Deuteronomio 16:3 - Dios Iwene

³ Ja̧danö, ja̧ iyawa kwukwaduwenama, ye'yeachi̧ jawakwö kwukwaduwoko chömöledö. Ja̧ ba'ali kwukwaduwena, jelemutjö dötölataja möle baledibanö ye'yeachi̧ jawa jwi̧i panda kwukwaduwo. Ja̧ panma, usula emawa jawa pan ötjabobe, baikwö labebö lobö yötawa: Juluwanö teada̧lökönö Egipto nijitjö lakebinaduwobetjö̧, pan ye'yeachakwa̧ kwiteada̧loböma jwiinobe, juluwanö lakebaduwobetjö̧, jö̧tö? Ja̧danö ba̧kwelöjatebö Dios mönö öbaledina omukwatakwawa ba'ali kwukwaduwenama, ja̧ panbi kwukwaduwo, ba̧kwelöjatebö ja̧ Egipto nijitjö juluwanö lakebinaduwa kwomukwatibaduwakobetjö̧.

Deuteronomio 16:3 ပူးပေါင်းရင်းမြစ်များ

1 Reyes 22:27

Tjöba a'o ichibajadö, weti̧ jobadönö yökawaduwo, baikwö: –Bite Micaiasnö ka̧lena kwödaduwo, ja̧danö sule ja'yubeda pan ukwobö, ja̧danö ojwiyo owobö kwiyaduwonö, ötjö Acab wene jwiinö Ramot Galaadbetjö chȩwa̧jenanö baibanö, –jö̧ba̧lö weti̧ yökawodönö, —jö̧ba̧lö weinobe Acabma.

Éxodo 12:11

Ja̧danö, kukwaduwenama juluwanö labeibö kwi̧'yaduwakobetjö̧ 'dubawiböda kukwaduwo. Sapatijuduwibi 'dubawibö, ja̧danö kwotokwa'ijuduwibi do̧ba̧lö ja̧nö kwukwaduwo. Ja̧nöda juluwanö kwukwaduwo labeibö kwi̧'yaduwakobetjö̧, juluwanö. Ja̧ ba'ali kwanö kwujunaduwakwa̧ma ötjö Isabenö Jo̧nö omukwatö kwujunaduwakobe, ökwödö kwö̧jibaduwinö pjabatö kwö̧jaduwejubiya wame chöbaledi̧ omukwatöma.

Éxodo 12:17

Bakwöta o̧bakwena, ba̧kwȩlö̧jatebö ja̧ ba'ali, pan 'ye'yeachö̧kö̧, jö̧ba̧lö ötjabi ba'alima ökwödöbi, ökwödötjö tupadanö jojodöbi kwujunaduwo ötjö pjatatina kwomukwataduwobö. Ökwödö Israel jojodönö okobe deinö bakwasokwena jojodönöma Egiptotjö lakebaduwobö pjatatijatö. Ja̧ pjatatina omukwatö pan 'ye'yeachö̧kö̧ ba'alima kwujunaduwo. Ba̧kwȩlö̧jatebö ökwödötjö tupadanö jojodöbi ja̧ ba'ali tjujunobö webö kwujunaduwo, jobadöbi, jobadötjö tupadanö jojodöbi ba̧kwȩlö̧jatebö ja̧ ba'ali tjujunobö.

Éxodo 12:39

'Ya̧jadöma ja'ö ö'wachö pansa'be tje'ewaja̧'be, 'ye'yeachi̧ pjaatakwawökö'betjö, panpja̧ söbijadötö. Egiptotjö te'ada̧lökönö latjebobö a'dewö lotjajabetjö̧ kwakwawa tjukwakwa̧ma otidijöködötö latjebakwa̧ abönöma, sule pan otikwa'be 'ye'yeachi̧ pjaatakwawökö'beda e'ewijadötö.

Éxodo 12:8

Ikenama, te'ada̧lökönö sököbaduwo ja̧ yö̧teda itebiya kwukwaduwobö. Sököbaduwaja̧ itebiyama pan 'ye'yeachö̧kö̧ pankwö, lei öjiyakwö kukwaduwo.

Éxodo 34:18

Ina webijetö Isabenö Jo̧ma Moisésnöma: —Imiamekwena, pan 'ye'yeachö̧kö̧ ba'ali kwanö kwujunaduwo. Ja̧danö, Abib mikwo̧ ja̧wo̧ Egiptotjö lakebinaduwobetjö̧ jo̧ba ja̧wo̧ kwujuno ja̧ ba'alima. Ja̧danö, ja̧ pan 'ye'yeachö̧kö̧ ba'alima jelemutjö dötölataja mölȩ baledibanö pan 'ye'yeachi̧kwö kwukwaduwoko, Egiptotjö lakebinaduwa weti̧danö.

Isaías 52:12

Jau, ö'öbakwawö yebabinö lakebaduwobö jwiakobe, otiwanö tjo̧'omanö kwȩwa̧jaduwobö ja̧kobe, kwuluwo̧duwi Isabenö Jo̧ Dios kwabönöduwi 'ya̧nö, ökwödönö öbibö i̧'yakobetjö̧. Jau chömöledö, kwabönöduwi tjöbeba̧lö i̧'yakwo̧, ja̧danö ju'wibi kwökömanöduwi tjöeba̧lakwo̧, jo̧kwajabetjö̧ yebabinö dökibaduwobö jwiakobe.

Lucas 22:19

Ikenama Jesúsma pan emibö, Diosnö aebinobe, otiwanö kwiyajabe jö̧ba̧lö, ikenama 'delawö, iteda webadönö iyö, wanedö yöawinobe baikwö: —Bipja̧ma ötjö chiteba'o, ja̧danö ökwödö kwö̧jibaduwobö chiyobe chiteba'oma. Ötjönö omukwatö emö kwaduwi— jö̧ba̧lö.

1 Corintios 5:8

Ja̧danö, wanedö yötawa: Ja̧ Dios ökwödönö dö̧jibinö ja̧ina pjiesta dujunaduwo chömöledö, ja̧danö jejenö dujunenama, damötjö jawama ye'yeachi̧ ji̧ panpja̧ dukwoko. Jau chömöledö, Dios öpöjödinö ja̧awa ye'yeachi̧ jawa ji̧ panpja̧ dukwoko, sulabenö ja̧awa ye'yeachi̧ jawa ji̧ panpja̧ dukwoko. Ju'wida dukwaduwo chömöledö, ye'yeachi̧ jawa jwii̧ panpja̧da, bakwainö otiwi̧ jawa ji̧, isabenö wene ji̧ panpja̧da dukwaduwo chömöledö.

Deuteronomio 16:2

Ja̧ ba'ali kwujunaduwakwa̧ma baikwö labebö lobö yötawa: Isabenö Jo̧ma kwiteboduwitjö ju'wi comunidad omudawö ujunakobe, iteda eju comunidad baibanö. Ja̧danö, ökwödöma kwajwimuduwitjö pakayaö̧kö̧, obejaö̧kö̧ jobe Dios omudawö ujuninelö kwuluwo̧duwi Isabenö Jo̧ Diosnö kwabö juwö kwiyaduwakwedöja Abib jawo̧nö, mönö öbaledina omukwatakwawa iyawa baibanö.

Deuteronomio 4:9

Tupakwö yöawinobe Moisesma, israel jojodönö: —Teada̧lönö kwö̧jaduwo chömöledö, ökwödö kwedinaduwa jawama kwo̧'wo jwikibaduwapji jö̧ba̧lö. Jau chömöledö, ba̧kwelöjatebö kwo̧'woduwi jwibibökönö, ina kwö̧jaduwayi ja̧ jawa omukwatö kwö̧jaduwobö jo̧be, ja̧danö kwitji̧muduwinöbi, kwö̧'dödöduwinöbi yökawaduwobö jo̧be, jobadöbi ba̧kwȩlöjatebö omukwatö tjö̧jakobetjö̧.

1 Tesalonicenses 1:6

Ja̧danö, ökwödö ja̧bö di̧sebi̧danö ja̧bö, ökwödödanö ichejekwadö bakibinaduwobe chömöledö, ja̧danö Duluwo̧danö ichejekwadö bakibinaduwobe. Jau chömöledö, usula kwemawaduwijayonö, Dios O̧'wo̧ Luwo̧ pjaatawö̧, kwo̧'wo̧ luwo̧duwi ösöwachibanö kwösödinaduwobe otiwa jawa wenema.

Josué 4:7

babe möle baledaja̧ wene yökawaduwena, –Isabenö Jo̧ iteapjo, wei̧ wȩyukwa öbiya döbölataja a̧ja̧pjo ojwebe ichibenama, ojwe isuwöma kaatibinobe, ökwödö israel jojodö otiwanö kököachibajenada döbaledobö, –jö̧ba̧lö kwataduwena. Jejenö babe kwe'ewaduwakwa̧ inawiyama babe baledaja̧ wene ba̧kwelöjatebö tjomukwatibobö inawiya ja̧kobe. Jejenö jojodö tjomukwatibobö ja̧kobetjö̧, inawiya emaduwi, —jö̧ba̧lö weinobe Josuema, ömadö docebedönö.