Deuteronomio 32:4 - Dios Iwene

⁴ Jo̧ba Diosma inesö tjöeba̧la̧wa inawadanöbo̧, ja̧danö okobe jwiinö ja̧bö ö̧ji̧ma, otiwanö ja̧bö jo̧. Jojodönö wainökwena edökönö, bakwainö jweinö edo̧ jojodönö. Jo̧ba dösödökwe Diosma omöna yöba̧lö̧kö̧, ba̧kwelöjatebö jö̧a̧li̧danö ja̧bo̧, ja̧danö la'akatjöda sulabenö ja̧bö̧kö̧.

Deuteronomio 32:4 ပူးပေါင်းရင်းမြစ်များ

Génesis 1:31

Diosma okobe jwiinö otidaja̧ edinö jwiinö ösödijetö, otiwa, jöba̧lö. Ikenama yi̧böbi yi̧bijetö. Ja̧danö, dewachöbi dewachijetö. Jejenö baibijetö jelemutjö bakwöta mölema.

Génesis 18:25

Chuluwo̧, ökwöma jejenö lȩkebö̧kena. Otiwanö omukwatö ju̧kwadökwö sulabenö ja̧bö ju̧kwadökwö debö tji̧'yobö söbebö loköbökena. Jejenö söbebö loköbitjö̧ma otiwadönöbi sulabedönöbi bakwainöda kwedena. Ökwöma jejenö kwomukwatökena. Ökwöma böjȩnö ju̧kwadötjö didö sulabenö ja̧tjojobö, didö otiwanö ja̧tjojobö waiso̧ja. Jo̧kwaobetjö̧ jweinö omukwatö weköbakwo̧ja— yöba̧lijetö Abrahamma Isabenö Jo̧ Diosnö.

2 Samuel 22:47

Chuluwo̧ Isabenö Jo̧, isabenö 'yaba̧lo̧ja, ökwö inesö inawadanöbo̧nö chösödakwö. Ökwö inawadanöbo̧ chö̧jibinö pjabato̧ Diosnö chösödakwö, isabenö inesö otiwo̧ja jö̧ba̧lö.

2 Samuel 23:3

Jau, israel jojodö dösödökwe Dios, ökwödö israel jojodönö tjö̧beba̧linö teada̧lo̧ma yöawajabe, baikwö yötawobö: Jojodö inesö la'aka tjuluwo̧, Diosnö yebabinö omukwatö, Dios ösödi̧danö ömöayedönö yöbawö webo̧ma, isabenö otiwanö ömöayedönö pjabato̧.

Diosnö ösödo̧ Job mikwo̧ usula emawina jawa 34:10

—Jo̧kwajabetjö̧ ökwödö okwa jawa waisanö omukwatadöma, baikwö yöta̧lakwa̧ kwa̧ja̧kwaduwo: Diosma la'akatjöda sulabenö ja̧bö̧kö̧, Okobe Jwiinö Juluwo̧ma ja'yubebi sulabenö ja̧bö̧kö̧.

Diosnö ösödo̧ Job mikwo̧ usula emawina jawa 35:14

—Ökwö yöka̧li̧bi ja̧danö Job. Ökwöma Diosnö yöka̧lajabe, –Diosnö chedökökwe, sulabenö jatinojobö ja̧tinokojobö jö̧ba̧lö yöawakwo̧, yöa̧lakwa̧ teada̧lo̧sa, –jö̧ka̧lajabe. Jo̧kwaijayonö ju'wibi yöka̧lajabe, –Diosma sulabedönö dameakwö lȩebo jö̧a̧lijayonö, sulabenö lȩbȩbö̧kö̧, jadanö jojodö sulabenö jatji̧ edö omukwatö̧kö̧, –jö̧ba̧lö yöka̧lajabe. Jobekwö dötölatajanö ömukwatö sulabenö yöka̧liökwe, ökwö budekwö yöka̧li̧bi a̧ja̧kwökena Job.

Diosnö ösödo̧ Job mikwo̧ usula emawina jawa 36:23

Bakwo̧bi Diosnö ba̧ja̧do̧ma deobe, –Baikwö ja̧bö kwö̧jo, –jö̧ba̧lö ba̧ja̧do̧ma, ja̧danö bakwobi deobe, –Sulabenö jaköbajabe, –jö̧ba̧lö Diosnö jwebebo̧ma.

Diosnö ösödo̧ Job mikwo̧ usula emawina jawa 8:3

—La'akatjöda sulabenö lȩbȩbö̧kö̧ Diosma Job, ba̧kwelöjatebö jweinö lȩebo jö̧a̧li̧danöda lȩbebo̧ Okobe Jwiinö Juluwo Diosma.

Éxodo 34:6

Ikenama Moisés öba a'o baledö baikwö jwöbijetö: Ötjödasa Isabenö Jo̧ma, ötjödasa Isabenö Jo̧ma. Ötjödasa lȩlö̧jinö edo̧ Diosma, ja̧danö, dö̧sölö̧jinö edö pjabato̧ Diosma. Ja̧danö, ötjödasa jojodönö juluwanö cho̧'wo sulinö edö̧kö̧ Diosma. Ja̧danö, ötjödasa jwiinö ile nibebo̧ Diosma, balewachökönö. Ja̧danö, ötjödasa yöbawö chujuni̧danö ja̧bo̧ Diosma.

Isaías 17:10

—Jau, jobekwö baledakobe, kwö̧jibaduwinö pjabatina Diosnö kwo̧'woduwi jwikibinaduwobetjö̧. Inesö tjöeba̧lakwawa inawadanöbo̧ ökwödönö tjöbeba̧lo̧nö omukwatöködöja, jo̧kwajabetjö̧ isabenö kwöwaekwaduwakwedöja, ökwödö israel jojodöma. Jo̧banö omukwatökönö kwö̧jaduwobetjö̧, ökwödönö baledakwa̧ baikwö yötawaduwakwö: Ubasa'ba otiwa'ba junadöja, ja̧danö ju'wedö tjitebotjö kwichejebina'ba otiwa'babi junadöja.

Isaías 25:1

Chuluwo̧ Diosnö ösödö, baikwö yöta̧la: —Isabenö Jo̧, chösödökwe Diosja. Ökwöma isabenö inesö otiwi̧ jojodö edajitjökö jawa i̧sȩbo̧ja chuluwo̧, jokwajabetjö ökwönö ösödö yöta̧locha, –Chösödökwe Isabenö Jo̧ma ju'wedötjö bajalekwönönö juluwo̧, –jö̧balö. Jau chuluwo̧, damötjö̧ kwotidakwa̧ jawa omukwatö juninaja̧, –Yadakwö baikwö chotidocha, –jö̧ba̧lö, ja̧danö omukwatö kwujuninadanö badekwachinö kwotidajabe.

Isaías 26:4

Ba̧kwelöjatebö Isabenö Jo̧ Diosnö do'wo wa̧na̧lö dösödobö jo̧be, duluwo̧ Isabenö Jo̧ Diosma, inawa tjöeba̧lawa ba̧kwelöjatebö 'diinö ja̧wadanö ichejekwo̧obetjö̧.

Isaías 28:16

Ötjö Isabenö Jo̧ma baikwö yötawaduwakwö: Jerusalen mösa'o Sion mikwa'onö inawa chödocha, –Isabenö otiwawa, –jö̧ba̧lö badedö chedinawama. Jawa, o̧do la'aka baibanö, ajayinö lödawawa nöinö mikwawawa baibanö chödocha, o̧do la'aka 'diinö jakobetjö̧. Ja̧danö jawa ösödadöma, –Dakwö jatakwajö, –jö̧ba̧löma omukwatö tjö̧jökakwedö.

Isaías 30:18

Jo̧kwaijayonö jobekwö baledoböma ösödö̧kö̧ Isabenö Jo̧ma. Jo̧bama o̧'wo 'dibachibö, lekwe teada̧lo̧, ökwödönö dösölö̧jinö pjaatobö ösödobetjö̧. Iteda ujulu i̧sȩbö, ökwödönö lȩlöjinö edobö ösödo̧ chömöledö. Jau chömöledö, Isabenö Jo̧ Diosma, otiwanö ja̧o jö̧a̧li̧danö ja̧bö jo̧, ja̧danö okobe deinö jo̧banö tjo'wo wana̧lö teada̧ladönö isabenö otiwanö pjabato̧, jo̧ba yöawi̧ kwa̧ja̧kwaduwo chömöledö.

Isaías 32:2

Jobekwö lȩekwa jweinö yöbawö, tjömöayedönö otiwanö tjöbeba̧lö pjatjatakwedö, baikwö wanedö yötawa pjatjatakwa̧ma: Jwa̧le'epjo labinö doibenama, tjöekwemidanö tjö̧jakwedö, ja̧danö ju'wibi kököelö tjö̧jenama, ojwedanö tjö̧jakwedö, jadanö tubemi kököemi tjö̧jenama, nöawa isadanemi tjö'wachobö otiwawadanö tjö̧jakwedö, otiwanö jojodönö tjöbeba̧lö lȩekwa yötjawobetjö̧.

Daniel 4:34

Ja̧danö, ja̧ jelemutjö döbalataja o̧biya baledibajenama, ötjö Nabucodonosorma mölejȩbekwö chedijatö, ja̧danö yemidanö jojo omukwati̧danö otiwanö chomukwatijatö. Ja̧danö Okobe Jwiinö Juluwo̧ Diosnö chösödijatö, ba̧kwȩlö̧jatebö jo̧nö chösödijatö, otiwo̧, juluwo̧ jö̧ba̧lö. Isabenö ba̧kwȩlö̧jatebö la'aka luwo̧ jo̧ Diosma, isabenö ba̧kwȩlö̧jatebö 'dö̧ibajökönö la'aka luwo̧ ö̧jakwo̧.

Daniel 4:37

Ja̧danö, babema ötjö Nabucodonosorma, Diosnö otiwanö omukwatö chösödobe, mölejȩbe jo̧ Diosnö. Okobe jwiinö Dios otidi̧ma otiwanö otidobe, ja̧danö okobe jwiinö ja̧i̧ma, jweinö otiwanö ja̧obe. Ja̧danö otiwadösa jö̧ba̧lö omukwatadönö nijakwönönöbedösa jö̧ba̧lö omukwatadö batjibanö ujunobö waiso̧ Diosma, jö̧ba̧lö yöbawö iwȩyudinobe Nabucodonosorma, böjȩ bakwameachibanö ju̧kwadö jojodönö.

Mateo 5:48

Jau chömöledö, kwabe'doduwi mölejȩbe jo̧ Diosma, bakwainö otiwanö ja̧bo̧, jo̧kwajabetjö̧ ökwödö jo̧ba i̧tji̧mubi bakwainö otiwanö ja̧bö kwö̧jaduwo— jö̧ba̧lö yöawinobe Jesúsma.

Juan 1:14

Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.

Juan 1:17

Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.

Juan 14:6

—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Juan 5:22

Ja̧danö, ötjödasa jojodönö lȩebakwawa baledakwa̧ yötawakwo̧ma. Chabe'doma ötjönöda kabebö öwanijatö, ötjöda jojojodönö, otiwanö ja̧bö tjö̧jinojobö, sulabenö ja̧bö tjö̧jinojobö yötawobö. Ja̧danö, Chabe'doma jojodönö lȩebakwawa baledakwa̧ yöawökakwo̧, iteda itji̧da, ötjöda.

Romanos 1:32

Chömöledö, bidöma Dios jö̧a̧linama waisadö, Jejenö ja̧badöma wobalenöda tjimidawakwedö, jö̧ba̧lö. Ja̧ wene tjöwaisijayonö, jwaikwöda sulabenö ja̧bö ja̧kwawada ösödadö. Jemi tupakwöbi, ju'wedöbi sulabenö ja̧tjobö ösödadö.

Romanos 2:2

Kwöwawaisaduwa chömöledö, Diosma jejenö sulabenö ja̧badönö lȩebenama, jweinö lȩebobe, sulabenö ja̧tji̧ mikwa baibanö, ¿jö̧tö?

Romanos 2:5

Jo̧kwaijayonö, jejenö ite'ada̧lijayonö, jwaikwöda sulabenö omukwatadöja, kwomukwataduwi̧ balewachökönö. Ja̧danö, jwiinö labi̧ jawa lȩebakobe Diosma, ökwödönöma, jojodönö lȩebi̧ möle baibenama. Ja̧ möle baibenama, jweinöda lȩebakwo̧ Diosma, jojodö ja̧tji̧ mikwa baibanö.

Romanos 3:5

Chömöledö, Diosma sulabe jwibo̧, ¿jö̧tö? Ja̧danö, sulabe jwibo̧obetjö̧, sulabenö ja̧badönö lȩebobö jo̧be, ¿jö̧tö? Jejenö ji̧jayonö, jejenö omukwatöködö ju'wedö böjȩ jojodöma. Jobadöma wainö omukwatadö, Dios lȩeboböma jwia, jö̧ba̧lö omukwatadö. Ja'yubeda jobadö tjomukwati̧ma yötawa chömöledö. Baikwö tjomukwatobe: Böjȩ jojodöma okobe deinö bakwainö otiwa jawada ja̧bö tjö̧jitjö̧ma, jojodö tjomukwatökena Diosnöma, Jo̧bada inesö otiwanö ja̧bö jo̧, jö̧ba̧lö. Jo̧kwaijayonö, sulabenö ja̧bö tjö̧jobema, ju'wedö Diosnö tjomukwatobö jo̧be, Aaa, Diosda otiwanö ja̧bö jo̧ma, jö̧ba̧lö. Jejenö omukwatö, jemi tupakwöbi tjomukwatobe, Jojodö sulabenö ja̧bö tjö̧ji̧ma otiwobe, jö̧ba̧lö tjomukwatobe. Jojodö sulabenö ja̧bö tjö̧ji̧ma ju'wedö Diosnö tjösödobö ja̧obetjö̧, Diosnö pjabatadö sulabenö ja̧badöma, jö̧ba̧lö tjomukwatobe. Ja̧danö, jemi tupakwö ju'wibi tjomukwatobe. Diosma sulabenö ja̧badönö lȩeboböma jwia, jö̧ba̧lö tjomukwatobe. Sulabenö ja̧badöma Diosnö pjabatadö, jo̧kwajabetjö̧ jo̧banö pjabatadönö lȩeboböma jwibo̧ Diosma, jö̧ba̧lö omukwatadö. Jejenö omukwatadöma, ¿jweinö tjomukwatobeji̧ chömöledö? Jweinö omukwatöködö, ö'öbönöda omukwatadö chömöledö.

1 Corintios 10:4

Ja̧danö, okobe deinö bakobe Dios iyina ojwiyo tjowinobe, ¿jö̧tö? Jau chömöledö, okobe deinö inawatjö tjowinobe, ja̧danö jawa jobadökwö kweachinawama, Cristodainobe chömöledö.

Deuteronomio 10:18

Ja̧danö löyödönöbi, tji̧lekwamu wobekwinadönöbi tjöbeba̧lö pjabato̧, ju'wedö jobadönö sulabenö ja̧tja̧pji jö̧ba̧lö. Ja̧danö ju'wibi jelobetjö ichajadönö ösödö pjabato̧, tju̧kwa kwakwawabi, tjitea ka̧miji̧do̧bi iyö.

Deuteronomio 32:15

Jejenö iyiawö̧, tjomeawinö tjukwinobe israel jojodöma, o̧tewadö batjibanö. O̧tewadö babibö, nötja̧chibinobe, inesö o̧tewadö batjibanö, ja̧danö jobadönö otidina Diosnö katjatibinobe, tjö̧jibinö pjabato̧ inawadanöbo̧ Diosnö obö katjatibinobe.

Deuteronomio 32:18

Jejenö ja̧bö inawadanöbo̧ jobadönö tjöbeba̧lö pjabatina Diosnö tjo̧'wo jwitjibinobe, ajayinö jobadönö otidinanöma.

Deuteronomio 7:9

—Ja̧danö chömöledö, jejenö pjaatinobetjö̧, baikwö kwöwaisaduwobö jo̧be kwuluwo̧duwi Isabenö Jo̧ Diosnö, –Dösödökwema isabenö Diosbo̧, –jö̧ba̧lö, ja̧danö –Dösödökwe Diosma isabenö yöbawö ujuninadanö ja̧akwo̧, –jö̧ba̧lö. Ja̧danö, ju'wibi kwöwaisaduwobö jo̧be, –Diosnö ösödö, wei̧danö a̧ja̧kwö ju̧kwadönö ile nibebo̧ Diosma, ba̧kwelöjatebö 'dö̧ibajökenanö jobadönöbi, tji̧tji̧mu tupadanö jojodönöbi ile nibebo̧, –jö̧ba̧lö.

Santiago 1:17

Isabenö chö̧ja̧wo̧dö, Diosma suli̧ jawa iyoböma jwibo̧. Ja̧danö, ökwödö sulabenö ja̧dobö domukwati̧ma ¿Diostjö ichobeji̧? Ichokobe Diostjöma. Suli̧ jawa ja'yubebi ichokobe Diostjöma. Dios iyi̧ma bakwai̧ otiwi̧da ji̧. Ja̧danö chö̧ja̧wo̧dö, ja̧ otiwi̧ jawa iyi̧ma Diostjöda ichobe, okobe deinö mölejȩbe dejatinö lö̧jadönö otido̧tjöda. Ja̧danö, jobadö Dios otidinawö̧, mölejȩbe dejatinö lö̧jadöma ju'wikwenama nöinö dejatadö. Ja̧danö, ju'wikwenama ja'yubeda dejatadö. Ju'wi möle jwiinö ba̧kwȩlö̧jateböma dejatöködö. Ja̧danö, ju'wikwena tjidejatemima isa'wo tjöeba̧lawö̧. Jo̧kwaijayonö chö̧ja̧wo̧dö, Dios otiwi̧ma la'akatjöda tjöeba̧lokobe. Wajuwanö ji̧, tjöbeba̧lökönö. Ba̧kwȩlö̧jatebö bakwai̧da tjöbeba̧lökönö ichobe Dios otiwi̧ma, jo̧batjö. Ja̧danö, Diosma la'akatjöda balewachökö. Bakwainöda jo̧, otiwo̧da. Ja̧danö, jo̧ba iyi̧ma otiwi̧da iyo̧.

Santiago 4:12

Chö̧ja̧wo̧dö, dö̧jibinö pjabato̧ma bakwo̧da ¿jö̧tö? Ja̧danö, jo̧bada jojodönö lȩbebo̧ ¿jö̧tö? Jo̧bada juluwo̧ jojodönö lȩbebö yöawobö, Bidöma tjö̧jibinö tjö̧jakwedö, ja̧danö, Bidöma tjö̧jibinö tjö̧jökakwedö, jö̧ba̧lö. Ökwödöma lȩbeböködösa chö̧ja̧wo̧dö.

1 Samuel 2:2

Isabenö bakwo̧bi deobe ökwödanö suli̧ jwibo̧ma Isabenö Jo̧ chuluwo̧, isabenö ökwödajayo̧ tjösödökwema deobe. Isabenö ökwödajayo̧ inawa 'diawa tjöbeba̧lö kwöji̧danöbo̧ma deobe Chuluwo̧ Dios.