Deuteronomio 24:3 - Dios Iwene

^3-4 Jemi ikenama, ikena jojo jilekwebi jobujunö öpöjödachibena, ja̧danö jo̧babi ilekwonö kaatibakwawa jawa wȩyukwöja jobujunö iyö, ejutjö lajebobö weitjö̧ma, ajayi jilekwema yemidanö jobujunö emobö jwiakobe, ju'wibi ikena jilekwe ö'wö baibitjö̧bi ajayi jilekwe yemidanö jobujunö emoböma jwiakobe chömöledö, baikwö yötawa: Jobujunö kabatibö, –Katatibakwö, jelo̧nöda kwemo, –jö̧ba̧lö, iteda ilekwo jelo̧kwö bajibobö weinobe ichejekwa. Jo̧kwajabetjö̧ jejenö webajo̧, jelo̧kwö bajibaja̧ ikenama yemidanö jobujunö emoböma jwiobe. Isabenö Jo̧ edemi, jejenö ja̧oböma jwiinö sulena chömöledö, jo̧kwajabetjö̧ jejenö ja̧köbaduwoko, kwiteboduwi niji, kwiteboduwi baibanö kwuluwo̧duwi Isabenö Jo̧ Dios ökwödönö iyakwa̧ niji suli̧ kwöwaedaduwapji jö̧ba̧lö, —Moises yöawinobe.

Deuteronomio 24:3 ပူးပေါင်းရင်းမြစ်များ

Isaías 50:1

Baikwö wanedö yöawobe Diosma, israel jojodönö: Chitji̧mu, kwojo'donö, tajawedö jelobekwö öbibö tje'ewinada? Jobujunö kabatibö, chilekwonö katatibobö wȩyukwöja chi̧wȩyudajabetjö̧, jobujunö öbibö tje'ewinaji̧? Ja̧danö ökwödö chi̧tji̧mubedö, ju'wedö tjömöayedö bakibaduwanö kwö̧jaduwi̧ma, ju'wedönö chumusidobetjö̧, ju'wedö tjömöayedö bakibaduwanö iyö lotinaji̧? Ja̧maökö chitji̧mu, ökwödö sulabenö ja̧bö kwö̧jaduwobetjö̧, iyö lotinawö̧ja. Kwojo'doduwibi ja̧danö, sulabenö ja̧bö jö̧jinobetjö̧, jelobekwö öbibö tje'ewinoko.

Mateo 5:31

Tupakwö yöawinobe Jesúsma: —Ju'wi weawabi laebobe. Bakwo̧ ilekwonö kaatibobö jö̧a̧litjö̧ma, kaatibakwawa wȩyukwöja ilekwonö iyö, wainö kabatibo̧, jö̧ba̧lö laebobe, ¿jö̧tö?

Marcos 10:4

Jejenö abebö a̧ja̧kwawö̧ jobadöma atadijadötö: —Moisésma bakwo̧ ilekwonö wainö kabatibo̧, jö̧ba̧lö, wȩyudijetö, tjilekwonö katjatibakwedö wȩyudö kwialusöjanö ilekwonö iyobetjö̧— atadijadötö.

Deuteronomio 24:1

Tupakwö yöawinobe Moisesma: —Chömöledö, ökwödötjö bakwo̧ ilekwonö emena, ja̧danö emaja̧ ikena, taba lö̧ji̧ jawa öwaisachibena ilekwonö. Jejenö öwaisachibajo̧, ilekwonö öpöjödachibena, ja̧danö ilekwonö öpöjödö, kaatibakwawa jawa wȩyukwöja i̧wȩyudena, –Bisu chilekwobinujunö katatibajabe, –jö̧ba̧lö. Ja̧danö wȩyukwöja ilekwonö iyö, ö̧jelö lajebobö weena. Jejenö kaatiboko, jilekwebajo̧ ejutjö lajebena,

Deuteronomio 24:2

ja̧danö labebaju, jelo̧nö jemena, jelo̧ ilekwo bajibanö.