Isabenö, Abrahamnöda omudawö chujunijatö iteda i̧tji̧munöbi, jo̧batjö tupadanö jojodönöbi öba̧jadobö, ötjö weti̧ a̧ja̧kwö tjö̧jakobetjö̧, jweinö omukwatö, ötjö chösödi̧danö ja̧bö. Jejenö tjuju̧kwitjö̧ma ötjö chiwene Abrahamnö yöbawö chujuninadanö badekwachakobe— jö̧ba̧lijetö Isabenö Jo̧ Diosma, itedada.
Filipenses 4:8 - Dios Iwene8 Bajaleapo yötawi̧ma baikwö yötawaduwakwö, otiwi̧ jawada, jojodö biya̧ma otiwa jö̧ba̧lö tjomukwato jö̧tja̧li̧ jawada kwomukwataduwo jö̧ba̧lö. Jau chömöledö, isabenö ji̧ jawada, ja̧danö otiwanö tjomukwati̧ jawada, ja̧danö jwei̧ jawada, ja̧danö bakwainö wene jwii̧ jawada, ja̧danö tjo̧'wo̧ ösöwi̧ jawada, ja̧danö jojodö tja̧ja̧kwobö otiwi̧ jawada omukwatö kwö̧jaduwo. အခန်းကိုကြည့်ပါ။ |
Filipenses 4:8
67 ပူးပေါင်းရင်းမြစ်များ
Isabenö otiwadö ba̧jȩkwadö tjösödawö̧ tjö̧jinobe Saulbi Jonatanbi, otiwanö bakobe tjö̧jinobe ina 'ya̧tja̧layima, ja̧danö debö tji̧'yenabi, bakobe ja̧nö debö tji̧'yinobe. Isabenö juluwadö tjö̧jinobe, muko köa̧litjö bajalekwönönö juluwadö tjö̧jinobe, ja̧danö didiba ujulutjö bajalekwönönö tjujuluwinobe.
Salomónma ju'wi jawa, ju'wi jawabi jwebebö yöawakwawa jawanö wanekwachi̧ma baikwö laebobe: Wanedö yötawa: Bakwo̧ tea luwo̧ma tea önobe ömöki̧ nönawapinö. Jo̧ba tea iyo̧ma iyawö̧nö önaukwotö jö̧ba̧lö ömöki̧ nönawapi̧nö, ö'öbönöda i̧sekwapinö tea önobe, jweinöda i̧sekwapi̧maökö. Chömöledö, jobekwö nöno̧nöma jwiinö öpöjödobe Isabenö Jo̧ma. Jo̧kwaijayonö Isabenö Jo̧ma jweinö i̧sekwapi̧nö tea nönö iyo̧nöma jwiinö ösödobe.
Ja̧danö, ju'wibi yötawa: Bakwuju, otiwanö omukwatö jujuma jilekwenö pjabatuju. Ja̧danö, jobekwö jilekwenö pjabatö jö̧jobetjö̧ ju'wedöma jilekwenö otiwanö tjedobe, jwiinö luwo̧, jö̧ba̧lö. Jo̧bekwö pjajatokobe jeluju, jilekwenö, taba̧löjinö jujuma. Jobujuma taba̧lö̧jinöda jö̧jobetjö̧ jilekwema, ayö chilekwoda kwabö lojökwesa, jö̧ba̧lö. Jo̧bama, ilekwo jawatjöda tjiwe'iju pjolowachi̧danö usula emawo̧.
Bemi tupakwö laebakwa̧ma jilekwenö juna̧luju jö̧jina jawa laebobe, jilekwenö juna̧luju ¿dakwö omukwatö jö̧jobeda? jö̧ba̧lö: Iso̧ma ilekwo̧nö, otiwanö omukwatujunö, ja̧danö ju'wi jawabi ju'wi jawa jotidobö waisujunöma öbadekwajobö waiyobe. Isabenö, jobekwö omukwatö waisanö jujuma jwiinö mikwawuju, inawiya nöinö mikwawi̧ öwiya mikwawi̧tjö̧ bajalekwönönö mikwawuju.
Ja̧danö, jilekwema jobujunö yöa̧lobe: —Chilekwo, isabenö ju'wedö ya̧döma jwiinö otiwanö omukwatö, waisanö otidö tju̧ju̧kwijayonö ökwöma jobadö otiwanö tjö̧ji̧tjö̧ o̧pekwönönö otiwanö omukwatö, waisanö otidö kwö̧jobe— jobekwö yöa̧lobe jobuju jilekwema jobujunöma. Jobekwö yöjawinobe Lemuel ojo'doma jo̧banöma. Ja̧danö, ju'wibi yöjawinobe:
Ikenama, omukwatajadö, idöda tjömöayedönö ju'wedönöbi, la'aka luwo̧ Herodesnö ösödadötjö ju'wedönöbi wetjinobe, Jesúsnö abebö tja̧ja̧kwobö baikwö: —Ba̧ja̧dakwawa luwo̧, ökwönö döwaisa, jweinö yöbawo̧ja jö̧ba̧lö. Ja̧danö, Aaa, jojodö sulabenö tjöpöjödapji jö̧ba̧lö omukwatökönö, yebabökönö jweinö Dios ösödi̧ jawa yöbawo̧ja, jö̧ba̧lö döwaisa. Jau ba̧ja̧dakwawa luwo̧, döwaisa, luwedönöbi jweinö yöbawo̧ja, jojodönö wainökwenama kwedokobetjö̧.
Jejenö otjiökwe, Jesúsma jobadönö yöa̧linobe: —Ökwödöma jojodö tjöba a'otjö otiwadödanö kwichejekwaduwobö ja̧bö ju̧kwadöja, jo̧kwaijayonö Diosma wamenö otiwadödanö kwichejekwaduwi̧ma omukwatö̧kö̧, Diosma kwomajadeduwinö sulabenö kwomukwataduwi̧ waiso̧. Jau, jojodö tjedemi biya̧ma nöinö mikwawi̧ jö̧ba̧lö tjösödi̧ jawama, Dios edemi mikwawökö ji̧, iteda öpöjödi̧ jawaobe. Ja̧danö, jojodö wamenö ökwödönö edö bidöma otiwadö jö̧ba̧lö tjomukwatijayonö, Diosma kwomajadeduwinö edö öpöjödobe, Bidöma sulabedö jö̧ba̧lö. —
Ja̧ mölema, bakwo̧ Simeón mikwo̧ma Jerusalénnö ö̧jinobe. Jo̧bama otiwanö ja̧bö ö̧jinobe, ja̧danö jwaikwöda Diosnö ösödö ö̧jinobe. Ja̧danö Dios weakwo̧ jö̧a̧linökwenö ösödinö te'ada̧lö ö̧jinobe, Juluwanö ichowe, juluwanö ökwödö Israel jojodönö dö̧jibinö pjaatowe, jö̧ba̧lö. Dios O̧'wo̧ Luwo̧ma Simeonkwö ö̧jinobe,
Ja̧danö, Jesús ö'wö baibaja̧ ikena, Jesúsnö ösödadötjö bakwo̧ José mikwo̧ma Jesúsnö i̧lȩdo̧nö ödobö jö̧a̧linobe. Jo̧ba Joséma, Judea niji comunidad Arimatea jojo, ja̧danö ju'wibi judío jojodö lȩekwa luwedötjö bakwo̧. Jo̧kwaijayonö, jo̧babi lȩekwa luwo̧ ö̧jijayonö, ju'wedö lȩekwa luwedö Jesúsnö kwabö lotjobö tjomukwati̧danöma omukwatinö̧kö̧, ja̧danö jobadökwöma Jesúsnö sulabenö ja̧binö̧kö̧. Jo̧ba Joséma isabenö otiwanö ja̧o jö̧a̧li̧danö ja̧bö ö̧jinobe, ja̧danö Dios la'aka luwo̧ ö̧jakwa̧ te'ada̧lö ö̧jinobe.
Bakwo̧ iteda ösödi̧, iteda omukwati̧ yöbawo̧ma o̧'wo̧ luwo̧ okwa sulabenö omukwato̧, itedada ösödi̧ma. Jojodö itenöda ösödö, Bitema jwiinö waiso̧, jö̧ba̧lö, tjomukwatobö isakwo̧. Jo̧kwaijayonö bakwo̧, jo̧banö webo̧ ösödi̧da ja̧bo̧ma, o̧'wo̧ luwo̧ okwa otiwanö omukwato̧, jojodöma webo̧nöda tjösödobö isakwö. Jobama jweinöda yöbawo̧— yöawinobe—.
Jejenö abebö a̧ja̧kwiawö̧ atadijadötö: —Duluwo̧ Cornelioma, ciennö guardia jojodö tjuluwo̧ma weatö ökwödönöma ökwönö öbibö di̧'yobö. Jo̧ba Duluwo̧ma otiwanö omukwatö jo̧. Diosnö otiwanö yebabinö omukwato̧. Okobe deinö judío jojodöma tjösödökwe Duluwo̧nöma. Dios weajökwe ángelma öwawachajo̧ webijetö Duluwo̧nöma ökwönö weobö, iteda ejube kwi̧'yobö, ökwö yökawi̧ a̧ja̧kwobö— yöbawijadötö.
Jo̧kwaobetjö̧, chömöledö, ökwödötjö emö junaduwi jelemutjö du̧ju̧tajanö ömadönö, pjaatakwawa jojodönö, ja̧ iyawa webadö batjibinö. Jobadö emö kwujunaduwakwawö̧ma, Otiwanö omukwatö ju̧kwadö, jö̧ba̧lö, jojodö yötja̧lawö̧nöda emö kwujunaduwo. Ja̧danö, jobadö emö kwujunaduwakwawö̧ma waisanö omukwatadönöda kwujunaduwo. Ja̧danö, Dios O̧'wo̧ Luwo̧ öba̧ja̧dawö̧nöda emö kwujunaduwo. Emö kwujunaduwawö̧nö wedakobe jobadöda iyawa wetjobö.
Ja̧danö, sule möle jawada ja̧bö dö̧jobö jo̧be chömöledö, Dios ösödi̧ jawada, Dios öpöjödi̧ jawamaökö. Owa̧lö, 'dukwachawö̧ baibanöma kwö̧jaduwoko, ja̧danö kwi̧lȩkwa̧muböködökwö sulabenö alewö kwö̧jaduwoko. Böjȩ jojodö sulabenö tjalewi̧danöma, kwalewaduwoko, ja̧danö sulabenö tjösödi̧danöma kwösödaduwoko. Ö'wiabinö edöma dameakwabinöma kwö̧jaduwoko, ja̧danö kwölakwabikwawaduwoko chömöledö.
Jau chömöledö, otiwanö ja̧bö ju̧kwadöma yebaböködö luwedönöma, sule sulabenö ja̧bö ju̧kwadöda yebabidö, wetji̧danö ja̧bö tjö̧jokobetjö̧. Ja̧danö, luwedönö yebabökönö kwö̧jaduwobö jö̧ka̧laduwitjö̧ma, otiwanö ja̧bö kwö̧jaduwo. Ja̧danö, otiwanö ja̧bö kwö̧jaduwitjö̧ma, luwedöma ökwödönö tjösödena, otiwanö ja̧badöja jö̧ba̧lö.
Isabenö judíoso̧ ö̧ji̧ Dios ömöledöso̧ ö̧ji̧ma, okwa jawada chömöledö, tji̧sȩdo̧ jawamaökö. Ja̧danö, isabenö Dios weinadanö 'wiekwama, tjomajade balewachinö ja̧awada, tji̧sȩdo̧ jawamaökö. Jau chömöledö, ja̧ tjomajade balewachinö ja̧awama, Dios O̧'wo̧ Luwo̧ ja̧i̧da, jojodö tji̧sȩdo̧ 'wiekwamaökö. Ja̧danö, isabenö judíoso̧ jo̧nöma, Diosda, Bitema otiwanö jo̧, jö̧ba̧lö yöawakwo̧. Jojodö yötjawökakobe chömöledö, Diosda yöawakwo̧.
Ja̧danö, Duluwo̧da yöawakwo̧obetjö̧, Duluwo̧ yöawakwa̧ abönöma, ju'wedönö yöbawökönaduwi, Aaa, Duluwo̧ wei̧ otiwanö ja̧badö, sulabenö ja̧badö jö̧ba̧lö. Jau chömöledö, Duluwo̧ ichakwa̧ möle badekwachenama, jo̧bada yöawakobe. Baikwö wanedö yötawa: Okobe jwiinö yȩa'wo okwa jawa Duluwo̧ma idejatakobe, otiwanö öwawinö baibanö, ja̧danö, jojodö tjomajadenö tjomukwati̧ i̧sebakobe Duluwo̧ma. Ja̧danö, iya̧da möleda Diosma jojodönö bakwo̧nökwena yöawakwo̧ otiwanö tjotidinama.
Chömöledö, Diosnö ateba ökwödönö, otiwanö ja̧köbaduwobö. Jau chömöledö, inesö chösödi̧ma chujulu chi̧sebobömaökö, ökwödö otiwanö ja̧bö kwö̧jaduwoböda inesö chösödi̧ma. Kwöwaisaduwa chömöledö, jobe ichibö ökwödönö lȩtebitjö̧ma chujulu öwaetjöda öwawena, ¿jö̧tö? Ja̧danö jobe ichibö lȩtebökötjö̧ma chujulu öwawökena otiwanöma, ¿jö̧tö? Jejenö omukwatö, Aaa, jobadönö lȩtebobö chösöda, chujulu öwawakobetjö̧ jö̧ba̧lö ¿chomukwatenaji̧? Ja̧maökö chömöledö, chujulu öwawi̧ma mikwawokobe ötjönöma chömöledö, inesö chösödi̧ma ökwödö otiwanö ja̧köbaduwobö. Jau chömöledö, lȩbebökönö chujulu jwibo̧danö chichejekwitjö̧ma otiwa, inesö chösödi̧ma ökwödö otiwanö ja̧bö kwö̧jaduwobö.
Ja̧danö, Titokwö jelo̧nö wedakobe kwiteboduwi Corintiobe chömöledö, Jesúsnö ösödo̧ döjawo̧nö. Jo̧bama Titokwö bakobe otidö, ökwödönö pjaatakobe, ja̧ balada kwoko̧ko̧daduwobö. Jo̧banö baikwö yötawa: Okobe deinö bemi niji ko̧ko̧kwö tjö̧baji̧tenia ju̧kwadö Jesúsnö ösödadö tjöwaisökwe jo̧bama, otiwa jawa wene otiwanö yöbawo̧ jö̧ba̧lö.
Jo̧kwajabetjö̧ otiwanö dotidobö disakwobe chömöledö, Duluwo̧ma edö otiwanö otidadö jö̧ba̧lö edakobetjö̧. Jau chömöledö, Duluwo̧ öba a'otjö otiwanö dotidobö disakwobe, jo̧kwaijayonö ja̧damaökö. Ju'wibi jojodö tjöba a'otjö otiwanö dotidobö disakwobe, okobe deinö jojodöbi edö dotidi̧ tjöwaisakobetjö̧, tjotido jö̧tja̧li̧danö isabenö otiwanö otidadö jö̧ba̧lö.
Jo̧kwaijayonö Dios O̧'wo̧ Luwo̧ do̧'wo̧ luwo̧nö otidi̧ma wainö ji̧ chömöledö. Baikwö yötawa: Dios O̧'wo̧ Luwo̧ otidi̧ma chömöledö, biya̧: ösödabikwawi̧bi, tjo̧'wo̧ ösöwi̧bi, tjo̧'wo̧ luwo̧nö wene jwiinö ja̧kwawabi, tjo̧'wo̧ 'dibachibö ja̧kwawabi, jojodönö dösölö̧jinö ja̧danö otiwanö ja̧awabi, jö̧tja̧li̧danö ja̧awabi,
Jo̧kwaobetjö̧ yötawaduwakwö. Dios jawa, otiwa jawa wene, isabenö wene, kwo̧'wo̧ luwo̧duwinö do̧batö omukwata̧lö ju̧kwaduwi chömöledö, ba̧kwȩlö̧jatebö, jemi tupakwö juluwachibanö kwi̧'yaduwo. Wanedö yötawa: 'Bötjabikwawakwedöma koleasö̧jȩma 'diinö di̧batakwawadö, otiwanö tji̧'yobö. Ja̧danö ökwödöbi, chömöledö. Dios iwene, otiwa jawa iwene, isabenö iwenema, kwo̧'wo̧ luwo̧duwinö 'diinö do̧ba̧lakwawö 'ya̧duwi. Jejenö otiwanö kwi̧'yaduwakwedöja, kwo̧'wo̧ luwo̧duwima juluwachibanö jemi tupakwö. Ja̧danö chömöledö, ju'wibi yötawaduwakwö. Jweinö, otiwanöda omukwatö ju̧kwaduwi. Jejenö kwö̧jaduwena Awetjama sulabe ujuluwotö jö̧ba̧lö weijayonö tjöbeba̧lakwawö kwö̧jaduwakwedöja. Ju'wi wanedö yötawa: 'Bötjabikwawakwedöma 'dii̧ jawa wamenö 'dubawadö, tjomuko tjöeba̧linö. Ja̧danö, jobadö tjomuko tjöeba̧li̧danö, ökwödöma, Awetja sulabenö wei̧ma tjöbeba̧lakwawö ju̧kwaduwi, jweinö, otiwanöda omukwatö.
Jo̧kwajabetjö̧ lȩekwa luwedö kwö̧jaduwenama, bakwainö jwei̧ jawada kwisakwaduwo, jweinö lȩekwa yökawaduwo jö̧ka̧laduwi̧danö jweinö yökawaduwakobetjö̧. Jejenö Dios wei̧danö lȩekwa yökawaduwo chömöledö, jejenö lȩekwa yökawaduwiökwe kwuluwo̧duwi Isabenö Jo Dios ökwödönö iyakwemi nijibe tekachaduwobö pjaatakobetjö̧, ja̧danö iyemi nijinö kwiteboduwi baibanö otiwanö kwö̧jaduwakobetjö̧, —jö̧ba̧lö yöawinobe Moisesma.
Ina möayo̧danöbo̧ja Timoteo, jo̧kwaijayonö Dios ösödi̧danö ja̧bö ja̧kwawa i̧sebö kwö̧jo, ju'wedö edö tjöwaisachibobö. Ja̧danö, yöba̧lö kwö̧ji̧bi, ja̧danö ja̧bö kwö̧ji̧bi, ja̧danö jojodönö ösödö kwö̧ji̧bi, ja̧danö Jesúsnö ösödö kwö̧ji̧ma, bakwainö Dios ösödi̧danö ja̧bö ja̧kwawada i̧sebö kwö̧jo. Jejenö ja̧bö kwö̧jo Timoteo, jojodö, Aaa, bite möayo̧danöbo̧ Timoteo yöawi̧ma da̧ja̧kwoko, jö̧ba̧lö yötja̧lökakobetjö̧.
ja̧danö, wobekwinadötjö tjite'ada̧lakwawö̧ma sule jojodö, Bidöma otiwanö ja̧bö ji̧nadö, jö̧ba̧lö tjöwaisawö̧nöda. Ja̧ otiwanö ja̧bö tjuju̧kwina jawama baikwö yötawa: Otiwanö tji̧tji̧munö bötjatö, jelobetjö ichajadönö tjejunö tebatö, ju'wedö Jesúsnö ösödadö tjömöayujudanöbujusa jö̧ba̧lö pjabatö, usula emawadönö pjabatö, ja̧danö jwaikwöda okobe jwiinö otiwanö ja̧awa ja̧bö. Jejenö ja̧bö ji̧nadö ya̧dö tji̧lȩkwa̧munö wobekwinadönöda kwujuno, Jesúsnö ösödadö tjite'ada̧lawö̧, jö̧ba̧lö
Te'ada̧lakwawa luwo̧ otidakwo̧ma wainö ja̧bö jo̧, baikwö yötawa: Te'ada̧lakwawa luwo̧ otidakwo̧ma, jelobetjö ichajadönö dösölö̧jinö pjabatö jo̧, ja̧danö otiwa jawada ösödo̧, otiwanö ja̧bö ö̧jo jö̧ba̧lö. Ja̧danö, ja̧i̧ma jweinö omukwatö ja̧bo̧, ja̧danö, bakwainö edo̧ jojodönöma, bakwo̧nö jelo̧nötjö o̧penönö omukwatökönö, ja̧danö, jwaikwöda Dios ösödi̧ jawada ja̧bo̧. Ja̧danö, ja̧bö ö̧ji̧ma, Aaa biya̧ma otiwanö ja̧awa jö̧ba̧lö öwaisi̧danö ja̧bö jo̧, sulabenö ösödi̧ jawa ja̧bökönö.
Jesúsnö ösödadötjö ömadö damöbedönö baikwö ja̧bö tjö̧jobö kwöba̧ja̧dodönö: Okobe jwiinö ja̧tji̧ma, jweinö omukwatö ja̧bö tjö̧jobö, ja̧danö obökönö ja̧bö tjö̧jobö, ja̧danö tjösödi̧ jawa ja̧bökönö, biya̧ma otiwanö ja̧awa jö̧ba̧lö tjöwaisi̧da ja̧bö tjö̧jobö. Ja̧danö, jobadönö kwöba̧ja̧do, jwaikwöda Jesúsnö ösödö tjö̧jobö, ja̧danö tjömöledö Jesúsnö ösödadönö tjösödobö, ja̧danö tjo̧'wo̧ luwo̧nö me'dawachibökönö tjö̧jobö kwöba̧ja̧dodönö.
Ja̧danö, Dios, ökwödö Dabe'do Diosma ¿dakwö yöawobeda, Biya̧ ötjönö inesö kwösödaduwi̧ kwi̧sekwaduwi̧ma, jö̧ba̧lö? Biya̧ chö̧ja̧wo̧dö, Diosnö jwiinö inesö dösödi̧ma: Usulasedönö, tjabe'do tjojo'do debadönöbi, tjilekwe wotjinawö̧nöbi pjadatobö jo̧be, usula tjemawena. Ju'wi jawabi chö̧ja̧wo̧dö, biya̧: Böjȩnö ju̧kwadö sulabenö ja̧tji̧tjö 'da̧bachibö dö̧jobö jo̧be, ja̧ suli̧kwö pjabacha̧lökönö. Jejenö kwö̧jaduwo chö̧ja̧wo̧dö, Dios kwö̧jaduwobö ösödi̧danö, jo̧ba iwene ösödinö a̧ja̧kwö.
Jo̧kwaijayonö chö̧ja̧wo̧dö, jejenöma jö̧kö̧ Dios öibökwema. Diosma jo̧banö pjabatö öibobe waisinö omukwatobö, Dios omukwati̧danö. Ja̧danö, jo̧bama suli̧tjö 'da̧bachibö ö̧jobe, o̧'wo̧ luwo̧nö bakwainö otiwanöda edö. Ja̧danö, jejenö otiwanö edö ju'wedökwö wene jwiinö ö̧jobe. Ja̧danö ju'wedönö ösödö, tjo̧'omanö yöba̧lö, jo̧. Ja̧danö, ö̧ja̧wo̧döma jo̧banö jwebeba̧lö yötja̧lenabi jo̧ba Dios öibökwe waisanö omukwato̧ma otiwanö a̧ja̧kwobe, öwaisachibobö. Ja̧danö, jo̧bama ömöledönö lȩlö̧jino edobe, ba̧kwȩlö̧jatebö pjabatö. Jo̧bama isabenö iteda yöa̧li̧danö i̧sekwo̧, jojodönö ba̧kwȩlö̧jatebö pjabatö. Ja̧danö chö̧ja̧wo̧dö, jo̧ba Dioskwö jwaikwöda 'yo̧. Ja̧danö, jo̧ba Dios öibökwe waisanö omukwato̧ma jojodönö okobe deinö bakwainö edobe, jwibadönöbi, juna̧ladönöbi bakwaibedöda. Ja̧danö, jo̧ba waisanö omukwato̧ma yöba̧löda yöba̧lö̧kö̧, i̧sekwökönö. Jo̧bama iteda yöa̧li̧danö i̧sekwö jo̧.
Jau chömöledö, ökwödöma Diosnö ösödöködö tjö'da̧de ja̧nö, otiwanö ja̧bö kwö̧jaduwo, otiwanö ja̧bö kwö̧ja̧duwi̧ tjedakobetjö̧. Ajayinöma isabenö ökwödönö wanedö sulabenö ja̧badö jö̧ba̧lö yötja̧lena chömöledö, jo̧kwaijayonö jwaikwöda otiwanö ja̧bö kwö̧jaduwitjö̧ma, otiwanö ja̧bö kwö̧jaduwi̧ edö tjöwaisachibena, Aaa, Jesúsnö ösödadöma isabenö otiwanö ja̧bö ju̧kwadö, jö̧ba̧lö. Ja̧danö chömöledö, jejenö tjöwaisachibobetjö̧, 'dö̧ibaji̧ möle Dios ichakwa̧ möle badekwachenama, jo̧banö tjösödena, Otiwo̧ja, jö̧ba̧lö.
Ja̧danö inesö mikwawi̧ ja̧bö kwö̧jaduwobö yötawaduwakwö chömöledö, jwaikwöda kwömöledö Jesúsnö ösödadönö ösödabikwawö kwö̧jaduwo jö̧ba̧lö. Ja̧ma, ju'wi jayetjö bajalekwönönö inesö mikwawi̧ chömöledö, jejenö ösödabikwawö kwö̧jaduwitjö̧ma, kwömöledö sulabenö ja̧tjaja̧ omukwatökönö jobadönö ösödö kwö̧jaduwakobetjö̧.
Ja̧danö, jejenö omukwatö te'ada̧lö jo̧ma, Isabenö ötjöma Jesucristodanö ichejekwo̧ chö̧jakwo̧sa, jö̧ba̧lö, babe böjȩnö ö̧jayi otiwanö ja̧bö 'yo̧, suli̧tjö dichö loinökwedanö. Isabenö chö̧ja̧wo̧dö, Jesúsnö omukwatö te'ada̧lö jo̧ma böjȩnö ö̧jayi sulabenö ja̧bökönö ja̧kwawa isakwo̧, Jesús böjȩnö ö̧jinadanö.
Chö̧ja̧wo̧dö chösödawö̧, a̧ja̧kwaduwitjö. Okobe jwiinö yöawakwawa kwa̧ja̧kwaduwi̧ma juluwanö kwösödaduwoko, Jweinö yöbawo̧, jö̧ba̧lö. Isabenö, bakwo̧ yöawi̧ a̧ja̧kwö ö'wiawakwa̧lö̧jönö kwa̧ja̧kwa̧laduwobö jo̧be, ba̧jekwadö omöna yöbawadö tjö̧jobetjö̧. Jau chö̧ja̧wo̧dö, ö'wiawakwa̧lö̧jönö kwa̧ja̧kwa̧laduwo kwöwaisaduwobö, Ite yöbawo̧ma ¿Dios O̧'wo̧ Luwo̧ öibökweji̧? Ja̧danö, yöawi̧ma ¿Dios O̧'wo̧ Luwo̧tjö̧ ichobeji̧? jö̧ba̧lö.
ကြော်ငြာတွေ