Deuteronomio 8:2 - Dios Iwene2 Ja̧danö kwo̧'wo jwikibaduwoko chömöledö, kwuluwo̧duwi Isabenö Jo̧ Dios cuarenta o̧biya baledibanö jojodö deobe ökwödönö öibinama. Jejenö ökwödönö öibinobe chömöledö, ökwödönö ö̧ba̧ja̧dobö, –Juluwöködösa, Diosnö do̧'wo döwana̧lobö jö̧ba̧ladösa, –jö̧ba̧lö kwöwaisachibaduwakobetjö̧. Ja̧danö ju'wibi jejenö öibinobe, kwomajadeduwinö kwomukwataduwi̧ öwawakobetjö̧, isabenö jo̧ba wei̧ kwa̧ja̧kwaduwakwojobö, kwa̧ja̧kwaduwökakwojobö, jö̧ba̧lö. အခန်းကိုကြည့်ပါ။ |
Deuteronomio 8:2
46 ပူးပေါင်းရင်းမြစ်များ
Jo̧kwaiökwe Isabenö Jo̧nö budekwö abebijetö Moisésma. Aebiökwe Isabenö Jo̧ma Moisésnö isȩbijetö towinö. Moisésma jowitjö ötjebiya tjebö lobijetö ojwese'do okwa. Loemi ojwiyo o̧'dajobuma otiwobu baibijetö. Jobema Isabenö Jo̧ma Israel jojodönö tjö̧ji̧ weawa jawa junijetö, ja̧ weawa a̧ja̧kwö tjö̧jobö. Ja̧danö, jo̧ba wei̧ tja̧ja̧kwojobö edobö
Ikenama Isabenö Jo̧ma yöba̧lijetö Moisésnö: —A̧ja̧kwitjö. Ötjöma mölekwena kwakwawa mölejebetjö nijakwö tjoduwobö wetocha, ökwödö pan kwukwaduwi̧danö kwukwaduwobö. Jojodönö weköbo kwakwawa tjoduwena tjejutjö labebö tje'do mölekwena ja̧ möle tjukwi̧da, u'yudökönö. Jejenö ötjö weti̧ tja̧ja̧kwojobö, tja̧ja̧kwokojobö chedocha.
Jobekwö omukwatadö bö̧je jojodöma, jo̧kwaijayonö Dios omudawö ujunina möle badekwachenama, okobe jwiinö ja̧jaye tjomukwati̧ma söbebö loakwo̧ Isabenö Jo̧ma. —Ju'wedötjö bajalekwönönö otiwo̧sa, bajalekwönönö juluwo̧sa, —jö̧ba̧lö tjomukwati̧ma söbebö loakwo̧ Diosma. Ja̧danö ja̧ möle sule Isabenö Jo̧ Diosnöda omukwatö tjösödakwedö, —Isabenö Jo̧ Diosda okobe deinö ju'wedötjö bajalekwönönö bo̧ma, —jö̧balö.
Isabenö yötawaduwakwö, jejenö aebiökwe Diosma jo̧ba impuesto ötjabi̧ balada emawa otido̧ usula söbebö loinobe, ja̧danö jobetjö ȩwa̧jenama, sulabe jwibö ȩwa̧jinobe. Jo̧kwaijayonö sulabe jwiböma ȩwa̧jinokobe jelo̧ abebo̧ fariseo jojoma chömöledö. Otiwo̧sa jö̧ba̧lö omukwatijayonö isabenö otiwo̧inokobe, Diosma usula söbebö loinokobetjö̧. Jau chömöledö, okobe deinö otiwadösa jö̧ba̧lö omukwatadönöma, otiwöködö tjö̧ji̧ i̧sebakobe Diosma, ja̧danö sulabedösa jö̧ba̧lö omukwatadönöma Diosma i̧sebakobe, chedemi bidöma otiwadö, jö̧ba̧lö— Jejenö wanedö yöawinobe Jesúsma, Diosma tjusula waisadönö pjabato̧ jö̧ba̧lö.
Ja̧ Moises israel jojodönö yöawina mölema, Egipto nijitjö latjebaja̧ ikena treinta y nueve o̧biyabi, jawo̧dö bakwamubedö baledibaja̧ ikena jawo̧ ajayi möle. Ja̧danö ju'wibi, ja̧ möle abönö, Moisesma ida̧ökö amorreos jojodötjö la'aka luwo̧ Hesbon comunidadtjö webina Sijon mikwo̧nö ujuluwinobe, ja̧danö ju'wibi Astarot comunidadtjöbi, Edrey comunidadtjöbi webo̧ Basan niji la'aka luwo̧ Og mikwo̧nö ujuluwinobe. Ja̧ möle Moisesma israel jojodönö yöawinobe, ja̧danö jobadönö yöawi̧ma, jwaikwöda Isabenö Jo̧ jobadönö yöawobö wei̧danö, israel jojodönö yöawinobe Moisesma.
Kabatökönö kwabönöduwi 'ya̧nö, otiwanö kwabekwaduwakwemi isakwiainobe, ja̧danö mölekwena ojwiyo'wonö otiwanö kwekachaduwakwa̧ i̧sȩbiainobe, ja̧danö yö̧tekwena ökwölasa'onö otiwanö kwedaduwobö i̧sȩbiainobe, jo̧kwaijayonö kabatökönö jejenö otiwanö pjabatiainajayonö yayonö o̧'wo wa̧nalöködöja, –jö̧ba̧lö yöta̧lijatö ökwödönö, Dios iyakwemi nijibe tekachaduwobö kwöpöjödaduwenama, —jö̧ba̧lö yöawinobe Moisesma, israel jojodönö.
Jejenö ju'wedö tjösödawö̧nö kwösödaduwobö ötjibitjö̧ma, ötjibi̧danö kwösödaduwoko chömöledö, la'akatjöda. Tupakwö baledakwa̧ yötjawinadanö baledijayonö, ju'wedönö kwösödaduwobö ötjibi̧ma kwa̧ja̧kwaduwoko chömöledö. Jau chömöledö, jejenö baledi̧ma, kwuluwo̧duwi Isabenö Jo̧ Dios baledobö weobe, otiwanö iteda wei̧ a̧ja̧kwö kwö̧jaduwojobö jö̧ba̧lö, isabenö kwösödaduwo jö̧ka̧laduwi̧danö okobe jwiinö kwomajadeduwinöbi, kwo̧'wo̧duwinöbi jwaikwöda kwuluwo̧duwi Isabenö Jo̧ Diosnö ile nibebö kwösödaduwojobö jö̧ba̧lö.
Tupakwö yöawinobe, —Kwuluwo̧duwi Isabenö Jo̧ Diosma isabenö otiwanö iteada̧linobe ökwödönö chömöledö. Jo̧bama okobe jwiinö cuarenta o̧biya baledibanö kwekachaduwina waiso̧, ja̧danö okobe jwiinö kwö̧jaduwi̧ waekwökönö kwöbaledaduwobö pjaatinobe. Kwekachaduwonö, ökwödökwö ja̧nö pjaatinobe, kwujuna̧laduwo jö̧ka̧laduwi̧ma ja'yubebi jwiköbaduwapji jö̧ba̧lö.
Ja̧ i̧sȩbo jö̧a̧lina labebö lobö yötawaduwakwö chömöledö, baikwö laebobe Isabenö Jo̧ ökwödönö yöawi̧ma: –Chömöledö Israel jojodö, cuarenta o̧biya baledibanö jojodö deobe kwekachaduwonö, ökwödönö ötibajabe. Ja̧danö, jobe kwekachaduwonö, otiwanö ökwödönö chiteada̧lijatö, lekwe möle kwekachaduwijayonö, kwö̧ka̧mijido̧duwi damösa̧do̧ jwöachökönö wetijatö, ja̧danö sapatubiyabi damösatu jwöachökönö wetijatö.
ja̧danö jo̧bada kwa'dödö wajwitjina kwakwawa Mana ötjabi̧ jawa mölejebetjö tjoduwobö webinama, kwakwawa jwiena kwukwaduwobö. Jejenö ökwödönö pjabatinama, kwuluwo̧duwi Diosda chömöledö, ja̧danö jejenö ökwödönö öbibö ö̧ba̧jadinobe ökwödönö, –Juluwöködösa, –jö̧ba̧lö kwöwaisachibaduwakobetjö̧, ja̧danö jo̧ba wei̧ kwa̧ja̧kwaduwakwojobö jö̧ba̧lö öwawakobetjö̧. Ja̧danö, jejenö öbibö ba̧ja̧dajo̧, inesö otiwanö ökwödönö pjaatakobetjö̧, jobekwö öibinobe kwuluwo̧duwi Diosma chömöledö.
Ja̧danö, isabenö omukwataduwi, Ökwödöma luwedöböködösa, sulabedösa, mikwawöködösa, juluwöködösa, jö̧ba̧lö. Ja̧danö, Dios pjaati̧kwöda dujulu juna̧ladösa, jö̧ba̧lö, omukwataduwi. Jejenö jweinö kwomukwataduwiökwe Duluwo̧ Diosma ökwödönö kwo̧'wo̧ luwo̧duwi okwanö möakwö kaebi̧danö kabebö öwanakwo̧, Bidöma isabenö jwiinö mikwawadö, jö̧ba̧lö.
Jo̧kwaijayonö Diosma ökwödönö pjaatobö juluwo̧ ökwödö dösödi̧da omukwatö junibö dö̧jobö. Chö̧ja̧wo̧dö, Diosma ökwödönö pjabatö ujuluwobe ökwödö sulabe dösödi̧ma. Isabenö chö̧ja̧wo̧dö, Dios pjaati̧ma ökwödö sulabenö dösödi̧tjö o̧penönö juluwobe. Jejenöobetjö̧ Dios iwenetjö baikwö laebobe: Diosma, Luwedösa, jö̧ba̧lö, omukwatadönö ölakwabikwawö jo̧. Jo̧kwaijayonö, Jo̧kwadabedösa, jö̧ba̧lö omukwatadönö lȩlö̧jinö pjabato̧. Jejenö laebobe Dios iwenema. Chö̧ja̧wo̧dö, Luwedösa, jö̧ba̧lö, domukwataduwoko. Jejenö omukwatökönö dö̧jiökwe Diosma lȩlö̧jino edö pjaatakwo̧.
ja̧ usula kwemawaduwi̧ baledibö isabenö Dios yöawi̧ kwösödaduwi̧ wenema otiwanö öwawakobetjö̧. Jau chömöledö, isabenö usula kwemawaduwobö jo̧be. Baikwö wanedö yötawa: Oro ökwölanö lödebö tjotidökötjö̧ma, bakwainö otiwi̧ma öwawökena, ¿jö̧tö? Sule ökwölanö lödebö tjotidaja̧ ikenada otiwanö öwawobe oro otiwi̧ma, ¿jö̧tö? Ökwödö Dios yöawi̧ kwösödaduwi̧bi ja̧danö chömöledö. Usula emawökönö kwö̧jaduwitjö̧ma, otiwanö Dios yöawi̧ kwösödaduwijayonö, kwösödaduwi̧ma otiwanö öwawökena, sule usula emawö kwöbaledaduwajenada otiwanö öwawena otiwanö kwösödaduwi̧ wenema. Jo̧kwajabetjö̧ isabenö usula kwemawaduwobö otiwobe chömöledö. Jau chömöledö, oroma mikwawijayonö, ja'yubeda mikwawobe, oroma tupakwö jwiakobetjö̧. Jo̧kwaijayonö ökwödö Dios yöawi̧ kwösödaduwi̧ma orotjö bajalekwönönö mikwawi̧ chömöledö, jo̧kwajabetjö̧ orotjö bajalekwönönö isabenö kwösödaduwi̧ wene otiwanö öwawobö jo̧be. Jau chömöledö, babe usula kwemawaduwi̧ma, ökwöladanö ichejekwa, bakwainö otiwanö kwösödaduwi̧ wenema öwawobö, ja̧danö ja̧ jawa usula emawö kwöbaledaduwenama, isabenö Dios yöawi̧ kwösödaduwi̧ wenema öwawakobe chömöledö. Ja̧danö chömöledö, jejenö öwawobetjö̧, 'dö̧ibaji̧ möle Jesucristo ichenama, Diosma otiwanö ösödadöja jö̧ba̧lö yöawakobe, ja̧danö dejatinö ujulu ökwödönö iyakobe, ja̧danö ökwödönö otiwanö omukwatakobe chömöledö. Jejenö jo̧be chömöledö, jo̧kwajabetjö̧ babe usula kwemawaduwijayonö, yayonö kwo̧'wo̧ ösöwachibanö ja̧döja, otiwa jö̧ba̧lö.
Ja̧danö, jobuju jömöayedönö, jobuju yöjawi̧ ösödadönöma omönanö ö'wö batjibanö wetakwo̧sa. Ötjöma jobadö tjo̧'wo̧ luwo̧ okwanö tjomukwati̧bi waiso̧sa. Ja̧danö, jobadö ö'wö batjibiawö̧ okobe deinö ötjönö ösödadöma, okobe jwiinö tjö̧baji̧tenia, jweinö tjöwaisachibakobe ötjönöma. Ötjönö jweinö tjöwaisachibakobe, ¡Ayö! Jesúsma jojodö tjo̧'wo̧ luwo̧ okwanö tjomukwati̧bi okobe jwiinö waiso̧, jö̧ba̧lö. Ja̧danö, tjöwaisachibakobe lȩtebakwa̧ma jweinö omukwatö lȩtebakwo̧sa, jojodö bakwo̧nökwena ja̧tjaja̧ mikwama. Jau, jojodö ja̧tji̧ mikwama lȩtebocha, sulabenö omukwatö ja̧badönöma.
Jobadöma wainö israel jojodö tjö̧'da̧denö tjö̧jobö wetakwo̧sa, israel jojodö tja'dödö otiwanö ötjönö ösödö tjö̧jinadanö tjö̧jojobö tjö̧jokojobö jö̧ba̧lö. Tja'dödöma otiwanö ötjönö ösödö, weti̧ a̧ja̧kwö tjö̧jinobe, ja̧danö bidöbi tjö̧jinadanö tjö̧jojobö tjö̧jokojobö jö̧ba̧lö, ina tjitebonö cananeos jojodö tjö̧'da̧denö tjö̧jobö wetocha, —jö̧ba̧lö yöawinobe Isabenö Jo̧ma.
ကြော်ငြာတွေ