aka luwo̧ iteda itji̧da, ile niebökweda, ji̧bijetö. Jo̧kwaobetjö̧, la'aka luwo̧ma, Chitji̧nö otiwanö omukwatö kwakwatjökena, jö̧ba̧lö, webijetö jo̧banö, itji̧nö, uba batjo otidadönötjö emajobö.

Marcos 12:7

Jo̧kwaijayonö, la'aka luwo̧ itji̧ ichobe edö, uba batjo otidadöma jö̧ba̧lijadötö, Ite yai icho̧ma la'aka luwo̧ itji̧, abe'do woaja̧ okobe biyu uba batjo emakwo̧. Kwabö lodonö, ökwödöda biyu uba batjo la'aka luwedö badibakobetjö̧, jö̧ba̧lö.

Juan 1:10

Ja̧danö, dewinö jo̧ma böjȩnö ö̧jena böjȩnö ju̧kwadöma tjöwaisachibinokobe jo̧banöma, Bitema Dios, jö̧ba̧löma. Böjȩbi, böjȩnö ju̧kwadönöbi otidinajayonö tjöwaisachibinokobe, Jo̧bada, jö̧ba̧löma.

Juan 1:14

Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.

Juan 1:3

Ja̧danö jo̧ba, Dios Iwene Jo̧, jö̧ba̧lö, ötjabökwema okobe jwiinö otidijetö. Jo̧ba otidinökötjö̧ma ja'yubebi batibokoinobe.

Juan 13:3

Ja̧danö, Jesúsma omukwatinobe, Chabe'doma ötjönö okobe jwiinö ujulu iyo̧, jö̧ba̧lö. Chabe'do itebobetjö ichinasa. ja̧danö, jo̧ba ö̧jobekwö chȩwa̧jakwo̧sa, jö̧ba̧lö, omukwatinobe Jesúsma.

Juan 13:32

Ja̧danö, bakobe, ötjöma Dios otiwi̧ chi̧sebena Diosma ötjö chotiwi̧ i̧sebobe. Babeda Diosma ötjö chotiwi̧ i̧sebobe— yöawinobe.

Juan 15:15

Belöma, Chömöayedö, jö̧ba̧löda ötabijatö ökwödönöma. Jo̧kwaijayonö babema jejenöma ötabököwö̧ja. Babema, chömöledö, jö̧ba̧löda, ötabiwö̧ja. Kwöwaisaduwa, bakwo̧ uluwo̧ omukwatö ja̧akwa̧ma wajwiobe. Jo̧kwaijayonö ökwödö ötjö chömöledököbaduwobetjö̧ ötjö omukwatö ja̧takwa̧ma kwöwaisaduwobe, ökwödönö yötawobetjö̧. Jau chömöledö, okobe jwiinö Chabe'do ötjönö yöawi̧ma ökwödönö yötawobe kwöwaisachibaduwobö— yöawinobe—.

Juan 16:15

Ja̧danö, okobe jwiinö ötjö chomukwati̧ma bakwainö Chabe'do omukwati̧danö chomukwatobe. Jo̧kwaobetjö̧ yötawatö. Dios O̧'wo̧ Luwo̧ma ötjö yötawina, ötjö ja̧tina öwaitjöda yöawakobe ökwödönöma— yöawinobe Jesúsma iteda öba̧ja̧di̧ waisachadönöma.

Juan 17:2

Chabe'do, ökwöma chujulu iyö böjȩ jojodönö webo̧ batibanö pjakatinobetjö̧, jejenö ateba, ötjö jwiinö chotiwi̧ma kwi̧sebo, jö̧ba̧lö. Chabe'do, ökwöma chujulu iyö pjakatobetjö̧ böjȩ jojodötjö kwiyinawö̧nö tjö̧jibinö pjatatobö jo̧be, ba̧kwȩlö̧jatebö ja̧kwawa tjujuna̧lobö.

Juan 3:16

Diosma okobe deinö böjȩnö ju̧kwadönö jwiinö ile niebobetjö̧ itji̧nö iteakwo̧nöda weinobe böjȩkwö. Ja̧danö, itji̧ iteakwo̧nö weinobe, jo̧banö ösödadöma, Bitema dö̧jibinö pjabato̧, jö̧ba̧lö, ba̧kwȩlö̧jatebö tjuju̧kwobö Dioskwö. Ja̧danö, jobadönö Dios lȩebi̧tjö baledökönö ba̧kwȩlö̧jatebö tjuju̧kwakwedö Dioskwö.

Juan 3:25

Ja̧danö, Juan ömöayedöma jelo̧ judío jojokwö yötja̧lakwawinobe, judío jojodönö tjidichawobö weina jawa, Dios öba a'otjö otiwanö tjö̧jobö weina jawama. Juan ömöayedökwö jelo̧ judió jojodö wainö omukwatö yötja̧lakwawinobe.

Juan 5:26

Ina yöawinobe: —Ötjö Chabe'doma jojodönö ba̧kwȩlö̧jatebö ja̧kwawa iyo̧. Jo̧bama la'akatjöda ji̧naobetjö̧, jo̧batjöda laebinobe ja̧kwawama. Ja̧danö, jo̧bama weinobetjö̧, ötjö, iteda Itji̧bi, bakwainö itedadanö, ba̧kwȩlö̧jatebö ja̧kwawa iyo̧sa.

Juan 5:27

Dios, ötjö Chabe'doma, ötjönö kabebö öwaninobe jojodönö lȩtebobö. Ötjöma, jojo baibanö jeminökwechobetjö̧ Chabe'doma ötjönö kabebö öwaninobe jojodönö lȩtebobö.

Juan 9:29

Dios Moisésnö yöawinama döwaisa. Jo̧kwaijayonö ¿jo̧ba Jesús? Jo̧ba ichinabi wajwibadösa—jö̧tja̧liökwe:

Hechos 10:36

Kwöwaisaduwa, Diosma yöbawijetö iteda otiwa jawa wene ökwödönöda, Israel jojodönöda. Ja̧ wenema, okobe jwiinö Duluwo̧ Jesucristo ö̧jina wene. Jesucristo, ökwödö Dioskwö otiwanö dichibanö pjaatina wene, ja̧ wenema.

Hechos 2:17

Jo̧bama baikwö yöbawö wȩyudijetö: Baikwö yöawobe Diosma ökwödö judío jojodönöma: Böjȩ ina 'dö̧ibajökenanö Cho̧'wo̧ Luwo̧nö wetocha jojodökwö ö̧jobö. Ökwödötjö tupadanö jojodönöma ötjö yötawi̧ otiwanö yöbawadö batjibobö wetocha Cho̧'wo̧ Luwo̧nö, jobadökwö ö̧jobö. Ja̧danö, Cho̧'wo̧ Luwo̧ jobadö tjo̧'wo̧ luwo̧nö öba̧ja̧da̧lonö ötjö yötawi̧ yötjawakobe. Ja̧danö, möayedö ömadönöma ötjö chösödi̧ tjöwaisachibobö tji̧'wi̧di̧danö tjedobö chi̧sebakobe. Ja̧danö, damö ömadönöma ötjö chösödi̧ tjöwaisachibobö tji̧'wi̧dinö tjedobö chi̧sebakobe.

Romanos 1:4

Jojo baibanö jeminökwenöma, Diosma iteda ujulunö i̧sebinobe, Bitema ötjöda chitji̧, jö̧ba̧lö. Baikwö i̧sebinobe chömöledö: Yemidanö woawatjö tjeachajinö ja̧böda i̧sebinobe, Jesúsma ötjöda chitji̧, jö̧ba̧lö. Jau chömöledö, ökwödö Duluwo̧ Jesucristonöda tjeachajinö ja̧inobe Diosma: Bitema ötjöda chitji̧, jö̧ba̧lö.

Romanos 8:17

Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.

1 Corintios 2:7

Jau chömöledö, yödawi̧ wene waisakwawa ji̧ma, Dios jawa waisakwawa ji̧da böjȩ jawamaökö, ja̧danö la'akatjöda jojodö wajwitjina wene. Jau chömöledö, jojodö la'akatjöda wajwitjinajayonö, böjȩ otidakwa̧ abönö Diosma ida̧ökö omukwatö ujuninobe, ökwödönö otiwanö pjaatobö.

1 Corintios 8:6

Jo̧kwaijayonö ökwödö Jesúsnö ösödadöma Duluwo̧ Diosma bakwo̧da, Abe'do Diosda. Jo̧bada okobe jwiinöbi, okobe deinöbi otidina, ja̧danö jo̧ba ösödi̧danö dö̧jo jö̧ba̧lö döjobe. Ja̧danö, Duluwo̧ Jesucristoma bakwo̧da. Jo̧banötjö okobe jwiinö otidinobe Diosma, ja̧danö jo̧ba Jesucristotjöda isabenö ja̧kwawa dujuna̧lobe.

Gálatas 4:4

Jo̧kwaijayonö, Dios badedö ujunina möle badekwachenama, Diosma iteda Itji̧nö weinobe. Jo̧bama jojosuju jitji̧ baibanö ichinobe, ja̧danö jo̧babi Moisés iwȩyudinadanö ja̧o jö̧a̧linobe.

Efesios 1:10

Ja̧danö, Diosma baikwö omukwatö webijetö Jesúsnöma. Ju'winö, okobe jwiinö ajayinö omukwatö chösödina badekwachena, Cristoma okobe jwiinö böjȩ jawabi, mölejȩ jawabi, mölejȩnö ju̧kwadöbi, böjȩnö ju̧kwadöbi tjuluwo̧ baibakwo̧. Jejenö omukwatö webijetö Diosma, Cristonöma.

Efesios 3:9

Ja̧danö, Diosma weinobe ötjönöma okobe jwiinö damötjö tojö junö omukwatinama labebö lobö yötawobö okobe deinö jojodönöma. Chömöledö, Diosma, okobe jwiinö otidina ¿jö̧tö? Ja̧danö, iteda tojö ujuninama tjo̧wi̧, labebö lobö yöbawo̧sa, jojodö tjöwaisachibanö. Jejenö yötawobö weinökwesa.

Deuteronomio 18:15

—Kwuluwo̧duwi Isabenö Jo̧ Dios ökwödönö yöawobö jö̧a̧lenama, jobadöjayedönötjö̧ yöawökakobe chömöledö. Ökwödönö yöawobö jö̧a̧lenama, ökwödötjö bakwo̧ iteda yöawi̧ yöbawo̧nö weakobe, ötjö Moisesja̧yo̧nö, ökwödönö Dios yöawi̧ yötawi̧danö yöawobö. Ja̧danö, jo̧ba Dios yöawi̧ yöawenama, isabenö jo̧ba yöawi̧ kwa̧ja̧kwaduwobö ja̧kobe chömöledö.

Deuteronomio 31:29

Jobekwö yötawobe ökwödönö chömöledö, isabenö ö'wö batibaja̧ okobe sulabenö ja̧köbaduwakwa̧ chöwaisobetjö̧. Jau chömöledö, ökwödönö chöwaisa, –Ö'wö batibaja̧ okobe isabenö sulabenö ja̧köbaduwakwedöja, jweinö ja̧bö kwö̧jaduwobö yöbawö wetijayonö, jalachibö wainö ja̧köbaduwakwedöja, –jöba̧lö chöwaisa. Ja̧danö ju'wibi chöwaisa, jejenö Isabenö Jo̧ öpöjödi̧ jawa sulabenö ja̧köbaduwiökwe, ökwödönö ödameakwakwo̧ Diosma, ja̧danö ökwödönö ödameakwobetjö̧ nöinö wene kwöbaledaduwakwedöja, —jö̧ba̧lö yöawinobe Moisesma, israel jojodönö.

Deuteronomio 4:30

Jau chömöledö, okobe jwiinö yötawaja̧ jawa baledenama, jwiinö kwo̧'wo tjo̧bekwö usula emawö kwö̧jaduwakwedöja, ja̧danö kwo̧'wo tjo̧bekwö ja̧nö, tjebachajö kwuluwo̧duwi Isabenö Jo̧ Diosnö kwösödaduwakwedöja, ja̧danö wei̧ kwa̧ja̧kwaduwakwedöja.

Hebreos 1:8

Ja̧danö, jejenö Diosma ömöayedö ángelesdönö yöawijayonö wainö yöawobe iteda Itji̧nöma. Baikwö laebobe Dios iteda Itji̧nö jö̧a̧lina: Isabenö ökwöma Diosja. Ja̧danö, ba̧kwȩlö̧jatebö jojodönö webö kwö̧jakwo̧ja. Isabenö jweinöda omukwatö webö kwö̧jakwo̧ja.

Hebreos 11:3

Chömöledö, Diosnö do̧'wo̧ döwana̧lobetjö̧ döwaisobe, Okobe jwiinö böjȩnö ju̧kwi̧bi, mölejȩnö ju̧kwi̧bi Dios jö̧a̧li̧tjöda baibinobe, jö̧ba̧lö. Ja̧danö böjȩnö ju̧kwi̧, mölejȩnö ju̧kwi̧, okobe jwiinö dedi̧ma ju'wi dedi̧ jawatjö baibinokobe. Okobe jwiinö dedi̧ma Dios jö̧a̧li̧tjöda baibinobe, dedökö jawatjöda. Jejenö döwaisa chömöledö, Diosnö do̧'wo̧ wana̧lö dö̧jobetjö̧.

Hebreos 3:6

Jo̧kwaijayonö Cristoma ömöayo̧nötjö o̧penönö inesö jo̧. Isabenö, jo̧bama Dios Itji̧. Ja̧danö, jo̧bama Dios i̧tji̧mu babibinadö tjuluwo̧. Ja̧danö, jobadönö otiwanö te'ada̧lo̧. Wanedö yötawa: Ökwödö, okobe deinö Cristonö ösödadöma o̧dodanö, Dios otidinejudanö döwanekwachobe. Ja̧danö Cristo, Dios Itji̧ma, Dios otidineju la'aka luwo̧danö jo̧, ökwödö Duluwo̧. Isabenö chömöledö, ökwödöma Dios otidinejuda wanekwachadösa yebabökönö jwaikwöda di̧'yitjö̧ma, Diosnö do̧'wo̧ wana̧lö. Jau chömöledö, ökwödöma Dios otidinejuda wanekwachadösa jwaikwöda Diosnö do̧'wo̧ wana̧lö di̧'yitjö̧ma, do̧'wo̧ luwo̧nö ösöwö, Cristoma dö̧jibinö pjaatinobetjö̧ Dios i̧tji̧mu babibinadösa, ja̧danö Dioskwö ba̧kwȩlö̧jatebö dö̧jakwedösa, jö̧ba̧lö.

Hebreos 4:14

Jo̧kwaobetjö̧ chömöledö, jwaikwöda di̧'yaduwo, domajadenö 'diinö do̧tjati̧danö, Ökwödöma Jesúsnö ösödadösa, dö̧jibinö pjabato̧nö, jö̧ba̧lö. Jejenö di̧'yobö jo̧be chömöledö, Jesúsda Diostjö jojodötjö ö'weje la'aka pjabato̧ baibanö ö̧jobetjö̧. Jo̧ba mölejȩbekwö kabekwachajinama Dios öba a'o jo̧.

Hebreos 5:8

Jo̧kwaijayonö ¿tajawedö Jesús usula emawobö weinada? Yötawaduwakwö chömöledö. Diosma Jesúsnö weinobe Jesús öwaisachibobö, Dios wei̧ cha̧ja̧kwobö jo̧be, jwiinö labi̧ wei̧bi, jö̧ba̧lö. Jesúsma, Dios Itji̧jayonö öwaisachibinö ichibinobe, Dios wei̧ jwiinö a̧ja̧kwi̧ i̧sebö, towisa'onö la̧nö wobö.

Hebreos 7:28

Jo̧kwaobetjö̧ döwaisachibobö jo̧be, Isabenö Jesúsma ju'wedö Diostjö jojodötjö ö'weje pjabatinadö, Dios ajayinö webö 'da̧batö ujuninawö̧nötjö o̧penönö mikwawo̧, jö̧ba̧lö. Jobadöma jojodö. Suli̧ juna̧linadö. Jo̧kwaijayonö babema, Dios ajayinö weinatjö baikwöma Dios iteda iminö 'da̧batö ujuninobe iteda Itji̧nö, Jesúsnöma. Diosma iteda iminö Jesúsnö 'da̧batö ujuninobe ajayinö Diostjö jojodötjö ö'weje pjabatadö tjotidena teachobö. Ja̧danö, jo̧ba Jesúsma jwiinö otiwo̧. Suli̧ma yelösöda jwibo̧. Ja̧danö, jo̧banöda Diosma iteda iminö 'da̧batö ujuninobe, ba̧kwȩlö̧jatebö suli̧ jwibo̧nöma, Diostjö jojodötjö ö'weje la'aka pjabato̧ baibanö. Isabenö chömöledö, Jesúsma ajayinö Diostjö jojodötjö ö'weje pjabatinadönötjö o̧penönö mikwawo̧. Ja̧danö, jo̧ba Diostjö jojodötjö ö'weje la'aka pjabato̧ baibanö jo̧ma otidobe Dios 'yayi̧ balekwa yöbawö ujunina, o̧penönö yöbawö ujuninama jamatö 'yo̧bö.

Hebreos 9:26

Isabenö chömöledö, Cristoma yemidanöbi, yemidanö ökwösobu o̧ba bakwabakwena ebawö woobö ji̧tjö̧ma, yelösöda, böjȩ otidina möletjö babe baibanö usula emawobö jȩna. Jo̧kwaijayonö yemidanöbi yemidanöbi usula emawökönö Cristoma bakwötanöda böjȩkwö ichinobe, Dios ajayinö yöbawö ujunina 'dö̧ibaji̧ mölema. Ja̧danö, böjȩkwö ichinobe woobö, iteda ökwösobu ebawö, iteda bakwötanöda iyawö dusuli̧ söbebö loobö.

1 Pedro 1:20

Ina böjȩ otidapji, Diosma omukwatö ujuninobe Cristoda dö̧jibinö pjaatobö chömöledö, ja̧danö babe ökwödö 'dö̧ibaji̧ möle ju̧kwadönö i̧sebinobe, jo̧banö ösödö kwö̧jibaduwobö.

2 Pedro 3:3

Jau chömöledö, inesö kwöwaisaduwobö ji̧ma biya̧: 'Dö̧ibaji̧ mölema, sulabenö obadö tjichakobe, idöda tjösödi̧ jawada ja̧bö ju̧kwadöma. Jobadöma ökwödönö obö

Judas 1:18

Baikwö yötjawinobe ökwödönö: 'Dö̧ibaji̧ möle sulabenö obadö tjö̧jakobe, idöda sulabenö tjösödi̧ jawa isakwadöma jö̧ba̧lö yötjawinobe.