Deuteronomio 24:18 - Dios Iwene

¹⁸ Jau chömöledö, ökwödö Egiptonö kwö̧jinaduwa wene kwomukwatibaduwo. Jobe ja̧nö, ju'wedö tjö̧möayedö kwö̧jinaduwobe, ¿jö̧tö? Jo̧kwaijayonö jobe usula emawö kwö̧jinaduwelö, kwuluwo̧duwi Isabenö Jo̧ Diosma kwö̧jibaduwinö pjaatinobe chömöledö, jo̧kwajabetjö̧ ja̧ jawa omukwatö, kwö̧'da̧deduwitjö usula emawö ju̧kwadönö yötawaja̧danö dösölöjinö kwedaduwobö yötawaduwakwö.

Deuteronomio 24:18 ပူးပေါင်းရင်းမြစ်များ

Éxodo 22:22

Ja̧danö, ju'wi wanedö yötawa: Jilekwe woinokonö, ja̧danö tjemu abe'do, ojo'do debo̧nö, debujunö usula tjemawinö weköbaduwoko.

Deuteronomio 15:15

Ja̧ weawama baikwö labebö lobö yötawa: Ajayinöma ökwödöma Egipto nijinö ja̧nö, ju'wedö tjömöayedö kwö̧jinaduwobe, jö̧tö? Jo̧kwaijayonö kwuluwo̧duwi Isabenö Jo̧ Diosma ja̧ kwö̧ji̧naduwelö kwö̧ji̧baduwanö eminobe, ja̧danö ja̧ lakebaduwinö pjaatina omukwatö, kwömöayedö israel jojodönö ökwödöbi lakebaduwobö wetaduwakwö.

Deuteronomio 16:12

—Ba̧kwȩlöjatebö Egipto nijinö kwö̧ji̧naduwa jawa kwomukwatibaduwobö jo̧be chömöledö, ja̧danö ja̧ jawa omukwatibö, yöbawö weti̧danö Diosnö ösödö ba'ali kwujunaduwo, –Duluwo̧ Diosma otiwanö Egiptotjö dö̧jibinö pjaatinobe, –jö̧ba̧lö.

Deuteronomio 24:17

—Ja̧danö, ju'wibi yötawaduwakwö, jojodö jelobetjö ichajadönöbi, löyödönöbi suli̧ tjöwaedobö webökönaduwi. Jojodö jobadöjayedönö sulabenö ja̧tji̧tjö̧ma, –Aaa, Idöma mikwawöködö, jobadönö sulabenö ja̧tjijayonö, lȩekwa yödawökö, –jö̧ba̧lö lȩkebaduwoko. Isabenö jobadöjayedönö pjabatö lȩkebaduwobö ji̧tjö̧ma, jweinö lȩekwa yökawaduwo. Ja̧danö jilekwe wobekwinujunö ju'wi jaye kwöbalewaduwitjö̧ma, jö̧ka̧mijido̧ wamesa̧do̧ isabenö jimidakwa̧ i̧sȩkwa baibanö jiyoböma webökönaduwi, usula jemawapji jö̧ba̧lö.

Deuteronomio 24:19

—Ja̧danö, batjo waji̧ kwe'daduwenama, trigo ochiju 'wibö 'di̧batö kwotidaduwena, okobe jwiinö kwödaduwobö kwe'ewaduwaja̧ ikenama, kwomukwatibaduwena, –Aaa, bakwa'bu̧ batjotjö ji̧bajabe, –jö̧ba̧lö. Jejenö kwomukwatibitjö̧ma, tjebachajö kwemaduwoko, batjonö kwujunibaduwo, jelobetjö ichajadöbi, löyödöbi, tjilekwamu wobekwinadöbi ja̧ emö tjukwobö.

Deuteronomio 24:22

Jau chömöledö, damötjö jobadö tjö̧ji̧danö ökwödöbi ju'wedö tjö̧möayedö Egiptjo nijinö kwö̧jinaduwobe. Jo̧kwajabetjö̧ ökwödönö baikwö wetaduwakwö, ja̧ damötjö̧ kwö̧ji̧naduwa wene omukwatö, kwiteboduwi nijinö ju̧kwadö jelobetjö ichajadönöbi, löyödönöbi, tjilekwamu wobekwinadönöbi dösölöjinö kwedaduwobö, —jö̧ba̧lö yöawinobe Moisesma.

Deuteronomio 5:15

Jobadö babe kwömöayedö tjö̧ji̧danö, damötjö̧ ökwödöbi Egipto jojodö tjömöayedö kwö̧jinaduwobe, usula emawö. Jo̧kwaijayonö tjömöayedö kwö̧jinaduwelö, kwuluwo̧duwi Isabenö Jo̧ Diosma, iteda inesö ujulunö ökwödönö labebö, baikwö ichejebinobe. Jo̧kwajabetjö̧, jejenöobetjö̧, okobe deinö ökwödöbi, kwömöayedöduwibi otikwökö möle otidökönö kwö̧jaduwobö jo̧be.