Filipenses 2:6 - Dios Iwene

⁶ Cristoma itedainobetjö̧ la'akatjöda Diosdainobe, jo̧kwaijayonö Diosdanö ö̧ji̧ 'diinö do̧a̧loböma omukwatinokobe.

Filipenses 2:6 ပူးပေါင်းရင်းမြစ်များ

Isaías 7:14

Jobekwö sulabenö ja̧köbiökwe, i̧sȩbakwa̧ jawa Dios i̧sȩbobö akebököjayonö, yayonö Dios i̧sȩbakwa̧ jawa yötawakwö baikwö: Möayujuma metu'wo babibaju, jitji̧nö jemakobe, ja̧danö emaju, Emanuel jö̧ba̧lö jimidakobe jitji̧nö, Diosma ökwödökwö jo̧ jö̧ba̧lö.

Isaías 9:6

Jau chuluwo̧, isabenö tjo'wo ösöwachibanö ju̧kwadö kwömöledöma, bakwuju jitji̧nö jemajobetjö̧, duluwo̧ baibakwo̧ jitji̧nö jemajobetjö̧. Ja̧danö jo̧ba jemajökwema, isabenö duluwo̧ baibanö webö ö̧jakwo̧, ja̧danö jo̧ba imi baikwö ötjabikwo̧: —Inesö waisanö tjomukwatobö pjabato̧, —jö̧ba̧lö ötjabikwo̧. Ja̧danö ju'wibi, —Juluwo̧ Dios, —jö̧ba̧lö ötjabikwo̧. Ja̧danö ju'wibi, —Dabe'do Ba̧kwelöjatebö Jo̧, —jö̧balö ötjabikwo̧. Ja̧danö ju'wibi, —Wene Jwiinö Dö̧jobö Webö Jo̧, —jö̧ba̧lö ötjabikwo̧, duluwo̧ baibanö jemajökwema.

Mateo 1:23

Yötawaduwakwö, ina iso̧nö ja̧bökujuma, metu'wo jö̧jakobe, ja̧danö jitji̧nö jemakobe, ja̧danö jo̧banö Emanuel jö̧ba̧lö ötjabikobe, Diosma ökwödökwö jo̧, jö̧ba̧lö laebobe Dios iwene.

Juan 1:18

Ja̧danö, bakwo̧bi deobe, Diosnö edo̧ma, damötjöbi babebi. Jo̧kwaijayonö Dios iteakwo̧ itji̧ma Diosnö edo̧. Ja̧danö, jo̧ba, Dabe'do Dios ile niebökwema, ökwödönö Diosnö döwaisachibanö öba̧ja̧dinobe.

Juan 10:30

Ja̧danö, ötjö, ötjö Chabe'do bakwo̧dabedösa— yöbawijetö Jesúsma.

Juan 10:33

—Otiwanö kwotidina jawamaökö. Ökwöma sulabenö yöka̧lobe, Dios jawama. Ökwöma jojoköbijayonö, Ötjödasa Diosma, jö̧ba̧lö, yöka̧lobe. Ja̧ sulabenö yöka̧li̧tjö dikwawobö jö̧da̧la ökwönöma— jö̧tja̧linobe.

Juan 10:38

Jo̧kwaijayonö Chabe'do wei̧ chotiditjö̧ma chotidobe edö kwösödaduwobö jo̧be. Ökwödöma ötjö yötawi̧ a̧ja̧kwö, Wajwita, jweinö yöba̧lö̧kö̧ena, jö̧ba̧lö, kwomukwataduwena. Jo̧kwaijayonö Chabe'do wei̧ chotidobe edö kwöwaisachibaduwinö baibanö kwomukwataduwo, Bite Jesúsma abe'do Dioskwö ja̧nö juluwi̧ jawa i̧sebo̧, jö̧ba̧lö. Ja̧danö, kwomukwataduwo, Diosma Jesúskwö ja̧nö juluwi̧ jawa i̧sebo̧, bakwainöda ja̧nö i̧sebadö, jö̧ba̧lö, kwöwaisachibaduwinö baibanö kwomukwataduwo— yöawinobe Jesúsma judío jojodönöma.

Juan 14:28

Yötawaja̧, Tjo̧wi̧ chi̧'yakobe, jö̧ba̧lö, kwa̧ja̧kwaduwatö. Ja̧danö, kwa̧ja̧kwaduwatö, Yemidanö chichakwo̧sa, jö̧ba̧lö, yötawaja̧ma. Jejenö a̧ja̧kwö kwo̧'wo̧ tjo̧kekwibaduwatö. ¿Tajawedö kwo̧'wo̧ tjo̧kekwibaduwa? Ötjöma Chabe'do ö̧jobekwö chȩwa̧jakwo̧sa. Ötjönö ile nikebaduwitjö̧ma kwösödaduwena, Otiwanö ȩwa̧jakobe abe'do öjobekwö, jö̧ba̧lö. Yelösöda Chabe'doma ötjönötjö o̧penönö inesö jo̧. Ötjönö ile nikebaduwitjö̧ma kwösödaduwo jö̧ka̧laduwena chȩwa̧jakwa̧ omukwatö— yöawinobe—.

Juan 14:9

Jejenö jö̧a̧liökwe: —Felipe ¿ötjönö wajwiköbiji̧?— jö̧a̧linobe Jesúsma Felipenöma—. Ökwödökwö lekwe möle chö̧jijayonö ina kwöwaisachibaduwokobe ötjönöma. ¿Tajawedö yöka̧laduwa, Dabe'donö i̧sebi dedo, jö̧ba̧lö? Yötawaduwakwö. Ötjönö edo̧ma Dabe'do Diosnöbi edobe.

Juan 17:5

Chabe'do, tjo̧wi̧, chȩwa̧jocha kwö̧jobekwö. Ja̧danö, jobetjö, ökwökwö chö̧jena, ötjö chotiwi̧ma kwi̧sebo jobe ju̧kwadönö. Jau Chabe'do, ötjö chotiwi̧ma kwi̧sebo ajayinö ökwökwö chö̧jena kwi̧sebinadanö, böjȩ ina kwotidapjii ötjö chotiwi̧ kwi̧sebinadanö— aebinobe Jesúsma iteda Abe'donö.

Juan 20:28

Jejenö jö̧a̧liökwe: —Ökwöma ötjö chuluwo̧ja. Isabenö ötjö cho̧'wo̧ chöwana̧lökwe Diosja— jö̧a̧linobe Tomásma.

Juan 5:18

Jejenö jö̧a̧liawö̧ jwiinö tjölabinobe Jesúsnö, kwabö lotjobö omukwatö. Yelösöda tjölabinobe, judío jojodö tjotidökö möle otidiawö̧. Ju'wi jawabi, biya̧: Jesúsma, Diosda ötjö Chabe'do, jö̧ba̧lö, jö̧a̧liawö̧ jwiinö tjölabinobe, Diosdanö bakwainö mikwawo̧sa, jö̧ba̧lö, jö̧a̧liawö̧.

Juan 5:23

Ja̧danö, jejenö kabebö öwanijatö ötjönö, jojodöma Chabe'do Diosnö otiwanö edö tjomukwati̧danö, bakwainö ötjönöbi tjomukwatobö, iteda itji̧nöma. Bakwo̧, ötjönö, Dios Itji̧nö otiwanö omukwatö̧kö̧ma, Diosnöbi otiwanö omukwatö̧kö̧, ötjönö webinanö, iteda itji̧nö webinanöma— yöawinobe Jesúsma judío la'aka luwedönö.

Romanos 9:5

Ja̧danö, jobadö Israel jojodöma inesö ajayinö ji̧nadö, Diosnö ösödinadö tji̧tji̧mu tupadanö jojodö. Ja̧danö, jobadö tjömöledöso̧, Israelso̧ baibanö ichinobe Cristoma. Jo̧ba Cristoma okobe deinö tjuluwo̧ Dios, ja̧danö jo̧banöda böjȩ jojodö tjösödo ba̧kwȩlö̧jatebö. Jau chömöledö, jo̧banö tjösödobö chösöda.

2 Corintios 4:4

Jau chömöledö, yödawi̧ma isabenö öwawinö yödawobe, jo̧kwaijayonö öpöjödadöma böjȩ jojodö tjösödökwe Awetja omöna yöa̧li̧ tjösödobetjö̧ yödawi̧ tjöpöjödobe chömöledö. Jau chömöledö, wanedö yötawa: Awetjama jobadönö ja̧obe, tjomukwati̧nö yȩa'wo okwa tjö̧ji̧danö tjomukwatobö, otiwa jawa wene dejati̧ tjedapji jö̧ba̧lö. Jau chömöledö, Duluwo̧ Cristoma iteda Abe'do Diosdanö bakwainö jo̧, ja̧danö jojodönö salöinö idejatobö ösödo̧, jo̧banö ösödö tjö̧jibakobetjö̧. Jo̧ba salöinö idejati̧ wene otiwa jawa weneda yödawobe jojodönö chömöledö, jo̧kwaijayonö ja̧ salöinö dejati̧ tjedapji jö̧ba̧lö, Awetjama öpöjödadönö omöna yöa̧lobe.

2 Corintios 8:9

Isabenö pjabatö kwiyaduwobö otiwa chömöledö, baikwö yötawa: Kwöwaisaduwa chömöledö, Duluwo̧ Jesucristo mikwa jwiinö otiwanö iyina wenema, ¿jö̧tö? Jau chömöledö, jo̧bama nöinö ujuna̧linajayonö, ujuna̧li̧ junibö, jwibo̧danö usulaso̧ baibinobe, ökwödönö pjabatö. Jejenö baibinobe, ökwödöma jo̧ba usulaso̧ ö̧jinatjö nöinö juna̧ladö bakibaduwakobetjö̧.

1 Timoteo 1:17

Inesö la'aka luwo̧, wobökönö ba̧kwȩlö̧jatebö jo̧, jojodöbi dedökökwe Diosma bakwo̧da, jelo̧ma deobe, jo̧banöda otiwanö domukwatobö jo̧be, ja̧danö jo̧banöda dösödobö jo̧be, otiwo̧ja̧, juluwo̧ja, jö̧ba̧lö. Jejenö kabatökönö dösödobö jo̧be.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

Tito 2:13

Jau Tito, ina böjȩnö dö̧jayi, do̧'wo̧ wana̧lö dite'ada̧lobe, isabenö Dios jö̧a̧lina möle badekwachakobe jö̧ba̧lö, inesö otiwa möle, ökwödö dö̧jibinö pjabato̧ la'aka Dios Jesucristoma iteda ujulu i̧sebenama.

Hebreos 1:6

Ja̧danö chömöledö, ángelesdönö yötawaduwakwö. Ju'wi Dios yöawina laebobe iteda iwenetjö, Dios ángelesdönö yöawinama. Chömöledö Diosma ángelesdönö yöawinobe, Ángelesdöma ötjö Chitji̧ abönö pöenö tjösödakobe yemidanö böjȩkwö, balekwöjȩnö ichakwo̧nö, jö̧ba̧lö. Baikwö laebobe Dios iwenetjö: Chömöayedö ángelesdönö okobe deinö, Chitji̧ yemidanö ichakwo̧nö tjösödobö weta, Jwiinö inesö jo̧, jö̧ba̧lö. Jejenö laebobe Dios iwenetjö. Isabenö chömöledö, Diosma jejenö, Chömöayedö ángelesdönö okobe deinö Chitji̧nö tjösödobö weta, jö̧ba̧lö, yöawinobetjö̧ döwaisachibobö jo̧be, Dios Itji̧ma ángelesdönötjö o̧penönö inesö jo̧, jö̧ba̧lö.

Hebreos 1:8

Ja̧danö, jejenö Diosma ömöayedö ángelesdönö yöawijayonö wainö yöawobe iteda Itji̧nöma. Baikwö laebobe Dios iteda Itji̧nö jö̧a̧lina: Isabenö ökwöma Diosja. Ja̧danö, ba̧kwȩlö̧jatebö jojodönö webö kwö̧jakwo̧ja. Isabenö jweinöda omukwatö webö kwö̧jakwo̧ja.

Hebreos 13:8

Ja̧danö, jo̧ba Jesucristoma la'akatjöda balewachökönö bakwo̧da jo̧, damötjöbi, babebi, ja̧danö ba̧kwȩlö̧jatebö.

Apocalipsis 21:6

Tjo̧wi̧ta, okobe jwiinö 'dö̧ibajabe. Ötjödasa la'akatjöda ji̧nama. Ja̧danö, ötjödasa 'dö̧bibajö̧kö̧ma. Ötjöma ojwiyo o̧ti̧lö̧jökwenöma ojwiyo iyo̧sa, mikwa jwiinö, ba̧kwȩlö̧jatebö ja̧kwawa ojwiyoda.