Filipenses 1:27 - Dios Iwene

²⁷ Chömöledö, baikwö wetaduwakwö: Ba̧kwȩlö̧jatebö otiwa jawa wene ösödadö otiwanö ja̧bö tjö̧ji̧danö ja̧bö kwö̧jaduwo chömöledö, ökwödökwö chö̧jitjö̧bi, detitjö̧bi ökwödönö yötjawi̧ cha̧ja̧kwakobetjö̧: Filipos jojodöma bakwainö ösödö 'diinö pjolachibökönö ju̧kwadötö jö̧ba̧lö, ja̧danö biya̧da isabenö wene jö̧ba̧lö, bakwainö omukwatö bakobe otiwa jawa wene tjöbeba̧lö ju̧kwadötö jö̧ba̧lö cha̧ja̧kwakobetjö̧.

Filipenses 1:27 ပူးပေါင်းရင်းမြစ်များ

1 Crónicas 19:12

Ja̧danö, jejenö 'da̧batö junajo̧, Abisainö yöa̧linobe, —Dölakwabikwawonö, siria jojodö tjujuluwitjö̧ma, ökwödönö pjabatö kwichaduwo dujuluwobö, ja̧danö amonitas jojodökwö kwölakwabikwawonö tjujuluwitjö̧ma, ökwödöma pjabatö dichakobe.

Proverbios 22:23

Jobekwö yökawoko. Isabenö Jo̧ma usulaso̧nö tjöbeba̧lö te'ada̧lo̧. Jobekwö te'ada̧lo̧obetjö̧ usulaso̧nö sulabenö ja̧bo̧nöma debö i̧'yinö lȩebakwo̧ Isabenö Jo̧ma.

Mateo 12:25

Jesúsma fariseo jojodö tjomukwati̧ öwaisinobe, jo̧kwajabetjö̧ jobadönö wanedö yöawinobe: —Kwöwaisaduwa, jojodö tjiteboma, jobe jojodö wainökwena ölakwabikwawö tjö̧jitjö̧ma, waekwakobe, ¿jö̧tö? Ja̧danö, comunidadnö ju̧kwadö, ju'wedö comunidadnö ju̧kwadökwö ölakwabikwawö tjö̧jitjö̧ma, waekwakobe, comunidadma lekwema jö̧kakobe, ja̧danö jojodö idöda tjömöledökwö ölakwabikwawö tjö̧jitjö̧ma, waekwakobe, ¿jö̧tö?

Hechos 2:46

Ju'wi möle jwiinö Jesúsnö ösödadöma bakwainö omukwata̧lö, Dios eju okwa tebachö ji̧abijadötö. Tjejubiyatjö kwanöbi tebachö ji̧abijadötö, tjo̧'wo̧ ösöwanö, sulabenö tjomukwati̧ jwiinö.

Hechos 24:24

Ikenama lekwokobetjö Félixma, jelobe kwebachö 'yi̧na ȩwa̧jijetö, ilekwokwö. Jobujuma judiosuju, Drusila mikwuju. Félixma Pablo yöawi̧ yemidanö a̧ja̧kwotö jö̧ba̧lö webijetö jo̧banö tjichejebobö. Tjichejebökwe yöawi̧, Jesucristonö tjo̧'wo̧ wana̧lakwawa wenema, a̧ja̧kwijetö Félixma.

Hechos 4:32

Okobe deinö Jesúsnö ösödadöma tjomajadenö tjo̧'wo̧ luwo̧nö otiwanö bakwainö omukwatijadötö. Tju̧kwa teatjöbi ö'wiawökönö ju̧kwiabijadötö, okobe jwiinö dujuna̧li̧kwenama, Okobe deinö bakwainö du̧kwa tea, jö̧ba̧lö.

Romanos 1:16

Jau chömöledö, tabada̧lökönö yöbawo̧sa otiwa jawa wenema, jo̧kwajabetjö̧ isabenö ökwödönöbi yötawobö jö̧ta̧la. Jau chömöledö, tabada̧lökönö yöbawo̧sa. ¿Tajawedö chötabada̧lobö chömöledö? Ja̧ weneda inesö mikwawi̧ wene, ju'wima jwiobe yelösöda, jojodö tjö̧jibobö chömöledö. Okobe deinö ja̧ otiwa jawa wene ösödadönöma, tjö̧jibinö ja̧akwo̧ Diosma, abönö a̧ja̧kwinadö judío jojodönöbi, judío jojodöböködönöbi. Ja̧danö, ja̧ weneda ji̧kwa weneobetjö̧, tabada̧lökönö yöbawo̧sa ötjöma chömöledö. Jau, ja̧ wene isabenö juluwi̧ ji̧.

Romanos 1:5

Ja̧danö, ju'wibi yötawa, Diosma Jesucristonö weachinobe, Jesucristoda ötjö Pablonö 'da̧batö ujunobö, Jesucristo webawo̧ batibanö. Ja̧ Dios weinama jwiinö chösödobe chömöledö, Diosma otiwa jawa ötjönö weinobe, jö̧ba̧lö. Ja̧danö, inesö otiwa jawa wene böjȩ bakwameachibanö judío jojodöböködönö yötawobö weinobe ötjönöma, jobadöbi Jesucristonö tjösödo jö̧ba̧lö. Ja̧danö, jobadötjö ösödadöma, Jesucristo wei̧ ja̧tjo jö̧ba̧lö, yötawobö weinobe.

Romanos 1:9

Jau chömöledö, ba̧kwȩlö̧jatebö ökwödönö omukwatö Diosnö atebobe. Isabenö abebo̧sa ökwödönöma, omöna yöta̧lökö. Diosda atebobe waiso̧, jo̧bada a̧ja̧kwobetjö̧. Jau chömöledö, ötjö chuluwo̧ma Diosda, jwaikwöda otiwa jawa wene, Dios itji̧ jawa wene yöbawö kwebacho̧sa jo̧ba wei̧danö. Jo̧ba chuluwo̧ Diosma ökwödönö atebobe a̧ja̧kwo̧.

Romanos 10:8

Jau chömöledö, wainö weobe Dios iwene, kwomukwataduwobö. Baikwö laebobe: Ji̧kwa wenema ödöokobe ökwödötjöma, isakwö kwi̧'yaduwobö, ida̧ökö ökwödökwö jo̧betjö̧. Ja̧danö, ida̧ökö kwinenenöbi, kwomajadenöbi jo̧be ichejekwa, ji̧kwa wenema, ödöokobe, jö̧ba̧lö laebobe Dios iwene. Jau chömöledö, ja̧ ji̧kwa wenema, ökwödönö yötawi̧ weneda.

Romanos 15:29

Ja̧danö chi̧'yenama, biya̧ chöwaisa, ökwödönö yötawenama, Cristoma nöinö pjaatakobe ökwödönöma, kwo̧'wo̧ luwo̧duwi jawama.

1 Corintios 1:10

Chömöledö, Duluwo̧ Jesucristo iminö wetaduwakwö bakwainö omukwatö kwö̧jaduwobö, ja̧danö kwömöledö Jesúsnö ösödadökwö ölakwabikwawa jwiinö kwö̧jaduwobö. Jau chömöledö, ju'wedö kwömöledö Jesúsnö ösödadökwö bakobe ja̧nö, isabenö bakwainö omukwatö, ja̧danö bakwainö ösödö kwö̧jaduwo.

1 Corintios 15:58

Jejenö jo̧be chösödawö̧ chömöledö, ja̧danö jejenöobetjö̧, 'diinö kwö̧jaduwo, pjolachibökönö. Ja̧danö jwaikwöda Duluwo̧ wei̧ ja̧bö kwö̧jaduwo kwöwaisaduwobetjö̧, Duluwo̧ wei̧ ja̧bö dö̧ji̧ma isabenö mikwa ji̧ jö̧ba̧lö.

2 Corintios 13:11

Tjo̧wi̧ta chömöledö, böja kwialusöja katatakwa̧ abönö, baikwö bajaleapo bakwamu jawa yötawiba chömöledö. Kwo̧'wo̧ luwo̧ ösöwachibanö kwö̧jaduwo, ja̧danö sulabenö ja̧bö kwö̧jaduwi̧ jwekekwaduwo, ja̧danö bakwo̧nökwena kwujuluwachibaduwobö pjakatakwawaduwo, ja̧danö kwömöledö Jesúsnö ösödadökwö bakwainö omukwatö kwö̧jaduwo, ja̧danö wene jwiinö kwö̧jaduwo chömöledö. Jau chömöledö, jejenö ja̧bö kwö̧jaduwo, ja̧danö jejenö ja̧bö kwö̧jaduwiökwe isabenö Diosma ökwödökwö ö̧jakwo̧. Jau chömöledö, Diosda dömöledönö ösödabikwawö dö̧jobö pjabato̧ma, ja̧danö dömöledökwö wene jwiinö dö̧jobö pjabato̧ma chömöledö, ja̧danö jo̧bama ökwödökwö ö̧jakwo̧.

2 Corintios 4:4

Jau chömöledö, yödawi̧ma isabenö öwawinö yödawobe, jo̧kwaijayonö öpöjödadöma böjȩ jojodö tjösödökwe Awetja omöna yöa̧li̧ tjösödobetjö̧ yödawi̧ tjöpöjödobe chömöledö. Jau chömöledö, wanedö yötawa: Awetjama jobadönö ja̧obe, tjomukwati̧nö yȩa'wo okwa tjö̧ji̧danö tjomukwatobö, otiwa jawa wene dejati̧ tjedapji jö̧ba̧lö. Jau chömöledö, Duluwo̧ Cristoma iteda Abe'do Diosdanö bakwainö jo̧, ja̧danö jojodönö salöinö idejatobö ösödo̧, jo̧banö ösödö tjö̧jibakobetjö̧. Jo̧ba salöinö idejati̧ wene otiwa jawa weneda yödawobe jojodönö chömöledö, jo̧kwaijayonö ja̧ salöinö dejati̧ tjedapji jö̧ba̧lö, Awetjama öpöjödadönö omöna yöa̧lobe.

2 Corintios 9:13

Jau chömöledö, jobadönöbi, ju'wedönöbi kwiyaduwi̧ma i̧sekwakobe, isabenö otiwa jawa wene Cristo jawa wene kwösödaduwi̧ma, Dios wei̧danö ja̧köbaduwobetjö̧. Ja̧danö, jejenö kwi̧sebaduwiawö̧, ökwödönö omukwatö Diosnö tjösödakobe, otiwanö pjabato̧ja jö̧ba̧lö.

Gálatas 1:7

Isabenö ju'wi wene otiwa jawa wenema jwiobe chömöledö, ökwödönö yödawina weneda. Jo̧kwaijayonö ju'wedöma ökwödönö suli̧ waedö, Cristo jawa wene otiwa jawa wene balewö lobö yötjawobe.

Efesios 1:13

Chömöledö ¿ökwödö judío jojodöböködöja? Ökwödöma Dios isabenö iwene yötjawi̧ a̧ja̧kwö kwösödinaduwobe. Jau chömöledö, kwö̧jibaduwinö ja̧awa, otiwa jawa wene yötjawi̧ a̧ja̧kwö, Jesúsnö kwösödinaduwobe, Jesúsma dö̧jibanö pjabato̧, jö̧ba̧lö. Ja̧danö, Jesúsnö kwösödaduwena Dios O̧'wo̧ Luwo̧ma tebachibö öjamatinobe ökwödö kwo̧'wo̧ luwo̧duwinöma. Jau chömöledö, Dios ajayinö yöbawö ujuninadanö, Ötjö Cho̧'wo̧ Luwo̧nö wetocha, jö̧ba̧lö, yöbawö ujuninadanö, iteda O̧'wo̧ Luwo̧nö weinobe ökwödö kwo̧'wo̧ luwo̧duwinö tebachibö öjamatobö. Ja̧danö jo̧ba tebachibö öjamatenama jweinö i̧sebinobe, Isabenö bidöma ötjö chi̧tji̧mu, jö̧ba̧lö.

Efesios 1:15

Chömöledö, Duluwo̧ Jesúsnö kwösödaduwi̧bi, ju'wedö Dios ömöledö babibinadökwö ösödabikwawö kwö̧jaduwi̧bi yötjawi̧ cha̧ja̧kwinobetjö̧ ba̧kwȩlö̧jatebö Diosnö ösödö yöta̧lobe, Chabe'do otiwanö pjakatinobe, jö̧ba̧lö. Ja̧danö, Diosnö atebena ba̧kwȩlö̧jatebö ökwödönö pjaatobö atebobe.

Efesios 4:1

Jo̧kwaobetjö̧ chömöledö, Diosma ökwödönö otiwanö pjaatobetjö̧ budekwö lȩtebaduwakwö, Otiwanö Dios ösödi̧ jawada ja̧bö ju̧kwaduwi, jö̧ba̧lö. Ötjöma Duluwo̧ weina yötawobetjö̧ ka̧lena ba̧kwaweju okwama bo̧sa. Bena ba̧nö budekwö lȩtebaduwakwö, baikwö: Diosma ökwödönö jwöinobe iteda ömöledö bakibaduwobö. Jo̧kwaobetjö̧, iteda ömöledö bakibinaduwobetjö̧ otiwanö ja̧bö ju̧kwaduwi, iteda ösödi̧ jawada ja̧bö, chömöledö.

Filipenses 2:12

Jo̧kwajabetjö̧ ökwödönö yötawaja̧danö ja̧bö kwö̧jaduwo chösödawö̧ chömöledö. Isabenö belö ökwödökwö chö̧jayima, ötjö yötawi̧danö ja̧bö kwö̧jinaduwobe chömöledö, ja̧danö ja̧tjö bajalekwönönö babe jelobetjö wȩyudö yötawi̧ ja̧bö kwö̧jaduwo chömöledö. Ja̧danö, Diosnö otiwanö yebabinö ösödö, jwaikwöda Duluwo̧ Dios wei̧ ja̧bö kwö̧jaduwo, Dios kwö̧jibaduwinö ja̧ina kwi̧sebaduwakobetjö̧.

Filipenses 2:24

Ja̧danö, ju'wibi yötawaduwakwö chömöledö, ötjöbi jobe kwiteboduwibe chi̧'yena. Jau chömöledö, Duluwo̧nö cho̧'wo̧ chöwana̧lobe, ötjöbi jobe chi̧'yobö weakwo̧ jö̧ba̧lö.

Filipenses 3:18

Jo̧kwaijayonö, ökwödö ja̧bö dö̧ji̧danö ja̧böködönöma, jobadö ja̧tji̧danöma ja̧bökönaduwi chömöledö. Ökwödönö yöbawiachinadanö, yemidanö budekwö yötawaduwakwö chömöledö, ju'wedöma Cristo towisa'onö midawö woina wene öpöjojodö tjuju̧kwobe,

Filipenses 3:20

Jo̧kwaijayonö böjȩ jojodöböködösa ökwödöma, böjȩ jawada domukwato jö̧ba̧lö. Ökwödöma mölejȩ jojodösa chömöledö, ja̧danö dö̧jibinö pjabato̧ Duluwo̧ Jesucristo mölejȩbetjö ichakwa̧ te'ada̧lö dö̧jobe ökwödöma chömöledö.

Filipenses 4:1

Ökwödöma chösödawö̧ chö̧ja̧wo̧döja, ja̧danö ökwödönö chedowe jö̧ba̧lö chomukwatobe. Ökwödönö omukwatö, cho̧'wo̧ ösöwanö chö̧jobe, ja̧danö ökwödönö omukwatö, chömöledö otiwadö jö̧ba̧lö chösödaduwakwö chömöledö. Ja̧danö, yötawaja̧danö, mölejȩbe jojodösa ökwödöma chömöledö, jo̧kwajabetjö̧ Duluwo̧kwö dötewinö ja̧nö, pjolachibökönö jo̧bakwö kwö̧jaduwobö jo̧be.

Colosenses 1:10

Duluwo̧ ömöledö tjö̧jo jö̧tja̧li̧danö kwö̧jaduwo jö̧ba̧lö. Jau chömöledö, Duluwo̧ ösödi̧danö ja̧bö kwö̧jaduwobö dösöda, ja̧danö okobe jwiinö otiwanö ja̧awa jwaikwöda ja̧bö kwö̧jaduwobö dösöda, ja̧danö tupakwö Diosnö kwöwaisaduwobö dösöda.

1 Tesalonicenses 3:6

Ja̧danö, Timoteoma ida̧ökö edö ȩwa̧jabe, ja̧danö otiwa wene yöawajabe ökwödönö, Tesalónicanö ju̧kwadöma Jesúsnö ösödö tjö̧jobetö jö̧ba̧lö, ja̧danö tjömöledönö ösödabikwawö tjö̧jobetö jö̧ba̧lö. Ja̧danö, ökwödönö yöawajabe, kabatökönö ökwödönö otiwanö kwomukwataduwi̧ma. Ja̧danö, ökwödönö dedobö nöinö dösödi̧danö, bakweminö ökwödönö kwedaduwobö kwösödaduwi̧ wene yöawajabe.

1 Tesalonicenses 4:1

Chömöledö, belö ökwödönö yödawijatö, Dios ösödi̧danö ja̧kwawama, baikwö ja̧bö kwö̧jaduwo jö̧ba̧lö, ¿jö̧tö? Ja̧danö babema Duluwo̧ Jesús iminö budekwödanö wedaduwakwö, yödawinadanö ja̧bö kwö̧jaduwo jö̧ba̧lö. Isabenö jejenö ja̧bö ju̧kwadöja ida̧ökö chömöledö, jo̧kwaijayonö jemi tupakwöbi jejenö ja̧bö kwö̧jaduwo chömöledö.

1 Timoteo 1:11

Jobekwö laebobe isabenö wene ötjö yötawi̧ wenema Timoteo. Ja̧danö, ja̧ jwiinö otiwa jawa wene yötawi̧ma, inesö otiwo̧ Diosma ötjönö yöbawö iyinobe, tupakwö ju'wedönö yötawo jö̧ba̧lö.

1 Timoteo 1:19

Ja̧danö kabatökönö Cristonö ösödö kwö̧jo, ja̧danö kwomajadenö kwöwaisi̧danö, jwaikwöda otiwanö ja̧bö kwö̧jo, sulabenö ja̧bökönö. Ju'wedöma tjomajadenö tjöwaisi̧danö ja̧bö tjö̧jinokobetjö̧, waekwinobe. Ja̧danö, Dios iwene tjösödo jö̧tja̧li̧ wenema kabatibö, isa̧ökö weneda tjösödinobe.

2 Timoteo 4:7

Dios wei̧ otidö chö̧ji̧ma baikwö wanedö yötawa: Otiwanö döpöjojonö ölakwabikwawö kwakwaakwawama otiwanö kwakwachakwawajabe. Ja̧danö ju'wibi wanedö yötawa: Ö'öbakwawadö ö'ötjakwawi̧ma otiwanö ö'öchakwawajabe, bajalebe chichibenanö kabatö, ja̧danö Dios yöawi̧ ösödöma kabatibökönö jwaikwöda otiwanö chösödajabe.

Tito 2:10

ja̧danö tjuluwedö tjujuna̧li̧ma naukwökönö tjö̧jobö. Jau Tito, jobadö tjö̧ji̧ma tji̧sebobö jo̧be, jwaikwöda chuluwo̧ wei̧ jweinö ja̧bö jo̧sa jö̧ba̧lö. Ja̧danö, jejenö tji̧sebobe edö, ju'wedöma dö̧jibinö pjabato̧ Dios yöawi̧ma tjösödakobe, otiwa jö̧ba̧lö.

Santiago 3:18

Chö̧ja̧wo̧dö, Dios öibawö̧ waisanö omukwatadöma tjömöledönö dösölö̧jinö pjabatö, wene jwiinö isakwö ja̧dö. Jejenö ja̧nö tjisakwobetjö̧, wene jwiinö tjö̧jobö, tjömöledöbi wene jwiinö tjö̧jobö tjisakwobe. Wanedö yötawaduwakwö: Dösölö̧jinö omukwatö pjabatadöma batjo junawadanö tjujunobe. Tjujuni̧ önebiama idöda dösölö̧jinö tjomukwati̧, ja̧danö, tjömöledönö otiwanö omukwatö pjatjati̧ma. Ja̧ dösölö̧jinö tjomukwati̧ma, ja̧danö tjömöledönö pjatjati̧ma junawa tjujuni̧danö tjujunobe tjömöledökwö otiwanö tjö̧ji̧ma. Ikenama ja̧ tjujuni̧ma otiwanö pokwobe ju'wedö tjömöledö tjomajade okwa, otiwanö wene jwiinö omukwatö tjö̧jobö. Isabenö chö̧ja̧wo̧dö, otiwanö dösölö̧jinö omukwatö ju̧kwadöma ju'wedönöbi otiwanö wene jwiinö tjö̧jobö pjabatadö.

2 Pedro 3:11

¿Dakwö kwomukwataduwa chömöledö? Jejenö okobe jwiinö dedi̧ma jejenö ubö jwiinö baibakobema, ¿böjȩ jawada omukwatö kwö̧jaduwobö otiwenaji̧? Ja̧maökö chömöledö, sulabenö ja̧bökönö Dios ösödi̧ ja̧bö kwö̧jaduwo chömöledö.

2 Pedro 3:14

Jau chömöledö, Dios 'yayöjȩ otidobö te'ada̧ladösa ökwödöma. Jo̧kwajabetjö̧ ja̧ baledakwa̧ möle baibobö dite'ada̧lonö, jwaikwöda wene jwiinö kwö̧jaduwobö kwisakwaduwo, ökwödönö edö, bakwainö sulabenö ja̧böködönöda Duluwo̧ edakobetjö̧.

Judas 1:3

Chömöledö, ökwödö Jesúsnö ösödadöma, okobe deinö bakwainö ji̧badösa, ¿jö̧tö? Jau chömöledö, ökwödö okobe deinö Dios lȩlö̧jinö iyi̧tjö emadösa, ja̧danö ja̧ jawa labebö lobö ökwödönö chiwȩyudobö jö̧ta̧latö. Jo̧kwaijayonö sulabenö yöbawadö yötjawobetjö̧, ja̧ chiwȩyudobö jö̧ta̧li̧ma waekwajabe, ju'wida chiwȩyudobö jo̧be babema. Jau chömöledö, ju'wedöma ju̧kwawö dö'da̧de tetjachajabe, ja̧danö dö'da̧de ja̧nö sulabenö yötjawobe. Jo̧kwajabetjö̧ ju'wida chiwȩyudobö jö̧ta̧lijayonö, ökwödönö kwujuluwaduwachibanö chiwȩyudobö jo̧be, dösödi̧ wene tjöbeba̧lö ölakwabikwawö kwö̧jaduwobö. Jau chömöledö, ja̧ dösödi̧ wenema, bakwöta wene balewachökö wene, ja̧danö bakwötanöda Dios iyina wene, ba̧kwȩlö̧jatebö ja̧ wenenöda dö̧jibobö. Ja̧ wene balewö lobö sulabenö yötjawapji jö̧ba̧lö, tjöbeba̧lö ölakwabikwawö kwö̧jaduwobö kwujuluwaduwachibanö chiwȩyudaduwakwö. Ökwödönö sulabenö yöbawadönö baikwö yötawa: Diosma damötjö jobadönö lȩebakwa̧ omukwatö ujuninobe. Jobadöma isabenö Diosnö ösödöködö chömöledö, ja̧danö sulabenö yöbawö Dios mikwa jwiinö otiwa jawa iyi̧ wene balewö lotjobe, jojodö jwaikwöda sulabenö ja̧bö tjö̧jobö wei̧ wene baibanö. Ja̧danö ju'wibi, Duluwo̧ma bakwo̧dajayonö, Duluwo̧ Jesucristonö öpöjödadö, duluwo̧bö̧kö̧ jö̧ba̧lö.