Efesios 6:18 - Dios Iwene

¹⁸ Ja̧danö chömöledö, ba̧kwȩlö̧jatebö Dios O̧'wo̧ Luwo̧ ökwödö kwo̧'wo̧ luwo̧duwinö öba̧ja̧da̧lonö a̧ja̧kwö akebaduwo Diosnöma, okobe jwiinö pjaataduwokwö. Kwö'wachibaduwoko chömöledö, Diosnö aekwama. Ba̧kwȩlö̧jatebö, ö'wachibökönö akebaduwo Diosnöma, iteda ömöledö babibadönöma pjaatobö.

Efesios 6:18 ပူးပေါင်းရင်းမြစ်များ

1 Reyes 8:52

—Jau chuluwo̧, ötjö kwömöayo̧bi, ju'wedö kwömöledö israel jojodöbi pjakatobö adebenama, otiwanö kwa̧ja̧kwobö atebakwö, okobe jwiinö ökwönö adebi̧ a̧ja̧kwö kwatadobö atebakwö.

1 Reyes 8:54

Jobekwö abebö, okobe jwiinö ja̧ Isabenö Jo̧nö aekwa aebinobe Salomonma. Jejenö aebonö, Isabenö Jo̧nö iyawöte öba a'o, u̧yu̧kiju̧kunö ja̧nö, ömamu mölȩjȩbekwö kabebö aebinobe, ja̧danö abebö kabatajo̧, jobetjö a̧la̧ibinobe.

1 Reyes 8:59

Ja̧danö dösödökwe Isabenö Jo̧ Dios ba̧kwelöjatebö jo̧banö atebaja̧ jawa omukwatibobö chösöda, babe öba a'otjö atebaja̧ma. Ja̧ omukwatibobö chösöda, wene baledö, jo̧banö pjaatobö adebiökwe, ötjö jo̧ba ömöayo̧nöbi, ju'wedö ömöledö israel jojodönöbi otiwanö pjaatakobetjö̧.

1 Reyes 9:3

Baikwö yöawinobe Isabenö Jo̧ma, Salomon i̧'wi̧dinö: —Salomon, chejutjö ötjönö akebina cha̧ja̧kwijatö, otiwanö pjatatobö akebina cha̧ja̧kwijatö Salomon. Ja̧danö, a̧ja̧kwajo̧, akebaja̧danö beju cheju baibanö kwotidinejuma 'da̧batö chujunajabe, ba̧kwelöjatebö chö̧jakweju baibanö. Kwotidineju ile nibebo̧sa Salomon, ja̧danö ba̧kwelöjatebö jeju jo̧bekwö cheda̧lakwo̧sa Salomon, akebinadanö.

Diosnö ösödo̧ Job mikwo̧ usula emawina jawa 27:10

—Ju'wibi yöta̧laduwakwö, isabenö Diosnö öpöjödadöma, Okobe Jwiinö Juluwo̧ Dios otidi̧ edö tjo̧'wo ösöwachibanö edöködö, jö̧tö? Ja̧danö kabatökönö, ba̧kwelöjatebö Diosnö abebö jwöböködö, jö̧tö? Ötjöma jejenöchokobe chömöledö, isabenö Diosnö ösödo̧sa chömöledö.

Isaías 26:16

Duluwo̧ Isabenö Jo̧, ökwödö Juda jojodönö lȩkebiawö̧, usula demawijatö, jadanö usula emawö ökwönö disakwijatö. Jwiinö usula emawö, tjo'omanö sewoba̧löda adebobö ji̧nobe duluwo̧, lȩkebawö̧ ökwönö bajaliyanö disakwenama.

Daniel 6:10

Danielma ja̧ weawa wȩyudö sello dobö ödina wene a̧ja̧kwinobe, ja̧danö a̧ja̧kwajo̧, ba̧kwȩlö̧jatebö abebajiadanö o̧do okwa tebachö Diosnö aebinobe. Jo̧bama ba̧kwȩlö̧jatebö mö̧sȩko̧ ventana po̧bebö, Jerusalénkwö edö Diosnö o̧'wo̧ wana̧lö abebiainobe, ja̧danö la'aka luwo̧ weaja̧ a̧ja̧kwajo̧, yayonö mösȩko̧nö uyu̧ko̧nö bamatö ventanasa'donö banö aebinobe, ju̧kwawökönö. Ba̧kwȩlö̧jatebö abebajiadanö, mölekwena wa̧pötakwanö jejenö Diosnö aebinobe, otiwanö pjabato̧ja jö̧ba̧lö.

Daniel 9:20

Jobekwö yöba̧lö Diosnö abeböbi, ötjö chusula yöbawö loböbi, chömöledö tjusula yöbawö loböbi Diosnö atebijatö, Isabenö Jo̧ Dios öba a'otjö Dios eju ja̧'o mösa'o comunidad lȩlö̧jinö edö pjaatobö ateba̧lijatö.

Mateo 26:41

Abökönö te'ada̧lö Diosnö akebaduwo, sulabenö ja̧köbaduwojobö jö̧ba̧lö balediawö̧, sulabenö ja̧köbaduwapji jö̧ba̧lö. Kwo̧'wo̧ luwo̧duwitjö isabenö otiwanö ja̧köbaduwobö ösödadöja chömöledö, jo̧kwaijayonö kwiteba'oduwitjö juluwöködöja— jö̧ba̧lö.

Marcos 13:33

Jo̧kwaobetjö̧ ökwödöma tjöbeba̧lakwawö kwite'ada̧laduwo, chichakwa̧ma wajwiköbaduwobetjö̧— jö̧ba̧lö—.

Marcos 14:38

Ikenama öba̧ja̧di̧ waisachadönö jö̧ba̧lijetö: —Diosnö abebaduwi ökwödönö pjaatobö tupadanö kwo̧'wo̧duwi juluwachibanö kwi̧'yaduwobö. Diosnö abebaduwi sulabenö ja̧köbaduwökakobetjö̧. Isabenö kwo̧'wo̧duwi luwo̧ma, Otiwanö ja̧bö chö̧jo, jö̧ka̧laduwijayonö ökwödöda kwujuluduwinö otiwanö ja̧bö ju̧kwöködöja. Me'dawadöja—jö̧ba̧lijetö Jesúsma öba̧ja̧di̧ waisachadönöma.

Lucas 21:36

Jau chömöledö, ökwödöma ba̧kwȩlö̧jatebö eda̧lö ja̧nö Diosnö akebaduwo kwujuluwachibaduwanö pjaatobö, yötawaja̧ baledakwa̧ jawa baledenama, otiwanö kwöbaledaduwakobetjö̧, ja̧danö baledajadö ötjö jojo baibanö jeminökwe chöba a'otjö otiwanö kwö̧jaduwakobetjö̧— jö̧ba̧lö yöawinobe Jesúsma.

Lucas 22:46

Ja̧danö, jejenö abibajadönö edö, Jesúsma jobadönö yöa̧linobe: —¿Tajawedö kwabekwaduwa? A̧laibö Diosnö abebaduwi, sulabenö ja̧köbaduwojobö jö̧ba̧lö ökwödönö baledenama, kwujuluwaduwachibanö pjaatobö, sulabenö ja̧köbaduwapji jö̧ba̧lö— yöa̧linobe Jesúsma.

Lucas 3:26

ja̧danö Nagaima Maat itji̧inobe, ja̧danö Maatma Matatías itji̧inobe, ja̧danö Matatíasma Semei itji̧inobe, ja̧danö Semeima José itji̧inobe, ja̧danö Joséma Judá itji̧inobe,

Lucas 3:37

ja̧danö Lamecma Matusalén itji̧inobe, ja̧danö Matusalénma Enoc itji̧inobe, ja̧danö Enocma Jared itji̧inobe, ja̧danö Jaredma Mahalaleel itji̧inobe, ja̧danö Mahalaleelma Cainán itji̧inobe,

Hechos 1:14

Jobadöma bakwainö omukwatö Diosnö abebö ju̧kwiabijadötö. Ja̧danö, ya̧döbi, Jesús ojo'do Maríabi, Jesús ö̧ja̧wo̧döbi jobadökwö Diosnö abebö ju̧kwiabijadötö ba̧kwȩlö̧jatebö.

Hechos 10:2

Ja̧danö, Cornelioma Diosnö ösödö ji̧abijetö. Jo̧babi jo̧ba ömöledöbi Diosnö otiwanö yebabinö omukwatö ji̧abijadötö. Jo̧bama judío jojodötjö tju̧kwa jwibadönö pjabatiabijetö. Ja̧danö, Cornelioma kabatökönö Diosnö abebö ji̧abijetö.

Hechos 12:5

Jo̧kwaobetjö̧ Pedroma ka̧lena ba̧kwaweju okwa bi̧jetö. Jobe ö̧bonö Jesúsnö ösödadöma kabatökönö abebijadötö Diosnö, Pedronö pjaatobö.

Hechos 6:4

Ja̧danö, ökwödöma kabatökönö Diosnö abeböda, Dios iwene yöbawöda duju̧kwakwedösa.

Romanos 12:12

Diosnö kwo̧'wo̧ wana̧lö, kwo̧'wo̧ luwo̧ ösöwanö omukwata̧lö kwö̧jaduwo, Diosma jö̧a̧li̧danö ja̧akwo̧ jö̧ba̧lö. Ja̧danö, wene baibenama, me'dawachibökönö kwö̧jaduwo. Ja̧danö, kabatökönö Diosnö abebö kwö̧jaduwo chömöledö.

Romanos 8:15

Jau chömöledö, isabenö Dios i̧tji̧mubedösa babema. Baikwö yötawa: Ajayinöma, suli̧ ömöayedödanö dö̧jinobe, ¿jö̧tö? Ja̧danö, suli̧ ömöayedödanö ja̧nö, yedabinobe, ¿jö̧tö? Jo̧kwaijayonö, yedaboböma jwiobe yelösöda babema. Jau chömöledö, Diosma weinobe iteda O̧'wo̧ Luwo̧nö, ökwödö do̧'wo̧ luwo̧nö ö̧jobö. Ja̧danö, jo̧ba Dios O̧'wo̧ Luwo̧ma, Diosda i̧tji̧mu badibobö ja̧inobe. Ja̧danö, Dios i̧tji̧mu badibobö ja̧inobetjö̧, babema yebabökönö adebena Dabe'do Diosnö, Chabe'dowe jö̧ba̧lö.

Gálatas 4:6

Ja̧danö, Dios i̧tji̧mu kwö̧jaduwobetjö̧, Diosma iteda Itji̧ O̧'wo̧ Luwo̧nö, do̧'wo̧ luwo̧nö ö̧jo jö̧ba̧lö weinobe. Jo̧ba Dios Itji̧ O̧'wo̧ Luwo̧ma, do̧'wo̧ luwo̧nö ja̧nö Chabe'dowe jwöobe Dabe'do Diosnö.

Efesios 2:22

Jau chömöledö ökwödö judío jojodöböködöbi, Dios O̧'wo̧ Luwo̧ kwo̧'wo̧ luwo̧duwinö tebachibö öjamatinobetjö̧ Jesúskwö bakobe babibö Dios ejudanö ja̧döja, Dios ö̧jejunö.

Efesios 3:18

Ja̧danö, atebobe Diosnöma pjaatobö tupakwö ökwödönöbi okobe deinö Dios ömöledö babibinadönöbi Cristo ökwödönö jwiinö ile niebi̧ma kwöwaisachibaduwobö. Cristoma ¿dokwa nöinö ile niebobeda ökwödönöma? Chömöledö, Cristo ile niebi̧ma ba̧ja̧dakwawökenanö nöi̧.

Efesios 3:8

Chömöledö, ötjöma ju'wedö Dios ömöledö babibinadötjö baikwönönöda jo̧sa. Jejenöijayonö Diosma ötjönö lȩlö̧jino edö 'da̧batö ujuninobe, judío jojodöböködönö yötawobö, Cristoma jwiinö pjabato̧, jwiinö otiwo̧, jwiinö juluwo̧, jö̧ba̧lö. Ja̧ jawa, Cristo pjaati̧, otiwi̧, ujuluwi̧ jawa kaatiboböma jwibo̧, jö̧ba̧lö, yötawobö 'da̧batö ujuninökwesa.

Efesios 6:19

Chömöledö, ötjönöbi akebaduwo Diosnöma, ötjönö öba̧ja̧da̧lo, iteda iwene yötawena otiwanö yötawakobetjö̧. Akebaduwotjö yebabökönö yötawakobetjö̧, jojodö otiwanö tjöwaisachibobö Dios iwene, otiwa jawa wene, ajayinö tojö ujunina wenema.

Filipenses 1:4

Jau chömöledö, ajayinö Jesúsnö kwösödinaduwelö baikwöma, ba̧kwȩlö̧jatebö otiwa jawa wene yötawobö otiwanö pjakatinaduwobe. Jo̧kwajabetjö̧, ba̧kwȩlö̧jatebö Diosnö atebenama, cho̧'wo̧ ösöwanö atebobe ökwödönö.

Filipenses 4:6

Ja̧danö, okobe jwiinö baledi̧ma, kwo̧'wo̧ tjo̧kekwaduwa chömöledö, dakwö ja̧dakwajö jö̧ba̧löma. Kwo̧'wo̧ tjo̧bekwökönö, Diosnöda akebaduwo chömöledö, jo̧ba pjaatobö akebaduwonö, otiwanö pjabato̧ja jö̧ba̧lö.

Colosenses 1:3

Chömöledö, ökwödönö da̧ja̧kwijatö baikwö: Colose jojodöma Cristo Jesúsnö ösödadötö, jö̧ba̧lö, ja̧danö okobe deinö Dios ömöledönö ösödabikwawö ju̧kwadötö, jö̧ba̧lö. Jejenö da̧ja̧kwinobetjö̧, ba̧kwȩlö̧jatebö ökwödönö omukwatö Diosnö, Duluwo̧ Jesucristo Abe'do Diosnö adebenama, jo̧banö ösödö adebobe, otiwanö ökwödönö pjaatinobe, jö̧ba̧lö.

Colosenses 4:2

Ba̧kwȩlö̧jatebö Diosnö abebö kwö̧jaduwo. Jau chömöledö, te'ada̧lönö ja̧nö, Diosnö abebö kwö̧jaduwo, ja̧danö, Otiwanö pjaatajabe, jö̧ba̧lö Diosnö ösödö akebaduwonö.

1 Tesalonicenses 5:17

kabatökönö Diosnö akebaduwo,

1 Timoteo 2:1

Ja̧danö, Jesúsnö ösödadönö weawa yötawa Timoteo, Jesúsnö ösödadönö weköbobö. Jesúsnö ösödadönö ajayi weti̧ma biya̧, Jesúsnö ösödadöma Diosnö atjebobö jo̧be. Ja̧danö, Jesúsnö ösödadö jwibö tjö̧jenama, Diosnö atjebobö jo̧be iyobö. Ja̧danö, ju'wedö jojodönö atjebobö jo̧be, Dios jobadönö pjaatobö. Ja̧danö, Diosma otiwanö iyinobetjö̧, jo̧banö atjebobö jo̧be, otiwanö pjabatö kwiyajabe jö̧ba̧lö. Ja̧danö, Jesúsnö ösödadöma Diosnö atjebobö jo̧be okobe deinö jojodönö pjaatobö.

2 Timoteo 1:3

Timoteo, kabatökönö ökwönö omukwatö Diosnö ösödö yöta̧lobe, otiwa jö̧ba̧lö. Jau Timoteo, cha'dödömine otiwanö Dios wei̧ ja̧bö tjö̧jinadanö, ötjöbi chomajadenö otiwanö chöwaisi̧danö, jwaikwöda Dios wei̧ ja̧bö jo̧sa. Ja̧danö jo̧ba wei̧ ja̧bö chö̧jonö, mölebi, yö̧tebi kabatökönö ökwönö omukwatö atebobe chuluwo̧ Diosnö.

Hebreos 5:7

Ja̧danö, Jesúsma, böjȩnö jojo babibö bötjachajo̧ma yelösöda usula emawinobe. Ja̧danö Diosnö, woawatjö ö̧jibinö juluwo̧ Diosnöma budekwabinö aebinobe woawatjö ö̧jibinö pjaatobö. Jo̧kwaijayonö Diosma, ö̧jibinö pjabatökönö weinobe usula emawö woobö. Chömöledö ¿Diosma a̧ja̧kwinököji̧ iteda Itji̧ ubudekwi̧ma? Isabenö a̧ja̧kwinobe, Jesúsma Diosnö yebabinö edö jo̧ba wei̧ a̧ja̧kwöda ö̧jinobetjö̧.

1 Pedro 4:7

Ja̧danö chömöledö, 'dö̧ibaji̧ möle yöneawachibobe. Jo̧kwajabetjö̧, jweinö omukwatö eda̧lakwawö kwö̧jaduwo, ja̧danö waisanö omukwatö Diosnö abebö kwö̧jaduwo.

Judas 1:20

Jobadönö a̧ja̧kwökönaduwi chösödawö̧ chömöledö, wainö ja̧bö kwö̧jaduwobö jo̧be chömöledö, baikwö yötawa: Jobadö yötjawi̧ ösödadöma omöna wene ösödadö, jo̧kwaijayonö jejenöböködöja ökwödöma. Ökwödöma omöna wene ösödöködöja, isabenö weneda ösödadöja, isabenö Diosda yöawi̧ kwösödaduwobetjö̧, ¿jö̧tö? Jo̧kwajabetjö̧ jwaikwöda Dios yöawi̧ ösödö kwujuluwaduwachibanö kwö̧jaduwo, ja̧danö Dios O̧'wo̧ Luwo̧kwö dötewanö ja̧nö, Diosnö abebö kwö̧jaduwo.

1 Samuel 1:12

Jejenö Isabenö Jo̧nö ajebonö, Elima Ananö edinobe. Anama Diosnö ajebenama, jomajadenöda ajebinobe, jiwene ökwöökönö, ja̧danö jaa yöja̧lobedanö ichejekwijayonö, ökwöi̧ jwiinö ajebinobe. Jejenö jiwene ökwöi̧ ökwöiökökwe, Elima edö omukwatinobe, bisuma 'dukwachoko jö̧ba̧lö.