Filipenses 3:19 - Dios Iwene

¹⁹ ja̧danö Dios ökwöla nöolanö lȩebakwawö̧ jobadöma chömöledö. Jobadöma jwaikwöda idöda tjösödi̧ jawada isakwadö, ja̧danö taba lö̧ji̧ jawa ösödadö, otiwa jö̧ba̧lö. Ja̧danö jwaikwöda böjȩ jawada omukwatadö jobadöma chömöledö.

Filipenses 3:19 ပူးပေါင်းရင်းမြစ်များ

Mateo 16:23

Yöa̧lökwe, Jesúsma jalachibö Pedronö yöa̧linobe: —¡'Da̧bachibö da̧ji Pedro!, sulabenö Awetja yöa̧li̧da yöka̧lobetjö̧, ja̧danö jweinö Dios ösödi̧danö chi̧'yapji jö̧ba̧lö tjökeba̧lobetjö̧. Jau Pedro, biya̧ kwomukwati̧ma Diostjö ichökö ji̧, jojodö tjo̧mukwatida— jö̧ba̧lö yöa̧linobe.

Mateo 25:41

Jemi ikenama wajwitobekwöchobe ju̧kwadönö yötawocha: Ökwödö sulabedöma chö̧jelö labebaduwi. Dios Awetjanöbi, iteda ömöayedönöbi lȩebobö Dios otidö ujuninola ökwöla nöolabe 'ya̧duwi, jobetjö Dios lȩebi̧tjö kwemaduwo jö̧ba̧lö.

Lucas 12:19

Ja̧danö, jejenö isabenö nöinö chujuna̧lobetjö̧, yöta̧lakobe ötjödada, Aaa, babe nöinö chujuna̧lobetjö̧ otiwa. Lekwe o̧biya otiwanö chö̧jobö chujuna̧la babema, jo̧kwajabetjö̧ tupakwö otidökönö kwanöbi, owöbi, cho̧'wo̧ ösöwanö chö̧jo, jö̧ba̧lö omukwatinobe jo̧ba nöinö juna̧lo̧ma.

Lucas 16:19

Jesúsma wanedö yöawinobe du̧ju̧tajanö, usulaso̧nöbi, balada luwo̧nöbi. Baikwö wanedö yöawinobe: —Bakwo̧ balada luwo̧ma ö̧jinobe. Jo̧ba balada luwo̧ma kwakwawatjöbi, 'duawakwawatjöbi otiwanö ö̧jinobe. Nöinö ujuna̧lobetjö, ba̧kwȩlö̧jatebö jwiinö otiwado̧ 'dubawö ö̧jinobe, ja̧danö möletenia jwiinö söi̧ kwakwawa kwanö ö̧jinobe.

Lucas 18:4

Lekwe möle jejenö jichiba̧lijayonö, lȩekwa luwo̧ma pjaatobö öpöjödinobe ajayinöma. Jo̧kwaijayonö kabatökönö jichiba̧liökwe, bajalianö omukwatö yöa̧linobe itedada: Diosnö yebabinö chomukwatököjayonö, ja̧danö jojodönö pjatatobö chomukwatököjayonö,

Romanos 16:18

Jau chömöledö, jejenö ja̧badöma Duluwo̧ Cristo wei̧ma ja̧böködö chömöledö, sule idöda tjösödi̧da ja̧bö ju̧kwadö. Jobadöma wajwibadönö dösölö̧jinö yöba̧ladö, ja̧danö, jojodö tjösödi̧ jawa yöba̧ladö jojodö jobadö omöna yötja̧li̧ a̧ja̧kwö tjösödobö.

Romanos 6:21

Jejenö kwö̧jinaduwama, ¿taji mikwawinada chömöledö? Babema, ajayinö ja̧köbinaduwi̧ omukwatö, kwötabakwaduwobe, ¿jö̧tö? Ja̧danö, ju'wibi, jejenö ja̧awa mikwawi̧ma wobaleda.

1 Corintios 3:3

böjȩ jojodö ja̧bö tjö̧ji̧danö ina ja̧bö kwö̧jaduwobetjö̧. Jau chömöledö, ju'wedö kwömöledö Jesúsnö ösödadönö ö'wiabinö edö kwö̧jaduwena, ja̧danö jobadökwö ölakwabikwawö kwö̧jaduwenama, kwi̧sebaduwobe, Dösödi̧ jawada ja̧bö ju̧kwadösa, jö̧ba̧lö, ¿jö̧tö? Ja̧danö, Ju'wedö böjȩ jojodö ja̧bö tjö̧ji̧danö ja̧bö ju̧kwadösa, jö̧ba̧lö kwi̧sebaduwobe, ¿jö̧tö?

1 Corintios 5:2

Jejenö kwö'da̧deduwitjö baledonö, ökwödöma ina Aaa, otiwadösa jö̧ba̧lö kwomukwataduwobe chömöledö. Aaa, otiwadösa jö̧ba̧lö kwomukwataduwoböma jwia, tabakwö kwubudekwaduwobö jo̧be chömöledö. Ja̧danö, jo̧ba iteda abe'do ilekwonö ja̧bö jo̧nö kwö'da̧deduwitjö 'da̧batö kwujunaduwonö chömöledö.

1 Corintios 5:6

Chömöledö, ökwödö Aaa otiwadösa jö̧ba̧lö kwomukwataduwi̧ma otiwökö, sula. Baikwö wanedö yötawa: Ökwödöma pan otikwa waisadöja. Pan tjotidakwedöma, sule ja'yubeda ye'yeachi̧ jawa anadö, okobe jwiinö pansa'be ye'yeachobö, ¿jö̧tö? Ja'yubeda tjanijayonö, okobe jwiinö 'dukwibö ye'yeachibobe, ¿jö̧tö?

2 Corintios 11:12

Ja̧danö, balada abeba̧lökönö ji̧achinadanö chö̧jakwo̧sa chömöledö, ju'wedö yöbawadö tjö̧jöködanö chö̧ji̧ öwawakobetjö̧. Jau chömöledö, ju'wedöma, Awetja ömöayedö tjö̧jijayonö, Cristo webawedödanö ichejekwö ja̧badö, jojodönö omöna yötjawo jö̧ba̧lö. Ja̧danö, jobadöma omöna yöba̧ladö, ökwödöma Pablo otidi̧danö bakwainö otidadösa jö̧ba̧lö. Jo̧kwaijayonö, balada abeba̧lökönö yöbawö chö̧jobetjö̧, jejenö yötja̧loböma jwiena chömöledö, ja̧danö balada abeba̧lö tjö̧jobetjö̧, öwaetjöda öwawakobe, chotidi̧danöma otidöködö jö̧ba̧lö.

Gálatas 6:13

Jau chömöledö, jobadö 'wibekwadöma Dios weina Moisés iwȩyudina jawa ja̧bö tjö̧jököjayonö, ökwödö Gálatas jojodönö 'wikekwaduwobö wetja̧lobe. Jau chömöledö, ökwödönö Aaa, bidö Gálatas jojodöma otiwanö wedi̧ ja̧bö 'witjekwajabe yötja̧lo jö̧ba̧lö, jejenö weba̧ladö.

Filipenses 2:21

Ju'wedö okobe deinö Jesucristo jawa junibö, idöda jawada omukwatadö chömöledö,

Colosenses 3:2

Jwaikwöda mölejȩ jawada omukwatö kwö̧jaduwo, böjȩ jawa omukwatöma kwö̧jaduwoko chömöledö,

2 Tesalonicenses 1:9

Jobadönö söbebö loakwo̧, Dios lȩebi̧tjö kabatökönö tjemawinö, ja̧danö Duluwo̧ ö̧jelötjö, ja̧danö jo̧ba dejatinö ujulutjö ba̧kwȩlö̧jatebö 'da̧bachibö tjö̧jakwedö.

2 Tesalonicenses 2:12

Jo̧kwajabetjö̧, okobe deinö isabenö wene öpöjödö sulabenö ja̧awa ösödadönöma lȩebakwo̧ Diosma.

2 Tesalonicenses 2:8

Jemi ikenama inesö sulabo̧ Awetja ömöayo̧ma ichibakobe chömöledö, jo̧kwaijayonö Duluwo̧ Jesús ichenama, yöba̧löda jo̧banö kwabö loakwo̧, ja̧danö dejatinö ujulunö jo̧banö söbebö loakwo̧.

2 Timoteo 3:4

Ja̧danö, tjömöledönö iyö lotjakobe tjöpöjojodönö, ja̧danö baledakwa̧ omukwatökönö idöda tjösödi̧da juluwanö ja̧tjakobe, ja̧danö nöinö mikwawadösa jö̧ba̧lö omukwatö tjö̧jakobe, ja̧danö Diosnö ösödökönö, jwaikwöda tjo̧'wo̧ ösöwachibobö ji̧ jawada tjösödakobe.

Santiago 4:16

Jo̧kwaijayonö ökwödöma Diosnö omukwatökönö ökwödöda yöka̧laduwobe kwi̧'yaduwakwa̧bi, kwotidaduwakwa̧bi. Jejenö yöka̧laduwi̧ma otiwökö. Sulabenö kwomukwataduwobe chö̧ja̧wo̧dö, jejenö yöka̧laduwena.

2 Pedro 2:1

Jau chömöledö, Dios yöawi̧ yöbawadöma Dios O̧'wo̧ Luwo̧ yöawi̧da yötjawinobe, jo̧kwaijayonö, jobadö otiwanö yötjawonö, Dios yöawi̧ yöbawöködöbi yötjawinobe. Jobadöma Dios yöawi̧ yötjawököjayonö, Dios yöawi̧ yöbawadösa, jö̧ba̧lö omöna yötja̧linobe. Ja̧danö chömöledö, ökwödö kwö'da̧deduwitjö jobadöjayedö omöna yöbawadö tjö̧jakobe chömöledö, Dios iwene yöbawadösa, jö̧ba̧lö omöna yöba̧ladöma. Jobadöma isa̧ökö wene yötjawakobe, suli̧ tjöwaedotö jö̧ba̧lö. Ja̧danö ju'wibi, Duluwo̧nö, jobadö tjö̧jibobö midawinanö tjöpöjödakobe, la'aka luwo̧bö̧kö̧ jö̧ba̧lö. Jejenö suli̧ waedadöma, Dios juluwanö jobadönö lȩebobö ja̧badö chömöledö.

2 Pedro 2:13

Ja̧danö chömöledö, jobadöma sulabenö ja̧tjaja̧ mikwa baibanö, usula tjemawakwedö. Jau chömöledö, okobe jwiinö tjösödi̧ jawama taba jwiinö ja̧badö, ja̧danö tojabinöma ja̧böködö, mölebi jojodö tjedonö taba jwiinö sulabenö ja̧bö ju̧kwadö. Ja̧danö chömöledö, kwö'da̧de ja̧nö sulabenö ja̧bö tjö̧jobetjö̧, jobadötjö taba lö̧jobe ökwödönö. Baikwö wanedö yötawa, kamijido̧ otiwado̧nö yȩabibi̧danö, jobadöma ökwödönö yetjebobedanö jo̧be, ökwödönö jojodö sulabenö tjomukwatobö ja̧tjobetjö̧. Jau chömöledö jobadöma jwaikwöda omöna yöba̧lö tjö̧jonö, tabakwökönö ökwödökwö Duluwo̧ midawö woina omukwatö kwukwaduwi̧ bakobe kwadö chömöledö, ökwödöbi Jesúsnö ösödadösa jö̧ba̧lö. Ja̧danö chömöledö, ökwödökwö bakobe tjö̧jobetjö̧, ökwödötjöböködötjijayonö, jojodö jobadö sulabenö ja̧bö tjö̧ji̧ edö, okobe deinö ökwödönö tjomukwatakobe, Jesúsnö ösödadöma jwaikwöda sulabenö ja̧bö ju̧kwadö, jö̧ba̧lö.

2 Pedro 2:3

Ja̧danö, idöda tjemotö jö̧ba̧lö tjösödobetjö̧, jobadö sulabenö yöbawadöma ökwödönö omöna yötja̧lakobe, ökwödötjö balada tjemo jö̧ba̧lö. Jo̧kwaijayonö Diosma damötjö jobadönö lȩebobö omukwatö ujuninobe chömöledö, ja̧danö isabenö jobadönö lȩebakobe.

Judas 1:10

Jejenö waisanö yöa̧linobe Miguelma chömöledö, jo̧kwaijayonö jejenö waisanöma yöba̧löködö ökwödönö sulabenö yöbawadöma. Jobadöma okobe jwiinö wajwitji̧ jawa sulabenö yöba̧ladö. Wanedö yötawa: Tebonö ju̧kwadö omukwatökönö a̧dekwanö tjöwaisi̧ jawada ja̧tji̧danö, jobadö sulabenö yöbawadöma idöda tjösödi̧ jawada omukwatökönö ja̧badö, ja̧danö jejenö ja̧bö, jobadönö söbebö loawa baibobö ja̧badö.

Judas 1:16

Jobadö sulabenö yöbawadönö baikwö yöta̧la: Diosnö sulabenö yöba̧ladö, ja̧danö ju'wibi jojodönö tjo̧'wo̧ sulinö yöba̧ladö, ja̧danö ju'wibi idöda sulabenö tjösödi̧ jawa isakwö ju̧kwadö, ja̧danö ju'wibi otiwo̧sa jö̧ba̧lö labinö yöba̧ladö, ja̧danö ju'wibi idöda tjemotö jö̧ba̧lö jojodö tjösödachibanö yöba̧ladö.

Apocalipsis 18:7

Babilonianö ju̧kwadöma idödada omukwatinadö, Otiwadösa, jö̧ba̧lö. Jobadöma, idöda tjösödi̧da tjemobö ösödadö. Babema balekwa mikwa baledobö webo̧sa jobadönö. Jobadö sulabenö wetjemitjö bajalekwönönö inia tjötjinö, balekwa mikwa iyö baledobö webo̧sa. Jobadöma idödada omukwatinadö, Ökwödöma inesö la'aka luwedösa, jö̧ba̧lö. Jilekwenö wobekwinaju budekwabinö jö̧ji̧danöma la'akatjöda dö̧jökakwedösa, jö̧ba̧lö, omukwatinadö, Babilonianö ju̧kwadöma.

Apocalipsis 19:20

Jo̧kwaijayonö kabayu dewo̧ wamenö wo̧ma, iteda ömöayedökwö ojwe okwatjö labebinanö do̧a̧lobe chedijatö. Ja̧danö, böjȩ teebetjö labebinanö, Dios iwene yöbawo̧sa, jö̧ba̧lö, omöna yöba̧lo̧nöbi do̧a̧lobe chedijatö. Ja̧danö, jo̧ba böjȩ teebetjö labebinama, ujulu i̧sebö jojodönö jelobekwö tjomukwatinö öbibo̧, ojwe okwatjö labebinanöbi, jo̧ba o̧'wo̧ jawabi tjösödinö. Ja̧danö, jo̧bama, jojodönö jelobekwö tjomukwatinö, tjöbanöbi, tjömamiju tjöwaisobekwöchobesamunöbi ojwe okwatjö labebina imi seyu do̧bö wȩyukwa tjösödobö öbibo̧. Ja̧danö, kabayu dewo̧ wamenö wo̧ma, jobadö du̧ju̧tajanöma, ina 'yaba̧ladönöma, ökwöla nöola okwa loobe chedijatö, jwiinö tubinö azufre mikwi̧ ubolanö.

Apocalipsis 21:8

Jo̧kwaijayonö jejenömaökö ju'wedönöma. Yebabinö, ¡Ayö! Diosnö chösöditjö̧ma inia tjötinö baledena, jö̧ba̧lö, yebabo̧danö yebabinadönöma otiwi̧ma chiyökakwo̧sa. Ja̧danö, Diosnö kabatibinadönöbi, ja̧danö, sulabedökwö pjabacha̧linadönöbi otiwa jawama chiyökakwo̧sa. Jobadönö ökwöla nöola okwa lotakwo̧sa. Ja̧danö, tji̧lȩkwa̧muböködökwö sulabenö ja̧binadönöbi, ja̧danö, jojodönö kwabö lobinadönöbi, ja̧danö, mea bobinadönöbi, ja̧danö, ju'wedö tjo̧'wo̧ tjöwana̧lobö tjotidinökwenö tjo̧'wo̧ wana̧linadönöbi, ja̧danö, bakwelajatebö omöna yöba̧linadönöbi, jobadönöma ökwöla nöola okwa lotakwo̧sa. Jobema jwiinö tubinö ubobe, azufre mikwi̧ tubi̧ma. Joola okwa lotji̧ma, 'dö̧ibaji̧ woawa mikwemi, jö̧ba̧lö weijatö Diosma ötjönöma, chiwȩyudobö.

Apocalipsis 22:15

Jo̧kwaijayonö ju'wedöma tetjachökakwedö. Jobadöma 'yayi̧ Jerusalén comunidad ö'öböda tjuju̧kwakwedö, sulabedöma. Jobadöma mea bobadöbi, tji̧lȩkwa̧muböködökwö sulabenö ja̧döbi, jojodönö kwabawö lobadöbi, jojodö tjotidina tjo̧'wo̧ jawa tjo̧'wo̧ wana̧ladöbi, omöna yöba̧lö ja̧döbi. Jobadöma tetjachökakwedö— jö̧a̧lijatö Jesúsma.

1 Samuel 2:29

Jo̧kwajabetjö̧, tajawedö jojodö kwabö juwö ötjönö tjiyi̧bi, ju'wi jaye ötjönö tjiyi̧bi kwöpöjödaduwobeda, mikwawökö ji̧ jö̧ba̧lö? Ja̧danö tajawedö ötjönö otiwanö kwomukwato jö̧ka̧li̧tjö bajalekwönönö kwi̧tji̧munöda otiwanö kwomukwatobeda, ötjönöda jojodö tjiyo jö̧tja̧li̧ jawa kwitji̧munöda iyö. Isabenö chömöledö israel jojodö tjiyi̧ jawatjö, inesö otiwa jawa, ötjönöda tjiyo jö̧tja̧li̧ jawama do̧kataduwajabe, ja̧danö ja̧ kwanö kwo̧tewachaduwobe, —jö̧ba̧lö yöawinobe Dios yöawi̧ yöbawo̧ma Elinöma.