Filipenses 4:11 - Dios Iwene

¹¹ Jejenö yöta̧li̧ma, Aaa, ötjöwe, jwibo̧sa, jö̧ba̧löma yöta̧lökö chömöledö. Jau chömöledö, ida̧ökö chöwaisachibinobe, jwibö chö̧jitjö̧bi, juna̧lö chö̧jitjö̧bi, cho̧'wo̧ ösöwanö chö̧jobö, otiwanö juna̧lo̧sa jö̧ba̧lö.

Filipenses 4:11 ပူးပေါင်းရင်းမြစ်များ

Génesis 28:20

Ikenama Jacobma iwene yöbawö junijetö Diosnö: —Dios, ötjökwö kwö̧jitjö̧ma, ja̧danö, chi̧'yobe kwakwawabi, kamisibi kwiyitjö̧ma ja̧danö, sulabe baledökönö chabe'do ejube otiwanö tjebachajö chichibitjö̧ma baikwö yöbawö chujunena: Ökwönö, Isabenö Jo̧ Diosnöma ötabena, Chuluwo̧ Dios jö̧ba̧lö. Ja̧danö ju'wibi yöbawö chujunena: Biwa inawa ökwönö omukwatö chujunaja̧wa jemima jojodö ökwönö ösödö tjichakwemi, bemima Dios ö̧jemi, jö̧ba̧lö. Ja̧danö, ju'wibi yöbawö chujunena: Ökwö okobe jwiinö kwiyi̧ma domulataja jawa o'wiju kwiyi̧tjö bakwa'wo 'da̧batö tjetatocha ökwönöma. Jao, ötjökwö kwö̧jitjö̧ma, ja̧danö, chi̧'yobe kwakwawabi, kamisibi kwiyitjö̧ma, ja̧danö, sulabe baledökönö chabe'do ejube otiwanö tjebachajö chichibitjö̧ma jejenö yöbawö chujunena— yöbawö junijetö Jacobma Diosnöma.

Éxodo 2:21

weajawö̧ öbibö 'yi̧jadötö. 'Ya̧jadö Moisésnö öbibö ȩwa̧jijadötö tjejutjö ukwobö. Ja̧danö, Moisésma jobadökwö ö̧jobö ösödobetjö̧ jobeda ji̧jetö lekwe, Reuel ejunö. Ju'winö Reuelma bakwuju itjijunö Séfora mikwujunö webijetö Moisés emobö ilekwo baibanö.

Lucas 3:14

Ja̧danö guardia jojodötjöbi ju'wedö abebö tja̧ja̧kwinobe: —¿Ökwödöja? ¿Dakwö ja̧bö di̧sebobö ökwödöma isabenö sulabenö domukwati̧ kabatibö balewachadösa jö̧ba̧löma?— Atjebökwe Juanma atadinobe: —Kwuluwedö tjimidi̧da emö kwö̧jaduwo. Ja̧danö ju'wibi, jojodönö 'döbebö naukwöma yebeabinöma kwemaduwoko. Ja̧danö ju'wibi, balada kwemaduwotö jö̧ba̧lö jojodönö omöna yöka̧laduwa, Bidöma sulabenö ja̧badö, jö̧ba̧löma. Kwuluwedö tjimidi̧da emö kwösödaduwo, Otiwa, jö̧ba̧lö— atadinobe Juanma.

2 Corintios 11:27

Ja̧danö, nöinö usula emawö otidiachijatö, ja̧danö nöinö yö̧te abökönö ji̧achijatö, ja̧danö a̧wi̧chi̧tjöbi ojwiyotjöbi, o̧ti̧ tjöbö ji̧achijatö, ja̧danö nöinö kwakwawabi jwibö ji̧achijatö, ja̧danö chejubi jwibö, kamijido̧ otiwado̧bi jwibö, tiyuwobe ji̧achijatö chömöledö.

2 Corintios 6:10

ja̧danö do̧'wo̧ tjo̧achijayonö, do̧'wo̧ luwo̧ ösöwachibanö ja̧dösa. Jau chömöledö, böjȩ jawatjö usulasedösa, jo̧kwaijayonö ju'wedönö nöinö juna̧ladö batjibanö tjo̧'wo̧ luwo̧ jawa iyadösa, ja̧danö jwibadödanö dichejekwijayonö, isabenö mikwawi̧ jawa okobe jwiinö juna̧ladösa. Jau chömöledö, ju'wedö ökwödönö Dios ömöayedöböködö jö̧ba̧lö yötja̧lijayonö, ja̧bö dö̧ji̧ma öwaetjöda i̧sebobe Dios ömöayedö dö̧ji̧ma.

2 Corintios 8:9

Isabenö pjabatö kwiyaduwobö otiwa chömöledö, baikwö yötawa: Kwöwaisaduwa chömöledö, Duluwo̧ Jesucristo mikwa jwiinö otiwanö iyina wenema, ¿jö̧tö? Jau chömöledö, jo̧bama nöinö ujuna̧linajayonö, ujuna̧li̧ junibö, jwibo̧danö usulaso̧ baibinobe, ökwödönö pjabatö. Jejenö baibinobe, ökwödöma jo̧ba usulaso̧ ö̧jinatjö nöinö juna̧ladö bakibaduwakobetjö̧.

2 Corintios 9:8

Ja̧danö baikwö yötawaduwakwö chömöledö, Diosma isabenö juluwo̧, a̧'dȩlökönö okobe jwiinö jwiköbaduwi̧ iyakobetjö̧, ja̧danö jwiköbaduwi̧tjö bajalekwönönö nöinö iyakwo̧ chömöledö. Jau chömöledö, jejenö iyakwo̧, ökwödöbi kwujuna̧laduwakobetjö̧, ja̧danö ju'wedönö pjakataduwoböbi kwujuna̧laduwakobetjö̧.

Filipenses 3:8

Jau chömöledö, ja̧ jawabi, okobe jwiinö ju'wi jawabi mikwawökö ji̧ jö̧ba̧lö, inesö mikwawi̧da chisakwobe chömöledö, jwaikwöda Chuluwo̧ Cristo Jesúsnö chöwaisobö chisakwobe babema chömöledö, ja̧da inesö mikwawi̧ jö̧ba̧lö. Wanedö yötawa: Sula'wo tjikwi̧danö ikwö lotinobedanö ichejekwa, mikwawökö ji̧ jö̧ba̧lö, Cristonöda chemo jö̧ba̧lö,

Hebreos 10:34

Ja̧danö, ju'wibi chömöledö. Kwömöledötjö ju'wedö, Jesúsnö ösödadönö ka̧lena ba̧kwaweju okwa tjödinobe. Ja̧danö, ka̧lena ba̧kwaweju okwa tjödiawö̧ kwo̧'wo̧duwi tjo̧bekwö kwö̧jinaduwobe, Ökwödöma jobadö tjö̧bi̧danö bakwainö ba̧dösa, jö̧ba̧lö. Isabenö, jobadö usula tjemawi̧ omukwatö kwo̧'wo̧duwi tjo̧bekwö kwö̧jinaduwobe. Ja̧danö chömöledö, ja̧ ajayinö möle, Jesúsnö kwösödinaduwobetjö̧ Jesúsnö öpöjödadötjö la'aka luwedöma kwiteaduwima tjeminobe. Jo̧kwaijayonö, ökwödöma me'dawachibökönö kwo̧'wo̧ luwo̧duwi ösöwanö kwö̧jinaduwobe, Ja̧ma wame jawa, jö̧ba̧lö. Dios ökwödönö iyi̧ma ja̧ wame jawatjö o̧penönö mikwawi̧, ba̧kwȩlö̧jatebö ji̧ jawa, jö̧ba̧lö, me'dawachibökönö kwö̧jinaduwobe. Isabenö chömöledö ökwödönö pjabatö yötawaduwakwö. Omukwataduwi ja̧ möle, ökwödö kwo̧'wo̧ luwo̧duwinö ösöwö kwö̧jinaduwama usula kwemawaduwijayonö.